How Pryaaz Ku Help Yu?
Wahn laydi weh naym Pamela mi reeli sik. Soh ih gaahn da dakta fi help. Bot, ih aalso pray tu Gaad fi schrent fi bayr op chroo di siknis. Yu tink Gaad mi help ahn?
Pamela seh: “Wen Ah mi-di tek chreetment fi kyansa, Ah yoostu aalwayz feel frayd. Bot wen Ah pray tu Jehoava Gaad, Ah mi feel kaam an Ah kuda mi tink schrayt. Ah stil sofa fahn bad payn, bot pryaa help mi fi stay pazitiv. Wen peepl aks mi how Ah feel, Ah seh, ‘Ah noh feel tu gud, bot Ah hapi!ʼ”
Af koars, wi noh fi onli pray wen wi di goh chroo wahn seeryos prablem weh di chretn wi laif. Memba, aala wi fays lata chalenj, weda big er smaal, ahn wi aalwayz feel dat wi need help fi deel wid dehn. Yu tink pryaaz ku help wi?
Di Baibl seh: “Chroa yu woriz pahn Jehoava, ahn hihn wahn help yu. Ih wahn neva alow di raichos wan fi looz ih balans ahn faal dong.” (Psalm 55:22) Da skripcha gi wi komfert, noh chroo? Soh how pryaa ku help yu? Wen yu pray tu Gaad eena di rait way, hihn wahn gi yu wateva yu need fi deel wid di chalenj dehn eena laif.—Si di baks “How Pryaaz Help Yu.”