Weh Gaad Wahn Du Eena di Fyoocha?

If yu di goh chroo haad taimz, yu wuda ekspek wahn gud fren fi du sohnting fi help yu, noh chroo? Wel, som peepl seh dat Gaad da noh wahn fren kaaz dehn feel dat hihn noh di du notn fi help dehn. Bot reeli, hihn noh onli don du wahn lata gud tingz aredi, bot ih wahn du sohnting bowt aala di prablemz ahn sofarin weh wi fays tudeh. Weh Gaad wahn du?

IH WAHN GEH RID A WIKIDNIS

Gaad wahn geh rid a di persn weh wikidnis kohn fram. Di Baibl seh: “Di hoal werl deh anda di powa a di eevl wan.” (1 Jan 5:19) Da “eevl wan” da Saytan; Jeezas kaal ahn “di wan weh di rool dis werl.” (Jan 12:31) Soh di reezn wai wi ga soh moch prablemz eena di werl tudeh da bikaaz Saytan di kanchroal it. Weh Gaad wahn du?

Soon, Jehoava Gaad wahn yooz ih Son, Jeezas Krais, fi “dischrai di Devl weh . . . ga powa oava det.” (Heebrooz 2:14; 1 Jan 3:8) In fak, di Baibl shoa dat di Devl “noa . . . dat ih ga jos lee bit a taim lef.” (Revilayshan 12:12) Gaad wahn aalso dischrai evribadi weh di praktis wikidnis.—Psalm 37:9; Proverbs 2:22.

IH WAHN MEK DI ERT WAHN PARADAIS

Afta wi Kriyayta geh rid a wikidnis fahn aafa di ert, ih wahn mek ih perpos fi di ert ahn hyoomanz kohn chroo—perfek peepl wahn liv fareva eena wahn paradais pahn dis ert. Weh wi ku luk faawod tu?

Wi wahn ga pees ahn feel sayf evri day. “Di hombl wan dehn wahn liv pahn di ert, ahn lata pees wahn deh, soh dehn wahn bee hapi hapi.”—Psalm 37:11.

Wi wahn ga lata helti ahn nais food fi eet. “Plenti a grayn wahn deh pahn di ert; pahn di tap a di mongtin ih wahn di oavafloa.”—Psalm 72:16.

Wi wahn ga wahn komfatabl hoam ahn werk weh wi wahn injai. “Dehn wahn bil hows ahn dehn saym wan wahn liv een deh; ahn dehn wahn plaant aachad ahn eet fahn di froot weh ih giv. . . . Di werk weh fi mee peepl dehn du wid dehn oan han, dehn wahn get fi injai tu di maks.”—Isaiah 65:21, 22.

Yoo wuda waahn si dehndeh tingz hapm? Soon, aala wi wahn injai dehndeh saym tingz evri day a wi laif.

IH WAHN GEH RID A SIKNIS AHN DET

Aala wi geh sik ahn haftu fays det, bot dat noh wahn hapm moch langa. Memba dat Jeezas mi ded fi wi. Soon, wi wahn get fi injai di benifits a Jeezas det. Di Baibl seh dat “evribadi weh eksasaiz dehn fayt eena hihn ku geh evalastin laif ahn noh geh dischrai.” (Jan 3:16, NW) Wat da som a dehndeh benifits?

Nohmoh siknis. “Ahn nobadi wahn seh: ‘Ah sik.ʼ Di peepl dehn weh di liv pahn di ert wahn geh fagivnis fi di rang weh dehn du.”—Isaiah 33:24.

Nohmoh det. “Hihn wahn dischrai det fareva, ahn di Sovrin Laad Jehoava wahn waip weh aala dehn aiywaata fahn dehn fays.”—Isaiah 25:8.

Peepl wahn liv fareva. “Di gif weh Gaad di gi wi da laif weh laas fareva ahn eva, ahn ih free.”—Roamanz 6:23.

Di rezorekshan. “Gaad wahn rayz op di raichos ahn di [wan dehn weh noh raichos].” (Aks 24:15) Di rezorekshan wahn hapm bikaaz Jeezas mi ded fi evribadi.

How Gaad wahn du aala dis?

IH SET OP WAHN PERFEK GOVAMENT

Gaad wahn yooz fi hihn govament fi mek ih perpos fi hyoomanz ahn fi di ert kohn chroo. Jeezas Krais da di King a da Kingdom. (Psalm 110:1, 2) Jeezas mi teech ih falowaz fi pray fi da govament, er Kingdom, wen ih seh: “Fi wee Faada weh deh da hevn, . . . kohn kohn set op yu kingdom.”—Machyu 6:9, 10.

Gaad Kingdom wahn rool oava di ert ahn geh rid a aala di payn ahn sofarin. Dis Kingdom da di bes govament hyoomanz kuda eva gat! Dat da wai Jeezas mi werk soh haad fi preech “di Gud Nyooz bowt di kingdom” wen ih mi deh pahn di ert, an ih mi tel ih disaipl dehn fi du di saym ting.—Machyu 4:23; 24:14.

Jehoava ga lata lov fi hyoomanz. Dats wai ih pramis fi du aala dehnya wandaful tingz fi wi. Dat mek yoo feel laik yu wuda waahn geh fi noa hihn ahn geh kloas tu ahn, noh chroo? If yu noa Gaad, how yu tink yu wahn benifit? Di neks aatikl wahn eksplayn.