“Paal Mi Tank Gaad fi di Inkorijment Weh Ih Mi Geh Fahn di Bradaz”

Wen di kangrigayshan da Roam mi hyaa dat Paal mi-di kohn, wahn groop a bradaz mi chravl bowt 40 mailz (64 km) fi goh meet ahn. Dehnya bradaz mi waahn shoa lov tu Paal, soh dehn gaan owta dehn way fi goh meet ahn. How dat mi afek Paal? Wel, di skripcha seh: “Wen Paal si dehn, ih mi feel gud” an ‘ih mi tank di Laad fi dehn bikaa dehn inkorij ahn.ʼ (Aks 28:15) Paal mi aalwayz inkorij di bradaz wen hihn wuda goh vizit di kangrigayshan dehn; now dis taim az wahn prizna, da hihn mi-di geh inkorijment fahn di bradaz.—2Kor 13:10.

Tudeh, di serkit oavaseeya dehn goh fahn kangrigayshan tu kangrigayshan fi inkorij di bradaz ahn sistaz. Laik aala Gaad peepl, sohntaim dehn ga woriz, feel dong, ahn feel taiyad. Di neks taim di serkit oavaseeya an ih waif vizit yu kangrigayshan, weh yoo ku du fi inkorij dehn, soh dat wi ku “inkorij wan anada”?—Roam 1:11, 12.

• 

  Sopoat di meetin dehn fi feel servis. Di serkit oavaseeya feel inkorij wen ih si di sakrifais weh di poblishaz mek soh dat dehn ku tek paat eena di speshal week a ih vizit. (1Tes 1:2, 3; 2:20) Wi inkorij yu fi mek it wahn goal fi agzilari painyaa joorin di mont a ih vizit. Ih wuda bee gud fi mek planz fi preech wid di brada an ih waif er invait wan a dehn fi goh wid yu pahn wahn Baibl stodi. Dehn soh hapi fi werk wid difrent poblishaz, eevn wid wahn nyoo poblisha er wid sombadi weh fain it haad fi tek paat eena di preechin werk.

• 

  Bee haspitabl. Yu tink yu ku invait dehn fi stay da yu hows er invait dehn fi wahn meel? If yu du dat, di serkit oavaseeya an ih waif wahn noa dat yu kay bowt dehn. Dehn noh ekspek notn fansi.—Lk 10:38-42.

• 

  Lisn an obay ih dairekshan ahn kongsl. Eena wahn kain ahn lovin way, di serkit oavaseeya help wi fi si how wi ku du beta eena wi wership tu Jehoava. Sohntaim, hihn mait haftu giv schrang kongsl. (1Kor 5:1-5) Wi mek di brada feel soh hapi wen wi wilin fi obay di inschrokshanz fahn Jehoava aaganaizayshan.—Heeb 13:17.

• 

  Shoa apreeshiayshan. Mek di serkit oavaseeya an ih waif noa dat dehn haad werk reeli help yu wahn lat. Yu ku tel dehn fays-tu-fays er chroo wahn lee tank-yoo kyaad.—Kol 3:15.