Gaad mi gi Jeezas di powa fi solv aal di prablemz weh hyoomanz di fays. Di miraklz weh Jeezas mi du shoa dat hihn ga di powa fi fiks prablemz weh hyoomanz kuda neva fiks pahn dehn oan. Fi egzampl, Jeezas ga di powa fi free wi fahn sin, weh da di mayn reezn wai wi geh sik, geh oal, ahn ded. (Mach. 9:​1-6; Roam. 5:​12, 18, 19) Jeezas miraklz proov dat hihn ku kyoar “aal kaina” siknis an eevn rezorek di ded. (Mach. 4:23; Jan 11:​43, 44) Hihn aalso ga di powa fi kaam dong big staam an ih ku free peepl fahn di deemon dehn. (Maak 4:​37-39; Look 8:2) Ih soh komfertin fi noa dat Jehoava gi Jeezas da kaina powa, noh chroo? Wi ku chros dat aal di pramis dehn bowt di fyoocha wahn kohn chroo wen Gaad Kingdom staat tu rool. Di miraklz weh Jeezas mi du wen hihn mi deh pahn di ert teech wi weh hihn wahn du fi di hoal ert az King a Gaad Kingdom. w23.04 3 ¶5-7

If yu deh eena wahn big kangrigayshan, ahn yu feel laik di kandokta mis yu han wahn lat, yu mait waahn giv op. Bot noh du dat. Kip aan di chrai koment. Chrai pripyaa moa dan wan koment fi eech meetin. Chrai koment erli eena di stodi soh dat if dehn noh kaal pahn yu di fers taim, yu wahn stil ga lata chaans fi koment joorin di res a di meetin. Wen yu di pripyaa fi di Wachtowa Stodi, chrai si how eech paragraaf goh lang wid di teem fi di aatikl. If yu du dat, yu wahn ga sohn gud koments fi shayr joorin di stodi. Pahn tap a dat, yu ku pripyaa fi koment pahn di paragraaf dehn weh taak bowt deep Baibl teechinz weh haada fi eksplayn. Wai dat da wahn gud aidyaa? Bikaaz les peepl wuda koment pahn paragraaf laik dehndeh. Bot wat if yu stil noh geh wahn chaans fi koment da meetin? Bifoa di meetin, yu ku taak tu di brada weh wahn kandok di stodi ahn tel ahn wich kweschan yu wuda waahn ansa. w23.04 21-22 ¶9-10

Joazef mi wilin fi fala Jehoava dairekshan, ahn bikaaz a dat, hihn da-mi wahn beta hozban. At lees chree taim hihn mi geh dairek inschrokshanz fahn Gaad weh mi ga fi du wid ih famili. Evri taim ih mi redi fi obay, eevn if ih neva eezi far ahn. (Mach. 1:20; 2:​13-15, 19-21) Joazef mi protek Mayri ahn tek kayr a ahn bikaaz hihn mi fala Gaad dairekshan. Fi shoar dis mi mek Mayri lov ahn rispek Joazef eevn moa! Unu weh da hozban, unu ku kapi Joazef wen unu luk fi gaidans fahn di Baibl fi help unu tek kayr a unu famili. Eevn if ih meenz dat yu haftu mek sohn chaynjiz, wen yu fala dehnya advais yu shoa dat yu lov yu waif ahn yu mek yu marij schranga. Wahn sista fahn Vanuatu weh marid fi oava 20 yaaz seh: “Wen mi hozban luk fi Jehoava dairekshan ahn fala weh ih seh, dat mek Ah rispek ahn moa. Ih mek Ah feel sayf, an Ah ku chros di disizhan dehn weh ih mek.” w23.05 21 ¶5