Wahn yong man di wach sohn peepl weh di goh eena wahn Kingdom Haal

KWESCHANZ WEH YONG PEEPL AKS

Wai Wi Need fi Goh da di Meetin Dehn da di Kingdom Haal?

Jehoava Witnisiz ga meetin too taim fi di week da di plays wehpaat wi wership Gaad. Wi kaal dehndeh plays Kingdom Haal. Weh aal hapm da wahn Kingdom Haal, ahn how yoo ku benifit if yu goh da wahn Kingdom Haal?

Weh aal hapm da wahn Kingdom Haal?

Di Kingdom Haal da wahn plays weh wi ku laan bowt di Baibl. Di meetin dehn ku help wi fi . . .

laan di chroot bowt Gaad.
andastan wai sertn tingz di hapm tudeh.
bee wahn beta persn.
fain di bes kaina frenz.

Yu mi noa? Jehoava Witnisiz kaal fi dehn plays a wership wahn Kingdom Haal bikaaz rait dehsoh, dehn aalwayz taak bowt Gaad Kingdom.—Machyu 6:9, 10; 24:14; Look 4:43.

Wai yoo shuda goh da wahn Kingdom Haal?

Di infamayshan wahn help yu. Di Baibl prinsipl dehn weh Jehoava Witnisiz diskos da di meetin dehn ku help yu “fi geh wizdom.” (Proverbs 4:5) Dat meen dat di Baibl ku help yu fi mek gud disizhanz eena yu laif. Ih ku aalso help yu fi fain di ansaz tu som a di moas impoatant kweschan eena laif, laik:

Wi aalso ga sohn taak da di meetin dehn pahn di weeken. Dehnya da som a di taitl fi di taak dehn:

Wai Wi fi Alow di Baibl fi Gaid Wi Laif?
Wehpaat Yu Ku Goh fi Help Wen Yu Feel Schres Owt?
Weh Aal Gaad Kingdom Di Du fi Wi Tudeh?

Brenda seh: “Wan a mai klaasmayt mi kohn da wan di meetin dehn. Hihn mi sidong wid mai famili, ahn wee mi shayr wi buk wid ahn. Aftawodz, hihn mi tel mi dat ih mi reeli laik di koment dehn weh di peepl gi wail dehn mi-di tek paat eena di meetin. Ih mi aalso tel mi dat da fi hihn cherch dehn noh ga no stodi mateeryal laik weh wee gat.”

Yu mi noa? Wi noh chaaj fi goh eena di Kingdom Haal, ahn wi noh tek op kalekshan.

Di peepl dehn weh yu meet deh wahn inkorij yu. Di Baibl seh dat wan reezn wai Kristyanz shuda meet tugeda da fi mek dehn “inkorij wan anada.” (Heebrooz 10:24, 25) Peepl weh kay bowt Gaad an ada peepl moa dan dehnself da gud peepl fi deh rong, espeshali tudeh wen peepl onli kay bowt dehnself.

Elisa seh: “Afta wahn lang day, Ai mait feel sad ahn taiyad, bot di peepl da di Kingdom Haal aalwayz mek Ah feel beta. Wen Ah goh hoam afta wahn meetin, Ah feel hapi ahn redi fi fays wahn nada day.

Yu mi noa? Wi ga moa dan 120,000 kangrigayshan a Jehoava Witnisiz rong di werl. Wi wership da moa dan 60,000 difrent Kingdom Haal. Evri yaa, wi bil bowt 1,500 nyoo Kingdom Haal soh dat wen moa peepl kohn da meetin dehn wi ga moa spays.a

Weh ada yong peepl di seh

Jessica seh: “Wen Ah mi deh eena hai skool, wan a mai klaasmayt mi kohn da som a di meetin dehn wid mi. Shee mi laik dat difrent peepl fahn difrent ayj mi-di stodi di Baibl ahn laan fan it tugeda. Di ada day, mi baas mi kohn da di meetin, ahn hihn mi sopraiz fi si dat wi yooz di Baibl wahn lat joorin di meetin. Wen Ai mi si humoch hihn mi apreeshiayt di meetin dehn, Ah staat tu apreeshiayt di meetin dehn eevn moa!”

Timothy seh: “Fi mee, di meetin dehn help mi noh fi tink bowt mi prablemz ahn di tingz weh di bada mi. Wi laan how fi liv wahn gud laif, how fi bee wahn beta persn, an ada tingz weh ku help wi eena wi laif. Wen Ah goh da di Kingdom Haal, Ah aalwayz geh di inkorijment weh Ah need, ahn wen Ah lef fahn deh Ah feel schranga.”

Jacob seh: “Ai mi invait wahn man tu wan a wi meetin dehn. Afta di meetin hihn mi seh: ‘Ai gaahn da di meetin jos fi proov dat weh unu bileev rang. Bot Ah get fi fain owt dat da weh Ai bileev rang!’ Hihn mi aalso laik dat Jehoava Witnisiz frenli. Ih seh: ‘Eevn doa Ai mi jos meet unu, unu mi chreet mi laik unu noa mi fi yaaz!’ ”

Madison seh: “Wahn lata taimz Ah wuda seh tu miself, ‘Az soon az di meetin don Ah jos gwehn hoam.’ Bot joorin di meetin, da feelin jos goh weh. Afta di meetin, Ah wuda fain miself di taak tu peepl, an Ah noh rimemba wai Ah mi feel di way how Ah mi feel. If da neva fi di meetin dehn, Ah wudn ga di wandaful fren dehn weh Ah ga tudeh.”

a Fi fain di Kingdom Haal weh deh kloasis tu weh yu liv, pleez vizit di “Laan Bowt Wi” sekshan den klik pahn “Meetinz” ahn den klik pahn “Fain Wahn Loakayshan Kloas Tu Weh Yu Liv.”