“Chooz fi Unuself Tudeh Hoo Unu Wahn Serv”

1. Weh wi need fi du if wi waahn bee reeli hapi, ahn wai? (Isaiah 48:​17, 18)

WI HEVNLI Faada lov wi wahn lat, an ih waahn wi injai laif now an eena di fyoocha. (Ikl. 3:​12, 13) Di way hihn mek wi alow wi fi du lata amayzin tingz, bot ih neva mek wi fi rool wiself er fi disaid fi wiself weh rait ahn weh rang. (Ikl. 8:9; Jer. 10:23) Hihn noa dat fi mek wi ku bee reeli hapi wi need fi serv an obay ahn.—Reed Isaiah 48:​17, 18.

2. Weh Saytan waahn wi bileev, ahn weh Jehoava du bowt it?

² Saytan waahn wi bileev dat wi noh need Jehoava, dat wi ku rool oava wi oanself. (Jen. 3:​4, 5) Soh Jehoava alow hyoomanz fi rool oava dehnself fi sohn taim. Ahn wen wi luk pan di werl tudeh, wi ku si dat hyoomanz kyaahn rool oava dehnself. Bot di Baibl taak bowt lata man ahn wuman weh mi hapi di serv Jehoava, ahn di hapiyis wan owta aala dehn da Jeezas. Soh mek wi si wai Jeezas mi chooz fi serv Jehoava. Ahn wi wahn si wai Jehoava dizerv wi wership ahn wai wee chooz fi serv Jehoava.

WAI JEEZAS CHOOZ FI SERV JEHOAVA

3. Weh Saytan mi aafa Jeezas, ahn weh disizhan Jeezas mi mek?

³ Lee bit afta Jeezas geh baptaiz, Saytan aafa fi giv ahn aala di kingdom a di werl ahn dehn richiz if hihn wuda wership ahn jos wan taim. Jeezas mi shoa hoo hihn chooz fi wership wen ih seh: “Goh fahn ya, Saytan! Kaaz di Skripchaz seh: ‘Da Jehoava yu Gaad yu fi wership, ahn da onli hihn wan yu fi serv.ʼ” (Mach. 4:​8-10) Wai Jeezas mek da disizhan? Mek wi luk pahn sohn reezn.

4-5. Wat da sohn reezn wai Jeezas chooz fi serv Jehoava?

⁴ Di mayn reezn wai Jeezas chooz fi serv Jehoava da bikaaz Jeezas reeli lov ih Pa. (Jan 14:31) Jeezas aalso chooz fi serv Jehoava bikaaz da di rait ting fi du. (Jan 8:​28, 29; Rev. 4:11) Ahn Jeezas noa dat laif kohn fahn Jehoava, dat ih ku chros ahn eena evriting, ahn dat ih jenaros. (Saa. 33:4; 36:9; Jay. 1:17) Jehoava aalwayz tel Jeezas di chroot, an evriting Jeezas ga kohn fahn ih Pa. (Jan 1:14) Bot sayka Saytan lata peepl ded. Hihn laiyad, greedi, ahn selfish. (Jan 8:44) Jeezas noa di too a dehn, an ih neva eevn tink bowt fala Saytan ahn ribel gens Jehoava.—Fil. 2:​5-8.

⁵ Wahn neks reezn wai Jeezas chooz fi serv Jehoava da bikaaz a di lata gud tingz weh wuda hapm if hihn stay laayal. (Heeb. 12:2) Hihn wuda mek Jehoava naym hoali ahn mek it pasabl fi geh rid a sin ahn det.

WAI JEHOAVA DIZERV WI WERSHIP

6-7. Wai lata peepl noh serv Jehoava, bot wai hihn dizerv wi wership?

⁶ Lata peepl noh serv Jehoava bikaaz dehn noh noa ahn. Dehn noh noa bowt fi hihn byootiful kwalitiz ahn weh aal hihn du fi dehn. Di peepl weh Paal mi preech tu da Atenz da-mi laik dat.—Aks 17:​19, 20, 30, 34.

⁷ Paal mi eksplayn tu dehn dat Gaad “giv evribadi laif ahn bret an evriting els,” ahn dat “sayka hihn wee ku moov an egzis.” Gaad mek evriting, ahn “fahn wan man hihn mek aala di nayshan dehn,” soh hihn ga di rait fi mek wi wership ahn.—Aks 17:​25, 26, 28.

8. Weh Jehoava wahn neva du, ahn how hihn shoa dat ih lov wi wahn lat?

⁸ Jehoava da di Kriyayta ahn di Moas Hai, ahn hihn ku du wateva hihn waahn. If hihn waahn, hihn ku foas peepl fi wership ahn. Bot hihn wuda neva du dat. Insted, ih gi wi lata proof dat hihn egzis ahn dat ih lov wi wahn lat. Hihn waahn az moch peepl az pasabl fi bee fi hihn fren fareva. (1 Tim. 2:​3, 4) Dat da wai Jehoava chrayn wi fi teech peepl bowt di gud tingz weh hihn wahn du fi peepl eena di fyoocha ahn how hihn wahn du dehn. (Mach. 10:​11-13; 28:​19, 20) Ih aalso gi wi di kangrigayshan, wehpaat wi ku wership ahn an geh help fahn lovin eldaz.—Aks 20:28.

9. Eena weh wayz Jehoava shoa dat ih lov peepl?

⁹ Wi ku reeli si how grayt Jehoava lov wen wi si how hihn chreet peepl weh chooz fi ignoar ahn. Fahn eva sins, lata peepl chooz fi liv bai dehn oan standadz a weh rait ahn weh rang. Stilyet, Jehoava gi dehn laif ahn weh dehn need fi injai it. (Mach. 5:​44, 45; Aks 14:​16, 17) Bikaaz a hihn, dehn ku ga frenz ahn famili weh lov dehn, dehn ku ga chiljren, dehn ku werk, ahn dehn ku injai laif. (Saa. 127:3; Ikl. 2:24) Aala dehnya tingz shoa wi dat wi lovin Pa lov evribadi. (Eks. 34:6) Mek wi taak bowt som a di reezn wai wi chooz fi serv Jehoava ahn how hihn bles wi wen wi du dat.

WAI WI CHOOZ FI SERV JEHOAVA

10. (a) Wat da di mayn reezn wai wi serv Jehoava? (Machyu 22:37) (b) How yu benifit fahn Jehoava payshens ahn fergivnis? (Saam 103:​13, 14)

¹⁰ Jos laik Jeezas, di mayn reezn wai wee chooz fi serv Jehoava da bikaaz wi reeli lov ahn. (Reed Machyu 22:37.) Di moa wi geh fi noa Jehoava, di moa wi waahn jraa kloasa tu ahn. Fi egzampl, Jehoava veri payshent wid wi an ih fergiv wi fi wi sinz. Wen di Izrelait dehn neva obay ahn, hihn beg dehn: “Pleez ton bak fahn unu badnis.” (Jer. 18:11) Jehoava memba dat wi noh perfek ahn dat wi mek owta dos. (Reed Saam 103:​13, 14.) How yoo feel wen yu tink bowt Jehoava payshens ahn fergivnis? Dat noh mek yu waahn serv ahn fareva?

11. Wat da sohn ada reezn wai wi chooz fi serv Jehoava?

¹¹ Wahn nada reezn wai wi chooz fi serv Jehoava da bikaaz wi noa da di rait ting fi du. (Mach. 4:10) Ahn wi noa dat lata gud tingz wahn hapm if wi stay laayal tu ahn. Wen wi laayal tu Jehoava, wi mek fi hihn naym hoali, wi proov dat Saytan laiyad, ahn wi mek Jehoava hapi. An if wi chooz fi serv Jehoava now, wi ga di hoap fi serv ahn fareva!—Jan 17:3.

12-13. Weh wi laan fahn Jane ahn Pam?

¹² Fahn wi yong, wi ku laan fi lov Jehoava wahn lat ahn fi mek wi lov kip di geh schranga az wi geh oalda. Dat da weh mi hapm tu Jane ahn Pam.a Wen dehn fers staat stodi di Baibl, Jane mi 11 ahn Pam mi 10. Fi dehn payrents neva waahn stodi, bot dehn mi alow Jane ahn Pam fi stodi wid di Witnisiz az lang az dehn goh da cherch wid di famili pahn di weeken. Jane seh, “Weh di Witnisiz teech mi fahn di Baibl help mi fi noh tek jrogz er komit sekshwal imoraliti laik weh mi ada klaasmayt dehn du.”

¹³ Wahn fyoo yaaz layta, dehn staat tu preech wid di kangrigayshan. Laytaraan, dehn staat tu painyaa eevn doa dehn mi-di tek kayr a dehn payrents. Jane seh how shee feel bowt aal weh Jehoava du fi shee an ih sista; ih seh: “Ah laan dat Jehoava reeli kay fi ih frenz, ahn laik weh 2 Timoti 2:19 seh, ‘Jehoava noa hoo bilangz tu hihn.ʼ” Fi shoar Jehoava kay fi dehn wan weh chooz fi lov ahn serv ahn!

14. How wi ku difen Jehoava naym? (Koment pahn di picha.)

¹⁴ Wi waahn mek peepl noa dat di bad tingz weh dehn hyaa bowt Gaad da noh chroo. Fi egzampl, tink bowt wahn kloas fren weh kain, jenaros, ahn fergivin. Bot wan day, yu hyaa sohnbadi seh dat yu fren kruwil ahn laiyad. Yu wuda stan op far ahn, noh chroo? Saym way soh, wen wi hyaa sohnbadi tel lai bowt Jehoava, wi wahn difen ih naym ahn tel di chroot bowt ahn. (Saa. 34:1; Isa. 43:10) Wen wi difen Jehoava wid weh wi seh ahn du, wi proov dat wi waahn serv ahn wid wi hoal haat.

15. How di apasl Paal benifit wen ih mek chaynjiz fi serv Jehoava? (Filipiyanz 3:​7, 8)

¹⁵ Wi wilin fi mek chaynjiz soh dat wi ku serv Jehoava ahn du moa far ahn. Di apasl Paal da wahn gud egzampl a dat. Hihn mi ga wahn impoatant pozishan eena di Jooish rilijan, bot hihn mi wilin fi giv op aala dat fi fala Krais ahn serv Jehoava. (Gal. 1:14) Sayka dat, hihn mi liv wahn hapi laif an ih geh di privilij fi rool lang wid Krais da hevn. Paal neva rigret ih disizhan fi serv Jehoava, ahn wee noh wahn rigret fi wee wan needa.—Reed Filipiyanz 3:​7, 8.

16. Weh wi laan fahn Julia ekspeeryens? (Koment pahn di picha.)

¹⁶ If wi servis tu Jehoava da di moas impoatant ting eena wi laif, hihn wahn bles wi now an eena di fyoocha. Kansida di egzampl a wahn sista weh naym Julia. Bifoa ih laan di chroot, fahn ih yong ih yoostu sing fi ih cherch. Wahn profeshanal opra singa mi noatis ahn an chrayn ahn fi bee wahn opra singa tu. Shee mi geh soh faymos dat ih staat tu sing da difrent myoozik haal. Wen shee mi-di goh da wahn faymos myoozik skool, wan a fi shee klaasmayt staat taak tu ahn bowt Gaad. Ih teech ahn dat Gaad ga wahn naym, Jehoava. Noh lang afta dat, Julia staat stodi di Baibl twais a week. Afta wahn wail, shee mi disaid fi yooz ih laif fi serv Jehoava insteda bee wahn profeshanal singa. Dat da neva wahn eezi disizhan fi mek. Shee seh: “Lata peepl mi tel mi dat Ai da-mi wahn fool fi giv op mi kareeya, bot Ah mi waahn yooz mi laif fi serv Jehoava wid aala mi haat.” How shee feel bowt di disizhan shee mek moa dan 30 yaaz agoa? Ih seh, “Ai feel hapi dat Ah chooz fi serv Jehoava, an Ah chros dat hihn wahn gi mi weh mi haat dizaiya eena di fyoocha.”—Saa. 37:4.

KANTINYU FI SERV JEHOAVA

17. How kloas wi deh tu di en a dis sistem, ahn how dat afek wee ahn peepl weh noh di serv Jehoava?

¹⁷ Wi di liv kloas tu di en a dis sistem. Di apasl Paal seh dat “di wan weh di kohn wahn soon get ya an ih noh wahn bee layt.” (Heeb. 10:37) Weh dat meenz? Noh moch taim lef fi peepl chooz fi serv Jehoava, soh dehn haftu du sohnting bowt it. (1 Kor. 7:29) An if wi don mek wi disizhan fi serv Jehoava, wi noa dat eevn if wi fays chalenjiz, dehn noh wahn laas fareva.

18. Weh Jeezas ahn Jehoava waahn wi du?

¹⁸ Jeezas mi inkorij peepl fi bee ih disaiplz ahn kip aan di fala ahn. (Mach. 16:24) Soh eevn if wee di serv Jehoava fi lata yaaz, wi noh waahn giv op, wi waahn kip aan di werk haad fi liv op tu da disizhan wi mek yaaz agoa. Ih noh wahn bee eezi, bot wi wahn bee hapi an injai lata blesinz wen wi serv ahn!—Saa. 35:27.

19. Weh wi laan fahn Gene ekspeeryens?

¹⁹ Sohn peepl feel laik dehn kyaahn injai dehn laif if dehn serv Jehoava. Lata yong bradaz ahn sistaz feel laik dehn di mis owt pahn sohnting eena laif. Wahn yong brada weh naym Gene seh: “Ah mi feel laik Ah kudn ga fon bikaaz Ai da-mi wan a Jehoava Witnisiz. Ah mi si lata yong peepl Ah groa op wid di ga lata fon di du tingz laik goh da paati, dayt, er play bad veedyo gaym, bot Ai mi aalwayz haftu di goh da meetin ahn goh pahn feel servis.” How dat mi afek Gene? Hihn seh, “Ai staat du di saym tingz weh dehn mi-di du, ahn fi wahn lee wail Ah mi-di ga fon. Bot deep eensaid Ah neva reeli hapi. Ah mi staat tink bowt how Ah wahn benifit if Ah du weh di Baibl seh, an Ah disaid fi serv Jehoava wid aala mi haat. Sins den, ih luk laik Jehoava ansa aala mi pryaaz.”

20. Weh yu disaid fi du?

²⁰ Saam 65:4 seh: “Di persn weh yu [Jehoava] pik an invait fi kohn kloas tu yoo fi liv eena yu koatyaad wahn bee hapi.” Ahn wee wahn bee hapi tu if wi du laik Jashwa. Hihn mi seh: “Mee ahn mai famili, wee wahn serv Jehoava.”—Jash. 24:15.