Du Beta Eena di Minischri—How Wi Ku Staat Wahn Kanvasayshan ahn Gi Wahn Gud Witnis

Jeezas kuda mi witnis infaamali tu wahn Samaritan uman bikaaz hihn mi staat wahn kanvasayshan wid shee. How wee ku du beta wen wi waahn staat wahn kanvasayshan wid peepl weh wi noh noa?

• Bee frenli ahn taak tu peepl. Eevn doa Jeezas mi taiyad, ih mi staat wahn kanvasayshan jos di aks fi waata. Soh yu ku staat wid wahn simpl lee heloa ahn den maybi yu ku seh sohnting bowt di weda er jos taak bowt sohnting weh di hapm eena di ayrya. Memba dat di fos ting da jos fi staat wahn kanvasayshan, soh taak bowt eniting weh yu tink di persn wuda inchrestid eena. If di persn noh pay yu no main, noh wori, dat okay. Chrai agen wid sohnbadi els. Aks Jehoava fi gi yu korij.—Ne 2:4; Aks 4:29.

• Luk owt fi eni apachooniti fi taak bowt di gud nyooz, bot noh rosh it. Alow di kanvasayshan fi bee nachral. If yu foas it, di persn mait noh feel komfatabl an ih mait jos stap di kanvasayshan. Noh feel no way if di kanvasayshan wid di persn don an yu neva geh wahn chaans fi gi wahn witnis. If yu di tink bowt how fi staat wahn kanvasayshan bowt di gud nyooz ahn yu feel frayd er shai, den praktis fi jos staat wahn kanvasayshan widowt plan fi gi wahn witnis. [Play ahn diskos veedyo 1.]

• Kriyayt wahn apachooniti fi gi wahn witnis. Maybi yu ku jos menshan sohnting bowt di chroot weh reeli toch yu haat. Dis ku mek di persn waahn aks yu wahn kweschan bowt it. Jeezas mi seh sohn inchrestin tingz weh mi mek di uman waahn aks ahn sohn kweschan. Soh wen hihn mi staat taak bowt di gud nyooz, hihn jos mi-di ansa fi shee kweschanz. [Play ahn diskos veedyo 2, ahn den play ahn diskos veedyo 3.]