Dehndeh “room” mait di rifaa tu wi kangrigayshan dehn. Joorin di grayt chribyulayshan, Jehoava pramis dat hihn wahn protek wi if wi kantinyu serv ahn lang wid wi bradaz ahn sistaz. Wi haftu werk haad fahn now fi noh jos talarayt wi bradaz ahn sistaz, bot fi ga schrang lov fi dehn. Wi laif wahn dipen pan it! “Di grayt day a Jehoava” wahn bee wahn reeli haad taim fi aal hyoomanz. (Zeph. 1:​14, 15) Jehoava peepl wahn sofa tu. Bot if wi pripyaa fahn now, wi wahn ku stay kaam ahn help adaz. Wi wahn ku bayr op anda eni prablemz weh kohn wi way. Wen wi bradaz ahn sistaz goh chroo haad taimz, wi wahn ku shoa kompashan ahn du wi bes fi help dehn geh evriting weh dehn need. If wi laan fi lov wi bradaz ahn sistaz fahn now, wi wahn ku stik kloas tu dehn eena di fyoocha. Jehoava wahn bles wi wid evalastin laif eena wahn werl weh noh ga no kaina dizaasta ahn sofarin.—Isa. 65:17. w23.07 7 ¶16-17

Eena di Baibl, wi reed bowt sohn faytful man weh mi schrang. Bot sohntaim dehn neva feel schrang. Fi egzampl, sohntaim King Dayvid mi feel laik ih mi “schrang laik wahn mongtin,” bot ada taimz ih mi feel “fraitn no miks.” (Saa. 30:7) Gaad spirit mi gi Samson lata schrent, bot Samson mi noa dat widowt di powa fahn Jehoava, ih mi wahn ‘geh week ahn bee laik evri ada man.ʼ (Joj. 14:​5, 6; 16:17) Jehoava da di wan weh mi giv ih servants di schrent weh dehn mi need. Di apasl Paal mi noa dat hihn tu mi wahn need Jehoava help. (2 Kor. 12:​9, 10) Paal mi fays lata helt prablemz. (Gal. 4:​13, 14) Sohntaim, ih mi haftu fait fi du weh rait. (Roam. 7:​18, 19) Ih mi wori wahn lat bowt weh mait hapm tu ahn. (2 Kor. 1:​8, 9) Bot wen Paal mi week, dat da wen ih mi ga powa. How? Jehoava mi gi Paal di schrent weh ih mi need fi bayr op anda wateva chraiyalz ih mi gaahn chroo. w23.10 12 ¶1-2

Sohntaim wi mait feel laik wi noh wert notn. Bot ih impoatant fi memba dat Jehoava fain wahn way fi jraa eech wan a wi kloas tu hihn. (Jan 6:44) Hihn si di gud eena wee. Jehoava noa wee beta dan wee noa wi oanself. (2 Chron. 6:30) Soh wee ku chros Jehoava wen ih seh dat wee preshos tu hihn. (1 Jan 3:​19, 20) Som a wi mi du sohn bad tingz bifoa wi mi kom eena di chroot. Sayka dat, wi mait stil feel gilti sohntaim. (1 Peet. 4:3) Eevn if wi di serv Jehoava fi yaaz, wi stil haftu fait gens wi weeknis dehn. Yoo feel da way? Yu da noh di onli wan weh feel laik dat. Tek, fi egzampl, di apasl Paal. Hihn mi feel mizarabl bikaaz ih neva perfek. (Roam. 7:24) Eevn doa hihn mi ripent fan ih sin dehn ahn geh baptaiz, hihn mi stil seh dat hihn “da di lees wan owta aala di apasl dehn” ahn “di wers” sina.—1 Kor. 15:9; 1 Tim. 1:15. w24.03 27 ¶5-6