Wahn Disizhan Weh Aala Wi Need fi Mek

If yoo wuda waahn goh da wahn plays weh yu neva gaahn bifoa, weh yu wuda du?

1. 1. Yu wuda goh di way yu tink yu shuda goh?

2. 2. Yu wuda fala adaz ahn hoap dat dehn noa di way?

3. 3. Yu wuda chros wahn map er wahn gud fren weh noa di way?

If wi pik eeda wan a di fers too opshanz, wi wahn reech sohnweh bot noh egzakli di plays weh wi waahn goh. Bot if wi pik di terd opshan, fi shoar wi wahn reech wehpaat wi waahn goh.

Wi laif da laik wahn jerni ahn wi hoap ih leed wi tu wahn hapi fyoocha. If dat da di kaina laif weh wi waahn, ih veri impoatant fi saach fi di rait advais wen wi di mek disizhanz.

Wail moas disizhanz wi mek da smaal disizhanz, som disizhanz veri impoatant. Dehndeh impoatant disizhanz weh wi mek shoa weh wi bileev bowt weh rait ahn weh rang. Ahn dehn wahn afek er help wi ahn di peepl weh wi lov fi wahn lang taim. Dehnya disizhanz da bowt tingz weh ga fi du wid:

• Seks ahn marij

• Werk, moni, ahn how fi bee aanis

• How fi rayz pikni

• How fi chreet adaz

How yu ku bee shoar dat di disizhanz weh yu mek ku help yoo ahn yu famili ga wahn hapi fyoocha?

Eech wan a wi shuda aks wiself dis kweschan: Weh ku help mee mek gud disizhanz bowt weh rait ahn weh rang?

Dis magazeen ku help yu andastan wai di Baibl ku help yu mek gud disizhanz bowt weh rait ahn weh rang.