HELP FI DI FAMILI
How Yu ku Help Yu Pikni fi Geh Beta Graydz
Imajin yu pikni staat shoa dat ih noh reeli laik skool. Ih noh stodi an ih noh du ih hoamwerk. Den, weh staat tu hapm? Ih graydz staat tu goh dong an ih staat tu bihayv bad. How yu ku help yu pikni fi geh beta graydz?
Weh yu need fi noa
Presha mek di prablem geh wos. Wen yu put presha pahn yu pikni, ih wahn staat tu schres owt da skool ahn hoam! Fi deel wid ih schres, ih mait tel lai, haid ih loa graydz, fayk yu signicha pan ih ripoat kyaad, er bang huki fahn skool. Di prablem wahn onli geh wos.
Di pramis a wahn riwaad noh mait help. Wahn pa weh naym Andrew seh, “Fi inkorij wi daata, wi mi chrai fi gi ahn wahn gif wen ih geh gud graydz, bot dat onli mek shee foakos pahn di gif. Wen shee wuda geh wahn loa grayd, shee wuda feel moa sad bowt di gif weh ih neva get dan bowt ih loa grayd.”
Ih noh help fi blaym di teecha dehn. Yu pikni ku en op di tink dat ih noh need fi werk haad fi geh gud rizolts. Ih mait laan fi blaym adaz fi ih mistayk dehn an ekspek adaz fi fiks ih prablemz. Dis mait teech yu pikni fi noh tek rispansabiliti fi ih akshanz eevn layta az wahn adolt.
Weh yu ku du
Kanchroal yu feelinz. If yu feel beks, noh taak tu yu pikni bowt ih graydz til wen yu feel kaam. Wahn pa weh naym Brett seh, “Mee ahn mi waif noatis dat wi geh di bes rizolts wen wi stay kaam ahn chrai andastan wi pikni feelinz.”
Baibl prinsipl: “Eech wan a unu shuda hori fi lisn. Tek yu taim bifoa yu taak, ahn noh hori fi geh beks.”—Jaymz 1:19.
Fain owt wat da di reel prablem. Sohn kaman reezn wai wahn pikni mait geh loa graydz ku bee bikaaz sombadi di buli ahn da skool, ih chaynj fahn wan skool tu wahn nada wan, ih di wori bowt egzam, unu di ga famili prablemz, ih noh di sleep inof, ih noh ga wahn gud skejul, er ih kyaahn foakos pahn ih skool werk. Soh noh tink dat yu pikni jos layzi.
Baibl prinsipl: “Di wan weh shoa andastandin eena wahn mata wahn ga sokses.”—Proverbs 16:20.
Fain wahn plays wehpaat yu pikni ku stodi. Mek wahn skejul fi yu pikni du ih hoamwerk ahn stodi. Fain wahn plays fi mek ih du ih hoamwerk wehpaa no dischrakshan deh (laik TV ahn sel foan). Brok op di skejul intu shaat seshanz insteda foas ahn fi stodi fi lang. Dis wahn help ahn fi foakos beta. Hector, wahn pa fahn Germany, seh, “If wahn tes di kom op, wi goh oava wahn lee bit a ih skool werk evri day insteda stodi laas minit.”
Baibl prinsipl: “Fi evriting dehn ga wahn apointid taim.”—Ecclesiastes 3:1.
Inkorij yu pikni fi laan. If yu pikni andastan how skool ku help ahn fahn now, ih wahn put moa inchres eena ih skool werk. Fi egzampl, mats ku help ahn fi spen ih moni eena wahn waiz way.
Baibl prinsipl: “Saach fi wizdom, saach fi andastandin. . . . Mek ih tek fos plays eena yu laif.”—Proverbs 4:5, 8.
Tip: Help yu pikni wid ih hoamwerk, bot noh di it fi ahn. Andrew seh, “Wi daata mi pen pahn wi tu moch an ih neva waahn tink fi ihself.” Teech yu pikni how fi du ih hoamwerk pan ih oan.