How fi Yooz di Veedyo Dehn fi Teech Yu Baibl Styoodents

Pichaz, veedyo, maps, ahn ada tingz laik dat kech peepl atenshan ahn help dehn fi memba weh yu mi teech dehn. Jehoava, di bes Teecha eva, yoostu yooz tingz weh ih servant dehn ku si wid dehn aiy fi help dehn laan sertn impoatant lesn. (Ge 15:5; Jer 18:1-6) Jeezas yoostu du di saym ting. (Mach 18:2-6; 22:19-21) Laytli, wan a di bes tool weh wi yooz fi du dis da wi veedyo dehn. Yoo di mek gud yoos a dehnya toolz fi help teech yu Baibl styoodent dehn?

Ten veedyo don geh pripyaa fi help wi teech di difrent lesn dehn fahn di broashoar Gud Nyooz Fahn Gaad! Naamali, eech veedyo taitl goh lang wid wan a di kweschanz eena boal weh deh eena di broashoar. Di dijital verzhan gat een sohn link weh rimain wi wen wi fi shoa eech a di veedyo dehn. Pahn tap a dat, dehn ga sohn ada veedyo weh goh lang wid di difrent stodi poblikayshan dehn weh deh eena wi Teechin Toolbaks.

Wat if yu di diskos wahn Baibl tapik weh yu styoodent fain haad fi andastan? Er wat if yu styoodent di deel wid wahn spesifik chraiyal? Saach chroo di veedyo dehn pahn jw.org® ahn JW Braadkyaastin® fi fain wan weh wahn help ahn. Maybi yoo ahn yu styoodent ku wach wan a dehn tugeda ahn den diskos it.

Eech mont, sohn nyoo veedyo geh rilees. Az yu wach dehn, tink bowt how yu ku yooz dehn fi teech adaz.