Mek Gaad Vyoo a Alkohol Gaid Yu

FI SHOAR, yu graytful fi aala di gif dehn weh Jehoava gi yu, ahn yu aalso tankful dat hihn alow yu fi disaid how yu wahn yooz dehndeh gif. Di Baibl seh dat wain da wahn gif fahn Gaad. Ih eevn tel wi: “Food da fi mek wi hapi, ahn wain mek wi feel hapi tu.” (Eccl. 10:19; Ps. 104:15) Bot maybi yu geh fi si dat sohn peepl en op di ga wahn jrinkin prablem. Aalso, peepl rong di werl ga difrent opinyan bowt alkohol. Soh weh ku help wahn Kristyan fi mek waiz disizhanz bowt alkohol?

Wen wi mek disizhanz, wi need fi chros Gaad advais ahn noh weh peepl rong wi seh. Da way deh, wi wahn ku ga wahn hapiya laif.

Yu mosi noatis dat lata peepl eeda jrink aal di taim er dehn jrink haad. Som peepl jrink kaaz ih mek dehn rilaks. Adaz jrink fi stap wori bowt dehn prablemz. Ahn da ada plays, peepl tink dat sohnbadi weh ku jrink haad da wahn schrang persn.

Bot Kristyanz geh waiz advais fahn dehn lovin Kriyayta. Fi egzampl, hihn waan wi bowt di terabl rizolts a weh ku hapm wen sohnbadi geh jronk. Eena Proverbs 23:​29-35, wi reed bowt sohnbadi weh geh jronk ahn som a di bad tingz weh mi hapm tu ahn.a Daniel, wahn elda fahn Europe, memba weh ih laif yoostu bee laik bifoa hihn mi staat serv Jehoava. Daniel seh: “Sins Ah yoostu jrink wahn lat, Ah mi mek sohn bad disizhanz. Bikaaz a dat, Ah mi gaahn chroo sohn terabl tingz eena laif, ahn wen Ah tink bowt dehn, Ah stil feel bad.”

Aala wi ga di freedom fi mek wi oan disizhanz. Soh how Kristyanz ku mek waiz disizhanz an avoid di prablemz weh alkohol ku kaaz? Di bes ting fi du da fi alow Gaad tinkin fi gaid wi disizhanz.

Mek wi luk pahn weh di Baibl ga fi seh bowt alkohol ahn sohn reezn wai peepl jrink.

WEH DI BAIBL SEH BOWT ALKOHOL?

No way eena di Baibl seh dat ih rang fi mek sohnbadi jrink sohn alkohol. In fak, di Baibl seh dat wen wahn persn jrink wain dat ku mek ahn hapi. Dis da weh ih seh: “Goh, eet yu food eena hapinis, ahn jrink yu wain wid wahn hapi haat.” (Eccl. 9:7) An eevn Jeezas mi jrink wain, ahn som a Jehoava ada faytful servants mi jrink wain tu.—Mach. 26:​27-29; Look 7:34; 1 Tim. 5:23.

Soh di Baibl noh seh dat ih rang fi jrink sohn alkohol, bot ih doo seh dat ih rang fi geh jronk. Ih seh: “Unu noh fi jrink lata wain ahn geh jronk needa.” (Ifee. 5:18) An ih eevn seh dat wahn “jronkad . . . noh wahn bee no paat a Gaad Kingdom.” (1 Kor. 6:10) Soh wi si dat Jehoava noh laik wen wahn persn jrink haad er geh jronk. Insteda mek disizhanz weh bays pahn weh peepl rong wi du, wee mek disizhanz weh mek Gaad hapi.

Som peepl feel laik dehn ku jrink wahn lat widowt geh jronk. Bot dis kaina tinkin veri daynjaros. Di Baibl mek it klyaa dat wahn persn weh “jrink lata wain” ku mek seeryos mistayks ahn damij ih rilayshanship wid Jehoava. (Taitos 2:3; Prov. 20:1) Ahn Jeezas mi waan dat wahn persn weh “jrink tu moch” wahn kyaahn bee paat a Gaad nyoo werl. (Look 21:​34-36) Weh ku help wahn Kristyan fi avoid di prablemz weh ku kom op kaaz a alkohol?

TINK BOWT WAI, WEN, ER HUMOCH YU JRINK

Ih daynjaros fi mek tingz laik wi kolcha afek di disizhanz wi mek bowt alkohol. Kristyanz aalwayz chrai pleez Jehoava, eevn eena disizhanz dehn mek bowt weh fi eet ahn weh fi jrink. Di advais eena di Baibl rimain wi: “Weda [wi] di eet er jrink er du eniting els, [wi] mos du evriting fi bring gloari tu Gaad. (1 Kor. 10:31) Now mek wi taak bowt sohn Baibl prinsiplz ahn kweschanz weh ku help wi:

Ai jrink soh dat Ah ku fit een wid di krowd? Eksodos 23:2 seh: “Unu noh fi du bad tingz jos bikaaz dat da weh evribadi els di du.” Eena dis vers, Jehoava mi-di waan di Izrelaits fi noh fala peepl weh noh di serv hihn. Dis advais stil gud fi Kristyanz tudeh. If wi mek peepl afek wi tinkin ahn disizhanz bowt alkohol, den lee bit bai lee bit, dis ku mek wi looz wi frenship wid Jehoava.—Roam. 12:2.

Ai jrink fi shoa aaf how schrang Ah schrang? Eena sohn kolcha, ih kaman fi si peepl di jrink aafn ahn di jrink haad. (1 Peet. 4:3) Bot noatis di waiz advais weh deh eena 1 Korintyanz 16:​13, weh seh: “Unu mos aalwayz deh pahn unu gyaad. Stan op schrang eena di fayt. Aalwayz shoa korij ahn schrentn unuself.” Yu tink alkohol ku mek wahn persn bee schrang? Non ataal! Alkohol ku mek wahn persn noh tink klyaa ahn mek bad disizhanz. Soh wen wahn persn jrink wahn lata alkohol ih noh mek da persn schrang. Bot insteda dat, ih mek wahn persn ak foolish. Isaiah 28:7 tel wi how wen sohnbadi schray weh sayka jrink, dehn staga ahn stombl.

Jehoava da di wan weh gi wi reel schrent. Ahn wahn schrang persn wahn aalwayz deh pahn ih gyaad ahn stan op schrang eena di fayt. (Ps. 18:32) Wahn chroo Kristyan ku bee schrang if ih luk owt fi daynja an avoid it. Dat wahn help ahn fi noh mek foolish disizhanz weh ku damij ih rilayshanship wid Jehoava. Jeezas da-mi wahn schrang persn; hihn mi ga wahn schrang rilayshanship wid ih Pa. Ahn lata peepl mi rispek ahn bikaaz ih mi ga korij an aalwayz waahn du weh rait.

Ai jrink soh dat Ah ku ferget bowt mi prablemz? Dis da weh wahn saamis mi rait: “Wen Ah feel laik mi woriz da tu moch fi mek Ah deel wid, yu [Jehoava] komfert mi ahn kaam mi soal.” (Ps. 94:19) If yu di wori bowt yu prablemz, aks Jehoava fi help, noh pen pahn alkohol. Pray tu Jehoava moa ahn moa ahn hihn wahn help yu fi noh wori. Wahn lata bradaz ahn sistaz aalso aks machoar frenz eena di kangrigayshan fi advais. Wen wahn persn jrink alkohol fi deel wid ih prablemz, ih noh wahn tink schrayt an ih wahn haada fi mek ih du weh rait. (Hos. 4:11) Daniel, weh wi mi taak bowt erliya, mi seh: “Bikaaz Ah mi aalwayz feel nervos, frayd, worid, schres owt, ahn gilti, Ah mi jrink wahn lat. Bot dis mi onli bring moa prablemz an Ah looz wahn lata mi frenz ahn rispek fi miself.” Weh mi help Daniel fi deel wid ih prablem? Hihn seh: “Ah mi riyalaiz dat Ai mi need Jehoava fi help mi, noh alkohol. Wen Ah staat pen pahn Jehoava, dat da weh help mi fi deel wid mi prablemz.” Eevn if wi noh si wahn way owt, wi noa fi shoar dat Jehoava wahn aalwayz dehdeh fi help wi.—Fil. 4:​6, 7; 1 Peet. 5:7.

If yu chooz fi jrink, ih gud fi mek yu chek how aafn er humoch yu jrink. Yu ku aks yuself dehnya kweschanz: ‘Enibadi eena mi famili er wahn kloas fren eva tel mi dat dehn di wori bowt humoch Ah jrink?ʼ If dat da di kays, ih ku bee dat yu di staat tu ga er yu don ga wahn jrinkin prablem ahn noh eevn noa it. ‘Ah di jrink moa dan weh Ah yoostu?ʼ If yoo di jrink moa dan weh yu yoostu jrink, den ih pasabl dat yoo di geh adiktid. ‘Ai fain it haad fi mek sohn dayz paas widowt Ah jrink alkohol?ʼ If yu ansa da yes, den yu mait ga wahn jrinkin prablem. Dis meenz dat yu mait need fi geh help fahn wahn profeshanal fi help yu wid yu jrinkin prablem.

Bikaaz jrinkin ku kaaz wahn lata prablemz, sohn Kristyanz mek op dehn main fi noh jrink non ataal. An adaz mait noh jrink alkohol er lika bikaaz dehn jos noh laik how ih tays. If wan a yu frenz chooz noh fi jrink, yu ku shoa ahn rispek ahn noh kritisaiz ahn.

Maybi yu disaid dat di bes ting fi mek yu du da fi set wahn limit pahn humoch er how aafn yu wahn jrink alkohol. Som disaid fi jrink wans a week, ahn som disaid fi jrink wahn lee bit wen dehn eet. Som peepl chooz fi onli jrink byaa er wain ahn no haad lika, nat eevn eena dehn miks jrink. Wans wahn persn don mek op ih main bowt how aafn er weh ih wahn jrink, ih wahn bee eeziya fi mek ih stik tu weh ih disaid fi du. Wahn machoar Kristyan noh fi feel shaym bowt di disizhanz weh ih mek.

Wen yu di mek wahn disizhan bowt alkohol, yu need fi tink bowt how adaz feel tu. Roamanz 14:21 seh: “Ih beta noh fi eet meet ner jrink wain ner du eniting weh ku damij unu brada fayt.” How yu ku aplai disya kongsl? Bee lovin. If yu noa dat yu wahn ofen sombadi if yu tek wahn lee jrink, lov wahn moov yu fi noh jrink wen yu deh rong ahn. Wen yu du dis, yu shoa dat yu rispek adaz ahn noh onli kay bowt yuself.—1 Kor. 10:24.

Eena sohn konchriz, dehn eevn ga sohn laa bowt alkohol, ahn Kristyanz obay dehndeh laa. Dehndeh laa mait seh how oal sohnbadi fi bee fi staat jrink. Eena lata plays, ih gens di laa fi jraiv wahn veekl er ron wahn hevi masheen if yu di jrink.—Roam. 13:​1-5.

Jehoava gi wi wahn lata gud gif, ahn wan a dehn da fi bee aybl fi chooz how wi wahn yooz dehndeh gif. Wi ga di freedom fi chooz weh wi wahn eet ahn weh wi wahn jrink. Soh mek wi disizhanz shoa dat wi reeli valyu wi freedom ahn yooz it fi pleez Jehoava.