STODI AATIKL 10
Evribadi Eena di Kangrigayshan Ku Help Baibl Styoodents fi Kwalifai fi Geh Baptaiz
“Eech paat a di badi . . . help di badi groa.”—IFEE. 4:16.
SANG 85 Welkom Wan Anada
WEH WI WAHN DISKOS?a
1-2. Hoo ku help wahn Baibl styoodent fi kwalifai fi geh baptaiz?
AMY, wahn sista weh liv da Fiji, seh: “Ah mi lov weh Ah mi-di laan wen Ah mi-di stodi di Baibl. Ah mi noa dat da mi di chroot. Bot da neva til Ah staat spen taim wid di bradaz ahn sistaz dat Ah mi staat tu mek chaynjiz eena mi laif ahn den geh baptaiz.” Amy ekspeeryens teech wi wahn impoatant lesn. Moa dan laikli, wahn Baibl styoodent wahn mek proagres ahn kwalifai fi geh baptaiz if ih geh help fahn adaz eena di kangrigayshan.
2 Eech poblisha ku help nyoo styoodents fi bee paat a di kangrigayshan. (Ifee. 4:16) Leilani, wahn painyaa weh liv da Vanuatu, seh: “Peepl seh dat ih tek wahn vilij fi rayz wahn pikni. Wel, da di saym ting fi mek nyoo disaiplz. Ih yoozhwali tek wahn hoal kangrigayshan fi bring sohnbadi intu di chroot.” Famili membaz, frenz, ahn teechaz aal help chrayn wahn pikni fi groa op fi bee wahn machoar persn. Aala dehn ku inkorij di pikni ahn teech ahn lata impoatant lesn. Saym way soh, poblishaz ku giv advais an inkorijment tu Baibl styoodents ahn set wahn gud egzampl fi dehn soh dat dehn ku mek proagres ahn kwalifai fi geh baptaiz.—Prov. 15:22.
3. Weh yu laan fahn weh Ana, Dorin, ahn Leilani seh?
3 Wai di poblisha weh kandok wahn Baibl stodi shuda bee hapi wen ada poblishaz help owt dehn styoodent? Ana, wahn speshal painyaa da Moldova, seh: “Wahn Baibl styoodent need wahn lata help, an ih haad fi mek jos wan persn gi dehn aala di help weh dehn need.” Dorin, wahn speshal painyaa eena da saym konchri, seh: “Lata taim, ada poblishaz seh sohnting weh toch di styoodent haat, sohnting weh Ai wudn eevn tink fi seh.” Leilani menshan wahn nada reezn wai wi shuda bee hapi wen adaz help. Shee seh: “Di lov ahn kyaa weh ada bradaz ahn sistaz shoa di styoodent ku help dehn noa dat wee da Jehoava peepl fi chroo.”—Jan 13:35.
4. Weh wi wahn diskos eena dis aatikl?
4 Bot yu mait wanda, ‘How Ai ku help di Baibl styoodent mek proagres if Ai da noh di wan weh di kandok di stodi?ʼ Mek wi diskos weh wee ku du wen sohnbadi invait wi fi goh wid dehn pahn wahn Baibl stodi ahn wen di styoodent staat tu kohn da meetin. Wi wahn aalso diskos weh eldaz ku du fi help Baibl styoodents mek proagres ahn kwalifai fi geh baptaiz.
WEN SOHNBADI INVAIT YU FI GOH WID DEHN PAHN WAHN BAIBL STODI
Wen sohnbadi invait yu fi goh wid dehn pahn wahn Baibl stodi, pripyaa di lesn weh dehn wahn diskos (Paragraaf 5-7)
5. Weh yu shuda du wen sohnbadi invait yu fi goh wid dehn pahn wahn Baibl stodi?
5 Pahn wahn Baibl stodi, di teecha ga di rispansabiliti fi help di styoodent andastan Gaad Werd. If di teecha invait yu fi goh lang wid ahn, den yoo dehdeh fi help ahn. (Eccl. 4:9, 10) Bot weh yu ku du fi bee wahn gud helpa joorin di Baibl stodi?
6. How di prinsipl da Proverbs 20:18 ku help yu wen sohnbadi invait yu fi goh wid dehn pahn wahn Baibl stodi?
6 Pripyaa fi di Baibl stodi. Fers, yu ku aks di teecha fi tel yu wahn lee bit bowt di styoodent. (Reed Proverbs 20:18.)b Yu ku aks kweschanz laik: “Wat da di styoodent bakgrong? Weh tapik yu wahn di stodi wid ahn? Weh yu waahn mek di styoodent laan fahn di stodi tudeh? Eniting deh weh Ah shud er shudn seh er du wail wi deh pahn di stodi? How Ai ku inkorij di styoodent fi mek proagres?” Af koars, di teecha noh wahn giv yu no praivit infamayshan bowt di styoodent, bot eni infamayshan weh ih doo shayr wid yu wahn reeli help yu. Wahn mishineri weh naym Joy yoozhwali ga dis kaina diskoshan wid eni poblisha weh goh wid ahn pahn wahn Baibl stodi. Shee seh: “Dis infamayshan help mi paadna fi waahn help di styoodent, an ih aalso help ahn fi noa weh fi seh joorin di stodi.”
7. Wai yoo need fi pripyaa if sohnbadi invait yu fi goh wid dehn pahn wahn Baibl stodi?
7 If sohnbadi invait yu fi goh wid dehn pahn wahn Baibl stodi, ih wuda bee gud if yu pripyaa di lesn weh dehn wahn stodi. (Ezra 7:10) Memba Dorin weh wi mi menshan erliya? Hihn seh: “Ai reeli apreeshiayt it wen Ah invait sohnbadi fi goh wid mi pahn wahn stodi ahn dehn pripyaa heda taim. Dat help dehn fi gi sohn gud koments.” Pahn tap a dat, di styoodent wahn noatis dat di too a unu mi pripyaa, ahn dat wahn set wahn gud egzampl far ahn. An eevn if yu noh ga taim fi pripyaa gud fi di lesn, yu ku at lees tek sohn taim fi fain di mayn points.
8. How yu ku mek shoar dat yu pryaa toch di Baibl styoodent haat?
8 Pryaa da wahn impoatant paat a wahn Baibl stodi. Soh tink heda taim bowt weh yu wahn pray fa if di teecha aks yu fi pray. If yu du dat, den yu wahn ku pray bowt spesifik tingz weh impoatant tu di styoodent ahn weh wahn toch ih haat. (Ps. 141:2) Hanae, wahn sista weh liv da Japan, stil memba how wahn sista weh gaahn lang wid ih Baibl teecha mi pray. Shee seh: “Ah kuda mi feel dat shee mi ga wahn schrang frenship wid Jehoava, an Ai mi waahn bee laik shee. Ah mi aalso feel dat ih lov mi wen ih pray fi mi ahn yooz mi naym eena ih pryaaz.”
9. Akaadn tu Jaymz 1:19, weh yu ku du fi bee wahn gud paadna wen yu goh pahn wahn Baibl stodi?
9 Help di teecha joorin di stodi. Wahn speshal painyaa da Nigeria seh: “Wahn gud paadna wahn lisn gud joorin di stodi. Ih wahn gi gud koments bot ih noh wahn taak tu moch. An ih andastan dat di teecha da di wan weh fi tek di leed.” Soh how yu ku noa wen fi seh sohnting ahn weh fi seh? (Prov. 25:11) Lisn gud wail di teecha ahn di styoodent di taak. (Reed Jaymz 1:19.) Den yu wahn bee redi fi help owt da di rait taim. Af koars, yu haftu yooz gud jojment. Fi egzampl, yu wudn waahn taak tu moch, intarop di teecha wen ih di eksplayn sohnting, er chaynj di sobjek. Bot wid wahn shaat koment, iloschrayshan, er kweschan, yu ku help di styoodent andastan di tapik beta. Sohntaim, yu mait feel laik yu noh ga moch fi seh pahn di tapik weh dehn di diskos. Bot if yu komen di styoodent ahn shoa ahn dat yu kay bowt ahn, yu wahn help ahn fi mek proagres.
10. How yu ku help di Baibl styoodent wen yu tel ahn bowt tingz weh yoo gaahn chroo?
10 Tel dehn bowt tingz weh yoo gaahn chroo. If yu tink ih ku help di styoodent, yu ku tel ahn wahn lee bit bowt how yoo mi laan di chroot, bowt som a di chalenjiz weh yu mi fays, er how yu si Jehoava help yu owt eena yu laif. (Ps. 78:4, 7) Dat ku bee jos weh di styoodent need fi hyaa. Ih ku schrentn ih fayt er inkorij ahn fi kantinyu mek proagres ahn kwalifai fi geh baptaiz. An ih mait eevn shoa di styoodent how fi get oava wahn chraiyal weh ih di goh chroo. (1 Peet. 5:9) Gabriel, wahn painyaa weh liv da Brazil, memba how hihn mi benifit wen ih mi-di stodi di Baibl. Ih seh: “Wen di bradaz mi tel mi weh dehn gaahn chroo, Ah laan dat Jehoava si di chalenjiz weh wi fays. An if dehn kuda mi get oava dehndeh chalenjiz, den Ai ku get oava mai chalenjiz tu.”
WEN DI BAIBL STYOODENT KOHN DA MEETIN
Aala wi ku inkorij di styoodent fi kantinyu goh da meetin (Paragraaf 11)
11-12. Wai wi shuda gi Baibl styoodents wahn waam welkom wen dehn kohn da meetin?
11 Wahn Baibl styoodent haftu kohn da meetin regyula fi benifit fahn dehn ahn fi mek proagres ahn kwalifai fi geh baptaiz. (Heeb. 10:24, 25) Ih teecha wahn praabli invait ahn tu ih fers meetin. Wen ih kohn, aala wi ku inkorij ahn fi kip di kohn da Kingdom Haal. How wi ku du dat?
12 Gi di styoodent wahn waam welkom. (Roam. 15:7) If evribadi welkom di styoodent wen ih kohn da meetin, moa dan laikli ih wahn waahn kantinyu kohn da meetin. Soh widowt put di styoodent eena wahn akwad sichuwayshan, giv ahn wahn waam welkom an inchrojoos ahn tu adaz. Spen taim wid ahn, bikaaz maybi ih teecha noh reech yet er ih bizi wid sohnting els eena di Kingdom Haal. Pay kloas atenshan tu weh di styoodent seh ahn shoa ahn dat yu kay bowt ahn. How dat ku afek wahn styoodent? Dmitrii, wahn brada weh jos geh baptaiz wahn fyoo yaaz agoa ahn weh di serv az wahn ministeeryal servant, memba di fers taim ih gaahn da meetin. Ih seh: “Ah mi-di wayt owtsaida di Kingdom Haal an Ah mi feel kaina nervos. Wahn brada mi si mi deh ahn kehr mi eensaid. Wahn lata di bradaz ahn sistaz mi kom op tu mi fi welkom mi. Ah mi reeli sopraiz! Ah mi laik it soh moch dat Ah mi wish dehn ga meetin evri day. Ah neva ekspeeryens sohnting laik dis bifoa.”
13. How yu gud egzampl ku help wahn Baibl styoodent?
13 Set wahn gud egzampl. Yu gud egzampl ku help di Baibl styoodent si dat ih fain di chroot. (Mach. 5:16) Vitalii, wahn brada hoo di serv az wahn painyaa da Moldova, seh: “Ah mi laan how adaz eena di kangrigayshan liv, tink, ahn bihayv. Dis mi help mi fi si dat Jehoava Witnisiz da di chroo rilijan.”
14. How fi yoo egzampl ku help wahn styoodent kantinyu mek proagres?
14 Fi mek wahn styoodent kwalifai fi geh baptaiz, ih haftu liv akaadn tu di Baibl prinsiplz weh ih di laan. Dis noh aalwayz eezi. Bot wen di styoodent si how yoo benifit wen yu liv akaadn tu Baibl prinsiplz, den ih mait waahn kapi fi yoo egzampl. (1 Kor. 11:1) Tink bowt weh mi hapm tu Hanae, weh wi menshan erliya. Shee seh: “Di bradaz ahn sistaz don mi-di liv akaadn tu di tingz weh Ai mi-di laan. Ah mi si how Ai kuda mi inkorij, fergiv, ahn shoa lov tu adaz. Dehn mi aalwayz seh kain tingz bowt adaz. Ai mi waahn bee laik dehn.”
15. How Proverbs 27:17 help wi fi si wai wi shuda mek frenz wid wahn Baibl styoodent az ih kantinyu goh da meetin?
15 Mek frenz wid di styoodent. Az di styoodent kantinyu goh da meetin, kip aan di shoa kansaan far ahn. (Fil. 2:4) Yu ku chrai get fi noa ahn beta, bot noh bee intafayrin. Insted, yu ku tel ahn dat yu hapi fi si dat ih di mek proagres, ahn yu ku aks ahn bowt ih famili, ih jab, ahn how ih Baibl stodi di goh. Wen unu taak bowt tingz laik dehndeh, unu ku geh fi bee gud frenz. Ahn wen yu chrai bee frenz wid di styoodent, yu help ahn fi mek proagres soh dat ih ku kwalifai fi geh baptaiz. (Reed Proverbs 27:17.)c Hanae da wahn regyula painyaa now. Dis da weh shee seh wen ih mi fers staat goh da meetin: “Az Ah mi mek frenz eena di kangrigayshan, Ah mi staat tu luk faawod tu di meetin dehn. Ah gaan eevn wen Ah mi feel taiyad. Ah mi injai di taim weh Ah mi spen wid mi nyoo frenz, ahn dis mi help mi fi stap bee frenz wid peepl weh neva wership Jehoava. Ah mi waahn geh kloasa tu Jehoava ahn tu di bradaz ahn sistaz. Soh Ah mi disaid fi geh baptaiz.”
16. Wat els yoo ku du fi help wahn Baibl styoodent feel hapi fi bee paat a di kangrigayshan?
16 Az di styoodent kantinyu fi mek proagres ahn fi mek chaynjiz eena ih laif, help ahn fi feel laik ih bilangz eena di kangrigayshan. Yu ku du dis wen yu du kain tingz far ahn. (Heeb. 13:2) Denis, wahn brada weh liv da Moldova, memba how hihn mi feel wen ih mi-di stodi. Hihn seh: “Sevral taimz, di bradaz ahn sistaz mi invait mee ahn mi waif fi spen taim wid dehn. Dehn tel wi how Jehoava mi help dehn. Dat mi inkorij wi! Dat mi aalso help fi kanvins wi dat wi mi waahn serv Jehoava ahn dat wi mi ga wahn wandaful fyoocha heda wi.” Wans wahn Baibl styoodent kwalifai fi bee wahn poblisha, yu ku aalso invait ahn fi goh wid yu pahn feel servis. Diego, wahn poblisha fahn Brazil, seh: “Wahn lata bradaz mi invait mi fi goh owt goh preech wid dehn. Dis da-mi di bes way fi geh fi noa dehn beta. Az Ah gaan owt pahn feel servis wid dehn, Ah laan wahn lat, an Ah mi feel kloasa tu Jehoava ahn tu Jeezas.”
HOW DI ELDAZ KU HELP?
Eldaz, shoa dat yu kay bowt Baibl styoodents kaaz dat wahn help dehn fi mek proagres (Paragraaf 17)
17. How di eldaz ku help Baibl styoodents?
17 Mek taim fi Baibl styoodents. Eldaz, wen unu shoa dat unu lov ahn kay bowt di Baibl styoodent dehn, unu ku help dehn fi mek proagres ahn kwalifai fi geh baptaiz. Yu ku taak tu dehn wen dehn kohn da meetin. Dehn wahn noa dat yu kay bowt dehn if yu memba dehn naym, espeshali wen dehn staat tu koment. Yu ku ajos yu skejul soh dat yu ku goh wid wahn poblisha sohntaim wen ih goh pan ih Baibl stodi. Yu mait bee aybl fi help wahn styoodent moa dan yu tink. Jackie, wahn painyaa weh liv da Nigeria, seh: “Sohntaim wahn elda wuda goh wid mi pahn mi Baibl stodi ahn dat sopraiz mi styoodent dehn. Wan Baibl styoodent mi seh: ‘Mai paasta wuda neva du dat. Hihn onli vizit rich peepl an onli if dehn pay ahn!ʼ” Da styoodent goh da meetin now.
18. How eldaz ku fala di inschrokshanz da Aks 20:28?
18 Chrayn an inkorij Baibl teechaz. Eldaz, unu ga wahn impoatant rispansabiliti fi help poblishaz fi du beta eena di preechin ahn teechin werk. (Reed Aks 20:28.) If sohnbadi feel shai fi kandok wahn Baibl stodi wail yoo dehdeh wid dehn, aafa fi kandok di Baibl stodi. Jackie seh: “Eldaz aalwayz aks mi how mi Baibl styoodent dehn di du. Wen Ah need help wid mi Baibl stodi, dehn gi mi gud advais.” Eldaz ku du wahn lat fi inkorij Baibl teechaz. (1 Tes. 5:11) Jackie aalso seh: “Ai laik it wen eldaz inkorij mi ahn tel mi dat dehn apreeshiayt mi haad werk. Dat rifresh mi, laik wahn koal glaas a waata pahn wahn hat day. Wen dehn komen mi, ih mek Ah feel laik Ah di du wahn gud jab. An ih mek Ah feel eevn hapiya fi kandok Baibl stodiz.”—Prov. 25:25.
19. Wat mek wi reeli hapi?
19 Eevn if wi noh di kandok wahn Baibl stodi rait now, wi ku stil help sohnbadi fi mek proagres ahn kwalifai fi geh baptaiz. Wen sohnbadi invait wi fi goh wid dehn pahn wahn Baibl stodi, wi ku pripyaa gud koments fi help dehn owt, bot wi noh waahn tek oava ahn taak tu moch. Wi ku mek frenz wid di styoodents wen dehn kohn da Kingdom Haal, ahn wi ku set wahn gud egzampl fi dehn. Eldaz ku inkorij di styoodents wen dehn mek taim fi dehn, ahn dehn ku inkorij di poblishaz wen dehn chrayn dehn ahn komen dehn. Wee reeli hapi wen wi ku du sohnting, eevn if da sohnting smaal, fi help sohnbadi lov ahn serv Jehoava!
SANG 79 Teech Dehn fi Stan Op Schrang
a Noh aala wi ga di privilij fi kandok wahn Baibl stodi rait now, bot aala wi ku help sohnbadi fi mek proagres ahn kwalifai fi geh baptaiz. Eena dis aatikl, wi wahn si how eech wan a wi ku help wahn Baibl styoodent reech da goal.
b Proverbs 20:18: “Wen yu ga kamyoonikayshan, yu planz wahn werk owt gud; ahn wen yu goh da waar, fala dairekshan fahn wahn waiz persn.”
c Proverbs 27:17: “Jos laik how aiyan shaapm aiyan, da rait soh wahn man shaapm ih fren.”