“Yoo Veri Preshos tu Gaad”!

1-2. Weh ku help wi fi bee shoar dat wee preshos tu Jehoava?

JEHOAVA peepl veri preshos tu ahn, bot som a dehn noh feel da way. Maybi dehn feel laik Jehoava noh reeli lov dehn bikaaz ada peepl chreet dehn bad er mek dehn feel laik dehn noh mata. Yoo eva feel da way? Weh ku help yu fi noa dat yoo preshos tu Jehoava?

² Wan ting weh ku help yu da fi reed skripchaz weh shoa how Jehoava waahn mek peepl chreet wan anada. Jeezas mi chreet peepl kain ahn wid rispek. Dat shoa wi dat peepl weh feel laik dehn noh gud inof akchwali veri preshos tu hihn ahn tu ih Pa. (Jan 5:19; Heeb. 1:3) Eena dis aatikl, wi wahn taak bowt (1) how Jeezas mi help peepl fi si dat dehn preshos tu Jehoava ahn (2) how wi ku kanvins wiself dat wee preshos tu Jehoava.—Hag. 2:7.

HOW JEEZAS MI HELP PEEPL FI SI DAT DEHN PRESHOS TU JEHOAVA

3. How Jeezas mi chreet di peepl da Gyalilee weh mi gaahn tu ahn fi help?

³ Wen Jeezas mi deh pahn ert, di rilijos leedaz yoostu luk dong pahn di peepl, ahn dehn mi eevn seh dat dehn “don kandem aredi.” (Jan 7:​47-49; reed di noat eena di Study Bible) Bot Jeezas da neva laik dat. Hihn mi si dat di peepl “da-mi laik sheep weh dehn oana chreet bad ahn dash wan said. Dehn da-mi laik sheep widowt wahn shepad.” (Mach. 9:36; reed di noat dehn eena di Study Bible.) Soh Jeezas mi chreet dehn wid rispek ahn tek taim fi teech dehn ahn heel dehn. (Mach. 9:35) Wen Jeezas mi-di preech da Gyalilee, lata peepl mi gaahn lisn tu ahn an mek ih kyoar dehn. Ahn bikaaz Jeezas mi waahn help eevn moa peepl, ih mi chrayn ih apasl dehn fi teech peepl an ih mi tel dehn fi kyoar peepl lang di way.—Mach. 10:​5-8.

4. Weh wi laan fahn di way how Jeezas mi chreet peepl weh adaz luk dong pan?

⁴ Wen Jeezas mi chreet peepl wid kainis ahn rispek, ih mi shoa wi dat peepl weh adaz luk dong pan preshos tu hihn ahn tu Jehoava. Soh if yu di serv Jehoava ahn yu noh shoar if Jehoava reeli lov yu, tink bowt how Jeezas mi chreet peepl weh mi waahn laan fan ahn. Dat wahn help yu fi si how preshos yoo preshos tu Jehoava.

5. Weh wi noa bowt wahn laydi weh Jeezas mi meet wen ih mi-di preech da Gyalilee?

⁵ Jeezas neva onli preech tu di krowd a peepl weh gaahn lisn tu ahn. Hihn mi pay atenshan tu eech persn weh mi need help. Fi egzampl, wen Jeezas mi-di preech da Gyalilee, ih mi meet wahn laydi weh mi-di sofa fahn hemrij fi 12 yaaz. (Maak 5:25) Bikaaz a fi shee medikal kandishan, di Laa seh shee neva kleen ahn dat enibadi weh toch ahn neva mi wahn bee kleen needa. Soh shee mi kyaahn spen moch taim wid ada peepl, an ih mi kyaahn wership Jehoava wid ada peepl da di sinagag er da di difrent festival weh dehn yoostu selibrayt. (Lev. 15:​19, 25) Soh dis laydi neva jos sik; ih mi praabli feel laik ih mi deh pahn ih oan ahn laik nobadi mi kay bowt ahn.—Maak 5:26.

6. Weh di laydi mi du fi geh kyoar?

⁶ Dis poa lee laydi mi-di sofa fi soh lang, an ih mi waahn mek Jeezas kyoar ahn. Bot shee neva gaahn aks Jeezas fi du dat. Wai? Maybi ih mi feel shaym sayka ih siknis. Er maybi ih mi frayd dat Jeezas mi wahn jraiv ahn weh bikaaz shee neva sopoas tu deh monks di krowd, sayka weh shee neva kleen. Soh shee jos gaahn toch Jeezas kloaz, kaaz shee mi shoar dat dat mi wahn kyoar ahn. (Maak 5:​27, 28) Ahn shee mi rait! Sayka ih schrang fayt, ih geh kyoar! Den wen Jeezas aks hoo toch ahn, shee tel ahn weh ih du. How Jeezas mi chreet ahn?

7. How Jeezas mi chreet di laydi weh mi-di sofa fi soh lang? (Maak 5:34)

⁷ Jeezas mi chreet di laydi kain an ih mi shoa ahn rispek. Hihn mi si dat shee mi “staat tu chrimbl ahn geh fraitn.” (Maak 5:33) Ahn soh Jeezas mi kain tu di laydi an ih mi inkorij ahn. Ih mi eevn kaal ahn “daata.” Dat da-mi wahn veri lovin ahn kain way fi shoa rispek far ahn. (Reed Maak 5:34.) Dis da di onli taim eena di Baibl weh Jeezas mi kaal sohnbadi “daata.” Hihn mi praabli du dat eena dis sichuwayshan bikaaz ih mi si how fraitn di laydi mi feel. How yu tink di laydi mi feel afta Jeezas mi taak tu ahn laik dat? Shee mosi mi soh hapi bikaaz Jeezas mi soh kain tu ahn! Noh mata weh Jeezas mi seh, shee mi don geh kyoar. Bot if Jeezas mi skoal ahn er eniting laik dat, shee mi wahn praabli feel bad fi wahn lang taim. Soh insted, Jeezas mi taak tu di laydi eena wahn lovin ahn kain way, an ih mi help shee fi si dat wi hevnli Faada si shee az wahn preshos daata.

8. Weh wahn sista fahn Brazil mi haftu deel wid?

⁸ Nowadayz, som a Gaad peepl sofa fahn helt prablemz weh ku mek dehn feel dipres er laik dehn wertles. Maria,a wahn regyula painyaa fahn Brazil, neva baan wid no fut er ih lef han. Shee seh: “Dehn mi aalwayz buli mi da skool, ahn dehn mi kaal mi lata hertful naymz. Sohntaim eevn mi oan famili mi chreet mi laik Ah noh wert notn.”

9. Weh mi help Maria fi si dat shee preshos tu Jehoava?

⁹ Weh mi help Maria? Wen shee mi staat serv Jehoava, di bradaz ahn sistaz eena ih kangrigayshan mi giv ahn komfert ahn help ahn fi si ihself di way how Jehoava si ahn. Shee seh: “Soh moch bradaz ahn sistaz help mi! Ah soh tankful tu Jehoava bikaaz ih gi mi wahn wandaful spirichwal famili.” Dehndeh bradaz ahn sistaz mi help Maria fi noa dat shee preshos tu Jehoava.

10. Weh prablem Mayri Magdaleen mi gat, ahn how dat mi mek ih feel? (Koment pahn di picha dehn.)

¹⁰ Mek wi taak bowt how Jeezas mi help wahn nada persn—Mayri Magdaleen. Shee mi ga sevn deemon eena ahn! (Look 8:2) Di deemonz mi praabli mek shee du aal kaina schraynj ting, ahn soh peepl mi praabli stay faar fan ahn. Shee mi sofa wahn lat. Ih mosi mi feel frayd, feel laik nobadi lov ahn, an feel laik nobadi ku help ahn. Jeezas mi set ahn free fahn di deemonz, ahn shee mi staat fala ahn. Wat da sohn ada wayz how Jeezas mi help Mayri Magdaleen fi andastan dat shee preshos tu Gaad?

11. How Jeezas mi shoa Mayri Magdaleen dat shee preshos tu Gaad? (Koment pahn di picha dehn.)

¹¹ Jeezas mi invait Mayri Magdaleen fi goh lang wid hihn an ih disaipl dehn wen dehn mi-di preech fahn vilij tu vilij.b Sayka dat, shee mi kantinyu fi benifit bikaaz shee kuda mi hyaa wen Jeezas mi-di teech ada peepl. Jeezas mi apyaa tu shee pahn di day wen ih mi geh rezorek. Shee da-mi wan a di fers disaipl weh hihn mi taak tu pahn da day. Hihn mi eevn aks shee fi goh tel di apasl dehn dat hihn mi geh rezorek. Eena aala dehnya wayz, Jeezas mi shoa Mayri dat shee mi preshos tu Jehoava!—Jan 20:​11-18.

12. Weh mi mek Lidia feel laik nobadi kuda eva lov ahn?

¹² Jos laik Mayri Magdaleen, lata peepl tudeh feel laik nobadi lov dehn. Lidia, wahn sista fahn Spain, seh dat wen fi shee ma mi pregnant wid ahn, ih mi-di tink bowt geh wahn aboarshan. Lidia memba dat eevn wen shee mi smaal, ih ma yoostu niglek ahn an taak tu ahn eena wahn kruwil way. Shee seh: “Bikaaz mi ma neva shoa mi lov, aal Ai mi waahn da fi mek ada peepl lov mi ahn waahn bee mi fren. Bot Ah mi frayd dat nobadi mi wahn lov mi bikaaz mi ma mi kanvins mi dat Ai da wahn bad persn.”

13. Weh mi help Lidia fi si dat shee preshos tu Jehoava?

¹³ Tingz mi chaynj fi Lidia wen ih staat stodi di Baibl. Shee geh fi andastan dat ih preshos tu Jehoava wen shee pray tu ahn an reed ih Baibl ahn wen bradaz ahn sistaz du ahn seh nais tingz far ahn. Shee seh: “Mi hozban aalwayz tel mi humoch ih lov mi, an ih rimain mi bowt mi gud kwalitiz. Ada kloas frenz du dat tu.” Maybi sohnbadi eena yu kangrigayshan need help fi andastan how preshos dehn preshos tu Jehoava, ahn yu ku bee di wan fi du ahn seh nais tingz fi help dehn.

HOW FI SI WISELF DI WAY JEHOAVA SI WI

14. How 1 Samwel 16:7 help wi fi si wiself di way Jehoava si wi? (Koment pahn di baks weh naym “Wai Jehoava Peepl Soh Preshos tu Hihn?”)

¹⁴ Memba dat Jehoava noh si yu di way peepl eena di werl si yu. (Reed 1 Samwel 16:7.) Peepl eena di werl wahn joj yu valyu bays pahn how yu luk, humoch moni yu gat, er humoch ejukayshan yu gat. Bot Jehoava da noh laik dat. (Aiz. 55:​8, 9) Soh insteda tink bowt yuself di way di werl tink bowt yu, chrai fi si yuself di way Jehoava si yu. Di Baibl taak bowt peepl weh mi feel laik dehn noh wert notn sohntaim, laik Ilaija, Nayomi, ahn Hana. Wen yu reed bowt dehn, noatis humoch lov Jehoava mi shoa fi dehn. Yu ku rait dong eniting weh hapm eena yu laif weh shoa yu dat Jehoava lov yu ahn dat yu preshos tu hihn. An enitaim yu feel laik yu noh impoatant tu Jehoava, yu ku luk op risaach infamayshan eena wi poblikayshan dehn weh ku help yu fi si dat yoo preshos tu Jehoava.c

15. Wai Danyel mi soh preshos tu Jehoava? (Daniel 9:23)

¹⁵ Memba dat yu preshos tu Jehoava bikaaz yu faytful. Wahn taim, maybi wen Danyel mi nayli 100 yaaz oal, ih mi taiyad bad an ih mi feel diskorij. (Dan. 9:​20, 21) How Jehoava mi inkorij ahn? Ih mi sen di aynjel Gaybral fi rimain Danyel dat ih mi “veri preshos tu Gaad” ahn dat Jehoava hyaa ih pryaaz. (Reed Daniel 9:23.)d Wai Danyel mi soh preshos tu Jehoava? Danyel mi faytful an ih mi lov raichosnis. (Ezek. 14:14) Jehoava put aala dat eena di Baibl fi gi wee komfert. (Roam. 15:4) Yoo preshos tu Jehoava tu, bikaaz yu lov weh rait ahn yu faytful tu ahn. Soh jos laik how Jehoava lisn tu Danyel pryaaz, ih wahn lisn tu yoo tu.—Mic. 6:​8, ftns.; Heeb. 6:10.

16. Weh ku help yu fi si Jehoava az wahn lovin Pa?

¹⁶ Memba dat Jehoava da yu Pa an ih lov yu. Hihn waahn help yu, ih noh waahn fain faalt wid yu. (Saa. 130:3; Mach. 7:11; Look 12:​6, 7) Lata peepl weh feel laik dehn noh gud inof benifit wen dehn tek taim fi tink bowt how Jehoava feel bowt dehn. Fi egzampl, wahn sista fahn Spain weh naym Michelle mi feel laik nobadi lov ahn an laik ih noh wert notn bikaaz ih hozban mi chreet ahn bad ahn taak tu ahn eena wahn kruwil way fi yaaz. Shee seh, “Enitaim Ah feel yoosles, Ah chrai imajin Jehoava di bak mi ahn protek mi ahn shoa mi lov.” (Saa. 28:9) Lauren, wahn sista fahn South Africa, rimain ihself, “If Jehoava jraa mi kloas tu ahn, kip mi kloas tu ahn fi aal dehnya yaaz, an eevn yooz mi fi teech adaz, den hihn mos tink dat Ai preshos ahn dat ih ku yooz mi fi du ih wil.”—Jan 6:44.

17. Weh ku help yu fi bee shoar dat Jehoava hapi wid yu? (Saam 5:12) (Koment pahn di picha.)

¹⁷ Bee shoar dat Jehoava hapi wid yu. (Reed Saam 5:12.) Dayvid seh dat wen wi raichos, dat mek Jehoava hapi an ih wahn protek wi “jos laik how wahn big sheel gi protekshan.” Wen wi noa dat Jehoava hapi wid wi, dat ku protek wi wen wi staat tink bad bowt wiself. How yu ku noa if Jehoava hapi wid yu? Jehoava tel wi how ih feel bowt wi eena di Baibl. Ih aalso yooz eldaz, kloas frenz, an adaz fi rimain wi dat wi preshos tu hihn. How yu shuda feel wen yu geh da inkorijment?

18. Wai yu shuda bileev di komendayshan weh yu geh fahn adaz?

¹⁸ Wen peepl weh noa yu ahn lov yu tel yu gud tingz bowt yuself, noh tink dat dehn rang. Memba dat Jehoava ku yooz dehn fi help yu noa dat hihn hapi wid yu. Sista Michelle seh: “Lee bit bai lee bit, Ah di laan fi bileev di kain werdz ahn gud tingz weh adaz tel mi bowt miself. Ih ku bee haad fi bileev dehndeh tingz, bot Ah noa dat da weh Jehoava waahn Ah du.” Di eldaz help Michelle tu, soh dat ih ku si dat ih preshos tu Jehoava. Now shee da wahn painyaa an ih du rimoat werk fi Betel.

19. Wai wi ku bee shoar dat wi preshos tu Jehoava?

¹⁹ Jeezas tel wi dat wi veri impoatant tu wi hevnli Faada. (Look 12:24) Soh wi ku bee shoar dat wee preshos tu Jehoava. Neva ferget dat! Ahn mek wi du wi bes fi help adaz fi si how preshos dehn preshos tu Jehoava!