Kantinyu “Bil Op Wan Anada”

1. Akaadn tu 1 Tesaloanyanz 5:11, weh werk aala wi di du?

FI YOO kangrigayshan eva bil er fiks op wahn Kingdom Haal? If yes, fi shoar yu memba di fers meetin unu mi ga eena di nyoo Kingdom Haal. Yu mi soh tankful tu Jehoava ahn soh hapi dat yu mi praabli kyaahn eevn sing di sang bikaaz yu mi aalmoas krai anaal. Wen wi bil wahn nais Kingdom Haal, ih bring prayz tu Jehoava. Bot wen wi bil op wan anada, dat prayz hihn eevn moa. Tu Jehoava, di werk weh wi du fi bil op di peepl weh goh eena dehndeh bildin way moa impoatant dan di bildin dehn. Da dis kaina bildin werk di apasl Paal mi taak bowt eena wi teem skripcha da 1 Tesaloanyanz 5:11.—Reed.

2. Weh wi wahn diskos eena dis aatikl?

² Di apasl Paal da wahn gud egzampl a sohnbadi weh mi noa how fi bil op ih bradaz ahn sistaz. Hihn mi shoa dat ih andastan how dehn feel. Eena dis aatikl, wi wahn kansida how hihn mi help ih bradaz ahn sistaz (1) fi bayr op chroo haad taimz, (2) fi ga pees wid wan anada, ahn (3) fi schrentn dehn fayt eena Jehoava. Mek wi si how wi ku kapi fi hihn egzampl ahn bil op wi bradaz ahn sistaz tudeh.—1 Kor. 11:1.

PAAL MI HELP IH BRADAZ AHN SISTAZ FI BAYR OP CHROO HAAD TAIMZ

3. How Paal mi shoa weh mi moa impoatant eena ih laif?

³ Paal mi lov ih bradaz ahn sistaz wahn lat. Hihn mi noa weh ih feel laik fi goh chroo haad taimz. Dat da wai hihn mi ga kompashan an ih mi andastan wen dehn mi-di goh chroo rof taimz. Wan taim, Paal mi brok, soh ih mi haftu fain wahn way fi sopoat ihself ahn di bradaz weh mi deh wid ahn. (Aks 20:34) Hihn yoostu mek tent fi wahn livin. Wen hihn mi reech Korint, hihn mi werk wid Akwila ahn Prisila, sins dehn yoostu mek tent tu. Bot “evri Sabat” hihn wuda preech tu di Jooish ahn di Greek peepl. Den wen Sailas ahn Timoti mi reech, “Paal staat yooz aala ih taim fi preech.” (Aks 18:2-5) Paal neva ferget weh mi moa impoatant tu hihn—fi serv Jehoava. Bikaaz Paal mi werk haad eena di minischri an ih mi sopoat ihself, hihn kuda mi inkorij ih bradaz ahn sistaz. Paal mi andastan dat dehn mi haftu provaid fi dehn famili ahn dat dehn mi wahn ga prablemz. Bot hihn mi rimain dehn fi noh mek dehndeh tingz get eena di way a “di moa impoatant tingz,” weh da evriting weh ga fi du wid wi wership tu Jehoava.—Fil. 1:10.

4. How Paal ahn Timoti mi help dehn bradaz ahn sistaz fi bayr op anda persikyooshan?

⁴ Lee wail afta Paal mi help faam wahn kangrigayshan da Tesalonaika, peepl staat persikyoot di nyoo bradaz ahn sistaz. Wen di wan dehn weh mi deh gens Paal ahn Sailas kudn fain dehn, dehn jreg “som a di bradaz ahn kehr dehn tu di roolaz a di siti,” ahn dehn mi-di hala seh: “Dehnya man di ribel gens Seeza.” (Aks 17:6, 7) Yoo ku imajin how fraitn dehndeh bradaz mi feel fi fain owt dat di man dehn fahn di siti mi ton gens dehn? Dat kuda mi diskorij dehn ahn mek dehn noh waahn du moa fi Jehoava, bot Paal neva waahn mek dat hapm. Eevn doa hihn ahn Sailas mi haftu lef, dehn mi mek shoar dat da nyoo kangrigayshan mi ga sohnbadi fi tek kayr a dehn. Paal mi rimain di Tesaloanyanz: “[Wi] sen Timoti tu unu. Hihn da wi brada . . . . Wi sen ahn fi schrentn unu ahn komfert unu soh dat unu fayt geh schranga. Den laik dat, nobadi fayt wahn geh week sayka dehndeh chribyulayshan.” (1 Tes. 3:2, 3) Moa dan laikli, Timoti ihself mosi mi gaahn chroo persikyooshan da Lischra, wehpaat hihn kohn fram. Hihn mi si how Paal mi schrentn di fayt a di bradaz deh. Bikaaz hihn mi si how Jehoava mi help dehn, hihn kuda mi mek ih nyoo bradaz ahn sistaz noa dat evriting mi wahn ton owt gud fi dehn tu.—Aks 14:8, 19-22; Heeb. 12:2.

5. How wahn elda mi help wahn brada weh naym Bryant?

⁵ Wat els Paal mi du fi schrentn ih bradaz ahn sistaz? Wen Paal ahn Baarnabas gaahn vizit Lischra, Aikoanyom, an Antiyak, dehn “mi apoint som a di bradaz fi bee eldaz eena eech kangrigayshan.” (Aks 14:21-23) Fi shoar dehndeh eldaz mi inkorij di kangrigayshan dehn, jos laik wi eldaz tudeh. Noatis weh wahn brada weh naym Bryant seh: “Wen Ah mi ton 15, mi pa lef hoam ahn mi ma geh disfeloship. Ah mi feel laik Ah mi deh bai miself an Ah mi feel diskorij.” Weh mi help Bryant fi bayr op chroo da haad taim? Hihn seh: “Wahn elda weh naym Tony yoostu taak tu mi da di meetin dehn an ih wuda chek op pahn mi sohn ada taim tu. Hihn tel mi bowt adaz weh gaahn chroo tof taimz bot stay hapi. Hihn reed Psalm 27:10 fi mi, an ih wuda aafn taak bowt Hezikaiya, weh da-mi wahn faytful man eevn doa ih pa da neva wahn gud egzampl.” How aala dis mi help Bryant? Hihn seh: “Wid di inkorijment weh Ah geh fahn Tony, Ah mi staat painyaa, ahn dat mek Ah feel reeli hapi.” Eldaz, unu mos deh pahn di lukowt fi help dehn wan hoo da laik Bryant, weh mait need “wahn gud werd” a inkorijment.—Prov. 12:25.

6. How Paal mi yooz reel laif stoariz fi inkorij ih bradaz ahn sistaz?

⁶ Paal mi rimain ih bradaz ahn sistaz dat wahn “big krowd a peepl” mi gaahn chroo chraiyalz, ahn wid Jehoava help dehn kuda mi bayr op. (Heeb. 12:1) Paal mi andastan dat di laif stoari a faytful servants fahn di paas weh mi gaahn chroo aal kaina haad taimz kuda mi help di bradaz ahn sistaz fi ga korij ahn fi stay foakos pahn di “siti a di livin Gaad.” (Heeb. 12:22) Tudeh, fi wee fayt geh schranga wen wi reed bowt how Jehoava mi help Gidiyan, Bayrak, Dayvid, Samwel, ahn lata ada faytful peepl. (Heeb. 11:32-35) An eena fi wee taim wi ga lata faytful egzampl tu, ahn wahn lata bradaz ahn sistaz rait letaz tu werl hedkwaataz fi tel dehn how dehn fayt geh schranga afta dehn reed di laif stoari a wan a wi faytful bradaz ahn sistaz.

PAAL MI SHOA IH BRADAZ AHN SISTAZ HOW FI GA PEES WID WAN ANADA

7. Weh yu laan fahn Paal kongsl da Roamanz 14:19-21?

⁷ Wi bil op wi bradaz ahn sistaz eena di kangrigayshan wen wi seh ahn du tingz weh wahn mek wi ga pees. Noh bikaaz wi noh agree eena sertn tingz wi noh wahn ga yooniti. Ahn wi noh mek tingz aalwayz goh fi wee way, eevn if wi noh di goh gens Baibl prinsiplz. Tek fi egzampl di kangrigayshan da Roam. Som a di bradaz ahn sistaz da-mi Joo ahn som a dehn da-mi fahn ada nayshanz. Di Laa weh Gaad gi Moaziz mi inklood sohn laa weh seh dat Gaad peepl noh fi eet sertn kaina food, ahn peepl weh mi serv Gaad bifoa di Kristyan kangrigayshan staat op mi haftu obay da Laa. Bot Kristyanz neva deh anda da Laa, soh dehn kuda mi eet food weh da Laa seh Gaad peepl noh fi eet. (Maak 7:19) Fahn den aan, som a di Jooish Kristyanz mi staat eet aal kaina food. Bot som a di ada Jooish Kristyanz neva feel dat ih mi rait fi eet dehndeh food. Bikaaz a dis, di kangrigayshan mi divaid op. Paal mi help di bradaz ahn sistaz fi andastan dat ih moa impoatant fi ga pees wid wan anada. Hihn mi seh: “Ih beta noh fi eet meet ner jrink wain ner du eniting weh ku damij unu brada fayt.” (Reed Roamanz 14:19-21.) Paal mi help ih bradaz ahn sistaz fi si dat wen dehn noh gree, dat ku bee daynjaros tu adaz ahn tu di hoal kangrigayshan. Hihn mi eevn wilin fi chaynj di way ih goh aan soh dat ih noh stombl adaz. (1 Kor. 9:19-22) Wee ku bee laik Paal ahn bil op adaz ahn ga pees if wi chrai wi bes noh fi mek wahn big deel bowt sohnting weh wee prifaa fi du wi oan way bot sohnbadi els prifaa fi du it wahn nada way.

8. How Paal mi deel wid wahn sichuwayshan weh kuda mi damij di pees eena di kangrigayshan?

⁸ Paal mi set wahn gud egzampl a how fi ga pees wen yu noh gree pahn impoatant tingz. Wan taim, sohn bradaz ahn sistaz eena di fers-senchri kangrigayshan mi bileev dat di Kristyanz weh da neva Joo mi need fi geh serkomsaiz. Maybi dehn mi feel da way bikaaz dehn neva waahn di Jooz taak bad bowt dehn. (Gal. 6:12) Bot Paal neva gree wid dat ataal. Insteda chrai du tingz fi hihn oan way, hihn mi hombl an ih mi aks di apaslz an eldaz da Jeroosalem fi advais. (Aks 15:1, 2) Bikaaz a how Paal mi handl di sichuwayshan, di bradaz ahn sistaz eena di kangrigayshan kuda mi ga pees wid wan anada ahn bee hapi.—Aks 15:30, 31.

9. How wi ku kapi Paal egzampl?

⁹ If wahn seeryos sichuwayshan eva kom op, wi ku geh advais fahn dehn wan weh Jehoava apoint fi tek di leed eena di kangrigayshan. If wi du dat, wi wahn di kip di pees. Eena di poblikayshan dehn weh wi get chroo di aaganaizayshan, wi geh gud advais weh bays pahn Baibl prinsiplz. If wi foakos pahn dehndeh advais insteda wi oan opinyan, wi wahn di kip di pees eena di kangrigayshan.

10. Wat els Paal mi du fi kip di pees eena di kangrigayshan?

¹⁰ Paal neva foakos pahn di bad kwalitiz weh ih si eena ih bradaz ahn sistaz. Rada, hihn mi luk pahn di gud kwalitiz weh dehn shoa, ahn dat mi help kip di pees eena di kangrigayshan. Fi egzampl, da di en a ih leta tu di bradaz ahn sistaz da Roam, Paal mi seh gud tingz bowt dehn an ih eevn menshan lata dehn bai naym. Jos laik Paal, wi ku taak bowt di gud kwalitiz weh wi bradaz ahn sistaz gat. Wen wi du dat, wi bil op wi frenship wid wi bradaz ahn sistaz, ahn di lov eena di kangrigayshan wahn groa.

11. How wi ku geh bak pees wen wi ga prablemz?

¹¹ Sohntaim, eevn spirichwali machoar Kristyanz mait noh gree er dehn mait kwaaril wid eech ada. Dat da egzakli weh mi hapm wid Paal an ih gud fren Baarnabas. Wen dehn mi-di plan dehn neks mishineri chrip, wan a dehn mi waahn mek Maak goh lang wid dehn, bot di ada wan neva waahn. Sayka dat, wahn “big aagyument brok owt,” ahn too a dehn gaahn dehn oan way. (Aks 15:37-39) Bot Paal, Baarnabas, ahn Maak mi mek pees ahn dat mi shoa dat di pees ahn yooniti eena di kangrigayshan mi moa preshos tu dehn. Laytaraan, Paal mi taak gud bowt Baarnabas ahn Maak. (1 Kor. 9:6; Kol. 4:10) Jos laik dehn, wee need fi fiks eni prablem weh wi mait ga wid enibadi eena di kangrigayshan ahn kantinyu fi foakos pahn dehn gud kwalitiz. Eena da way, wi wahn ga pees ahn yooniti wid wan anada.—Ifee. 4:3.

PAAL MI HELP IH BRADAZ AHN SISTAZ FI SCHRENTN DEHN FAYT

12. Wat da som a di chalenjiz weh wi bradaz ahn sistaz di goh chroo?

¹² Wi bil op wi bradaz ahn sistaz wen wi help dehn fi schrentn dehn fayt eena Jehoava. Som a dehn ga peepl weh dehn werk wid, klaasmayts, an eevn famili weh teez dehn bikaaz dehn da Witnisiz. Adaz haftu deel wid sohn seeryos helt prablemz er dehn di chrai noh fi feel diskorij bikaaz sohnbadi hert dehn feelinz. Den dehn ga sohn ada bradaz ahn sistaz weh baptaiz fi sohn yaaz now ahn dehn di wayt fi wahn lang taim fi mek dis sistem kohn tu wahn en. Aala dehnya tingz ku tes wi bradaz ahn sistaz fayt. Di bradaz ahn sistaz eena di fers-senchri kangrigayshan mi gaahn chroo sohn simila sichuwayshan. Weh Paal mi du fi schrentn ih bradaz ahn sistaz?

13. How Paal mi help bradaz ahn sistaz weh mi geh teez sayka weh dehn bileev?

¹³ Paal mi yooz di Baibl fi schrentn ih bradaz ahn sistaz fayt. Fi egzampl, maybi di bradaz weh da-mi Joo neva noa weh fi seh wen dehn famili kritisaiz dehn ahn tel dehn dat di Jooish rilijan beta dan fi dehn wan. Fi shoar, di leta weh Paal mi sen tu di Heebroo Kristyanz mi schrentn dehn wahn lat. (Heeb. 1:5, 6; 2:2, 3; 9:24, 25) Di way how Paal mi eksplayn tingz mi help dehn fi noa weh fi seh tu enibadi, inkloodin dehn famili membaz weh neva serv Jehoava. Tudeh, sohn bradaz ahn sistaz di goh chroo di saym sichuwayshan. Wee ku help dehn yooz wi poblikayshan dehn weh bays pahn di Baibl fi eksplayn weh dehn bileev. An if peepl teez wi yong bradaz ahn sistaz bikaaz dehn bileev eena kriyayshan, wi ku help dehn fain infamayshan eena di Was Life Created? ahn The Origin of Life—Five Questions Worth Asking broashoar fi mek dehn shoa wai dehn bileev dat laif mi geh kriyaytid.

14. Weh Paal mi du eevn doa hihn mi bizi di preech ahn teech adaz?

¹⁴ Paal mi inkorij ih bradaz ahn sistaz fi shoa lov ahn du “gud werks.” (Heeb. 10:24) Hihn neva onli tel ih bradaz ahn sistaz gud tingz fi inkorij dehn, bot ih du gud tingz fi dehn tu. Fi egzampl, wen di bradaz ahn sistaz da Judeeya mi-di goh chroo wahn famin, Paal mi kehr dehn som a di tingz weh dehn mi need. (Aks 11:27-30) Eevn doa Paal mi bizi di preech ahn teech adaz, ih mi aalwayz luk fi wayz how fi help ih bradaz ahn sistaz geh di tingz weh dehn need. (Gal. 2:10) Wen ih du dat, ih mi help dehn fi chros dat Jehoava mi wahn tek kayr a dehn. Tudeh, wee ku bil op di fayt a wi bradaz ahn sistaz wen wi yooz wi taim, efoat, ahn skilz fi help du dizaasta rileef werk. Wahn nada way wi ku du dis da wen wi gi doanayshan tu di werlwaid werk. Wen wi du tingz laik dat, wi ku help wi bradaz ahn sistaz fi chros dat Jehoava wahn aalwayz dehdeh fi dehn.

15-16. How wi shuda chreet bradaz ahn sistaz wen dehn fayt week?

¹⁵ Paal mi kip di inkorij bradaz ahn sistaz wen dehn fayt mi week. Hihn mi shoa kompashan fi dehn ahn taak tu dehn eena wahn kain way ahn mek dehn feel komfatabl. (Heeb. 6:9; 10:39) Fi egzampl, eena ih leta tu di Heebrooz, hihn mi yooz di werd “wee” wen ih mi-di gi kongsl. Da way deh hihn mi shoa dat hihn mi inklood ihself ahn hihn mi haftu fala it tu. (Heeb. 2:1, 3) Jos laik Paal, wi noh waahn giv op pahn wi bradaz ahn sistaz wen dehn fayt week. Insteda dat, wi waahn kip di bil dehn op ahn shoa dat wi reeli kay bowt dehn. Wen wi du dat, wi shoa dat wi reeli lov dehn. Wen wi taak tu wi bradaz ahn sistaz eena wahn jentl ahn kain way wen wi di inkorij dehn, wi bil dehn op eevn moa.

¹⁶ Paal mi mek shoar di bradaz ahn sistaz noa dat Jehoava mi-di si dehn gud werks. (Heeb. 10:32-34) Wee ku du di saym ting wen wi di help wahn brada er wahn sista wen ih fayt week. Wi ku aks dehn fi tel wi how dehn mi laan di chroot er inkorij dehn fi tink bak pahn wayz how Jehoava mi help dehn eena di paas. Wi ku yooz dis taim fi help dehn si dat Jehoava noh ferget di tingz weh dehn du owta lov far ahn, an dat hihn wahn neva lef dehn pahn dehn oan. (Heeb. 6:10; 13:5, 6) Dehnya kaina kanvasayshan ku help dehnya bradaz ahn sistaz fi waahn kantinyu serv Jehoava.

“KIP AAN DI INKORIJ WAN ANADA”

17. Weh kaina skilz wi need fi gat?

¹⁷ Jos laik how wahn kanschrokshan werka skilz geh beta oava di yaaz, saym way soh wee geh beta eena di way wi bil op er inkorij wi bradaz ahn sistaz. Wi ku help adaz bayr op wen dehn goh chroo chraiyalz ahn mek dehn fayt schranga wen wi taak bowt di egzampl a adaz weh mi bayr op ahn stay faytful eena di paas. Wi ku promoat pees wen wi taak bowt di gud kwalitiz weh wi si eena wi bradaz ahn sistaz, wen wi noh du notn weh ku kaaz divizhan, ahn wen wi fiks eni prablem weh wi mait ga wid adaz. Ahn wi ku help bil op wi bradaz ahn sistaz fayt wen wi shayr impoatant Baibl chroot wid dehn, gi dehn di help weh dehn need, ahn sopoat dehn wen dehn spirichwali week.

18. Weh yoo mek op yu main fi du?

¹⁸ Dehn wan weh werk pahn kanschrokshan proajek fi Jehoava aaganaizayshan feel hapi ahn satisfai wid di werk weh dehn di du. Saym way soh, wen wi bil op di kangrigayshan eena wahn spirichwal way, ih mek wee feel hapi ahn satisfai. Noh mata how haad yu werk fi mantayn wahn hows, ih wahn stil brok op ahn ratn. Bot di werk weh wi du fi bil op di kangrigayshan wahn laas fareva! Soh mek wi mek op wi main fi “kip aan di inkorij wan anada ahn di bil op wan anada.”—1 Tes. 5:11.