Dyooteronomi
9 “Lisn, Oa Izrel, tudeh unu di kraas di Jaadn Riva fi tek weh di lan weh bilangz tu sohn nayshan weh biga ahn schranga dan unu. Dehndeh nayshan ga sohn big siti wid sohn hai waal weh goh way op tu di skai. 2 An eena dehndeh nayshan, dehn ga sohn man weh mi taal ahn schrang weh da-mi Aynak disendant dehn, weh unu mi noa bowt. An unu mi hyaa peepl seh dat nobadi ku fait gens dehn. 3 Bot unu ku bee shoar dat tudeh Jehoava unu Gaad, hoo da laik wahn faiya weh bon op evriting, wahn goh heda unu ahn dischrai dehn. Hihn wahn kanka dehn fronta unu soh dat unu ku jraiv dehn owt ahn dischrai dehn kwik-wan, jos laik weh Jehoava mi pramis unu.
4 “Wen Jehoava unu Gaad jraiv weh dehndeh nayshan fahn fronta unu, unu noh fi tel unuself dat Jehoava bring unu eena dis lan bikaaz unu raichos. Bot Jehoava jraiv di peepl eena dehndeh nayshan fahn fronta unu bikaaz dehn wikid. 5 Unu noh di kanka dehn lan sayka weh unu raichos er bikaaz unu ga wahn aanis haat. Bot Jehoava unu Gaad di jraiv weh dehndeh nayshan bikaaz dehn wikid, ahn Jehoava di du dat soh dat ih ku kip di pramis weh ih mi swayr tu Aybraham, Aizak, ahn Jaykob, hoo da unu ansestaz. 6 Unu da wahn stobant set a peepl, an unu fi memba dat di reezn wai Jehoava di giv unu dis gud lan fi mek unu kanka da noh bikaaz unu raichos.
7 “Unu fi aalwayz memba how unu mi mek Jehoava unu Gaad geh beks wid unu eena di wildanes. Neva ferget dat. Unu mi ribel gens Jehoava fahn di day unu mi lef Eejip til di taim wen unu mi kom eena dis plays. 8 Eevn da Hoareb Jehoava mi geh beks wid unu, ahn Jehoava mi soh beks dat ih mi redi fi dischrai unu. 9 Wen Ah gaan op di mongtin fi geh di flat stoan dehn, weh ga di werdz a di kovenant weh Jehoava mek wid unu, Ah mi stay op deh fi 40 dayz ahn 40 naits, an Ah neva eet no food ner jrink no waata. 10 Den Jehoava gi mi di too flat stoan weh ih mi rait pan wid ih finga. Ahn Jehoava mi rait dong aala di tingz weh ih mi tel unu fahn owta di faiya pahn di mongtin, pahn di day wen unu mi gyada tugeda. 11 Afta di 40 dayz ahn 40 naits, Jehoava mi gi mi di too flat stoan weh ga di werdz a di kovenant. 12 Den Jehoava tel mi, ‘Hori goh dong, bikaaz yu peepl weh yu bring fahn owta Eejip di du wikid tingz. Dehn neva tek lang fi schray weh fahn di way Ah mi tel dehn fi goh. Dehn mek wahn imij owta metal fi dehnself.’ 13 Afta dat Jehoava tel mi, ‘Ah don si dat dehnya peepl stobant. 14 Noh chrai stap mi fahn dischrai dehn. An Ah noh wahn mek nobadi memba dehn naym. An Ah wahn mek wahn biga ahn schranga nayshan kohn fahn yoo insted.’
15 “Soh Ah gaahn dong di mongtin wail faiya mi deh pahn di mongtin, an Ah mi-di hoal di too flat stoan weh ga di werdz a di kovenant eena mi han. 16 Den Ah mi si dat unu mi sin gens Jehoava unu Gaad! Unu mi mek wahn stachu owta metal fi unuself. Unu neva tek lang fi schray weh fahn di way Jehoava unu Gaad tel unu fi goh. 17 Soh Ah mi tek di too flat stoan ahn dash dehn pahn di grong ahn dehn mi brok op fronta unu. 18 Joorin 40 dayz ahn 40 naits, Ah mi bow dong wid mi fays loa tu di grong fronta Jehoava, laik weh Ah mi du bifoa. Ah neva eet no food ner jrink no waata, sayka aala di sin dehn weh unu mi du an aala di tingz weh unu mi du weh Jehoava mi si az wikid. An unu mi mek ih geh beks wid unu. 19 Ah mi frayd bikaaz Jehoava mi soh beks wid unu dat ih mi redi fi dischrai unu. Bot Jehoava mi lisn tu mi agen.
20 “Jehoava mi soh beks wid Ayron dat ih mi redi fi dischrai ahn. Bot wen dat hapm, Ah mi pray tu Gaad fi mek ih noh dischrai Ayron jos laik how Ah mi pray fi unu. 21 Den Ah tek di stachu a di kyaaf weh unu mek an Ah bon it op. Den Ah brok it op ahn grain it til ih ton laik dos. An Ah chroa it eena di schreem weh kohn dong fahn di mongtin. Unu mi sin wen unu mi mek dis kyaaf.
22 “Unu mi eevn mek Jehoava geh beks wid unu wen unu mi deh da Tabera, da Masa, ahn da Kibrot-hatayava. 23 Wen Jehoava mek unu lef Kaydesh-barniya an ih tel unu fi goh op ahn kanka di lan weh ih wahn giv unu, unu mi rifyooz fi obay di koman weh Jehoava unu Gaad mi giv unu. Unu neva shoa fayt eena ahn, an unu neva obay ahn. 24 Unu di ribel gens Jehoava fahn sins Ah noa unu.
25 “Soh Ah mi kip di bow dong fronta Jehoava fi 40 dayz ahn 40 naits. Ah mi du dat bikaaz Jehoava seh ih mi wahn dischrai unu. 26 Ah mi beg Jehoava, an Ah mi seh, ‘Moas Hai Laad Jehoava, noh dischrai yu peepl. Dehn da fi yoo peepl* weh yu mi sayv, ahn yu mi yooz yu powa fi tek dehn owta Eejip. 27 Memba yu servant dehn Aybraham, Aizak, ahn Jaykob. Noh pay no main tu dehnya peepl weh stobant, tu di wikid tingz weh dehn du, ahn tu dehn sin. 28 Er els di peepl fahn di lan weh yu sayv wi fram wahn seh: “Jehoava mi kyaahn bring ih peepl tu di lan weh ih mi pramis fi gi dehn. Ahn bikaaz ih hayt dehn, ih kehr dehn da di wildanes fi mek dehn ded.” 29 Dehn da fi yoo peepl ahn yu inheritans, ahn yu mi yooz yu grayt powa ahn schrent* fi bring dehn owt.’