1921—Wan Honjrid Yaaz Agoa

DI WATCH TOWER a Janiweri 1, 1921, mi aks di Baibl Styoodents dis kweschan: “Weh werk wi ku luk faawod fi du dis yaa?” Den ih mi koat Isaiah 61:1, 2, weh mi rimain dehn a dehn asainment fi preech. “Jehoava mi anoint mi fi tel di gud nyooz tu di hombl wan dehn . . . , fi tel dehn bowt di yaa a gudwil ahn di day a venjans a wi Gaad.”

PREECHAZ A DI GUD NYOOZ WEH MI GA KORIJ

Fi mek di Baibl Styoodents ku du di preechin werk, dehn mi need fi ga lata korij. Dehn mi need fi preech bowt di “gud nyooz” tu di hombl wan dehn an aalso bowt “di day a venjans” tu di wikid.

Brada J. H. Hoskin, weh mi liv da Canada, mi preech wid korij eevn doa peepl mi deh gens ahn. Eena 1921, hihn mi meet wahn Metodis preecha. Brada Hoskin staat aaf ih kanvasayshan di seh: “Wi ku ga wahn gud kanvasayshan bowt di Baibl. An eevn if wi noh gree pahn som tingz, wi ku stil en wi kanvasayshan eena wahn peesful way ahn stay az frenz.” Bot dat neva hapm. Brada Hoskin mi seh: “Wee mi onli taak fi wahn fyoo minits wen [di preecha] nak di doa soh haad dat Ai mi tink dat di glaas windo pahn di doa mi wahn brok.”

Di preecha mi hala: “Wai yu noh goh tu peepl weh da noh Kristyanz ahn taak tu dehn insted?” Brada Hoskin neva ansa bak, bot wen ih mi lef fahn deh, ih mi-di tink tu ihself, ‘Ai reeli feel laik Ai jos mi-di taak tu wan a dehn!ʼ

Wen di preecha mi gaahn preech da ih cherch di neks day, hihn mi seh bad tingz bowt Brada Hoskin. Brada Hoskin seh: “Hihn mi tel di peepl dat Ai laiyad bad; dat Ai da di wers persn weh eva kohn da da tong, ahn dat dehn shuda kil mi.” Bot dis neva stap di brada, hihn mi kantinyu preech ahn taak tu lata peepl. Hihn mi seh: “Ai mi reeli injai fi preech deh. Sohn peepl wuda eevn seh, ‘Ai noa dat yoo di du Gaad werk!ʼ Ahn dehn eevn aafa fi gi mi tingz weh Ah mi need.”

PERSNAL AHN FAMILI STODI

Fi help peepl andastan di Baibl beta, di Baibl Styoodents mi poblish sohn Baibl kweschan an ansaz eena The Golden Age magazeen.a Dehn mi ga Baibl kweschanz fi yong peepl weh payrents ku diskos wid dehn chiljren. Payrents wuda “aks dehn chiljren di kweschanz ahn help dehn fain di ansaz eena di Baibl.” Dehn mi ga kweschanz laik, “Humoch buks mek op di Baibl?,” weh mi teech sohn baysik faks bowt di Baibl. Ada kweschanz laik, “Evri Kristyan shuda ekspek fi fays persikyooshan?,” mi pripyaa yong wanz fi preech wid korij.

Dehn mi aalso ga Baibl kweschanz an ansaz fi peepl weh mi ga moa nalij a di Baibl. Dehn kuda mi fain di ansaz eena di fers buk a Studies in the Scriptures. Lata peepl mi laan wahn lata tingz fahn dehnya kweschanz, bot den dehn mi anonks eena The Golden Age a Disemba 21, 1921, dat dehnya kweschanz noh wahn geh poblish nohmoh. Wai nat?

WAHN BRAN NYOO BUK!

Di buk *The Harp of God*

Wahn kyaad wid wahn reedin asainment

Sohn kyaad wid kweschanz

Di bradaz weh mi-di tek di leed mi riyalaiz dat peepl mi need fi laan bowt di Baibl, tapik bai tapik. Soh dehn mi poblish di buk The Harp of God eena Novemba 1921. Peepl weh mi inchrestid ahn weh mi aksep di buk, mi aalso jain wahn stodi koars weh dehn kuda mi du bai dehnself di yooz da sayhn buk. Dis koars mi help peepl laan bowt Gaad perpos fi gi hyoomanz evalastin laif. How dis koars mi werk?

Wen wahn persn mi aksep wahn kapi a di buk, ih mi geh wahn smaal kyaad weh tel ahn weh aal ih fi reed eena di buk. Di neks week, eena ih maylbaks ih wuda geh wahn neks kyaad weh mi aks difrent kweschanz bowt weh ih mi reed. Da di en a di kyaad, ih mi ga wahn reedin asainment fi di week afta dat.

Evri week fi 12 weeks, di kangrigayshan weh deh kloasis tu weh di styoodent liv wuda mayl ahn wahn nyoo kyaad. Yoozhwali, di oalda bradaz ahn sistaz weh kudn goh fahn hows tu hows wuda mayl di kyaad dehn. Fi egzampl, Anna K. Gardner, fahn Millvale, Pennsylvania, U.S.A., mi seh: “Wen di buk The Harp of God mi geh rilees, ih mi help Thayle, mi sista weh kudn waak tu gud, fi du moa tingz. Shee wuda sen di kyaad dehn wid di kweschanz evri week.” Wen di persn wuda finish di koars, sohnbadi fahn di kangrigayshan wuda vizit ahn, an help ahn laan moa bowt di Baibl.

DI WERK AHED

Da di en a di yaa, Brada J. F. Rutherford mi sen wahn leta tu aal di kangrigayshan dehn. Eena da leta hihn mi seh dat “di preechin werk mi reech ahn help moa peepl dan di yaaz bifoa.” Den, hihn mi seh: “Lata werk deh fi du. Inkorij adaz fi jain wi fi du dis wandaful werk.” Ih klyaa fi si dat di Baibl Styoodents mi fala da advais. Eena di yaa 1922, dehn mi ga korij ahn dehn mi preech bowt di Kingdom moa dan eva bifoa!

Frenz Weh Mi Ga Lata Korij

Di Baibl Styoodents mi shoa schrang lov fi wan anada wen dehn mi help owt eech ada. Dis ekspeeryens shoa dat dehn da-mi frenz weh mi ga lata korij “wen taimz haad.”—Prov. 17:17.

Pahn Choozdeh, May 31, 1921, wahn blak man eena di siti a Tulsa (Oklahoma, U.S.A.) mi geh put eena jayl bikaaz ih mi geh akyooz fi atak wahn wait uman. Afta dat, wahn groop a moa dan 1,000 wait man mi staat tu fait wid wahn smaala groop a blak man. Dis big faitin mi spred kwik-wan tu wahn ayrya weh naym Greenwood, wehpaat moasli blak peepl liv. Dehn mi rab moa dan 1,400 hows ahn bizniz ahn den bon dehn dong. Sohn ripoat seh dat di amonk a peepl weh mi ded da-mi 36, bot akchwali, bowt 300 peepl mi ded. Dehn mi naym dis raiyat di Tulsa Race Massacre.

Brada Richard J. Hill, wahn blak Baibl Styoodent weh mi liv da Greenwood, eksplayn weh mi hapm. Hihn seh: “Di nait di raiyat mi hapm, wi mi ga wi kangrigayshan meetin. Afta di meetin mi don, wi mi hyaa shootin di hapm dongtong. Di shootin mi kantinyu til layt da nait.” Bai di neks maanin, weh da-mi Joon 1, di sichuwayshan mi geh wers. “Sohn peepl mi kohn tel wi dat if wi mi waahn protekshan, wi beta goh da Convention Hall rait away.” Soh Brada Hill, ih waif, an dehn faiv chiljren gaahn da Tulsa Convention Hall kwik-wan. Rait deh, dehn mi ga bowt 3,000 blak man ahn uman weh mi-di geh protekshan fahn di aami weh di govament mi sen fi kaam tingz dong.

Rong da sayhn taim, Brada Arthur Claus, weh da-mi wahn wait brada, mi mek wahn disizhan weh mi shoa dat ih reeli ga korij. Brada Claus seh: “Wen Ah mi hyaa dat peepl mi-di rab ahn bon dong hows da Greenwood, Ah mi disaid fi goh deh ahn si how mi dyaa fren, Brada Hill, di du.”

Brada Arthur Claus mi help 14 chiljren fi laan moa bowt di Baibl di yooz di buk The Harp of God

Az ih mi-di reech da Brada Hill hows, hihn si wahn wait nayba di hoal wahn gon. Di nayba da-mi aalso wan a Brada Hill fren, an hihn mi tink dat Brada Claus mi kohn fi teef ahn bon dong Brada Hill hows. Di nayba hala: “Weh yoo di du eena dis man yaad?”

Brada Claus seh: “If Ah neva giv ahn wahn gud ansa, hihn mi wahn shoot mi. Ah mi tel ahn dat Ai da Brada Hill fren ahn dat Ai mi don kohn da ih hows wahn lata taim.” Brada Claus ahn di nayba mi protek Brada Hill prapati gens di peepl weh mi-di rab di naybahud.

Noh tu lang afta dat, Brada Claus mi fain owt dat Brada Hill mi deh da Convention Hall lang wid ih famili. Brada Claus mi fain owt dat blak peepl mi kyaahn lef widowt di permishan a Jenaral Barrett, hoo da-mi di aafisa weh mi in chaaj. Brada Claus mi seh: “Ih mi reeli haad fi geh fi taak tu di jenaral. Wen Ah mi fainali geh fi taak tu ahn, Ah tel ahn dat Ah wuda laik fi kehr owt di famili fahn di Convention Hall. Hihn mi aks mi: ‘Yoo wahn luk afta dis famili ahn gi dehn weh dehn need?ʼ Af koars, Ai mi kwait hapi fi seh yes.”

Di jenaral mi sain di permishan ahn Brada Claus hori gaahn da Convention Hall. Hihn mi giv it tu wahn aafisa, an di aafisa hala seh: “Wat, dis geh sain bai di jenaral ihself? Yoo noa dat yoo da di fers persn fi kehr owt sohnbadi fahn dis plays?” Noh tu lang afta dat, Brada Claus ahn di aafisa mi fain Brada Hill an ih famili. Aala dehn mi get eena Brada Claus kaar ahn gaahn hoam.

Brada Claus mi mek shoar dat Brada Hill an ih famili mi sayf. Ada peepl mi admaiya di korij ahn schrang lov weh Brada Claus mi shoa fi ih bradaz. Brada Claus mi seh: “Di nayba weh mi help protek Brada Hill prapati, mi rispek Jehoava Witnisiz moa dan bifoa. Ahn wahn lata peepl mi geh inchrestid eena di chroot bikaaz dehn mi si dat Gaad peepl neva mek dehn skin kala divaid dehn, ahn non a wi neva tink dat wi beta dan eni wan a wi bradaz.”

a Di magazeen weh naym The Golden Age mi geh chaynj tu Consolation eena 1937, ahn den ih geh chaynj tu Awake! eena 1946.