Wahn Taim Wen Nohmoh Haychrid Wahn Deh!
Eevn if wee geh rid a di haychrid weh dehn eena wi haat, wi kyaahn stap peepl rong wi fahn hayt adaz. Bikaaz peepl kantinyu fi hayt eech ada, inosent peepl sofa. Soh, hoo ku geh rid a haychrid fareva?
Onli Jehoava Gaad ku geh rid a haychrid fareva. Ahn dat da egzakli weh di Baibl seh hihn wahn du.—Proverbs 20:22.
GAAD WAHN GEH RID A EVRITING WEH KAAZ HAYCHRID
1. SAYTAN DI DEVL. Saytan da di wan weh rispansabl fi aal di haychrid weh egzis tudeh. Gaad wahn dischrai Saytan an evribadi els weh ga haychrid eena dehn main ahn haat.—Psalm 37:38; Roamanz 16:20.
2. SAYTAN WIKID WERL. Gaad wahn geh rid a evriting eena dis werl weh wikid, inkloodin korop politishanz ahn rilijos leedaz weh promoat haychrid. Gaad wahn aalso geh rid a di bizniz dehn weh greedi, weh korop, ahn weh tek advantij a peepl.—2 Peeta 3:13.
3. HYOOMAN IMPERFEKSHAN. Di Baibl eksplayn dat aala wi inherit imperfekshan ahn dat da wai moas a di taim wi tink, feel, ahn du tingz weh rang. (Roamanz 5:12) Ahn bikaaz a wi imperfekshan, wi staat tu hayt eech ada. Gaad wahn help wi fi geh rid a dehnya rang tinkin, feelinz, an akshanz. Den peepl noh wahn hayt eech ada agen.—Isaiah 54:13.
DI BAIBL PRAMIS WI WAHN WERL WEHPAAT NOHMOH HAYCHRID WAHN DEH
1. NOBADI WAHN FAYS INJOSTIS. Gaad Kingdom wahn rool oava di ert. Ih wahn rool fahn hevn an ih wahn bring jostis fareva. (Daniel 2:44) Wi noh wahn ga nohmoh prejudis ahn nobadi wahn hayt eech ada agen. Gaad wahn geh rid a aala di injostis weh peepl di fays tudeh.—Look 18:7.
2. EVRIBADI WAHN GA PEES. Nobadi wahn sofa bikaaz a vailens er waar. (Psalm 46:9) Evribadi pahn ert wahn lov pees, soh di ert wahn bee wahn sayf plays fi liv eena.—Psalm 72:7.
3. EVRIBADI WAHN LIV FAREVA EENA PERFEK KANDISHANZ. Evribadi weh liv pahn ert wahn ga chroo lov fi wan anada. (Machyu 22:39) Nobadi wahn sofa, nat eevn bikaaz a bad memriz er bad taats. (Isaiah 65:17) Wen Gaad don geh rid a aala di haychrid weh egzis tudeh, hyoomanz wahn rijais. Di Baibl seh: “lata pees wahn deh, soh dehn wahn bee hapi hapi.”—Psalm 37:11.
Yoo wuda waahn liv eena wahn werl laik dat? Tudeh, wahn lata peepl di du weh di Baibl seh eena dehn laif soh dat dehn ku geh rid a haychrid. (Psalm 37:8) Dat da weh Jehoava Witnisiz di du aal oava di werl. Eevn doa dehn kohn fahn difrent kolcha ahn bakgrong, dehn yoonaitid ahn dehn lov wan anada laik famili.—Isaiah 2:2-4.
Jehoava Witnisiz wuda bee hapi fi shayr weh dehn laan bowt how fi bayr op wen dehn fays injostis ahn wen dehn deel wid peepl weh chreet dehn bad bikaaz dehn difrent. Weh yu laan ku help yu fi mek chaynjiz lee bit bai lee bit soh dat insteda yu ga haychrid yu wahn staat tu ga lov. Yu ku fain owt how fi chreet peepl eena wahn kain way, eevn dehn wan weh noh tankful er dehn wan weh shoa lata haychrid. Dis wahn help yu fi bee hapiya now, an yu rilayshanship wid adaz wahn geh moch beta. Pahn tap a dat, yu wahn laan weh yu ku du fi mek yu ku liv anda Gaad Kingdom wen haychrid noh wahn egzis nohmoh.—Psalm 37:29.