Wai Wi Need fi Aks fi Advais?

1. How wi ku mek waiz disizhanz weh wahn werk owt gud? (Praverbz 13:10; 15:22)

AALA wi waahn mek waiz disizhanz, an aala wi waahn mek wi planz werk owt gud. Di Baibl tel wi dat if wi waahn tingz werk owt gud, wi need fi aks fi advais.—Reed Praverbz 13:10; 15:22.

2. Weh Jehoava pramis fi du fi wi?

² Di bes Persn wi ku aks fi advais da wi Pa, Jehoava, ahn hihn pramis fi help wi. Ih seh: “Ah wahn wach oava yu ahn gi yu advais.” (Saa. 32:8) Dat meenz dat Jehoava wilin fi du moa dan jos gi wi advais. Hihn di wach oava wi fi help wi fala ih advais.

3. Weh wi wahn taak bowt eena dis aatikl?

³ Eena dis aatikl, wi wahn yooz di Baibl fi help wi ansa dehnya foa kweschan: (1) Weh kwaliti wahn help wi fi benifit fahn gud advais? (2) Hoo ku gi wi gud advais? (3) How wi ku shoa dat wi reeli waahn advais? (4) Wai wi noh fi aks adaz fi mek disizhanz fi wi?

WEH KWALITI WI NEED?

4. If wi waahn benifit fahn gud advais, weh kwaliti wi need fi shoa?

⁴ Wi haftu bee hombl fi benifit fahn gud advais. Wi haftu andastan dat wi noh aalwayz ga inof ekspeeryens er nalij fi mek waiz disizhanz pahn wi oan. If wi noh hombl, Jehoava wahn kyaahn help wi. Ahn wen wi reed di Baibl, wi wahn feel laik wi noh need fi yooz di advais weh deh een deh. (Mic. 6:8; 1 Peet. 5:5) Bot if wi hombl, wi wahn hori fi lisn ahn yooz di kongsl weh wi get fahn di Baibl.

5. Weh aal King Dayvid mi du weh kuda mi mek hihn geh prowd?

⁵ Wi ku laan wahn lat fahn King Dayvid egzampl. Yaaz bifoa hihn staat rool az king, peepl mi noa dat hihn play myoozik gud. Dehn mi eevn aks ahn fi play fi di king. (1 Sam. 16:​18, 19) Den Jehoava mi pik Dayvid fi bee di neks king an ih mi giv ahn hoali spirit, ahn dat mi mek hihn powaful. (1 Sam. 16:​11-13) Evribadi mi prayz ahn bikaaz ih mi kil lata dehn enimiz, inkloodin Golaiyat. (1 Sam. 17:​37, 50; 18:7) If Dayvid da-mi wahn prowd man, ih kuda mi seh dat sins hihn du aala dehndeh tingz, hihn neva need fi lisn tu ada peepl advais. Bot hihn neva stan soh.

6. How wi noa dat Dayvid mi wilin fi tek advais fahn adaz? (Koment pahn di picha.)

⁶ Afta Dayvid ton king, ih mi pik frenz weh mi wahn giv ahn advais. (1 Kran. 27:​32-34) Eevn bifoa Dayvid staat rool az king, ih mi aalwayz wilin fi lisn tu peepl weh giv ahn gud advais. Hihn neva onli tek advais fahn man bot ih mi aalso tek advais fahn wahn laydi weh mi naym Abigayl. Abigayl da-mi Naybal waif, ahn hihn da-mi wahn ignarant, angraytful man weh neva rispek nobadi. Bot Dayvid mi hombl an ih lisn tu fi shee gud advais, ahn dat sayv ahn fahn di mek wahn seeryos mistayk.—1 Sam. 25:​2, 3, 21-25, 32-34.

7. Weh wi laan fahn Dayvid egzampl? (Ikleeziyasteez 4:13) (Koment pahn di picha dehn.)

⁷ Wi ku laan wahn lat fahn Dayvid. Fi egzampl, wi mait noa how fi du sohnting gud er wi mait ga atariti oava adaz. Bot wi shuda neva tink dat wi noa evriting ahn dat wi noh need fi lisn tu advais. Wi shuda bee laik Dayvid ahn bee wilin fi lisn tu gud advais, noh mata hoo ih kohn fram. (Reed Ikleeziyasteez 4:13.) If wi du dat, ih wahn eeziya fi noh mek seeryos mistayks weh ku kaaz prablemz fi wee an fi adaz.

HOO KU GI WI GUD ADVAIS?

8. Wai Janatan kuda mi gi Dayvid gud advais?

⁸ Wi ku laan sohnting els fahn Dayvid egzampl. Hihn mi tek advais fahn peepl weh mi ga wahn gud rilayshanship wid Jehoava. Noh onli dat, dehn mi aalso andastan di sichuwayshan weh hihn mi need help wid. Fi egzampl, wen Dayvid mi waahn noa if King Saal mi wilin fi mek pees wid ahn, Dayvid mi lisn tu Janatan advais. Wai Janatan kuda mi gi Dayvid gud advais? Bikaaz Janatan mi ga wahn gud rilayshanship wid Jehoava. Pahn tap a dat, Saal da-mi fi hihn pa, soh ih mi noa ahn gud. (1 Sam. 20:​9-13) Weh dat teech wi?

9. Hoo wi shuda aks fi advais? Pleez eksplayn yu ansa. (Praverbz 13:20)

⁹ Wen wi need advais, ih gud fi taak tu sohnbadi weh ga wahn gud rilayshanship wid Jehoava ahn weh aalso ga ekspeeryens eena weh wi need help wid.a (Reed Praverbz 13:20.) Fi egzampl, sopoaz wahn yong brada waahn fain wahn gud waif. Hoo kuda giv ahn gud advais? If ih aks sohnbadi weh noh marid, ih mait geh gud advais if dehn giv ahn advais fahn di Baibl. Bot di brada wahn praabli geh moa yoosful advais if ih aks wahn marid kopl weh noa ahn gud ahn weh di serv Jehoava tugeda fi yaaz. Dehn wahn ku tel ahn how fi fala di Baibl advais ahn weh dehn laan fahn dehn oan ekspeeryens.

10. Weh wi wahn taak bowt now?

¹⁰ Wi don taak bowt how wi need fi bee hombl fi tek advais ahn bowt hoo ku gi wi gud advais. Now mek wi taak bowt wai wi haftu bee wilin fi tek advais an if wi shuda aks adaz fi mek disizhanz fi wi.

HOW WI KU SHOA DAT WI REELI WAAHN ADVAIS?

11-12. (a) Weh wi mait du sohntaim? (b) Weh King Rehobowam mi du wen ih mi haftu mek wahn impoatant disizhan?

¹¹ Sohntaim, sohnbadi mait aks fi advais, bot dehn noh reeli waahn advais. Maybi dehn don mek op dehn main weh dehn wahn du, ahn dehn jos waahn sohnbadi els agree wid dehn disizhan. If dat da di kays, dehn need fi laan fahn weh mi hapm tu King Rehobowam.

¹² Rehobowam da-mi di neks king afta Salaman ded. Wen Rehobowam mi staat rool, di nayshan mi-di praspa bot di peepl mi feel laik Salaman mi werk dehn tu haad. Soh di peepl gaahn taak tu Rehobowam an aks ahn fi mek tingz lee eeziya fi dehn. Rehobowam mi aks dehn fi giv ahn wahn lee taim fi tink bowt di sichuwayshan. Den ih mi gaahn aks fi advais fahn di oalda man dehn weh yoostu help Salaman. Dat da-mi wahn gud ting fi du. (1 Ki. 12:​2-7) Bot ih neva tek dehn advais. Wai? Maybi Rehobowam mi don mek op ih main weh ih mi wahn du, an ih mi praabli jos waahn di oalda man dehn tel ahn dat dehn agree wid ahn. Soh wen ih gaahn aks ih fren dehn ahn dehn mi agree wid ahn, hihn mi laik dat. (1 Ki. 12:​8-14) Rehobowam mi tel di peepl egzakli weh ih fren dehn mi seh. Sayka dat, lata di peepl mi ribel ahn pik wahn neks king, ahn di nayshan mi split. Fahn den aan, tingz neva gaahn gud fi Rehobowam.—1 Ki. 12:​16-19.

13. How wi ku noa if wi wilin fi tek ada peepl advais?

¹³ Weh wi ku laan fahn Rehobowam egzampl? Wi noh fi don mek wahn disizhan bifoa wi aks fi advais. Wen wi aks sohnbadi fi advais, wi need fi bee wilin fi lisn tu weh dehn tel wi. Ahn soh wi ku aks wiself, ‘Ai aks fi advais ahn noh tek it bikaaz da noh weh Ah waahn hyaa?ʼ Mek wi luk pahn wahn egzampl.

14. Wen wi aks fi advais, weh wi need fi memba? Yooz di egzampl eena di paragraaf. (Koment pahn di picha.)

¹⁴ Sopoaz sohnbadi aafa wahn brada wahn jab weh pay gud bot ih wuda haftu spen wahn lata taim apaat fahn ih famili. Bifoa ih tek di jab, ih aks wahn elda fi advais. Di elda rimain di brada bowt di Baibl prinsipl weh seh dat fi hihn rispansabiliti da fi tek kayr a ih famili spirichwal needz. (Ifee. 6:4; 1 Tim. 5:8) Lesgoh seh di brada neva laik di elda advais. Soh ih kip di goh rong an aks ada bradaz weh dehn tink bowt di sichuwayshan antil wan a dehn tel ahn dat ih ku tek di jab. Weh yu tink? Da brada reeli mi-di luk fi advais? Er yu tink ih mi don mek op ih main weh ih mi wahn du an ih mi jos waahn sohnbadi agree wid ahn? Wi haftu memba dat wi haat chriki bad. (Jer. 17:9) Sohntaim, wi mait geh advais weh wi noh laik, bot dat mait bee di advais weh wi need di moas.

WAI WI NOH FI AKS ADAZ FI MEK DISIZHANZ FI WI?

15. Weh wi noh fi du, ahn wai?

¹⁵ Jehoava ekspek eech wan a wi fi mek wi oan disizhanz. (Gal. 6:​4, 5) Wi laan dat bifoa wi mek op wi main weh wi wahn du eena eni sichuwayshan, wi shuda luk fi advais fahn di Baibl ahn fahn peepl weh faytful tu Jehoava fi yaaz. Sohn peepl wuda schrayt-op aks sohnbadi weh dehn chros, “If yoo da-mi mee, weh yoo wuda du?” Ada peepl mait noh bee soh dairek. Dehn mait jos mek di saym disizhan weh sohnbadi els mek widowt tek taim fi tink gud bowt di mata fi dehnself. Bot wi noh fi pen pahn ada peepl fi mek disizhanz fi wi.

16. Weh sichuwayshan mi kom op fi di bradaz ahn sistaz da Korint, ahn hoo mi ga di rispansabiliti fi disaid weh fi du eena da sichuwayshan? (1 Korintyanz 8:7; 10:​25, 26)

¹⁶ Tink bowt wahn sichuwayshan weh mi kom op fi di Kristyan dehn eena di kangrigayshan da Korint. Eech wan a dehn mi fi disaid fi dehnself if dehn wuda eet meet weh kuda mi bee paat a wahn sakrifais weh sohnbadi mi aafa tu wahn aidol. Paal mi tel dehn: “Wee noa dat wahn aidol da noh notn ataal ahn dat onli wan Gaad deh.” (1 Kor. 8:4) Bays pahn weh Paal seh, som a di bradaz ahn sistaz mi disaid dat dehn noh ga no prablem di bai meet fahn di maakit an eet it, eevn if ih mi geh yooz eena wahn sakrifais fi wahn aidol. An ada bradaz mi disaid dat dehn neva mi wahn eet da meet bikaaz ih mi wahn bada dehn kanshans. (Reed 1 Korintyanz 8:7; 10:​25, 26.) Eech wan a dehn mi haftu disaid dat fi dehnself. Paal neva tel dehn fi mek disizhanz fi ada peepl ner fi kapi ada peepl disizhanz. Paal mi seh: “Gaad wahn joj eech wan a wi akaadn tu weh wi du.”—Roam. 14:​10-12.

17. Weh ku hapm if wi jos kapi weh ada peepl du? Yooz di egzampl eena di paragraaf. (Koment pahn di picha dehn.)

¹⁷ How sohnting simila mait hapm nowadayz? Eech Kristyan need fi disaid fi dehnself if dehn wahn aksep er rijek blod frakshanz.b Dis mait noh bee di eeziyes tapik fi andastan, bot da fi wee rispansabiliti fi mek wi oan disizhan pahn dis mata. (Roam. 14:4) If wi jos kapi sohnbadi els disizhan, wi noh wahn laan fi bee waiz. Wi onli wahn geh waiz if wi mek wi oan disizhan bays pahn Baibl prinsiplz. (Heeb. 5:14) Soh if wi di schrogl fi andastan how wi ku yooz Baibl prinsiplz fi mek wahn gud disizhan pahn dis mata, wi ku du sohn risaach eena wi poblikayshan dehn. An afta dat, if wi stil fain it haad fi andastan, den wi ku aks wahn waiz Kristyan fi advais.

KIP DI AKS FI ADVAIS

18. Weh Jehoava du fi wi?

¹⁸ Jehoava shoa dat ih chros wi wen ih alow wi fi mek wi oan disizhanz. Ih gi wi di Baibl an ih gi wi waiz frenz weh ku help wi andastan how fi yooz Baibl prinsiplz. Dat da paat a how ih tek kayr a wi az wi lovin Pa. (Prav. 3:​21-23) Soh how wi ku shoa Jehoava dat wi tankful fi di help weh ih gi wi?

19. How wi ku kantinyu mek Jehoava hapi?

¹⁹ Payrents hapi wen dehn pikni groa op fi bee waiz peepl weh serv Jehoava ahn help adaz. Ahn wee ku mek Jehoava hapi wen wi groa spirichwali, wen wi aks fi waiz advais, ahn wen wi mek disizhanz weh shoa wi lov fi hihn.