KWESCHANZ WEH YONG PEEPL AKS
How di Baibl Ku Help Mee?—Paat 2: Injai Yu Baibl Reedin
Wahn yong man weh naym Will seh: “Di Baibl mait luk laik wahn boarin buk fi reed if yu noh noa di karek way fi reed it.”
If yu wuda laik fi fain owt di seekrit a how fi injai yu Baibl reedin, den dis aatikl wahn help yu.
Mek di Skripchaz bee reel tu yu
Imajin yuself az wan a di Baibl karaktaz. Yu ku chrai dis:
Pik wahn Baibl akonk weh yu wuda waahn stodi. Yu ku chooz wahn ivent weh hapm eena Baibl taimz er wahn pasij fahn di Gaspl, er yu ku chooz wan a di akonk dehn fahn di Jramatik Baibl reedin dehn weh deh pahn jw.org.
Reed di Baibl akonk. Yu ku reed it bai yuself, er yu ku reed it owt lowd lang wid yu frenz er famili membaz. Wan persn ku reed di paat weh di persn weh di tel di stoari seh ahn di adaz ku bee di ada karakta dehn.
Chrai dehnya sojeshan:
Jraa wahn picha weh reprizent di Baibl akonk. Er jraa difrent lee pichaz fi shoa di aada a how di ivent dehn mi hapm. Yooz sobhedin fi seh weh di hapm eena di picha.
Mek wahn chaat, lis, er graaf fi help yu memba di akonk. Fi egzampl, az yu reed bowt wahn Baibl karakta weh mi faytful, jraa dehn ahn rait dong di kwalitiz weh dehn mi shoa lang wid di blesinz weh dehn mi geh.
Ak laik yu di gi wahn nyooz ripoat bowt di Baibl akonk. Mek eech wan a di karakta dehn ripoat weh dehn mi si. Intavyoo di mayn karakta ahn di wan dehn weh mi si weh hapm.
If sombadi eena di akonk mi mek wahn disizhan weh neva waiz, imajin weh mi wahn hapm if dehn mi mek wahn difrent disizhan. Fi egzampl, tink bowt di akonk wen Peeta mi seh dat ih neva noa Jeezas. (Maak 14:66-72) Insteda seh dat ih neva noa Jeezas, weh Peeta kuda mi seh er du?
If yoo gud pahn kriyayt tingz, yu ku eevn rait yu oan verzhan a wahn Baibl akonk. Put een sohn lesn weh yoo an adaz ku laan fahn di akonk.—Roamanz 15:4.
Yoo ku mek di Baibl reel tu yoo!
Du risaach
If yu stodi di deetaylz eena wahn akonk, yu ku fain wahn lata spirichwal chrezhaz. Sohntaim wan er too werd ku bee reeli impoatant eena di akonk.
Fi egzampl, kompyaa Machyu 28:7 wid Maak 16:7.
Wai Maak mi put een di deetayl dat Jeezas mi wahn soon goh si ih disaipl dehn “an Peeta?”
Sohnting weh ku help: Maak neva mi dehdeh wen dehnya tingz mi hapm, soh hihn mi moa dan laikli geh dis deetayl fahn Peeta.
Di spirichwal chrezha: Wai Peeta mi hapi fi hyaa dat Jeezas mi waahn si ahn agen? (Maak 14:66-72) How Jeezas da-mi wahn reel fren tu Peeta? How yu ku fala Jeezas egzampl ahn bee wahn reel fren tu adaz?
Wen yu imajin yuself eena di Baibl akonk dehn ahn du risaach bowt di deetayl dehn, da den yu wahn reeli injai yu Baibl reedin!