Gaad Lov Wahn Laas Fareva

1-2. Weh prablem wahn lata wi fays?

IMAJIN wahn boat deh owt da see eena wahn bad staam. Di see rof bad an di boat di raak. Anles sombadi eena di boat let dong di anka, ih wahn kantinyu di moov bowt eniway wehpaat di see kehr it. Di anka da weh wuda hoal di boat stedi ahn mek ih noh jrif weh.

² Wen yu di goh chroo wahn haad taim, yu mait feel laik da boat. Sohntaim yu feelinz mait deh aal oava di plays. Wan day yu mait feel laik Jehoava lov yu ahn dehdeh fi yu, ahn di neks day yu feel laik hihn noh eevn noatis weh yu di goh chroo. (Saa. 10:1; 13:1) Maybi wahn fren komfert yu an ih mek yu feel gud fi wahn wail. (Prav. 17:17; 25:11) Bot yu staat dowt agen dat Jehoava kay bowt yu. Yu mait eevn tink dat Jehoava giv op pahn yu. If yoo di feel laik dis, how yoo ku let dong fi yoo anka? Weh ku help yu fi aalwayz bee shoar dat Jehoava lov yu ahn wahn aalwayz dehdeh fi yu?

3. (a) Weh “laayal lov” meenz? (Saam 31:7; 136:1) (b) Wai wi ku seh dat Jehoava da di bes egzampl a laayal lov? (Koment pahn di picha.)

³ Wan way weh ku help yu fi let dong fi yoo anka wen yu di goh chroo wahn haad taim da fi memba humoch Jehoava lov yu. (Reed Saam 31:7; 136:​1, ftn.) Dehnya vers seh dat Jehoava feel “laayal lov.” Wen sombadi feel dis kaina lov, da bikaaz ih laayal er ga deep afekshan tuwaadz sombadi els. Wahn lata taim wen di Baibl taak bowt Jehoava lov, ih di taak bowt laayal lov. Jehoava da di bes egzampl a laayal lov. In fak, di Baibl seh hihn “shoa wahn lata lov.” (Eks. 34:​6, 7) Di Baibl aalso seh dat Jehoava “ga lata lov” fi peepl weh kaal pan ahn. (Saa. 86:5) Tink bowt weh dat meenz: Jehoava wahn neva abandan fi hihn faytful servant dehn! Soh memba dat Jehoava aalwayz laayal. Dat ku help wi fi stay stedi wen wi di goh chroo chraiyalz.—Saa. 23:4.

TINK BOWT JEHOAVA LOV AZ WAHN BAYSIK BAIBL TEECHIN

4. Wat da sohn baysik Baibl teechin, ahn wai nobadi kyaahn stap yu fahn bileev dehn?

⁴ Wahn nada way yu let dong yu anka wen yu di goh chroo wahn haad taim da fi memba Jehoava lov az wahn baysik Baibl teechin. Weh di frayz “baysik Baibl teechin” meen tu yoo? Maybi yu tink bowt di fers Baibl teechinz weh yu mi laan fahn Gaad Werd. Fi egzampl, yu mi laan dat Gaad naym Jehoava, dat Jeezas da Gaad onli Son, dat peepl weh ded noh noa notn, ahn dat di ert wahn bee wahn paradais ahn peepl wahn liv pan it fareva. (Saa. 83:18; Ikl. 9:5; Jan 3:16; Rev. 21:​3, 4) Afta yoo bileev dat dehnya teechin da chroo, ih noh eezi fi mek sombadi stap yu fahn bileev dehn. Wai? Bikaaz yoo andastan dat dehnya teechin bays pahn faks. Wen yu memba Jehoava lov az wahn baysik Baibl teechin, dat wahn help yu fi noh dowt dat Jehoava lov yu an ih kay bowt weh yu di goh chroo. Mek wi si how.

5. Weh ku help sombadi fi rijek faals teechinz?

⁵ Weh mi help yu fi rijek faals teechinz wen yu mi fers staat stodi di Baibl? Maybi yu mi kompyaa weh yu cherch teech wid weh di Baibl teech. Fi egzampl, sopoaz yu mi bileev dat Jeezas da Gaad. Bot az yu stodi di Baibl, yu staat tu wanda if dat da weh di Baibl reeli teech. Afta yu stodi di Baibl fi wahn wail yu mi laan dat Jeezas da “di fersbaan owta evriting weh Gaad mek,” ahn hihn da “di onli Son a Gaad.” (Kol. 1:15; Jan 3:18) Faals teechinz da sohnting weh ku bee haad fi mek peepl let goh. (2 Kor. 10:​4, 5) Bot wans yu let goh a faals teechinz, yu noh wahn goh bak tu dehn.—Fil. 3:13.

6. Wai yu ku bee shoar dat Jehoava “lov laas fareva”?

⁶ Yu ku du di saym ting wid weh di Baibl teech bowt Jehoava lov. Wen yu di fays wahn prablem, yu ku staat dowt weda er nat Jehoava lov yu. If yu staat feel da way, aks yuself, ‘Di way how Ai di tink karek?ʼ Den kompyaa yu dowts bowt Jehoava lov wid weh di skripcha seh da Saam 136:1. Wai Jehoava seh dat fi hihn lov laayal? Ahn wai da saam seh “fi hihn lov laas fareva” 26 taimz? Memba dat Jehoava laayal lov fi ih peepl da wahn baysik Baibl teechin, jos laik di ada Baibl teechinz weh yu mi laan. Sohntaim yu mait bileev dat Jehoava noh lov yu, bot yu fi chreet da kaina tinkin di saym way how yu wuda chreet eni faals teechin. Yu let it goh ahn noh goh bak tu it fi notn!

7. Wat da sohn skripchaz weh proov dat Jehoava lov yu?

⁷ Di Baibl ga wahn lata vers weh kanvins wi dat Jehoava lov wi. Fi egzampl, Jeezas mi tel ih falowaz: “Unu wert moa dan aala dehnya lee berd.” (Mach. 10:31) Ahn Jehoava mi tel ih peepl: “Ai wahn schrentn yu, fi shoar, Ai wahn help yu, Ai wahn reeli hoal aan tu yu wid mai rait han a raichosnis.” (Aiz. 41:10) Yu noatis Jeezas neva seh ‘Yu mait wert moa,ʼ ahn Jehoava neva seh ‘Ai mait help yu.ʼ Soh wi ku bee shoar dat Jeezas lov wi ahn Jehoava wahn help wi. If yu eva feel laik Jehoava noh lov yu wen yu di goh chroo wahn haad taim, dehnya skripchaz wahn help yu fi feel beta, ahn dehn wahn help yu fi noa beta tu. Dehnya skripcha bays pahn faks. Soh if yu ga dowts, pray tu Jehoava bowt it ahn tek taim fi tink bowt skripcha laik dehnya. Den yu wahn ku seh weh 1 Jan 4:16 seh: “Wee noa ahn bileev dat Gaad lov wi.”a

8. Weh yu ku du if yu stil feel laik Jehoava noh lov yu?

⁸ Weh yu ku du if yu stil noh shoar if Jehoava lov yu? Kompyaa da feelin wid weh yu noa. Yu kyaahn pen pahn yu feelinz, bot yu ku pen pahn Jehoava lov. Di Baibl teech wi dat Jehoava lov da wahn fak. If yu noh bileev dat Jehoava lov yu, den yu di ferget Jehoava moas impoatant kwaliti, weh da lov.—1 Jan 4:8.

MEMBA DAT JEHOAVA LOV YU

9-10. Weh Jeezas mi-di taak bowt wen ih seh “di Faada lov unu”? (Jan 16:​26, 27) (Koment pahn di picha.)

⁹ Wi ku laan moa bowt Jehoava lov wen wi tink bowt weh Jeezas mi seh tu ih disaiplz: “Di Faada lov unu.” (Reed Jan 16:​26, 27.) Jeezas neva tel dehn dat jos fi mek dehn feel gud. Wen wi reed weh Jeezas mi-di taak bowt bifoa ih seh dat, wi laan dat hihn neva mi-di taak bowt fi dehn feelinz. Insted, hihn mi-di taak bowt pryaa.

¹⁰ Jeezas mi-di tel ih disaiplz dat dehn fi pray eena fi hihn naym, bot dehn noh fi pray tu hihn. (Jan 16:​23, 24) Ih mi impoatant fi mek dehn noa dat, bikaaz afta Jeezas mi rezorek, di disaiplz kuda mi waahn pray tu Jeezas. Dehn mi noa Jeezas gud ahn dehn kuda mi tink dat bikaaz hihn lov dehn hihn wuda waahn lisn tu dehn an aks ih Pa fi help dehn. Bot Jeezas tel dehn noh fi tink laik dat. Hihn mi tel dehn: “Di Faada lov unu.” Dat da paat a di baysik Baibl teechin bowt pryaa. Tink bowt weh dat meen fi yoo: Wen yu stodi di Baibl, yu mi geh fi noa Jeezas ahn lov ahn. (Jan 14:21) Bot laik Jeezas disaiplz, yu ku pray tu Gaad ahn noa dat ‘di Faada lov yu.ʼ Evri taim yu pray tu Jehoava, yu shoa dat yu bileev eena dat.—1 Jan 5:14.

ANDASTAN WEH KU MEK WI DOWT

11. Wai Saytan wuda waahn wi dowt dat Jehoava lov wi?

¹¹ Weh ku mek wi dowt dat Jehoava lov wi? Yu mait seh dat da Saytan, ahn dat da wan reezn weh kaaz wi fi ga dowts. Di Devl deh afta wi ahn hihn wuda waahn wi dowt dat Jehoava lov wi. (1 Peet. 5:8) Bikaaz a lov, Jehoava giv wi di ransom, bot Saytan waahn wi tink dat wi kyaahn benifit fahn di ransom. (Heeb. 2:9) Bot da hoo benifit wen wi dowt Jehoava lov fi wi? Saytan. Ahn hoo wahn hapi if wi geh soh diskorij dat wi giv op ahn stap serv Jehoava? Saytan. Saytan waahn wi tink dat Jehoava noh lov wi, bot dat da noh chroo. Hihn chrai chrik wi fi feel dat Jehoava noh lov wi ahn noh waahn ga notn fi du wid wi, bot hihn da di wan weh Jehoava noh lov. (Ifee. 6:11) Wen wi riyalaiz weh Saytan di chrai du, wi ku werk haada fi “stan op gens di Devl.”—Jay. 4:7.

12-13. How sin ku mek wi dowt dat Jehoava lov wi?

¹² Wahn nada reezn weh ku kaaz wi fi dowt dat Jehoava lov wi da sin weh wi inherit fahn Adam. (Saa. 51:5; Roam. 5:12) Sin damij wi rilayshanship wid Jehoava an ih aalso damij di way wi tink, how wi feel, ahn wi helt.

¹³ Sin afek wi eena wahn negitiv way. Ih ku mek wi feel gilti, frayd, ahn shaym. Wi ku feel laik dis wen wi sin, bot wi ku aalso feel laik dis bikaaz wi noa dat wi sinful. (Roam. 8:​20, 21) Jos laik wahn kaar weh ga wahn flat taiya noh wahn werk di way ih sopoas tu, wee noh werk di way wee sopoas tu. Soh ih noh sopraiz wi dat somtaim wi dowt dat Jehoava lov wi. If dat hapm, wi need fi memba dat Jehoava “da wahn grayt Gaad weh . . . aalwayz shoa lov tu enibadi weh lov [ahn] ahn weh kip [ih] komanment dehn.”—Neh. 1:5.

14. How di ransom help wi fi bee shoar dat Jehoava lov wi? (Roamanz 5:8) (Koment pahn di baks weh naym “Bee Kyaaful fi Mek ‘Sin Noh Chrai Fool Unu.ʼ”)

¹⁴ Somtaimz wi mait feel laik wi noh dizerv Jehoava lov, ahn yes, da chroo wi noh dizerv it, bot dat da wai fi hihn lov soh speshal. Notn weh wi du ku mek wi dizerv it. Bot stil Jehoava gi wi di ransom soh dat ih ku fergiv wi sin, an ih du dat bikaaz ih lov wi. (1 Jan 4:10) Memba, Jeezas mi kohn pahn di ert fi sayv sinaz, noh perfek peepl. (Reed Roamanz 5:8.) Non a wi noh perfek, ahn Jehoava noh ekspek wi fi bee. Wen wi andastan dat sin ku mek wi dowt weda er nat Jehoava lov wi, dat wahn mek wi fait fi noh giv een tu dehndeh dowts.—Roam. 7:​24, 25.

CHOOZ FI STAY LAAYAL

15-16. If wi stay laayal tu Jehoava, weh wi ku bee shoar a, ahn wai? (2 Samwel 22:26)

¹⁵ Jehoava waahn wi chooz fi stay laayal tu hihn. (Dyoo. 30:​19, 20) If wi stay laayal tu hihn, hihn wahn stay laayal tu wee. (Reed 2 Samwel 22:26.) Az lang az wi stay laayal tu Jehoava, wi ku bee shoar dat hihn wahn help wi noh mata weh wi di goh chroo.

¹⁶ Soh wi ga gud reezn fi bileev dat Jehoava lov wi an ih wahn help wi. Dat da wi anka soh dat wi ku stay stedi wen wi ga prablemz. Dat da weh di Baibl teech wi. If wi dowt dat Jehoava lov wi, memba weh wi noa bowt Jehoava lov insteda foakos pahn how wi di feel. Mek wi chros weh di Baibl seh da chroo—dat Jehoava lov wahn laas fareva.