Choozdeh, Aktoaba 21
Di wan weh stay faytful tu di en a dis sistem a tingz wahn geh sayv.—Mach. 24:13.
Mek wi luk pahn difrent wayz how wi benifit wen wi payshent. Wi stay kaam ahn wi hapiya wen wi payshent. Ih help wi fi ga gud mental ahn fizikal helt. Wen wi payshent wid adaz, wi wahn injai wahn beta rilayshanship wid dehn. Wi kangrigayshan wahn bee moa yoonaitid. If wi payshent, wi noh wahn eezi fi geh beks, eevn if sohnbadi du wi sohnting. Soh eevn if wahn prablem kom op, wi noh wahn mek it wers. (Saa. 37:8, ftn.; Prav. 14:29) Ahn moas impoatant, Jehoava egzampl a payshens mek wi jraa kloasa tu hihn. Payshens da wahn byootiful kwaliti, an aala wi benifit wen wi shoa it. Ih noh eezi fi bee payshent, bot wid Jehoava help wi ku du it. Wail wi di bayr payshens ahn wayt fi di nyoo werl, wi ku bee shoar dat “Jehoava di wach oava dehn wan hoo fyaa hihn, dehn wan hoo wayt pahn fi hihn laayal lov.” (Saa. 33:18) Mek wi du evriting wi kud fi kantinyu shoa payshens! w23.08 22 ¶7; 25 ¶16-17
Wenzdeh, Aktoaba 22
Fayt ded if wi noh shoa it bai di gud tingz weh wi du.—Jay. 2:17.
Jaymz mi seh dat wahn man praabli tink ih ga fayt, bot di tingz weh ih du neva shoa it. (Jay. 2:1-5, 9) Jaymz mi aalso menshan bowt sombadi weh neva du notn fi help ‘wahn brada er wahn sista weh noh ga kloaz fi wayr er nof food fi di day.ʼ Soh eevn if da persn seh ih ga fayt, ih noh meen notn bikaaz ih neva du eniting fi proov it. (Jay. 2:14-16) Jaymz mi seh dat Rayhab da wahn gud egzampl a fayt bikaaz a di tingz weh shee mi du. (Jay. 2:25, 26) Shee mi hyaa bowt Jehoava ahn bileev dat hihn mi deh wid di Izrelaits. (Jash. 2:9-11) Shee mi shoa fayt eena Jehoava wen ih mi protek di too Izrelait spai dehn. Eevn doa shee da neva wahn Izrelait an ih neva perfek, Jehoava mi stil aksep shee az wahn raichos persn sayka ih fayt, jos laik how ih mi aksep Aybraham. Fi shee egzampl shoa wi dat ih impoatant fi du tingz weh proov dat wi ga fayt. w23.12 5-6 ¶12-13
Terzdeh, Aktoaba 23
Ah pray dat unu ku stan op schrang pahn di fongdayshan, jos laik how di roots a wahn chree mek ih stan op schrang, ahn jos laik how wahn bildin stan op schrang pahn wahn salid fongdayshan.—Ifee. 3:17.
Az servants a Jehoava, wi noh jos waahn noa di baysik teechinz a di Baibl. Wi waahn laan “eevn di deep tingz a Gaad,” ahn dat ku onli hapm wid di help a ih hoali spirit. (1 Kor. 2:9, 10) Maybi yu ku staat wahn persnal Baibl stodi proajek fi help yu geh kloasa tu Jehoava. Fi egzampl, yu ku stodi bowt how Gaad mi shoa ih lov fi ih servant dehn eena di paas ahn how dat proov dat ih lov yoo tu. Yu ku aalso stodi bowt di way how Jehoava mi waahn di Izrelaits wership ahn bak eena fi dehn taim ahn kompyaa it tu how ih waahn wi wership ahn rait now. Er maybi yu ku stodi bowt di prafesi dehn weh Jeezas mi fulfil wen ih mi deh ya pahn ert. Yu ku injai stodi bowt tapiks laik dehndeh wen yu yooz di Watch Tower Publications Index er di Risaach Gaid fi Jehoava Witnisiz. Wen yu du wahn deep stodi a Gaad Werd, ih mek yu fayt geh schranga ahn yu wahn “fain di nalij a Gaad.”—Prav. 2:4, 5. w23.10 18-19 ¶3-5