Ih Soh Gud fi Jraa Kloas tu Wan Anada!

1-2. Wat da sohnting weh impoatant tu Jehoava, ahn weh hihn waahn wi du?

DI WAY wi chreet ada peepl veri impoatant tu Jehoava. Jeezas seh dat wi fi lov wi nayba jos laik how wi lov wiself. (Mach. 22:​37-39) Dat meenz wi haftu bee kain eevn tu peepl weh noh bileev weh wee bileev. Wen wi du dat, wi di kapi Jehoava egzampl, bikaaz hihn “mek di son shain pahn di wikid ahn di gud peepl, an ih mek ih rayn pahn di raichos wan dehn ahn di peepl weh noh raichos.”—Mach. 5:45.

² Eevn doa Jehoava lov evribadi, hihn feel wahn speshal lov fi peepl weh du weh rait. (Jan 14:21) An ih waahn wi bee laik hihn. Soh ih inkorij wi fi “lov wan anada” fahn wi haat ahn fi “ga schrang lov” fi wi bradaz ahn sistaz. (1 Peet. 4:8; Roam. 12:10) Di lov weh dehndeh vers taak bowt simila tu how wi feel bowt wahn kloas fren er famili memba.

3. Weh wi need fi memba bowt lov?

³ Wen yu waahn yu plaants fi groa gud, yu werk haad fi tek kayr a dehn. Jos laik dat, wi need fi werk haad fi mek wi lov fi wi bradaz ahn sistaz groa. Di apasl Paal seh: “Kantinyu fi lov wan anada laik bradaz ahn sistaz.” (Heeb. 13:1) Jehoava waahn wi kip di schrentn wi lov fi wan anada. Dis aatikl wahn help wi fi si wai wi fi jraa kloasa tu wi bradaz ahn sistaz ahn how wi ku kip di du dat.

WAI WI FI JRAA KLOASA TU WAN ANADA

4. Akaadn tu Saam 133:​1, how wi ku mek shoar wi kantinyu apreeshiayt di yooniti weh wi gat wid wi bradaz ahn sistaz? (Koment pahn di picha dehn.)

⁴ Reed Saam 133:1. Wi feel laik how di saamis mi feel wen ih seh dat ih “gud ahn byootiful” fi bee frenz wid peepl weh lov Jehoava. Wen yu si wahn byootiful chree evri day, yu mait noh pay it no main. If wi noh kyaaful, di saym ting ku hapm wid di yooniti weh wi gat wid wi bradaz ahn sistaz. Wi si dehn soh aafn dat wi mait tek it fi grantid. Weh wi ku du fi mek dat noh hapm? Wi need fi tek taim fi tink bowt how preshos wi bradaz ahn sistaz tu di kangrigayshan ahn tu wee.

5. How di lov weh wee shoa ku afek ada peepl?

⁵ Wan a di tingz weh stan owt fi wahn lata peepl wen dehn kohn da meetin fi di fers taim da di lata lov wi ga fi eech ada, ahn dat kanvins som a dehn dat dis da di chroot. Jeezas seh: “Evribadi wahn noa dat unu da mai disaipl if unu lov wan anada.” (Jan 13:35) Mek wi luk pahn Chaithra egzampl. Shee da-mi wahn yooniversiti styoodent weh mi-di stodi wid Jehoava Witnisiz. Shee mi aksep wahn invitayshan fi goh da wahn reejinal kanvenshan. Afta di fers day, ih tel ih Baibl teecha: “Mai payrents neva hog mee. Bot da unu kanvenshan, Ai geh 52 hog eena jos wan day! Ah feel Jehoava lov chroo ih spirichwal famili. An Ah waahn bee paat a da famili tu.” Chaithra kantinyu fi mek proagres ahn geh baptaiz eena 2024. Eevn nyoo Baibl styoodents ku si di gud tingz weh wi du, inkloodin di lov wi ga fi wan anada, ahn dat mek dehn waahn serv Jehoava.—Mach. 5:16.

6. How wi bradaz ahn sistaz ku protek wi if wi kip kloas tu dehn?

⁶ Wi geh protekshan wen wi kip kloas tu wi bradaz ahn sistaz. Paal tel di Kristyanz eena fi hihn taim: “Unu mos kip aan di inkorij wan anada evri day . . . soh dat sin noh chrai fool unu ahn mek unu haat geh haad.” (Heeb. 3:13) Sohntaim wen wi geh diskorij, wi mait fain it haad fi du weh rait. If wi kip kloas tu wi bradaz ahn sistaz, dehn wahn noatis dat wi noh di du soh gud. Jehoava ku yooz wan a dehn fi gi wi di help weh wi need. (Saa. 73:​2, 17, 23) Di inkorijment weh wi geh fahn dehn gud fi wi.

7. How lov ahn yooniti werk tugeda? (Koloashanz 3:​13, 14)

⁷ Wi da paat a wahn groop a peepl weh werk haad fi shoa lov tu wan anada, soh wi geh lata blesinz. (1 Jan 4:11) Fi egzampl, lov mek wi “kantinyu fi put op wid wan anada,” ahn dat help wi fi bee yoonaitid wid wi bradaz ahn sistaz. (Reed Koloashanz 3:​13, 14; Ifee. 4:​2-6) Sayka dat, wen wi goh da meetin, wi ga reel pees ahn yooniti. No ada groop a peepl ga dat.

SHOA AANA TU WAN ANADA

8. How Jehoava help wi fi bee yoonaitid?

⁸ Di yooniti weh wi ga wid wi bradaz ahn sistaz da wahn mirakl. Jehoava mek dat pasabl eevn doa wi noh perfek. (1 Kor. 12:25) Di Baibl seh dat “Gaad di teech [wi] how fi shoa lov tu wan anada.” (1 Tes. 4:9) Dat meenz dat Gaad di yooz di Baibl fi teech wi egzakli weh wi need fi du soh dat wi ku jraa kloasa tu wan anada. Wi ku laan weh Jehoava di teech wi wen wi stodi di Baibl ahn yooz weh wi laan eena wi laif. (Heeb. 4:12; Jay. 1:25) Dat da weh Jehoava Witnisiz chrai haad fi du.

9. Weh Roamanz 12:​9-13 teech wi bowt how fi shoa aana tu wan anada?

⁹ How Gaad Werd ku help wi fi jraa kloasa tu wan anada? Reed weh Paal seh bowt dis da Roamanz 12:​9-13. (Reed.) Noatis dat Paal seh “bee wilin [“bee di fers wan,” ftn.] fi shoa aana tu wan anada.” How wi ku du dat? Wee shuda bee di fers wan fi shoa “schrang lov fi wan anada.” Wi ku du dat wen wi wilin fi fergiv, wen wi shoa haspitaliti, wen wi jenaros, an eena lata ada wayz. (Ifee. 4:32) Yu noh haftu wayt fi mek yu bradaz ahn sistaz jraa kloas tu yoo. Yu ku “bee di fers wan” fi reech owt tu dehn. Yu wahn feel laik weh Jeezas mi seh: “Wi feel moa hapinis wen wi giv tu adaz dan wen wi get tingz fahn ada peepl.”—Aks 20:35.

10. How wi ku werk haad fi “shoa aana tu wan anada”? (Koment pahn di picha.)

¹⁰ Rait afta Paal tel wi bee wilin fi shoa aana tu wan anada, ih inkorij wi fi “werk haad ahn noh bee layzi.” Wen wahn haad-werkin persn geh wahn asainment, ih mek shoar dat ih du ih bes. Praverbz 3:​27, 28 seh: “If yu ku help sohnbadi weh need help, den noh hoal bak, help dehn.” Soh wen wi si dat sohnbadi need sohnting, wi du weh wi kud fi help dehn. Wi noh hezitayt ahn wi noh lef it fi sohnbadi els du.—1 Jan 3:​17, 18.

11. Weh ku help wi fi jraa kloasa tu wan anada?

¹¹ Wahn nada way wi ku shoa aana tu adaz da wen wi wilin fi fergiv dehn wen dehn hert wi. Ifeezhanz 4:26 seh: “Noh mek di son goh dong an unu stil beks.” Wai? Vers 27 seh if wi du dat, wi wuda “gi di Devl wahn chaans fi kanchroal” wi. Eena di Baibl, Jehoava tel wi oava ahn oava fi fergiv wan anada. Koloashanz 3:13 tel wi fi ‘kantinyu fergiv wan anada wid aala wi haat.ʼ Wan a di bes way fi jraa kloas tu wi bradaz ahn sistaz da fi fergiv dehn wen dehn mek mistayk. Wen wi du dat, wi di help fi “kip di yooniti weh di spirit giv [wi] ahn liv eena pees wid wan anada.” (Ifee. 4:3) Wen wi fergiv adaz, wi wahn bee moa yoonaitid ahn wi wahn ga pees wid wan anada.

12. How Jehoava help wi fi bee fergivin?

¹² Ih ku bee haad fi fergiv sohnbadi weh hert yu, bot Gaad spirit ku help yu fi du dat. Afta di Baibl tel wi fi “ga schrang lov fi wan anada” ahn fi “werk haad,” ih seh: “Mek Gaad spirit blayz op eena unu.” Dat meenz dat Gaad hoali spirit wahn help wi fi bee eega fi du weh di Baibl seh. (Luk op di “be aglow with the spirit” noat pahn Roamanz 12:11 eena di Study Bible.) Soh Gaad spirit ku help wi fi shoa schrang lov fi eech ada ahn fi fergiv wan anada fahn wi haat. Dat meenz wi need fi beg Jehoava fi help wi.—Look 11:13.

NO DIVIZHAN FI DEH MONKS UNU

13. Weh ku kaaz divizhan monks wi?

¹³ Eena di kangrigayshan, wi ga “aal kaina peepl” fahn difrent bakgrong. (1 Tim. 2:​3, 4) Wi mait chooz difrent stail a kloaz, difrent medikal chreetment, ahn difrent entataynment. Eech wan a wi mek difrent disizhanz, an if wi noh kyaaful dehn ku kaaz divizhan eena di kangrigayshan. (Roam. 14:4; 1 Kor. 1:10) Bikaaz Gaad teech wi how fi shoa lov tu wan anada, wi fi bee kyaaful fi noh insis dat fi wee disizhan beta dan enibadi els wan.—Fil. 2:3.

14. Weh wi shuda chrai haad fi du?

¹⁴ Wi ku kip di kangrigayshan yoonaitid wen wi du wi bes fi bee inkorijin aal di taim. (1 Tes. 5:11) Laytli, wahn lata peepl weh mi stap serv Jehoava er weh mi geh tek owt fahn di kangrigayshan kohn bak tu Jehoava. Wi onli hapi fi welkom dehn bak! (2 Kor. 2:8) Wahn sista mi stap serv Jehoava fi ten yaaz. Weh mi hapm tu ahn wen ih kohn bak da Kingdom Haal? Shee seh, “Evribadi mi smail ahn shayk mi han.” (Aks 3:19) How shee mi feel? Shee seh, “Ah feel laik Jehoava mi-di help mi fi bee hapi agen.” Wen wi du wi bes fi inkorij evribadi, Jeezas ku yooz wi fi rifresh enibadi weh feel “taiyad ahn di kehr wahn hevi load.”—Mach. 11:​28, 29.

15. Wat els wi ku du fi kip di kangrigayshan yoonaitid? (Koment pahn di picha.)

¹⁵ Wahn nada way wi ku promoat yooniti da bai di way wi taak. Joab 12:11 seh: “Di ayz tes owt werdz di saym way di tong tays food.” Wahn gud kuk aalwayz tays ih food fi mek shoar ih nais bifoa ih serv it tu adaz. Saym way soh, wi waahn tink bowt weh wi wahn seh bifoa wi seh it, soh dat wi ku mek shoar weh wi seh inkorijin an ih wahn “benifit peepl weh di lisn.”—Saa. 141:3; Ifee. 4:29.

16. Hoo espeshali need fi chrai bee inkorijin wid weh dehn seh?

¹⁶ Hozbanz ahn payrents need fi bee kyaaful ahn taak eena wahn inkorijin way. (Kol. 3:​19, 21; Tai. 2:4) Eldaz need fi bee inkorijin ahn komfertin wen dehn di shepad Jehoava sheep. (Isa. 32:​1, 2; Gal. 6:1) Di Baibl seh: “Ih soh gud wen sombadi seh di karek ting da di karek taim!”—Prav. 15:23.

SHOA LOV FAHN WI HAAT

17. How wi ku mek shoar dat wi lov fi wi bradaz ahn sistaz kohn fahn wi haat?

¹⁷ Di apasl Jan inkorij wi “noh onli fi seh dat wi lov wan anada, bot wi mos shoa it bai weh wi du, an ih mos kohn fahn wi haat.” (1 Jan 3:18) How wi ku mek shoar dat wi lov kohn fahn wi haat? Di moa wi spen taim wid wi bradaz ahn sistaz, di kloasa wi wahn get ahn di schranga wi lov wahn bee. Mek taim fi ada peepl, fi egzampl, wen wi deh da meetin er wi deh owt eena di minischri. Tek taim fi vizit ada peepl. Wen wi du dat, wi di shoa dat wi laan weh Gaad di teech wi. (1 Tes. 4:9) Wi wahn ku si fi wiself dat “ih soh gud ahn byootiful fi si bradaz di liv tugeda eena yooniti!”—Saa. 133:1.