Kapi Jeezas ahn Bee Eega fi Preech

1. Weh mek wee difrent fahn ada peepl eena di werl?

WI GA wahn schrang dizaiya fi preech, ahn dat mek wi difrent fahn ada peepl weh klaym dehn da Kristyanz. (Tai. 2:14) Bot sohntaim, yu mait fain it haad fi kip da dizaiya schrang. Wahn haad-werkin elda mi seh, “Sohntaim, Ah jos noh feel laik preech.” Yoo eva feel laik dat?

2. Weh ku mek it haad fi kip wahn schrang dizaiya fi di minischri?

² Wi mait moa eksaitid fi du ada tingz eena Jehoava servis insteda goh preech. Wai? Bikaaz wen wi bil Kingdom Haal er ada bildin, wen wi help owt wi bradaz afta wahn dizaasta, er wen wi inkorij wi bradaz ahn sistaz, wi mait si di gud rizolts rait away, ahn dat mek wi feel gud. Wen wi werk wid wi bradaz, wi feel pees ahn yooniti ahn wi shoa lov fi wan anada. Ahn wi noa wi bradaz ahn sistaz tankful fi weh wi du fi dehn. Bot wi mait feel difrent bowt di preechin werk. Ih ku bee dat wi di preech fi lata yaaz eena di saym teritori ahn bayli enibadi rispan. Wi mait eevn meet peepl weh rijek di mesij weh wi di preech. An az di en geh kloasa, moa peepl wahn ton gens wi. (Mach. 10:22) Weh ku help fi kip wi dizaiya schrang er eevn mek it schranga?

3. Weh wi ku laan fahn Jeezas iloschrayshan da Look 13:​6-9?

³ Wi ku laan fahn Jeezas egzampl bowt how fi bee eega eena wi minischri. Joorin fi hihn minischri, ih neva sloa dong. Akchwali, az taim paas ih werk haada. (Reed Look 13:​6-9.) Jeezas da-mi laik di man weh werk eena di aachad. Di man mi-di tek kayr a wahn fig chree fi chree yaaz an ih neva bayr froot. Bot di man neva giv op. Jos laik dat, Jeezas mi spen chree yaaz di preech tu di Jooz, bot moas a dehn neva aksep di mesij. Jos laik how di man eena di aachad neva giv op pan ih fig chree, Jeezas neva giv op pahn peepl er sloa dong eena ih minischri. Rada, ih mi werk haada fi reech peepl haat.

4. Wat da foa tingz wi ku laan fahn Jeezas egzampl?

⁴ Eena dis aatikl, wi wahn taak bowt how Jeezas mi shoa eeganis eena ih minischri, espeshali joorin ih laas siks monts. (Luk op di “After these things” noat pahn Look 10:1 eena di Study Bible.) Wi ku shoa da saym eeganis if wi laan fahn weh hihn teech ahn weh ih du. Mek wi luk pahn foa tingz weh wi ku laan fahn Jeezas: (1) Ih mi foakos pahn weh Jehoava mi waahn ih du, (2) ih mi pay atenshan tu Baibl prafesi, (3) ih mi chros dat Jehoava mi wahn help ahn, an (4) ih mi kip di hoap dat peepl mi wahn lisn tu ahn.

IH MI FOAKOS PAHN WEH JEHOAVA MI WAAHN IH DU

5. How Jeezas mi shoa dat hihn mi foakos pahn weh Gaad mi waahn ih du?

⁵ Jeezas mi eega fi “preech di gud nyooz a di Kingdom” bikaaz ih mi noa weh Gaad waahn ih du. (Look 4:43) Jeezas mek di minischri bee di moas impoatant ting eena ih laif. Eevn joorin di laas fyoo monts a ih minischri, ih mi chravl “fahn siti tu siti ahn fahn vilij tu vilij” di teech peepl. (Look 13:22) Hihn mi aalso chrayn ada disaiplz fi preech laik hihn.—Look 10:1.

6. Weh di preechin werk ga fi du wid eni ada asainment weh wi gat? (Koment pahn di picha.)

⁶ Di mayn werk weh Jehoava ahn Jeezas waahn wi du da fi preech. (Mach. 24:14; 28:​19, 20) Evri ada asainment weh wi geh da fi sopoat di preechin werk. Fi egzampl, wi bil Kingdom Haal soh dat peepl weh wi preech tu ku kohn wership Jehoava. Wen dehn ga wahn dizaasta, wi mek shoar dat wi bradaz ahn sistaz geh weh dehn need soh dat dehn ku goh bak da meetin ahn staat preech agen. If wi memba dat di preechin werk da di moas impoatant werk weh Jehoava waahn wi du, wi wahn feel wahn schranga dizaiya fi preech regyula. Wahn elda fahn Hungary weh naym János seh, “Ah aalwayz tel miself dat no ada asainment ku tek di plays a di preechin werk. Dat da di moas impoatant werk.”

7. Wai Jehoava waahn wi kip aan di preech? (1 Timoti 2:​3, 4)

⁷ Jehoava waahn peepl hyaa an aksep di gud nyooz kaaz hihn noa dat dat wahn sayv dehn laif. (Reed 1 Timoti 2:​3, 4.) Wi wahn bee moa eega fi preech if wi laan fi feel di way how Jehoava feel bowt peepl. Ahn hihn help wi fi preech ahn teech beta. Fi egzampl, di broashoar weh naym Lov Peepl ahn Teech Dehn fi Fala Jeezas gi wi sohn gud sojeshan weh ku help wi staat kanvasayshan ahn teech peepl fi fala Jeezas. Eevn if peepl noh staat serv Jehoava now, dehn mait geh di chaans fi du dat bifoa di en a di grayt chribyulayshan. Weh wee tel dehn now mait help dehn fi serv Jehoava eena di fyoocha. Bot dat onli pasabl if wi kip aan di preech.

IH MI PAY ATENSHAN TU BAIBL PRAFESI

8. How Baibl prafesi mi help Jeezas mek gud yoos a ih taim?

⁸ Jeezas mi andastan how Baibl prafesi mi wahn kohn chroo, soh hihn mi noa dat ih mi onli ga chree an haaf yaaz lef fi finish di werk weh Gaad sen ahn fi du. (Dan. 9:​26, 27) Hihn mi noa weh di prafesi seh bowt wen ahn how ih mi wahn ded. (Look 18:​31-34) Bikaaz hihn mi andastan dat fi hihn taim mi shaat, hihn mi werk reeli haad fi preech wid eeganis.

9. How Baibl prafesi help wi fi kantinyu bee eega fi preech?

⁹ If wi andastan Baibl prafesi, wi wahn bee eega fi preech. Dis sistem noh ga lang fi goh. Wi si dat tingz weh di hapm ahn how peepl bihayv da jos laik weh di Baibl seh mi wahn hapm eena di laas dayz. Baibl prafesi tel wi dat di king a di sowt, weh stan fi di United States ahn Britain, ahn di king di naat, weh stan fi Russia ahn di difrent govament weh tek said wid dehn, wahn deh gens wan anada “joorin di taim a di en.” (Dan. 11:40) Di fut a di stachu da Daniel 2:​43-45 stan fi di United States ahn Britain. Bays pahn Baibl prafesi, wi ku bee shoar dat soon Gaad Kingdom wahn dischrai aal hyooman govaments. Aala dehnya prafesi shoa dat di taim weh lef shaat, ahn soh wi waahn mek gud yoos a wi taim fi preech di gud nyooz.

10. Wat da sohn ada wayz how Baibl prafesi ku help wi bee eega fi preech?

¹⁰ Baibl prafesi gi wi gud nyooz weh wi eega fi shayr wid adaz. Carrie, wahn sista weh di serv da di Dominican Republic, seh: “Wen Ah tink bowt di byootiful tingz weh Jehoava pramis wi fi di fyoocha, Ah feel laik Ah haftu tel adaz bowt dehn. Wen Ah si evriting weh peepl haftu deel wid tudeh, Ah riyalaiz dat dehndeh pramis da fi dehn tu, noh jos fi mee.” Baibl prafesi help wi fi kantinyu preech bikaaz Jehoava deh bihain di preechin werk. Leila, wahn sista fahn Hungary, seh: “Isaiah 11:​6-9 teech mi dat enibadi ku chaynj, ahn dat help mi fi preech di gud nyooz tu peepl eevn if Ah tink dat dehn noh wahn lisn.” Christopher, wahn brada fahn Zambia, seh: “Maak 13:10 seh dat di gud nyooz wahn geh preech aal oava di werl, an Ah feel da wahn privilij fi help mek dis prafesi kohn chroo.” Weh Baibl prafesi moov yoo fi kantinyu bee eega fi preech?

IH MI CHROS DAT JEHOAVA MI WAHN HELP AHN

11. Wai Jeezas mi need fi chros dat Jehoava mi wahn help ahn preech wid eeganis? (Look 12:​49, 53)

¹¹ Jeezas mi chros dat Jehoava mi wahn help ahn preech wid eeganis. Eevn doa Jeezas mi shoa rispek wen ih preech, hihn mi noa dat som peepl mi wahn geh beks ahn ster op chrobl. (Reed Look 12:​49, 53.) Di rilijos leedaz mi hayt weh Jeezas mi-di preech, soh dehn mi chrai kil ahn. (Jan 8:59; 10:​31, 39) Stilyet, Jeezas neva stap preech, kaaz ih mi noa dat Jehoava mi deh wid ahn. Jeezas mi seh: “Hihn noh abandan mi, kaaz Ai aalwayz du di tingz weh pleez hihn.”—Jan 8:29.

12. How Jeezas mi help ih disaiplz fi kantinyu preech eevn wen adaz mi ton gens dehn?

¹² Jeezas mi rimain ih disaiplz dat dehn tu ku pen pahn Jehoava fi sopoat. Ih pramis dehn oava ahn oava dat Jehoava wuda help dehn eevn wen peepl ton gens dehn. (Mach. 10:​18-20; Look 12:​11, 12) Bikaaz Jeezas mi noa dat lata peepl mi wahn deh gens di gud nyooz, hihn mi tel ih disaipl dehn fi bee kyaaful. (Mach. 10:16; Look 10:3) Hihn mi aalso tel dehn fi noh foas peepl fi lisn if dehn noh waahn. (Look 10:​10, 11) An ih tel dehn fi ron weh if peepl chrai persikyoot dehn. (Mach. 10:23) Eevn doa Jeezas mi eega fi preech an ih chros Jehoava, ih neva put ihself eena daynja if ih neva haftu.—Jan 11:​53, 54.

13. How yu ku bee shoar dat Jehoava wahn help yoo?

¹³ Peepl deh gens di werk weh wi du, soh wi need Jehoava help fi tel peepl bowt di gud nyooz. (Rev. 12:17) Wai yu kee bee shoar dat Jehoava wahn help yoo? Bikaaz eena Jan chapta 17 wi reed dat Jeezas mi pray an aks Jehoava fi wach oava ih apasl dehn, ahn Jehoava mi ansa da pryaa. Di buk a Aks tel wi how Jehoava mi help di apasl dehn fi preech wid eeganis eevn wen dehn mi-di goh chroo persikyooshan. Wen Jeezas mi pray fi di apasl dehn, ih mi aalso pray fi enibadi weh put fayt eena di gud nyooz, ahn dat inklood yoo. Jehoava stil di ansa Jeezas pryaa. Jos laik how hihn mi help di apasl dehn, hihn wahn help yoo tu.—Jan 17:​11, 15, 20.

14. How wi noa wi wahn ku kantinyu preech wid eeganis? (Koment pahn di picha.)

¹⁴ Eevn if ih geh haada fi preech di kloasa wi get tu di en a dis sistem, wi wahn stil geh aal di help wi need. (Look 21:​12-15) Wee du laik how Jeezas an ih apasl dehn mi du. Wi lef it op tu peepl fi disaid weda er nat dehn wahn lisn, ahn wi noh aagyu wid dehn. Eevn eena konchriz weh ih noh leegal fi preech, wi bradaz stil fain wahn way fi preech di gud nyooz bikaaz dehn chros Jehoava ahn noh pen pahn dehn oanself. Eena di fers senchri, Jehoava mi gi ih servants di schrent weh dehn mi need fi preech di gud nyooz. Tudeh tu, hihn gi wee di schrent weh wi need fi “preech tu peepl fahn aala di nayshan dehn bowt aal weh di werd a Gaad seh” til hihn seh di werk don. (2 Tim. 4:17) Yu ku bee shoar dat if yu pen pahn Jehoava, yu wahn ku kantinyu bee eega fi preech.

IH MI KIP DI HOAP DAT PEEPL MI WAHN LISN TU AHN

15. How wee noa dat Jeezas mi shoar dat peepl mi wahn lisn tu di gud nyooz?

¹⁵ Jeezas mi shoar dat sohn peepl stil mi wahn lisn tu di gud nyooz. Dat mi help ahn fi bee eega fi preech. Fi egzampl, bowt wahn yaa afta Jeezas staat preech, hihn mi si dat lata peepl mi wilin fi lisn tu di gud nyooz ahn dat dehn da-mi laik wahn feel weh raip ahn redi fi reep. (Jan 4:35) Bowt wahn yaa layta, ih mi tel ih disaipl dehn dat “lata werk deh fi du eena di haavis.” (Mach. 9:​37, 38) Laytaraan, agen ih tel dehn: “Lata werk deh fi du eena di haavis . . . Bayg di Maasta a di haavis fi sen owt moa werkaz intu fi hihn haavis.” (Look 10:2) Jeezas mi shoar dat sohn peepl stil mi wahn lisn tu di gud nyooz, ahn hihn mi rijais wen dehn mi du dat.—Look 10:21.

16. Weh iloschrayshanz Jeezas mi yooz fi help wi si dat wi preechin werk wahn bring gud rizolts? (Look 13:​18-21) (Koment pahn di picha.)

¹⁶ Jeezas mi teech ih disaipl dehn dat di mesij weh dehn preech wahn bring gud rizolts. Kansida too a ih iloschrayshan. (Reed Look 13:​18-21.) Jeezas mi kompyaa di mesij tu wahn lee mostad seed weh wuda groa intu wahn big chree. Weh dat meen? Lata peepl wuda aksep di gud nyooz ahn notn kuda stap dat fahn hapm. Eena ih neks iloschrayshan, ih mi kompyaa di Kingdom mesij tu ees. Weh dat meen? Di gud nyooz wuda geh preech aal oava di werl an ih wuda help peepl mek chaynjiz eena dehn laif, eevn if nobadi els noh seeʼt rait away. Soh Jeezas mi help ih disaiplz si dat di gud nyooz wuda chaynj lata peepl laif.

17. Weh gud reezn wi ga fi kantinyu preech?

¹⁷ Wen wi tink bowt how di preechin werk help lata peepl aal oava di werl, ih mek wi waahn kantinyu preech wid jai. Evri yaa, milyanz a peepl kohn da di Memoaryal ahn stodi di Baibl wid wi. Lata peepl get baptaiz ahn jain wi eena di preechin werk. Wi noh noa humoch peepl wahn aksep di gud nyooz, bot wi doo noa dat Jehoava di gyada wahn big krowd a peepl weh wahn servaiv di grayt chribyulayshan. (Rev. 7:​9, 14) Jehoava da di Maasta a di haavis, ahn hihn stil kanfident dat lata peepl wahn aksep di gud nyooz, soh wi ga gud reezn fi kip aan di preech.

18. Weh wi waahn peepl noatis bowt wi wen wi di preech?

¹⁸ Jeezas disaiplz ga di repyutayshan dat dehn aalwayz eega fi preech di gud nyooz. Wen di peepl mi si how di apasl dehn preech wid korij, “dehn riyalaiz dat dehn yoostu goh rong goh preech wid Jeezas.” (Aks 4:13) Ahn wen peepl si wee owt di preech, wi waahn dehn si wi di kapi Jeezas egzampl ahn preech wid eeganis.