How Yu Ku Kip Di Laan Fahn Baysik Baibl Teechinz?

1. How yu mi feel wen yu fers laan di chroot fahn di Baibl?

DI FERS tingz wi laan wen wi staat stodi di Baibl mi chaynj wi laif. Fi egzampl, wen wi mi laan dat Gaad naym da Jehoava, wi mi staat jraa kloasa tu ahn. (Aiz. 42:8) Wen wi mi laan weh hapm tu sohnbadi wen dehn ded, wi mi stap wori if wi frenz ahn famili weh ded di sofa. (Ikl. 9:10) Ahn wen wi mi laan bowt Gaad pramis fi mek di ert wahn paradais, wi stap wori bowt weh wahn hapm eena di fyoocha. Wi laan dat wi ku liv fareva eena di fyoocha.—Saa. 37:29; 90:10.

2. How 2 Peeta 1:​12, 13 teech wi dat eevn machoar Kristyanz ku benifit fahn baysik Baibl teechinz?

² Eevn doa wi di taak bowt baysik Baibl teechinz, wi noh waahn tek dehn fi grantid, bikaaz dehn ku stil help wi. Di sekant leta weh di apasl Peeta mi rait da-mi fi Kristyanz weh mi-di “stik tu di chroot.” (Reed 2 Peeta 1:​12, 13.) Joorin da taim, dehn mi ga wikid peepl weh mi-di chrai stap di Kristyanz fahn serv Jehoava. (2 Peet. 2:​1-3) Peeta mi waahn schrentn ih bradaz ahn sistaz fi mek dehn noh bileev di laiz weh dehndeh wikid peepl mi-di teech. Soh ih rimain dehn bowt som a di tingz weh dehn mi don laan. Dehndeh teechinz mi wahn help dehn stay faytful tu di en.

3. Wai aal Kristyanz need fi kantinyu laan fahn baysik Baibl teechinz? Yooz di egzampl eena di paragraaf.

³ Eevn if wi deh eena di chroot fi wahn lang taim, wi ku stil benifit fahn baysik Baibl teechinz. Fi egzampl: Sohnbadi weh di kuk fi yaaz ahn sohnbadi weh jos di laan fi kuk mait yooz di saym ingreedyents fi pripyaa wahn meel. Eevn doa dehn di yooz di saym ingreedyents, di wan weh di kuk fi yaaz mait kom op wid sohnting moa inchrestin ahn naisa dan di wan weh jos di laan fi kuk. Saym way soh, sohnbadi weh deh eena di chroot fi yaaz ahn sohnbadi weh jos di laan di chroot mait andastan baysik Baibl teechinz eena difrent wayz. Wi serkomstans eena laif er weh wi du fi Jehoava praabli chaynj sins wi geh baptaiz. Soh eevn doa wi noa dehndeh teechinz fahn lang taim, weh wi di goh chroo eena laif now chaynj di way wi si dehn. Mek wi si weh sohnbadi weh di serv Jehoava fi yaaz ku laan fahn chree baysik Baibl teechinz.

JEHOAVA MEK EVRITING

4. How wi laif chaynj wen wi laan dat Jehoava mek evriting?

⁴ Sohnbadi weh waiz ahn powaful mek di ert an evriting weh deh pan it. Di Baibl seh dat “Gaad da di wan weh mek evriting.” (Heeb. 3:4) Bot wi ku laan wahn lat moa fahn dat. Jehoava mek wi, soh ih noa evriting bowt wi. Hihn kay bowt wi an ih noa weh bes fi wi. Ahn bikaaz wi noa dat Jehoava mek evriting, ih mek wi laif beta an ih gi wi laif moa meenin.

5. Weh ku help wi fi bee hombl? (Aizaiya 45:​9-12)

⁵ Wen wi tink bowt how Jehoava da di wan weh mek evriting, ih help wi fi bee hombl. Fi egzampl, wen Joab mi-di sofa, ih seh tingz bowt Jehoava weh da neva chroo. Hihn mi-di foakos moa pahn ihself ahn chrai difen ihself fahn ih soa-kaal frenz, insteda foakos pahn weh moa impoatant. Bot den Jehoava rimain ahn dat Hihn da di wan weh mek evriting. (Joab 38:​1-4) Dat mi help Joab fi riyalaiz dat Jehoava aalwayz du weh rait. Di prafit Aizaiya mi rait dat peepl noh fi tink dat dehn smaata dan di wan weh mek dehn.—Reed Aizaiya 45:​9-12.

6. Wen da wahn gud taim fi tink bowt how waiz ahn powaful Jehoava? (Koment pahn di picha dehn.)

⁶ Wen sohnbadi serv Jehoava fi yaaz, dehn ku staat pen pahn dehn oan aidyaaz an andastandin insteda pen pahn Jehoava ahn Fi Hihn Werd. (Joab 37:​23, 24) Bot if wi tink bowt how Jehoava grayta ahn waiza dan wee, how dat wahn help wi? (Aiz. 40:22; 55:​8, 9) Dis baysik Baibl teechin wahn help wi fi bee hombl ahn fi riyalaiz dat Jehoava tinkin wahn aalwayz bee beta dan fi wee wan.

7. Weh Rahela mi du fi aksep chaynjiz weh di aaganaizayshan mek?

⁷ Wen Rahela, wahn sista weh liv da Slovenia, fain it haad fi aksep wahn chaynj fahn di aaganaizayshan, ih help ahn fi tink bowt how Jehoava da di wan weh mek evriting. Shee seh: “Sohntaim, ih noh eezi fi aksep di disizhanz weh di bradaz weh di tek di leed mek. Fi egzampl, eevn afta Ah wach di Govanin Badi Opdayt #8 fi 2023, Ah mi shak di fers taim Ah mi si wahn brada wid wahn byaad di gi wahn taak. Soh Ah mi pray tu Jehoava an aks ahn fi help mi aksep di chaynj.” Rahela mi andastan dat sins Jehoava da di wan weh mek hevn an ert, hihn mos ku leed di aaganaizayshan eena di rait way. If yoo fain it haad fi aksep wahn nyoo andastandin er nyoo dairekshanz, tek taim fi tink bowt how Jehoava moa waiz ahn powaful dan enibadi els.—Roam. 11:​33-36.

WAI GAAD ALOW SOFARIN?

8. How wi benifit wen wi andastan wai Jehoava alow sofarin?

⁸ Wen peepl noh andastan wai Gaad alow sofarin, dehn geh beks wid Gaad er dehn tink dat hihn noh egzis. (Prav. 19:3) Bot yoo don laan dat Jehoava noh kaaz sofarin. Peepl sofa ahn ded bikaaz a sin. Bikaaz Jehoava payshent wid wi, wahn lata peepl di geh fi noa hihn ahn dehn aalso di geh fi andastan dat hihn wahn en sofarin. (2 Peet. 3:​9, 15) Wen yu andastan wai Jehoava alow sofarin, dat gi yu komfert ahn yu wahn jraa kloasa tu Jehoava.

9. Eena weh sichuwayshanz wi mait need fi tink bowt wai Jehoava alow sofarin?

⁹ Wi need fi bee payshent wail wi di wayt fi mek Jehoava en sofarin. Wen sohnbadi weh wi lov ded, er wen wee er wi famili di goh chroo haad taimz, er wen peepl chreet wi eena wahn way weh noh fyaa, wi mait geh beks bikaaz wi feel laik Jehoava di tek tu lang fi en sofarin. (Hab. 1:​2, 3) Wen wi feel da way, ih gud fi mek wi tink bowt di reeznz wai Jehoava alow sofarin.a (Saa. 34:19) Wi ku aalso tink bowt ih pramis fi en sofarin fareva.

10. Weh mi giv Anne komfert wen ih ma ded?

¹⁰ Wen wi andastan wai Gaad alow sofarin, ih help wi fi bayr op. Anne, weh liv pahn di ailan a Mayotte, eena di Indian Ocean, mi seh: “Ah mi reeli sad wen mi ma mi ded too yaaz agoa. Bot Ah aalwayz rimain miself dat Jehoava noh kaaz sofarin. Insted, ih reeli waahn geh rid a sofarin ahn rezorek dehn wan weh ded. An eevn doa Ah stil feel sad dat mi ma ded, wen Ah tink bowt dehndeh Baibl teechinz, Ah feel kaam ahn dehn gi mi di komfert weh Ah need.”

11. Bikaaz wi noa wai Jehoava alow sofarin, how dat help wi fi kantinyu preech?

¹¹ Wee andastan wai Gaad alow sofarin ahn dat ih wahn soon put wahn en tu sofarin. Peeta mi seh dat eena di meentaim, Jehoava di shoa payshens bikaaz ih wahn peepl ripent ahn geh sayv. Ahn Jehoava di shoa da payshens tu peepl eena yu kamyooniti bikaaz ih waahn gi dehn wahn apachooniti fi wership hihn. Wee lov peepl tu, jos laik Jehoava. Wi waahn dehn andastan wai Gaad di alow sofarin rait now. Ahn wi waahn dehn liv eena di nyoo werl weh Gaad pramis wi. Soh wi waahn du laik weh Peeta seh: “Unu need fi bee di kaina peepl weh kip dehn kandok hoali ahn shoa dat dehn faytful tu Gaad.” (2 Peet. 3:11) Wan way how wi ku shoa dat wi di stay faytful tu Gaad da wen wi goh preech. Dat gi wi di chaans fi teech peepl di chroot bowt wai Gaad alow sofarin. Ahn da wahn privilij fi werk lang wid Jehoava ahn help az moch peepl az pasabl fi laan bowt hihn bifoa di en kom.—1 Kor. 3:9.

WI DI LIV EENA “DI LAAS DAYZ”

12. How wi benifit wen wi laan dat wi di liv eena “di laas dayz”?

¹² Di Baibl tel wi weh peepl mi wahn stan laik joorin “di laas dayz.” (2 Tim. 3:​1-5) Ahn peepl nowadayz di goh aan jos laik how di Baibl mi seh dehn wahn di goh aan. Wi si peepl atichood ahn bihayvya di goh fahn bad tu wers. Sayka dat, wi noa wi ku chros di Baibl.—2 Tim. 3:​13-15.

13. How di iloschrayshan da Look 12:​15-21 ku help wi, ahn weh wi ku aks wiself?

¹³ Wen wi noa dat wi di liv eena di laas dayz, wi wahn foakos pahn di moas impoatant tingz. Wi laan wai dat impoatant fahn Jeezas iloschrayshan eena Look 12:​15-21. (Reed.) Di man eena di stoari mi “foolish,” noh bikaaz ih mi rich, bot bikaaz ih mi foakos pahn tingz weh neva reeli impoatant. Hihn mi “stoar op chrezhaz fi ihself,” bot tu Gaad hihn da-mi “wahn poa man.” Hihn neva yooz ih taim eena di rait way an ih neva ga moch taim fi liv. Gaad mi tel ahn: “Yu noh noa dat tunait yu wahn ded?” Wi di geh kloasa ahn kloasa tu di en, soh wi waahn aks wiself dehnya kweschanz: ‘How Ai yooz mi taim, mi enerji, ahn mi moni? Mai goalz shoa dat Ah di yooz dehndeh tingz fi foakos pahn weh moa impoatant? Di goalz weh Ah help mi chiljren set shoa dat Ah di yooz dehndeh tingz eena di rait way? Ai di werk haad fi stoar op chrezhaz fi miself er fi stoar op chrezhaz da hevn?ʼ

14. How Miki ekspeeryens shoa wi dat ih impoatant fi memba dat wi di liv eena di laas dayz?

¹⁴ Wen wi riyalaiz dat wi di liv eena di laas dayz, ih help wi noa weh kaina disizhanz wi shuda mek. Dat da weh hapm tu wahn sista weh naym Miki. Shee seh: “Afta Ah grajuayt fahn hai skool, Ah mi waahn wahn jab weh mi wahn alow mi fi stodi animalz. Ah mi aalso waahn painyaa ahn serv wehpaat dehn need moa help fi preech. Sohn bradaz ahn sistaz eena mi kangrigayshan tel mi fi tink gud bowt weda er nat Ah mi wahn ku stil painyaa if Ah geh di jab weh Ah mi waahn. Dehn mi rimain mi dat wi di liv eena di laas dayz, ahn dat eena di nyoo werl Ah wahn ga lata taim fi stodi bowt aal di animalz weh Ah waahn. Soh Ah mi disaid fi jos tek wahn klaas weh mi teech mi wahn skil weh help mi fi geh wahn jab weh mi wahn gi mi inof moni ahn taim fi painyaa. Ahn laytaraan, Ah kuda mi moov da Ecuador fi serv weh dehn need moa poblishaz.” Now, Miki an ih hozban di serv eena serkit werk da Ecuador.

15. How peepl mait rispan tu di gud nyooz? Yooz di egzampl eena di paragraaf. (Koment pahn di picha dehn.)

¹⁵ Wi noh waahn geh diskorij wen peepl noh waahn hyaa di gud nyooz. Peepl ku chaynj. Tek, fi egzampl, Jeezas haaf breda Jaymz. Hihn mi groa op wid Jeezas, ih mi si ahn ton di Mesaiya, an ih mi hyaa Jeezas teech beta dan how enibadi els teech. Bot fi yaaz, Jaymz neva waahn bee wan a Jeezas disaipl. Da noh til afta Jeezas geh rezorek, Jaymz mi ton wan a ih disaipl an ih da-mi wahn haad-werkin brada.b (Jan 7:5; Gal. 2:9) Ih impoatant fi noh giv op pahn yu famili er enibadi els weh noh lisn wen yu preech. Yu neva noa wen dehn mait aksep di gud nyooz. Memba wi di liv eena di laas dayz, soh noh stap preech. Dehn mait noh tink bowt weh yu tel dehn rait now, bot dehn mait tink bowt it laytaraan, maybi eevn afta di grayt chribyulayshan staat.c

BEE TANKFUL FI JEHOAVA RIMAINDAZ

16. How yu benifit fahn Jehoava rimaindaz? (Koment pahn di baks weh naym “Yooz Baibl Teechinz fi Help Adaz.”)

¹⁶ Som a di spirichwal food weh wi get gat een baysik Baibl teechinz fi help peepl weh jos di laan di chroot. Fi egzampl, wi poblik taak dehn, som a wi aatikl ahn veedyo weh deh pahn jw.org, ahn wi poblik magazeen dehn gat een infamayshan fi peepl weh noh di serv Jehoava yet. Eevn soh, wi stil benifit fahn dehndeh rimaindaz. Dehn mek wi lov fi Jehoava groa, dehn schrentn wi fayt eena di Baibl, ahn dehn help wi fi teech baysik Baibl chroot tu adaz.—Saa. 19:7.

17. Wen yu mait need fi tink bowt baysik Baibl teechinz?

¹⁷ Eevn if wi di serv Jehoava fi wahn lang taim, wi stil hapi wen wi geh wahn beta andastandin a wahn Baibl teechin. Bot wi aalso tankful fi di baysik Baibl teechinz weh wi mi laan eena di biginin. If wi eva temtid fi pen pahn wi oan aidyaaz insteda luk tu Jehoava ahn fi hihn aaganaizayshan, ih gud fi memba dat Jehoava da di wan weh mek evriting—hihn powaful ahn hihn noa evriting. Dat help wi fi stay hombl. If wee er sohnbadi weh wi lov di goh chroo wahn chraiyal, ih gud fi memba wai Jehoava alow dehn ting fi hapm. Dat wahn help wi fi bee payshent ahn wayt fi mek Jehoava fiks evriting. Wen wi di chooz how wi wahn yooz wi taim, enerji, ahn moni, ih gud fi memba dat wi di liv eena di laas dayz. Dat wahn help wi fi foakos pahn di moas impoatant tingz. Mek wi kip di laan fahn Jehoava rimaindaz soh dat wi ku bee waiz ahn kip di serv ahn dong tu di en.