Tes Yu Memri
Yoo don reed aala Di Wachtowa magazeen fi dis yaa? Wel, mek wi si if yu ku ansa dehnya kweschan:
Wai wi waahn prayz Jehoava?
Wi prayz Jehoava bikaaz wi lov ahn an rispek ahn wahn lat. Wi aalso prayz ahn bikaaz wi waahn adaz geh fi noa ahn.—w25.01, payj 3.
If sohnbadi hert wi, weh ku help wi fi bee moa fergivin?
Wi noh ignoar di way how wi feel; stilyet, wen wi let goh a anga ahn haytful feelinz, wi wahn ku moov aan, chreet adaz beta, ahn bee hapi agen.—w25.02, payj 15-16.
Wai Maak da wahn gud egzampl fi yong bradaz?
Maak mi wilin fi werk haad fi serv adaz. Eevn doa hihn mi praabli feel hert bikaaz a sohnting weh mi hapm, hihn neva stap. Ih mi spen taim di werk wid Paal ahn wid ada bradaz weh mi faytful fi yaaz.—w25.04, payj 27.
Weh Jeezas mi meen wen ih pray: “Ah teech dehn bowt yu naym”? (Jan 17:26)
Jeezas disaipl dehn mi don noa how Gaad naym. Bot Jeezas mi help dehn fi noa Jehoava beta. Ih mi help dehn fi andastan Jehoava perpos, di tingz weh ih du, ahn di kwalitiz weh ih shoa.—w25.05, payj 20-21.
If wi hombl, weh wi wahn aksep?
Wi aksep dat wi noh noa evriting. Fi egzampl, wi noh noa wen di en wahn kohn er weh Jehoava wahn du wen da taim kohn. Wi noh noa weh wahn hapm tumaaro needa, ahn wi kyaahn andastan how gud Jehoava noa wi.—w25.06, payj 15-18.
Weh ku help wi fi benifit fahn wahn aatikl er wahn poblik taak?
Wi ku aks wiself kweschanz laik: ‘Weh evidens di infamayshan yooz fi shoa dat dis da di chroot? Wat wuda bee wahn gud iloschrayshan weh Ah ku yooz fi teech dis tu sohnbadi? Hoo wuda waahn hyaa bowt dis, ahn wen Ah ku taak tu dehn bowt it?ʼ—w25.07, payj 19.
Weh wi ku laan bowt Jehoava fergivnis fahn di way how ih mi deel wid Dayvid?
Eevn doa Dayvid mi mek lata seeryos mistayks eena ih laif, wen ih mi ripent fahn ih haat, Jehoava mi fergiv ahn. (1 Ki. 9:4, 5) Wans Jehoava fergiv wi, hihn noh wahn kip di bring op di mistayk dehn weh wi du.—w25.08, payj 17.
If wi Baibl styoodent schrogl fi andastan sohnting weh wi di teech dehn, weh wi ku du?
If ih stil schrogl fi andastan wahn point eevn afta yu teech ahn gud fahn di Baibl, yu ku moov aan ahn mek planz fi kohn bak tu it layta.—w25.09, payj 24.
Di Baibl seh dat sin ku chrik wi. (Heeb. 3:13) How ih du dat?
Bikaaz wi sinful, wi ku geh temtid fi du tingz weh rang, an ih ku aalso mek wi dowt Jehoava lov.—w25.10, payj 16.
Wat da chree tingz weh ku help wi pray ahn tel Jehoava weh wi reeli tink ahn how wi reeli feel?
(1) Wi ku tink bowt weh kaina Gaad Jehoava. (2) Wi ku tink bowt weh wi di deel wid ahn taak tu Jehoava bowt it, fi egzampl if wi need fi fergiv sohnbadi. (3) Wi ku tek wi taim wen wi pray. Den wi wahn praabli tel Jehoava moa bowt weh wi tink ahn how wi feel.—w25.10, payj 19-20.
How wi ku help oalda bradaz ahn sistaz?
Wi ku vizit oalda bradaz ahn sistaz ahn kaal dehn regyula. Maybi wi ku goh lang wid dehn wen dehn need fi goh da dakta. Er wi ku werk lang wid dehn eena di minischri.—w25.11, payj 6-7.
Wat da di mayn tingz weh mek wahn wedn rispektabl?
Du weh di laa seh fi du fi mek di marij leegal. Mek shoar dat di wedn serimoni ahn di risepshan shoa di byootiful kwalitiz weh kohn fahn Jehoava. Jres eena wahn deesent way, ahn mek shoar unu noh fala eni kostom er chradishan weh goh gens Baibl prinsiplz. Taak tingz owt eena wahn rispekful way wen unu di mek planz fi unu wedn.—w25.12, payj 21-24.