How fi Bee Hapi Eevn Wen Yu Di Geh Oal

1-2. How Jehoava feel bowt faytful oalda bradaz ahn sistaz? (Saam 92:​12-14; koment pahn di picha.)

EENA som paat a di werl, peepl tink dat da wahn aana fi geh oal. Bot eena adaz playsiz, peepl du eniting fi mek dehn noh luk laik dehn di get oal. Fi egzampl, yoo memba di fers gray hyaa weh yu get? Yu praabli hori pul it owt bikaaz yu noh waahn nobadi els seeʼt. Bot layta yu riyalaiz dat noh mata humoch taim yu pul dehn owt, dehn wahn stil kom bak. Dis shoa wi dat noh mata weh wi du, wi kyaahn stap wiself fahn geh oal.

² Bot how wi hevnli Faada feel bowt ih servants weh di geh oalda? (Prav. 16:31) Hihn seh dat dehn da laik wahn byootiful chree. (Reed Saam 92:​12-14.) Wai hihn seh dat? Wahn chree weh ga lata leef er flowaz da yoozhwali wahn oal chree. Wan a di moas byootiful chree da di Japanese cheri chree weh ga lata byootiful blaasam. Som a di moas byootiful wanz oava wahn towzn yaaz oal. Sayhn way soh, oalda bradaz ahn sistaz preshos tu Jehoava. Hihn si di byootiful kwalitiz weh dehn gat. Jehoava si how dehn mi faytful tu hihn joorin gud taimz ahn bad taimz.

3. Giv wahn egzampl a how Jehoava mi yooz oalda wanz fi du ih wil.

³ Jos bikaaz wahn persn di geh oalda, dat noh meenz dat Jehoava valyu da persn eni les.a In fak, Jehoava mi yooz oalda wanz fi du amayzin tingz. Fi egzampl, Saara mi op eena ayj wen Jehoava mi tel shee dat ih mi wahn ga wahn son. Ahn wahn big nayshan mi wahn kom fahn ih son ahn di Mesaiya mi wahn bee wan a fi shee disendant. (Jen. 17:​15-19) Moaziz mi 80 yaaz oal wen Jehoava mi tel ahn fi leed di Izrelaits fahn owta Eejip. (Eks. 7:​6, 7) Ahn di apasl Jan mi oal wen Jehoava yooz hihn fi rait faiv Baibl buks.

4. Akaadn tu Praverbz 15:​15, wat ku help oalda wanz bayr op chroo di chraiyalz weh dehn fays? (Koment pahn di picha.)

⁴ Oalda wanz fays wahn lata difrent prablemz az dehn di geh oalda. Wahn oalda sista seh, “Oal ayj da no joak.” Bot jaib ku help oalda bradaz ahn sistaz fi bayr op chroo di chraiyalz weh dehn fays az dehn geh oalda. (Reed Praverbz 15:15.) Eena dis aatikl, wi wahn taak bowt wai ih ku bee wahn chalenj fi oalda wanz kip dehn jai. Wi wahn aalso taak bowt difrent tingz weh oalda wanz ku du fi kip dehn jai, ahn how adaz ku help oalda bradaz ahn sistaz eena dehn kangrigayshan.

WAI IH KU BEE WAHN CHALENJ FI OALDA WANZ KIP DEHN JAI

5. Weh mait mek oalda wanz geh diskorij?

⁵ Weh mait mek yu feel diskorij? Maybi yu feel da way bikaaz yu kyaahn du weh yu yoostu du. Yu mait wish yu kuda bee yong ahn helti agen. (Ikl. 7:10) Fi egzampl, wahn sista weh naym Ruby seh: “Ih haad jos fi put aan kloaz, bikaaz Ah aalwayz deh eena payn an Ah kyaahn moov bowt laik how Ah waahn. Jos fi put aan saks haad fi mek Ah du. Mi han dehn nom an Ah ga bad aachraitis, ahn dat mek it haad fi du eniting.” Ahn wahn brada weh naym Harold, weh serv da Betel, seh: “Ai kyaahn rekonaiz di persn weh Ah en op di bee, ahn somtaimz Ai geh foschraytid, bikaaz Ah yoostu laik play baysbaal. Peepl yoostu seh, ‘Giv di baal tu Harold bikaaz hihn wahn mek wi win.ʼ Bot now, Ai noh eevn tink Ah ku chroa wahn baaI.”

6. (a) Wat da sohn ada reezn wai oalda wanz mait feel diskorij? (b) Weh ku help oalda wanz fi disaid weda er nat dehn fi stap jraiv? (Reed di aatikl weh naym “Ai Shuda Stap Jraiv?” eena dis magazeen.)

⁶ Yu mait feel diskorij bikaaz yu kyaahn du tingz weh yu yoostu du bai yuself nohmoh. Maybi yu need sombadi fi help tek kayr a yu er yu haftu moov een wid yu pikni. Er maybi yu noh ga gud helt er kyaahn si gud nohmoh, ahn soh yu kyaahn goh playsiz bai yuself er jraiv nohmoh. Ahn dat ku bee haad. Bot memba yoo preshos tu Jehoava ahn tu adaz eevn if yu need help fi tek kayr a yuself, if yu liv bai yuself, er if yu kyaahn jraiv nohmoh. Ahn wee ku bee shoar dat Jehoava andastan how wi feel. Weh mata tu hihn da weh deh eena wi haat. (1 Sam. 16:7) Hihn noa humoch wi lov hihn ahn wi bradaz ahn sistaz, ahn dat da weh mek wee preshos tu hihn.

7. Weh ku help oalda wanz weh feel sad bikaaz dehn tink dehn mait noh geh fi si di en kohn?

⁷ Maybi yu mait feel sad bikaaz yu tink yu noh wahn geh fi si di en kohn. If yu feel dis way, weh ku help yu? Chrai memba dat Jehoava waahn bring wahn en tu dis wikid werl bot hihn ga gud reezn wai ih noh du it yet. (Aiz. 30:18) Hihn di giv peepl moa taim fi mek dehn geh fi noa hihn ahn serv ahn. (2 Peet. 3:9) Soh wen yu di feel diskorij, chrai tink bowt humoch peepl wahn benifit bikaaz Jehoava payshent. Som a dehn ku bee yu oan famili membaz.

8. Weh oalda wanz mait du wen dehn sik er deh eena payn?

⁸ Noh mata if wi yong er oal, wen wi sik er deh eena payn, wi moa dan laikli mait du er seh tingz weh wi mait rigret laytaraan. (Ikl. 7:7; Jay. 3:2) Fi egzampl, wen Joab mi-di sofa, hihn “taak loan krayzinis.” (Joab 6:​1-3) Aalso, oalda wanz mait seh er du tingz weh dehn naamali wudn seh er du, maybi bikaaz a dehn medikal kandishan. Bot jos bikaaz yu sik er oalda, dat noh giv yu reezn fi noh bee kain er fi bee dimandin. An if wi riyalaiz dat wi seh sohnting weh noh lovin tu sombadi, wi fi bee kwik fi seh sari.—Mach. 5:​23, 24.

HOW OALDA WANZ KU KIP DEHN JAI

9. Wai yu shuda aksep help fahn adaz? (Koment pahn di picha dehn.)

⁹ Aksep help fahn adaz. (Gal. 6:2) At fers, yu mait fain dat haad fi du. Wahn sista weh naym Gretl seh: “Somtaimz Ai fain it haad fi aksep help bikaaz Ah feel laik Ai di bada peepl tu moch. Ih mi tek mi sohn taim fi chaynj di way how Ah mi tink an admit dat Ah mi need help.” Wen yu aksep help fahn adaz, yu wahn mek dehn feel hapi. (Aks 20:35) Ahn yu wahn feel hapi tu fi si humoch dehn lov yu ahn kay bowt yu.

10. Wai yu shuda memba fi bee tankful? (Koment pahn di picha.)

¹⁰ Bee tankful. (Kol. 3:15; 1 Tes. 5:18) Wen sombadi du sohnting nais fi wi, wi feel tankful bot wi mait ferget fi shoa it. Bot if yu smail ahn seh tanks, wi mek wi frenz noa dat wee feel graytful fi weh dehn du fi wi. Wahn sista weh naym Leah, hoo tek kayr a oalda bradaz ahn sistaz da Betel, seh: “Wan a di sistaz weh Ai tek kayr a wuda lef mi wahn lee kyaad. Shee noh rait notn lang bot dehn sweet. Ai lov fi reed dehn, an ih mek mi hapi fi noa dat shee apreeshiayt wen Ai help ahn.”

11. How yoo ku help adaz? (Koment pahn di picha.)

¹¹ Chrai fi help adaz. Wen yu foakos yu taim an enerji pahn adaz, yu wahn tink les bowt fi yoo oan prablemz. Wi ku kompyaa oalda wanz tu wahn laibri weh ful op a buks weh wi ku laan fram. Bot if peepl noh reed di buks, den dehn kyaahn laan fahn dehn. Saym way soh, yonga wanz kyaahn laan fahn yoo if yoo noh taak tu dehn ahn tel dehn weh yoo noa. Aks dehn kweschanz ahn den lisn tu dehn. Den yu ku tel dehn how Jehoava mi help yoo eena yu laif ahn how hapi dehn wahn bee if dehn obay Jehoava. Wen yu komfert an inkorij yu frenz weh yong, yoo wahn feel hapi tu.—Saa. 71:18.

12. Akaadn tu Aizaiya 46:​4, weh Jehoava pramis fi du fi oalda wanz? (Koment pahn di picha.)

¹² Pray tu Jehoava fi gi yu schrent. Somtaimz yu mait feel taiyad er week, ahn dat mek yu feel diskorij. Bot memba dat Jehoava veri powaful. Di Baibl seh dat hihn “noh geh taiyad ner giv op.” (Aiz. 40:28) Soh hihn ku gi yu aal di schrent weh yu need. (Aiz. 40:​29-31) In fak, hihn pramis fi help oalda wanz. (Reed Aizaiya 46:4.) Ahn Jehoava aalwayz kip ih pramis dehn. (Jash. 23:14; Aiz. 55:​10, 11) Wen yu pray, Jehoava wahn gi yu di help yu need. Den wen yu feel humoch hihn lov yu, dat wahn mek yu hapi.

13. Akaadn tu 2 Korintyanz 4:​16-18, weh wi shuda memba? (Koment pahn di picha.)

¹³ Memba yu sichuwayshan wahn onli bee fi wahn lee wail. Wen wi memba dat wahn haad sichuwayshan wahn onli laas fi wahn lee wail, ih wahn moa eeziya fi mek wi bayr op. Ahn di Baibl pramis wi dat eena di fyoocha peepl noh wahn geh oal ahn sik nohmoh. (Joab 33:25; Aiz. 33:24) Soh yoo ku bee hapi dat eena di fyoocha, yoo wahn bee helti ahn schrang agen ahn way moa byootiful. (Reed 2 Korintyanz 4:​16-18.) Bot weh adaz ku du fi help?

HOW ADAZ KU HELP

14. Wai ih impoatant fi vizit oalda bradaz ahn sistaz ahn fi kaal dehn?

¹⁴ Vizit oalda bradaz ahn sistaz ahn kaal dehn regyula. (Heeb. 13:16) Oalda wanz ku feel sad bikaaz dehn spen wahn lata taim bai dehnself. Wahn brada weh kyaahn lef ih hows bikaaz a ih helt seh: “Aal day Ai haftu stay hoam bikaaz Ah kyaahn lef mi hows. Somtaimz Ah feel laik wahn oal laiyan eena wahn kayj. Ai geh beks ahn foschraytid bikaaz dehn noh ga moch weh Ah ku du.” Wen wi goh vizit oalda bradaz ahn sistaz, wi shoa dehn dat dehn impoatant tu wee ahn dat wi lov dehn. Maybi wi ku memba wahn taim wen wi mi waahn goh vizit er kaal wahn oalda brada er sista bot neva did en op di du it bikaaz wi mi bizi. Soh weh ku help wi fi du “di moa impoatant tingz,” laik fi vizit wi oalda bradaz ahn sistaz? (Fil. 1:10) Maybi yu ku ad wahn rimainda pahn yu kalinda soh dat yu ku sen wahn lee teks er kaal wahn oalda brada er sista fahn yu kangrigayshan. Yu ku aalso plan wahn day wen yu ku goh vizit dehn.

15. Weh yonga wanz an oalda wanz ku du tugeda?

¹⁵ If yu da wahn yonga persn, yu mait wanda weh yu wahn taak bowt er du wen yu deh wid wahn oalda brada er sista. Bot yu noh need fi wori. Jos bee wahn gud fren. (Prav. 17:17) Taak wid wahn oalda brada er sista bifoa er afta meetin. Maybi yu ku aks dehn wat da dehn fayvrit skripcha er sohnting foni weh dehn memba fahn wen dehn mi smaal. Yu ku aalso invait dehn fi wach wahn JW Braadkyaastin proagram wid yu. Maybi yu ku aalso help dehn du sohnting weh dehn kyaahn du bai dehnself. Fi egzampl, yu ku help dehn wid dehn ilekchranik divais ahn mek shoar ih deh op tu dayt er dongload di laytes poblikayshanz fi meetin. Wahn sista weh naym Carol seh: “Aafa fi du tingz weh yoo laik du. Eevn doa Ai oalda, Ai stil waahn injai laif. Ai laik goh shapin, goh owt goh eet, ahn spen taim owtsaid an injai Jehoava kriyayshan.” Wahn nada sista weh naym Maira seh: “Wan a mai frenz 90 yaaz oal an Ai 57 yaaz yonga dan shee. Bot Ai aalwayz ferget dat, bikaaz wee laaf tugeda ahn wach moovi tugeda. Ahn wen wi ga wi oan prablemz, wee goh tu eech ada fi advais.”

16. Wai ih wuda bee helpful fi goh wid wi oalda bradaz ahn sistaz da di dakta?

¹⁶ Goh wid dehn da dakta. Yu ku kehr dehn fi goh da dakta, bot aalso mek shoar di dakta er ners di chreet dehn gud ahn di help dehn. (Aiz. 1:17) Maybi yu ku aalso help tek noats fi dehn bowt weh di dakta di tel dehn. Wahn oalda sista weh naym Ruth seh: “Moas a di taim wen Ai goh da dakta bai miself, dehn neva tek mi seeryos. Somtaimz dehn tel mi, ‘Yoo noh sik, da onli eena yu hed.ʼ Bot wen Ai goh wid sombadi els, di daktaz chreet mi moch beta. Ah tankful fi mi bradaz ahn sistaz weh tek taim fi goh wid mi.”

17. Eena weh wayz wi ku injai di minischri wid oalda bradaz ahn sistaz?

¹⁷ Werk wid dehn eena di minischri. Som a wi oalda bradaz ahn sistaz kyaahn preech fahn hows tu hows. Maybi yu ku invait dehn fi jain yu fi du kyaat werk wid yu. Maybi yu ku kehr wahn chyaa fi dehn soh dat dehn ku sidong. Er yu ku invait dehn fi goh wid yu pahn wahn Baibl stodi. Yu ku eevn kandok di stodi da dehn hows. Eldaz ku mek araynjment fi ga feel servis meetin da wan a di oalda brada er sista hows soh dat ih eeziya fi mek dehn tek paat. Wee mek Jehoava hapi enitaim wi du tingz fi help oalda bradaz ahn sistaz.—Prav. 3:27; Roam. 12:10.

18. Weh wi wahn taak bowt eena di neks aatikl?

¹⁸ Dis aatikl rimain wi dat Jehoava lov wi an ih valyu oalda bradaz ahn sistaz. An aala wee eena di kangrigayshan lov ahn valyu dehn tu. Oal ayj da no joak, bot wid Jehoava help, yoo ku bee hapi tu. (Saa. 37:25) Ahn yoo ku luk faawod tu wahn taim wen yu ga braita dayz! Bot wat bowt dehn wan weh haftu tek kayr a wahn oalda famili memba, wahn pikni, er wahn fren weh sik? How dehn ku kip dehn jai? Dat da weh wi wahn taak bowt eena di neks aatikl.