Yong Bradaz—Kapi Maak ahn Timoti Egzampl

1-2. Weh kuda mi stap Maak ahn Timoti fahn du moa fi Jehoava ahn fi dehn bradaz ahn sistaz?

WI GA lata yong bradaz weh di du dehn bes fi serv Jehoava ahn dehn bradaz ahn sistaz. Wi soh hapi fi si dehnya yong bradaz di du moa, ahn wi shoar yoo da wan a dehn. (Saa. 110:3) Bot dat noh aalwayz eezi. Yu mait frayd fi du moa fi Jehoava kaaz yu noh noa noh weh yu laif wahn bee laik er weh Jehoava mait waahn yu goh. Maybi yu giv op wahn apachooniti fi du moa fi Jehoava bikaaz yu neva ga inof kanfidens eena yuself. If dat da di kays, noh wori. Yoo da noh di onli wan weh feel laik dat.

² Maak ahn Timoti mi praabli feel di saym way laik how yoo feel. Eevn doa dehn neva noa how dehn laif mi wahn ton owt, er maybi dehn mi feel laik dehn neva kwalifai fi dehn asainment, dehn stil chooz fi du moa fi Jehoava. Ih pasabl dat wen Paal ahn Baarnabas mi invait Maak fi chravl az wahn mishineri, Maak mosi mi stil di liv wid ih ma eena dehn nais hows. (Aks 12:​12, 13, 25) Bot Maak mi wilin fi lef hoam fi du moa fi Jehoava. Fers, ih gaahn da Antiyak. Den, ih chravl wid Paal ahn Baarnabas fi goh preech da sohn faar plays. (Aks 13:​1-5) Timoti mi eena wahn simila sichuwayshan. Hihn mi praabli stil liv wid ih payrents wen Paal invait ahn fi goh preech wid ahn. Timoti da-mi wahn yong man, soh hihn kuda mi feel dat ih neva kwalifai fi goh lang wid Paal. (Kompyaa 1 Korintyanz 16:​10, 11 ahn 1 Timoti 4:12.) Bot hihn mi stil aksep Paal invitayshan, an ih mi injai lata wandaful tingz eena ih laif kaaz ih mi chooz fi serv Jehoava.—Aks 16:​3-5.

3. (a) How wi noa dat Paal mi valyu Maak ahn Timoti? (2 Timoti 4:​6, 9, 11) (Koment pahn di picha dehn.) (b) Weh wi wahn diskos eena dis aatikl?

³ Fahn dehn yong, Maak ahn Timoti mi laan fi tek kayr a lata rispansabiliti eena di kangrigayshan. Paal valyu dehnya too yong man soh moch dat wen da mi soon taim fi mek ih ded, hihn mi aks dehn fi kohn si ahn. (Reed 2 Timoti 4:​6, 9, 11.) Weh gud kwalitiz Maak ahn Timoti mi ga fi mek Paal lov ahn chros dehn soh moch? How yong bradaz ku bee laik Maak ahn Timoti? Ahn how Paal advais ku help yong bradaz tudeh?

BEE LAIK MAAK AHN BEE WILIN FI SERV ADAZ

4-5. How Maak mi shoa dat ih mi wilin fi serv adaz?

⁴ Wi need fi bee wilin fi werk haad fi serv adaz, ahn wi waahn kantinyu serv dehn eevn wen dat noh eezi fi du. Maak mi set wahn gud egzampl. Wai wi seh dat? Hihn mi praabli feel hert wen Paal neva kehr ahn pan ih neks mishineri chrip. (Aks 15:​37, 38) Bot dat neva stap Maak fahn serv ih bradaz ahn sistaz.

⁵ Maak mi gaahn wid ih kozn Baarnabas fi serv sohnweh els. Bowt 11 yaaz layta, wen Paal da-mi wahn prizna da Roam, Maak mi deh rait deh fi inkorij ahn. (Fail. 23, 24) Paal mi soh tankful fi weh Maak mi du dat ih seh dat Maak mi giv ahn “lata komfert.”—Kol. 4:​10, 11.

6. How Maak mi benifit bikaaz ih werk lang wid faytful bradaz? (Koment pahn di futnoat.)

⁶ Maak benifit bikaaz ih spen taim di werk wid bradaz weh mi faytful fi yaaz. Afta ih spen wahn lee taim wid Paal da Roam, Maak mi gaahn da Babilan fi werk wid di apasl Peeta. Peeta mi en op di si Maak az ih son. (1 Peet. 5:13) Az dehn mi werk tugeda, Peeta moa dan laikli tel ih yong fren lata inchrestin tingz bowt Jeezas laif ahn minischri. Laytaraan, Maak mi praabli yooz lata da infamayshan wen ih mi rait di buk a Maak.a

7. How Seung-Woo mi kapi Maak egzampl? (Koment pahn di picha.)

⁷ Maak mi bizi di serv Jehoava an ih mi kip kloas tu faytful bradaz. How yoo ku kapi Maak egzampl? Maybi yu waahn du moa fi Jehoava, fi egzampl fi serv az wahn ministeeryal servant er wahn elda, bot maybi yu stil noh kwalifai az yet. If dat da di kays, noh geh diskorij. Insteda dat, kip di luk fi wayz how yu ku du moa fi Jehoava ahn fi yu bradaz ahn sistaz. Luk pahn Seung-Woo egzampl. Hihn da wahn elda now, bot wen ih mi yonga ih mi kompyaa ihself wid ada yong bradaz bikaaz dehn mi geh moa privilijiz dan hihn. Seung-Woo mi feel hert bikaaz a dat, an afta wahn wail ih mi taak tu di eldaz bowt how ih mi feel. Wahn elda tel ahn fi du wateva ih kud fi serv adaz eevn if dehn noh noatis di gud tingz weh ih du. Da advais mi help Seung-Woo fi help oalda wanz an adaz weh mi need help fi goh da meetin. Wen hihn luk bak pahn how tingz gaan, hihn seh: “Ah geh fi reeli andastan weh ih meen fi serv adaz. Ah feel reeli hapi fi help adaz.”

BEE LAIK TIMOTI AHN SHOA KANSAAN FI ADAZ

8. Wai Paal mi chooz Timoti fi chravl wid ahn? (Filipiyanz 2:​19-22)

⁸ Paal mi need bradaz weh mi ga korij fi chravl wid ahn wen ih gaahn bak da di siti dehn weh peepl mi persikyoot ahn. Fers, hihn mi aks Sailas fi goh wid ahn bikaaz hihn mi ga lata ekspeeryens di serv Jehoava. (Aks 15:​22, 40) Den, ih mi aks Timoti fi goh wid ahn tu. Wan reezn wai Paal mi chooz Timoti da bikaaz ih mi ga wahn gud naym wid di bradaz. (Aks 16:​1, 2) An ih mi aalso kay wahn lat bowt peepl.—Reed Filipiyanz 2:​19-22.

9. How Timoti mi shoa dat ih reeli kay fi ih bradaz ahn sistaz?

⁹ Fahn di taim wen Timoti staat werk wid Paal, ih mi shoa dat ih kay moa bowt adaz dan ihself. Soh wen Paal lef Bereeya, hihn mi noa dat Timoti wuda tek gud kayr a di bradaz ahn sistaz weh mi dehdeh. (Aks 17:​13, 14) Timoti mi praabli laan wahn lat fahn Sailas, weh mi stay da Bereeya tu. Bot laytaraan Paal sen Timoti hihn wan fi goh da Tesalonaika fi inkorij di bradaz ahn sistaz deh. (1 Tes. 3:2) Joorin di neks 15 yaaz, di lov weh Timoti mi ga fi ih bradaz ahn sistaz mi geh schranga. Ih mi lov dehn soh moch dat ih wuda krai wid ih bradaz wen dehn sofa. (Roam. 12:15; 2 Tim. 1:4) How yong bradaz tudeh ku kapi Timoti egzampl?

10. How Woo Jae mi laan fi kay moa bowt adaz?

¹⁰ Wahn brada weh naym Woo Jae mi laan fi kay moa bowt adaz. Wen ih mi yonga, hihn mi fain it haad fi taak tu oalda bradaz ahn sistaz eena di kangrigayshan. Soh ih wuda jos hayl dehn ahn goh bowt ih bizniz. Wahn elda sojes dat ih tel di bradaz weh ih laik bowt dehn, ahn dat wuda help ahn fi staat kanvasayshan. Di elda mi aalso inkorij ahn fi chrai tink bowt weh di ada persn wuda waahn taak bowt. Woo Jae mi du weh di brada seh. Woo Jae da wahn elda now, an ih seh: “Ih eeziya fi taak wid peepl fahn difrent ayj groop now. Ah hapi dat Ah noa moa bowt som a di tingz weh ada peepl goh chroo. Dis help mee fi noa weh mi bradaz ahn sistaz reeli need ahn weh Ai ku du fi help dehn.”

11. How yong bradaz ku laan fi kay moa bowt dehn bradaz ahn sistaz? (Koment pahn di picha.)

¹¹ Yong bradaz ku laan fi shoa dat dehn kay bowt adaz. Wen dehn deh da meetin, dehn ku taak tu evribadi, inkloodin oalda ahn yonga bradaz ahn sistaz, aks dehn how dehn di du, ahn den lisn tu weh dehn seh. Dat wahn help yu fi noa weh yoo ku du fi help dehn. Maybi yu fain owt dat wahn oalda kopl need help fi yooz JW Library^®. Yu tink yu kuda help dehn fi yooz dehn foan er tablet? Er maybi yu fain dat dehn noh ga planz fi werk wid enibadi pahn feel servis. Yu tink yu kuda werk wid dehn? Wen yu help yu bradaz ahn sistaz eena dehnya kaina way, yu wahn bee wahn gud egzampl eena yu kangrigayshan.

PAAL ADVAIS KU HELP YU

12. How di advais weh Paal gi Timoti ku help yong bradaz?

¹² Paal mi gi Timoti lata gud advais weh help ahn fi liv wahn hapi laif ahn fi du moa fi Jehoava. (1 Tim. 1:18; 2 Tim. 4:5) How Paal advais ku help yong bradaz tudeh? Yu ku reed di too leta weh Paal mi rait tu Timoti laik if hihn mi rait dehn tu yoo, ahn chrai si how yu ku yooz fi hihn advais eena yu laif. Mek wi luk pahn sohn egzampl.

13. Weh wahn help yu fi bee moa laayal tu Jehoava?

¹³ “Werk haad fi chrayn yuself fi serv Gaad wid yu hoal haat.” (1 Tim. 4:7b) Paal mi-di tel Timoti fi bee laayal tu Jehoava ahn du tingz weh pleez hihn. Ih noh aalwayz eezi fi du dat, soh wi haftu werk haad pan it. Di Greek werd weh wi chranslayt az “chrayn yuself” da wahn werd weh dehn yoostu yooz fi taak bowt how haad peepl wuda chrayn fi spoats. Dehndeh peepl wuda need fi werk haad fi ga gud habits weh wuda help dehn fi win. Jos laik dat, wi need fi werk haad fi ga gud habits weh wahn help wi fi bee Jehoava fren.

14. Weh shuda bee wi goal wen wi reed wi Baibl? Yooz di egzampl eena di paragraaf.

¹⁴ Ih impoatant fi mek it wahn habit fi reed di Baibl evri day ahn fi rimemba dat di reezn wai wi reed di Baibl da fi jraa kloasa tu Jehoava. Fi egzampl, wen yu reed bowt Jeezas ahn di rich yong roola, weh dat teech yu bowt Jehoava? (Maak 10:​17-22) Di yong man mi bileev dat Jeezas da-mi di Mesaiya, bot ih fayt neva schrang inof fi fala ahn. Eevn doa di yong man neva ga schrang fayt, Jeezas “mi feel lov far ahn eena ih haat.” How yu feel bowt how Jeezas mi taak tu di yong man? Jeezas mi waahn ih mek wahn waiz disizhan. Di way Jeezas mi feel bowt di yong man da di saym way Jehoava feel. (Jan 14:9) Wen yu tink bowt weh yu reed ahn yu sichuwayshan eena laif, aks yuself, ‘Weh Ai need fi du fi jraa kloasa tu Jehoava ahn du moa fi adaz?ʼ

15. Wai ih impoatant fi mek wahn yong brada set wahn gud egzampl fi adaz? Yooz di egzampl eena di paragraaf. (1 Timoti 4:​12, 13)

¹⁵ “Shoa dehn wan weh bileev eena Krais di way dehn shuda bihayv.” (Reed 1 Timoti 4:​12, 13.) Paal mi inkorij Timoti fi laan fi reed ahn teech beta. Paal mi aalso waahn ih shoa lov ahn fayt ahn fi liv wahn kleen laif. Dehndeh tingz impoatant bikaaz weh wahn persn du moa impoatant dan weh ih seh. Sopoaz yu fi gi wahn taak bowt how fi du moa eena di minischri. Yu noh wahn feel bad fi taak bowt it if yoo di du yu bes eena yu minischri. Ahn yu aadyans wahn bee moa wilin fi lisn if dehn si yoo di du weh yu seh.—1 Tim. 3:13.

16. (a) Eena weh faiv wayz yong bradaz ku set wahn gud egzampl? (b) How wahn yong brada ku set wahn gud egzampl eena di way how ih taak?

¹⁶ Da 1 Timoti 4:​12, Paal taak bowt faiv wayz how wahn yong brada ku bee wahn gud egzampl. Ih wuda gud fi stodi eech wan a dehn. Sopoaz yu waahn set wahn gud egzampl eena “di way how yu taak.” Yu ku tink bowt weh yu ku seh fi inkorij adaz. If yu stil di liv hoam wid yu payrents, yu ku tel dehn humoch yu apreeshiayt weh dehn du fi yu. Afta di meetin, yu ku komen sohnbadi weh mi ga wahn paat pahn di proagram. Yu ku koment eena yu oan werdz. Wen yu werk haad fi set wahn gud egzampl eena di way how yu taak, peepl wahn si dat yu di du beta eena yu servis tu Jehoava.—1 Tim. 4:15.

17. Weh wahn help wahn yong brada du moa fi Jehoava? (2 Timoti 2:22)

¹⁷ “Yu mos ron weh fahn di dizaiyaz weh yong peepl gat. Bot yu mos chrai haad fi bee moa raichos.” (Reed 2 Timoti 2:22.) Paal mi inkorij Timoti fi kip faar fahn eniting weh wuda stap ahn fahn du moa fi Jehoava ahn damij ih frenship wid ahn. Yu mait fain dat yu di spen tu moch taim di du yu oan ting insteda di du moa fi Jehoava. Fi egzampl, humoch taim yu spen di play spoats, di yooz di Intanet, er di play veedyo gaym? Yu tink yu kuda yooz som a da taim fi du moa fi Jehoava ahn fi adaz? Maybi yu ku aafa fi help mantayn di Kingdom Haal er fi du kyaat witnisin. Wen yu mek taim fi du tingz laik dehnya, yu wahn mek nyoo frenz weh wahn inkorij yu fi set spirichwal goalz ahn help yu fi reech dehn.

YU WAHN GEH BLESINZ WEN YU SERV ADAZ

18. Wai wi ku seh dat Maak ahn Timoti mi ga wahn gud laif?

¹⁸ Maak ahn Timoti mi mek lata chaynjiz eena dehn laif fi du moa fi adaz. Ahn sayka dat, lata gud tingz mi hapm eena dehn laif ahn dat mi mek dehn hapi. (Aks 20:35) Maak mi chravl aal oava fi help ih bradaz ahn sistaz. Hihn mi eevn rait wahn eksaitin buk bowt Jeezas laif ahn minischri. Timoti mi help Paal fi staat nyoo kangrigayshan ahn fi schrentn di bradaz ahn sistaz. Wee noa dat Jehoava mi hapi wid aal weh Maak ahn Timoti mi du fi serv hihn moa.

19. Wai yong bradaz shuda lisn tu di advais weh Paal mi gi Timoti, ahn weh kaina laif dehn wahn gat if dehn lisn?

¹⁹ Wen wi reed di letaz weh Paal mi rait tu Timoti, wi ku reeli si humoch ih mi lov ahn. Bot da Jehoava mi yooz Paal fi rait dehndeh leta, soh weh wi reed eena dehn shoa how Jehoava feel bowt wi yong bradaz tudeh. Hihn lov unu an ih waahn unu liv wahn hapi laif di serv ahn. Soh du yu bes fi fala Paal advais ahn du moa fi serv adaz. If yu du dat, yu wahn ku “hoal aan tait tu di reel laif” weh soon kohn.—1 Tim. 6:​18, 19.