Chrai fi Bee Hombl Laik Jehoava

1. Wai ih soh amayzin dat Jehoava hombl?

WEN yu tink bowt peepl eena powa, yu wuda seh dat dehn hombl? Praabli nat. Bot Jehoava, hoo da di moas powaful persn eena di yoonivers, da di moas hombl persn tu. (Saa. 113:​5-8) Hihn hombl eena evri way an eena evriting weh ih du. Hihn neva shoa praid er luk dong pahn adaz. Eena dis aatikl, wi wahn taak bowt foa wayz how Jehoava shoa dat ih hombl. Fi eech wan, wi wahn luk pahn how Jeezas kapi Jehoava egzampl. Wen wi luk pahn dehnya tingz, ih wahn help wi fi jraa kloasa tu Jehoava ahn laan fi bee moa hombl laik hihn.

JEHOAVA WAAHN LISN TU WI

2. Weh Saam 62:8 teech wi bowt Jehoava? (Koment pahn di picha.)

² Yoozhwali ih noh eezi fi taak tu peepl weh prowd. Dehn aalwayz tink dat dehn beta dan evribadi els, ahn soh dehn noh chreet peepl kain. Sayka dat, peepl yoozhwali avoid dehn. Bot Jehoava da noh laik dat ataal! Bikaaz hihn hombl, ih mek it eezi fi wi taak tu ahn an tel ahn weh wi tink ahn how wi feel. (Reed Saam 62:8.) Jos laik how wahn pa weh lov ih pikni waahn dehn tel ahn weh deh pahn dehn main, rait soh Jehoava waahn wi pray tu ahn an poar owt wi haat. Hihn eevn put egzamplz a how peepl pray tu ahn eena di Baibl. Dat shoa wi humoch Jehoava waahn lisn tu wi pryaaz. (Jash. 10:​12-14; 1 Sam. 1:​10-18) Bot sopoaz wi feel laik wi kyaahn pray tu Jehoava bikaaz a aala di mistayks weh wi mek?

3. Wai wi ku bee shoar dat Jehoava waahn wi pray tu ahn aal di taim?

³ Wi ku pray tu Jehoava eevn if wi feel laik wi mek soh moch mistayk dat hihn kyaahn lov wi. How wi noa dat? Wen Jeezas mi tel di stoari bowt di prodigal son, hihn mi kompyaa Jehoava tu di pa eena di stoari. Di son mi feel laik ih mi soh bad dat ih pa wuda neva waahn ih kohn bak tu di famili. Bot weh di pa mi du wen ih si ih son di kohn bak hoam? Jeezas seh dat az di pa kech sait a ih son, ih “ron ahn hog ahn tait an ih giv ahn wahn tenda kis.” (Look 15:​17-20) Jehoava da laik da pa. Wen ih hyaa wi pray bikaaz wi feel bad bowt wahn mistayk weh wi mek er bikaaz wi di wori bowt sohnting, hihn lisn gud tu wateva wi ga fi seh. (Lam. 3:​19, 20) Jehoava feel kompashan fi wi, ahn soh wen wi feel bad fi eni reezn, da laik hihn ron tu wi laik di pa eena Jeezas stoari, bikaaz ih waahn komfert wi ahn mek wi noa humoch ih lov wi. (Aiz. 57:15) How hihn du dat? Lata taim ih yooz di eldaz er wi frenz ahn famili weh serv ahn fi help wi wen wi need it. (Jay. 5:​14, 15) Jehoava help wi laik dat bikaaz ih waahn wi feel kloas tu ahn.

4. Wai ih mi eezi fi peepl kohn tu Jeezas?

⁴ How Jeezas kapi ih Pa? Jeezas da laik ih Pa, ih hombl. Dat da wai peepl mi waahn deh rong ahn. Dehn neva frayd fi aks ahn kweschanz. (Maak 4:​10, 11) Wen Jeezas mi aks dehn weh dehn tink bowt sohnting, dehn mi feel free fi tel ahn weh dehn reeli tink ahn feel. (Mach. 16:​13-16) Ahn wen dehn mek mistayk, dehn neva frayd fi weh Jeezas mi wahn du dehn. Dehn mi noa dat hihn kain, payshent, ahn ful a mersi. (Mach. 17:​24-27) Jeezas mi kapi ih Pa egzampl soh gud dat ih falowaz mi geh fi noa Jehoava beta jos fahn di wach how Jeezas goh aan. (Jan 14:9) Jeezas egzampl mi teech dehn dat Jehoava hombl an ih waahn bee dehn fren. Hihn da neva laik di rilijos leedaz bak den weh mi prowd ahn neva kay bowt peepl.

5. Wai ih eeziya fi adaz taak tu wi if wi hombl?

⁵ How wee ku kapi Jehoava? If wi noh hombl, wi mait en op di jelos ada peepl, tink dat wi beta dan dehn, ahn noh wilin fi fergiv dehn if dehn du wi sohnting. Bot if wi hombl, den wi wahn bee kain tu peepl, wi wahn bee payshent wid dehn, ahn wi wahn bee wilin fi fergiv dehn. (Kol. 3:​12-14) Soh if wi werk haad fi bee hombl, adaz wahn fain it eeziya fi taak tu wi. Dat reeli impoatant fi eldaz. Bradaz ahn sistaz eena di kangrigayshan need fi feel laik dehn ku goh taak tu di eldaz eni taim. Fi mek dehn feel da way, eldaz need fi spen taim wid dehn regyula. Dat meenz dehn need fi goh da meetin da Kingdom Haal az moch az pasabl, insteda kanek tu meetin oava di Intanet. An if dehn kud, dehn chrai fi werk wid dehn bradaz ahn sistaz pahn feel servis. Di moa taim di eldaz spen wid dehn bradaz ahn sistaz, di moa di bradaz ahn sistaz wahn geh fi noa di eldaz ahn di moa komfatabl dehn wahn feel fi taak tu di eldaz enitaim dehn need help.

JEHOAVA REEZNABL

6-7. How Jehoava shoa dat ih wilin fi chaynj ih main wen ih servant dehn pray tu ahn? Yooz di egzampl dehn eena di paragraaf.

⁶ Peepl weh prowd yoozhwali tink dehn aalwayz noa bes ahn dehn noh wilin fi chaynj dehn main. Bot Jehoava da noh laik dat. Hihn hombl, soh eevn doa hihn aalwayz noa weh bes, beta dan evribadi els, hihn wilin fi lisn tu ada peepl ahn sohntaim ih eevn chaynj ih main bays pahn weh dehn seh. Fi egzampl, wahn taim Miryam, lang wid Ayron, mi taak bad bowt Moaziz. Dat mi rang bikaaz Moaziz mi-di reprizent Jehoava. Jehoava mi geh beks bad wid Miryam an Ih mek shee kech leprosi. Bot Ayron mi beg Moaziz fi help Miryam, ahn Moaziz mi pray an aks Jehoava fi heel ahn. Weh Jehoava mi du? Wahn prowd persn neva mi wahn chaynj dehn main. Bot Jehoava difrent. Bikaaz hihn hombl, ih mi lisn tu Moaziz ahn heel Miryam.—Nom. 12:​1-15.

⁷ Wi ku si how hombl Jehoava fahn di way how ih mi chreet King Hezikaiya. Jehoava mi sen di prafit Aizaiya fi tel di king dat ih mi wahn ded. Wen Hezikaiya hyaa dat, ih krai ahn beg Jehoava fi heel ahn. Jehoava mi lisn tu Hezikaiya, an Ih mi tel ahn dat ih wahn liv fi 15 moa yaaz. (2 Ki. 20:​1, 5, 6) Dis shoa wi dat Jehoava reeli feel fi peepl, ahn bikaaz ih hombl, ih wilin fi lisn tu wi.

8. How Jeezas mi shoa dat hihn reeznabl? (Maak 3:​1-6)

⁸ How Jeezas kapi ih Pa? Wen Jeezas mi deh pahn ert, ih mi du gud tingz fi adaz eni chaans ih get. Fi egzampl, ih mi heel peepl pahn di Sabat eevn doa di rilijos leedaz mi tink dat rang. Jeezas neva meen tu peepl, ih mi shoa kompashan fi dehn an ih mi reeznabl. (Reed Maak 3:​1-6.) Jeezas di shoa dehndeh saym kwalitiz az di hed a di Kristyan kangrigayshan. Fi egzampl, wen sohnbadi eena di kangrigayshan komit wahn seeryos sin, hihn payshent wid dehn ahn gi dehn lata chaans fi chaynj dehn wayz.—Rev. 2:​2-5.

9. How wi ku laan fi bee reeznabl? (Koment pahn di picha dehn.)

⁹ How wee ku kapi Jehoava? Fi laan fahn Jehoava egzampl, wi haftu laan fi tink an ak eena wahn reeznabl way, jos laik hihn. (Jay. 3:17) Fi egzampl, payrents weh kapi Jehoava egzampl noh wahn ekspek dehn pikni fi du moa dan weh dehn ku du. Wahn gud egzampl a dat da Jaykob, hoo mi shoa kansidarayshan fi ih pikni. (Jen. 33:​12-14) Ahn payrents weh hombl ahn reeznabl noh wahn kompyaa dehn pikni wid wan anada needa. Eldaz need fi bee reeznabl tu. Fi egzampl, wen eldaz meet tugeda, non a dehn shuda insis dat di badi a eldaz du tingz fi dehn way. Rada, eech elda wahn wilin fi werk lang wid disizhanz weh moas a di eldaz pahn di badi agree wid, az lang az di disizhan noh goh gens Baibl prinsiplz. (1 Tim. 3:​2, 3) An aala wi ku laan fahn dis tu. Wi need fi chrai bee moa andastandin wid adaz eevn if wi noh si tingz di saym way laik dehn. (Roam. 14:1) Evribadi eena di kangrigayshan fi shoa dat dehn noh aalwayz waahn tingz dehn oan way.—Fil. 4:5.

JEHOAVA PAYSHENT

10. How Jehoava shoa payshens?

¹⁰ Yu praabli noatis dat peepl weh prowd noh laik wen yu mek dehn wayt. Dehn noh ga no payshens. Bot Jehoava da di opozit. Hihn moa payshent dan enibadi els! Fi egzampl, eena Noawa dayz, Jehoava mi seh dat ih mi wahn wayt fi 120 yaaz bifoa ih dischrai di wikid peepl weh mi-di liv bak den. (Jen. 6:3) Noawa mi ga nof taim fi rayz ih pikni ahn fi bil di aak tugeda wid ih famili. Ahn laytaraan, Jehoava mi lisn wen Aybraham aks ahn bowt di dischrokshan a Sadam ahn Gomoara. Sohnbadi weh prowd wuda mi seh sohnting laik, ‘Da hoo yoo soh fi di kweschan mee?ʼ Bot bikaaz Jehoava hombl, ih mi payshent wid Aybraham.—Jen. 18:​20-33.

11. Akaadn tu 2 Peeta 3:​9, wai Jehoava di shoa payshens eena fi wee taim?

¹¹ Jehoava di shoa payshens now tu. Hihn di wayt fi di taim weh hihn set fi bring di en a dis sistem. Wai hihn di wayt? “Bikaaz ih noh waahn nobadi geh dischrai, bot ih waahn evribadi geh di chaans fi ripent.” (Reed 2 Peeta 3:9.) Tink bowt dis: Bikaaz Jehoava payshent, milyanz a peepl geh fi noa ahn an bee ih fren. Wi hoap dat lat moa peepl wahn geh di chaans fi du dat bifoa di en kohn. Bot Jehoava noh wahn bee payshent fareva. Jehoava lov peepl, bot ih noh wahn mek dehn kantinyu di du wateva dehn waahn. Di day di kohn wen hihn wahn put wahn en tu aal wikidnis.—Hab. 2:3.

12. How Jeezas shoa dat hihn payshent laik Jehoava?

¹² How Jeezas kapi ih Pa? Fi towznz a yaaz, Jeezas di shoa payshens laik Jehoava. Jeezas si Saytan tel aal kaina terabl lai bowt Jehoava ahn bowt peepl weh serv Ahn. (Jen. 3:​4, 5; Joab 1:11; Rev. 12:10) Jeezas si lata peepl sofa eena terabl wayz. How yu tink Jeezas feel bowt dat? Ih mosi reeli waahn “dischrai evriting weh di Devl du,” noh chroo? (1 Jan 3:8) Weh help Jeezas fi bee payshent ahn wayt fi wen Jehoava seh da taim fi put wahn en tu evriting weh di Devl du? Wan reezn da bikaaz Jeezas hombl. Hihn noa dat Jehoava da di wan weh set di taim fi bring di en.—Aks 1:7.

13. How Jeezas mi payshent wid ih apasl dehn, ahn wai?

¹³ Wen Jeezas mi deh pahn ert, ih mi payshent wid ih apasl dehn. Fi egzampl, wen di apasl dehn stay mi-di aagyu bowt wich wan a dehn mi moa impoatant, Jeezas neva shayk ih hed ahn seh, “Aiy, dehnya bali!” ahn giv op pahn dehn. Rada, ih mi kantinyu fi bee payshent wid dehn. (Look 9:46; 22:​24-27) Hihn mi noa dat dehn mi wahn laan fi bee moa hombl. Yoo eva mek di saym mistayk oava ahn oava? Den yu praabli reeli tankful dat wi ga wahn hombl ahn payshent King di rool oava wi, noh chroo?

14. How wi ku laan fi bee moa payshent?

¹⁴ How wee ku kapi Jehoava? If wi waahn tink an ak laik Jehoava, wi haftu laan fi tink laik Jeezas. (1 Kor. 2:16) How wi ku du dat? Wan a di bes wayz fi laan fi tink laik Jeezas da fi reed di Gaspl dehn ahn tink bowt weh hihn mi du ahn chrai fi andastan wai ih du it. An af koars, wi haftu pray an aks Jehoava fi help wi bee hombl ahn payshent laik Jeezas. Di moa wi laan fi tink laik Jeezas, di eeziya ih wahn bee fi kapi Jehoava egzampl ahn bee payshent wid wiself ahn wid ada peepl.—Mach. 18:​26-30, 35.

JEHOAVA PAY ATENSHAN TU PEEPL WEH HOMBL

15. How Jehoava shoa dat ih pay atenshan tu peepl weh hombl? (Saam 138:6)

¹⁵ Reed Saam 138:6. Dat soh wandaful! Jehoava, di Moas Hai Laad a di yoonivers, pay atenshan tu peepl weh hombl an ih chreet dehn wid lov ahn rispek. Mek wi luk pahn wahn fyoo egzampl a hombl peepl weh Jehoava noatis oava di yaaz. Wi noh mait bee fameelya wid aala dehn, bot Jehoava mek shoar dehn deh eena di Baibl. Jehoava mek Moaziz rait bowt wahn laydi weh naym Debora, hoo mi werk az wahn ners fi Aizak ahn Jaykob famili fi bowt 125 yaaz! Wi noh noa wahn lat bowt Debora, bot Jehoava mek shoar wi noa humoch evribadi mi lov shee. (Jen. 24:59; 35:​8, ftn.) Honjridz a yaaz layta, Jehoava mi pik wahn lee shepad bwai weh naym Dayvid fi bee king a Izrel. (2 Sam. 22:​1, 36) Lee bit afta Jeezas mi baan, Jehoava mi sen sohn aynjel fi tel sohn hombl shepad bowt it. Dehn da-mi di fers fi noa dat di Mesaiya mi baan da Betlihem. (Look 2:​8-11) Ahn wen Joazef ahn Mayri mi kehr Jeezas da di templ, Jehoava mi giv too oal peepl, Simiyan an Ana, di privilij fi si ih Son. (Look 2:​25-30, 36-38) Yes, eevn doa Jehoava ga wahn hai pozishan, hihn pay atenshan tu peepl weh hombl!

16. How Jeezas kapi di way ih Pa chreet peepl?

¹⁶ How Jeezas kapi ih Pa? Jeezas si hombl peepl di saym way ih Pa si dehn, ih chreet dehn wid lov ahn rispek. Ih mi teech dehn di chroot bowt di Kingdom a Gaad. (Aks 4:13; Mach. 11:25) Jeezas mi heel peepl weh mi sik, an ih mi du it eena wahn way weh mek dehn feel laik ih lov dehn ahn rispek dehn. (Look 5:13) Di nait bifoa ih ded, ih mi wash ih apasl dehn fut. Dat da sohnting weh onli wahn servant yoostu du. (Jan 13:5) Ahn bifoa ih gaahn da hevn, ih mi giv aala ih falowaz, inkloodin wee, di privilij fi du di moas impoatant werk wi kuda eva du—help ada peepl fi geh evalastin laif.—Mach. 28:​19, 20.

17. How wi ku shoa lov ahn rispek fi adaz? (Koment pahn di picha.)

¹⁷ How wee ku kapi Jehoava? Wi shoa lov ahn rispek fi peepl wen wi preech di gud nyooz tu evribadi, noh mata weh dehn kohn fram, dehn sichuwayshan eena laif, di kala a dehn skin, er humoch ejukayshan dehn gat. Ahn wi shoa lov ahn rispek fi wi bradaz ahn sistaz wen wi kansida dehn moa impoatant dan wee, eevn if wi ga moa privilij eena di kangrigayshan dan dehn er wi ku du sertn tingz beta dan dehn. (Fil. 2:3) Jehoava hapi wen wi hombl ahn wi chreet wan anada wid lov ahn rispek eena dehnya wayz an eena eni ada way wi kud.—Roam. 12:10; Zeph. 3:12.

18. Wai yoo waahn chrai fi bee hombl laik Jehoava?

¹⁸ Wen wi chrai wi bes fi bee hombl laik wi lovin Pa da hevn, peepl wahn fain it eeziya fi kohn taak tu wi, wi wahn bee moa reeznabl ahn payshent, ahn wi wahn chreet peepl wid lov ahn rispek. Soh mek wi du aal weh wi kud fi kapi Jehoava egzampl. Ahn memba, wen wi werk haad fi du dat, wi wahn bee eevn moa preshos tu ahn!—Aiz. 43:4.