Dyooteronomi

25 “Wen too peepl di aagyu, dehn fi goh da di joj dehn. Ahn di joj dehn wahn disaid hoo inosent ahn hoo gilti. 2 If dehn need fi beet di gilti persn, di joj wahn mek ih lidong flat wid ih fays tu di grong, ahn dehn wahn beet ahn fronta di joj. Bays pahn how seeryos di mistayk weh ih mek, di joj dehn wahn disaid humoch taimz sohnbadi wahn beet ahn. 3 Wen dehn beet di persn, dehn onli fi lash ahn 40 taimz. If dehn lash ahn moa dan dat, dehn wahn shaym ahn fronta unu.

4 “Unu noh fi kova wahn bul mowt wen ih di beet owt di grayn.

5 “If sohn breda di liv tugeda* ahn wan a dehn ded an ih neva ga wahn son, di waif fahn di breda weh ded noh fi goh ahn geh marid tu sombadi els owtsaida di famili. Fi shee brada-in-laa ga di rispansabiliti fi geh marid tu ahn. Soh hihn fi goh da shee, ahn shee wahn bee ih waif. 6 Fi shee fersbaan son wahn bee laik di pikni fi di breda weh mi ded, soh dat di peepl a Izrel noh ferget fi hihn naym.

7 “Bot if wahn man noh waahn geh marid tu ih sista-in-laa, den shee fi goh da di eldaz da di siti gayt ahn shee fi tel dehn, ‘Mi brada-in-laa noh waahn mek di peepl a Izrel rimemba ih breda naym, ahn hihn noh waahn geh marid tu mee.’ 8 Di eldaz fahn di siti weh di man liv eena fi sen far ahn an taak tu ahn. An if ih stil seh, ‘Ah noh waahn geh marid tu shee,’ 9 den ih sista-in-laa fi goh op tu ahn fronta di eldaz, tek fi hihn sandalz aafa ih fut ahn spit eena ih fays ahn seh, ‘Dat da weh fi hapm tu di man weh noh waahn ga wahn son wid ih sista-in-laa soh dat ih breda famili lain ku kantinyu.’ 10 Afta dat di Izrelait dehn wahn rifaa tu fi hihn famili az ‘Di famili a di wan weh looz ih sandalz.’

11 “If too man di fait ahn wan a di man dehn waif chrai protek ih hozban fahn di ada man weh di beet ahn an shee schrech owt ih han ahn grab ih praivit paat, 12 unu fi kot aaf fi shee han an unu noh fi feel sari far ahn.

13 “Unu noh fi put too difrent stoan wayt eena unu bag. Unu noh fi ga wahn big wan ahn wahn smaal wan. 14 Unu noh fi ga too difrent kantayna fi mezha grayn. Unu noh fi ga wahn big wan ahn wahn smaal wan eena unu hows. 15 Unu fi aalwayz ga wahn stoan wayt weh gi di karek wayt ahn wahn kantayna weh gi di karek mezhament, soh dat unu ku liv wahn lang taim eena di lan weh Jehoava unu Gaad di giv unu. 16 Jehoava unu Gaad hayt evribadi weh noh aanis ahn weh du dehndeh tingz.

17 “Memba weh di Amalekait dehn mi du tu unu wen unu mi-di lef Eejip. 18 Dehn gaahn meet unu wail unu mi-di chravl, ahn dehn mi atak aala dehn wan weh mi deh way da bak wen unu mi taiyad. Dehn neva ga no rispek fi Gaad. 19 Wen Jehoava unu Gaad kip unu sayf fahn unu enimi dehn eena di lan weh Jehoava unu Gaad di giv unu, unu fi dischrai di Amalekait dehn fahn di ert* soh dat nobadi memba dehn. Dat da sohnting weh unu noh fi ferget.