Alfa da di fers leta eena di Greek alfabet, an omayga da di laas leta. Wen Jehoava seh dat hihn da “di Alfa an di Omayga,” ih shoa wi dat wen hihn staat sohnting, hihn wahn mek shoar ih finish it. Afta Jehoava mek Adam ahn Eev, Hihn tel dehn: “Unu fi ga lata pikni ahn ful op di ert, ahn tek kayr a it.” (Jen. 1:28) Di fers taim Jehoava mi seh wat da fi hihn perpos da mi laik if Jehoava mi-di seh “Alfa.” Di taim mi wahn kohn wen Adam ahn Eev obeedyant ahn perfek pikni dehn mi wahn ful op di ert ahn ton it intu wahn paradais. Wen dat hapm, da laik if Jehoava mi wahn seh “Omayga.” Afta Jehoava mi mek “di hevnz ahn di ert an evriting weh deh eena di hevnz ahn pahn di ert,” hihn mi seh sohnting weh mi shoa dat fi hihn perpos mi wahn kohn chroo. Dat shoa dat Jehoava perpos fi di peepl ahn di ert mi wahn kohn chroo noh mata wat. Bai di en a di sevent day, Jehoava mi wahn finish du evriting weh ih mi set owt fi du fahn di biginin.—Jen. 2:​1-3. w23.11 5 ¶13-14

Di jerni fahn Babilan tu Izrel neva eezi, an ih kuda mi tek op tu foa monts, bot Jehoava mi pramis dat di way mi wahn klayr a eni chalenj weh dehn mi wahn ku fays. Fi di faytful Jooz, di sakrifais weh dehn mi wahn mek fi goh bak hoam mi wahn bee notn kompyaa tu di blesinz weh dehn mi wahn injai. Di graytis blesin mi wahn bee dat dehn kuda wership Jehoava eena di way how hihn waahn. Da Babilan, dehn neva ga no templ fi Jehoava. Di Jooz kudn wership Jehoava laik weh di Laa a Moaziz mi seh, bikaaz dehn neva ga no alta weh dehn kuda mi aafa op dehn sakrifais, ahn dehn neva ga nobadi weh kuda mi aafa op dehndeh sakrifais fi dehn. Pahn tap a dat, dehn mi ga lat moa peepl da Babilan weh mi wership faals gaadz dan dehn wan weh mi rispek Jehoava ahn fi hihn standadz. Soh towznz a Jooz weh mi lov Jehoava mi kyaahn wayt fi goh bak hoam, wehpaat dehn kuda mi wership Jehoava di way how hihn waahn. w23.05 14-15 ¶3-4

Wi need Gaad hoali spirit fi help wi kantinyu bihayv laik “chiljren a di lait.” Wai? Bikaaz wi ga wahn kanstant fait fi mek wi stay kleen eena dis werl weh ful a imoraliti. (1 Tes. 4:​3-5, 7, 8) Bot Gaad hoali spirit ku help wi fi noh tink laik peepl eena dis werl, kaaz dehn noh tink di way how Jehoava tink. Hoali spirit wahn help wi fi du “evriting weh gud ahn raichos.” (Ifee. 5:9) Wan way wi ku geh hoali spirit da wen wi pray tu Jehoava. Jeezas mi seh dat Jehoava redi fi “gi hoali spirit tu di wan dehn weh di aks far it.” (Look 11:13) Wahn nada way how wi geh hoali spirit da wen wi wership Jehoava tugeda da meetin. (Ifee. 5:​19, 20) Hoali spirit ku help wi liv eena wahn way weh mek Jehoava hapi. w24.03 23-24 ¶13-15