Yong Sistaz—Mek It Yu Goal fi Bee Beta Kristyanz

1. Weh wi need fi du fi bee wahn machoar Kristyan?

IH AMAYZIN fi si how faas wahn pikni geh big. Ih luk laik dehn groa op widowt haftu du eniting. Bot if wi waahn groa fi bee wahn machoar Kristyan, wi need fi werk haad.b (1 Kor. 13:11; Heeb. 6:1) Fi reech da goal, wi need fi ga wahn schrang rilayshanship wid Jehoava. Ahn wi need Jehoava hoali spirit fi help wi divelop kwalitiz weh pleez hihn, fi laan gud skilz, ahn fi pripyaa wiself fi eni rispansabiliti weh wi mait gat eena di fyoocha.—Prov. 1:5.

2. Weh wi laan fahn Jenisiz 1:​27, ahn weh wi wahn diskos eena dis aatikl?

² Jehoava mek wi fi bee eeda wahn man er wahn wuman. (Reed Jenisiz 1:27.) An ih eezi fi si dat wahn man luk difrent fahn wahn wuman. Bot dehn difrent eena ada wayz tu. Fi egzampl, Jehoava gi dehn difrent rispansabiliti. Soh dehn need kwalitiz ahn skilz weh wahn help dehn fi du di werk weh Jehoava gi dehn. (Jen. 2:18) Eena dis aatikl, wi wahn taak bowt weh wahn sista ku du fi bee wahn machoar Kristyan wuman. An eena di neks aatikl wi wahn taak bowt weh yong bradaz ku du fi reech dis saym goal.

WERK HAAD FI GA KWALITIZ WEH PLEEZ JEHOAVA

3-4. Wehpaat yong sistaz ku fain gud egzamplz fi laan fram? (Koment pahn di picha.)

³ Di Baibl taak bowt lata faytful laydi weh mi lov ahn serv Jehoava. (Si di aatikl weh naym “Women in the Bible—What Can We Learn From Them?” pahn jw.org.) Laik weh di teem skripcha fi dis aatikl taak bowt, dehn mi ga “self-kanchroal” ahn dehn mi “faytful eena evriting.” Yong sistaz ku aalso fain machoar Kristyan sistaz eena dehn oan kangrigayshan fi laan fram.

⁴ Yong sistaz, tink bowt sohn machoar Kristyan sistaz weh yu noa yu ku laan fram. Luk pahn dehn byootiful kwalitiz, den tink bowt how yoo ku shoa di saym kwalitiz tu. Eena di neks paragraaf dehn, wi wahn taak bowt too impoatant kwalitiz weh machoar sistaz need.

5. Wai ih impoatant fi wahn machoar Kristyan sista bee hombl?

⁵ Fi bee wahn gud Kristyan yu haftu bee hombl. If wahn laydi hombl, shee wahn injai wahn gud rilayshanship wid Jehoava an adaz. (Jay. 4:6) Fi egzampl, wahn laydi weh lov Jehoava wahn bee hombl ahn chooz fi fala di inschrokshan da 1 Korintyanz 11:3. Eena dis skripcha, Jehoava eksplayn hoo hihn gi di rispansabiliti tu fi tek di leed eena di kangrigayshan an eena di famili.c

6. Weh yong sistaz ku laan fahn Ribeka bowt how fi bee hombl?

⁶ Mek wi luk pahn Ribeka egzampl. Joorin fi shee hoal laif, shee mi shoa dat shee da-mi wahn waiz wuman weh mi mek gud disizhanz ahn mi noa how fi handl difrent tingz weh kom op eena ih laif. (Jen. 24:58; 27:​5-17) Bot stil, shee mi aalwayz shoa rispek an ih mi wilin fi fala gaidans fahn adaz. (Jen. 24:​17, 18, 65) If yu hombl laik Ribeka ahn sopoat dehn wan weh Jehoava yooz fi tek di leed, yu wahn set wahn gud egzampl fi evribadi eena yu famili ahn di kangrigayshan.

7. How yong sistaz ku shoa dat dehn hombl jos laik Ester?

⁷ Aal machoar Kristyanz need fi bee hombl. Di Baibl seh dat wahn hombl persn wahn bee waiz. (Prov. 11:2) Ester da-mi wahn hombl ahn faytful servant a Jehoava. Eevn doa shee da-mi kween, shee neva geh prowd. Ester mi lisn ahn fala advais fahn ih oalda kozn Mordekai. (Ester 2:​10, 20, 22) Yoo ku aalso shoa dat yu hombl wen yu aks adaz fi gud advais ahn fala it.—Taitos 2:​3-5.

8. Wai wahn sista wahn jres eena wahn deesent way if ih hombl? (1 Timoti 2:​9, 10)

⁸ Ester mi shoa dat ih hombl eena ada wayz tu. Shee mi luk “priti an ih mi ga wahn nais shayp,” stilyet, shee neva chrai kaal atenshan tu ihself. (Ester 2:​7, 15) How sistaz ku benifit fahn Ester egzampl? 1 Timoti 2:​9, 10 shoa wi wan way how wi ku benifit. (Reed.) Rait ya, di apasl Paal tel Kristyan sistaz fi shoa rispek fi Gaad eena di way dehn jres. Di Greek werdz weh Paal yooz shoa dat wahn wuman fi aalwayz jres eena wahn deesent way ahn tink bowt how adaz wuda feel bowt di tingz weh ih wayr. Wi onli prowd a unu sistaz weh fala dis advais!

9. Weh wi ku laan fahn Abigayl egzampl?

⁹ Machoar Kristyan sistaz need fi shoa gud jojment tu. Weh dat meen? Dis da wen yu noa rait fahn rang ahn yu chooz fi du di rait ting. Mek wi luk pahn Abigayl egzampl. Fi shee hozban mi mek wahn bad disizhan weh mi wahn kaaz seeryos prablemz fi evribadi eena ih hows. Bot Abigayl mi kwik fi ak bikaaz shee mi noa wat da di rait ting fi du, ahn sayka dis shee mi sayv lata peepl laif. (1 Sam. 25:​14-23, 32-35) Wen yu yooz gud jojment, ih ku help yu fi noa wen fi taak ahn wen fi noh seh notn. Ih ku aalso help yu shoa inchres eena adaz widowt di mek dehn feel laik yu di get eena dehn bizniz.—1 Tes. 4:11.

LAAN GUD SKILZ WEH KU HELP YU EENA YU LAIF

10-11. If yu noa fi reed ahn rait gud, how dis ku help yoo an adaz? (Koment pahn di picha.)

¹⁰ Wahn Kristyan sista need fi laan skilz weh ku help ahn aal chroo ih laif. Shee ku laan som a dehnya skilz fahn wen ih smaal. Mek wi luk pahn sohn egzampl.

¹¹ Laan fi reed ahn rait gud. Eena sohn kolcha ih noh impoatant fi wahn laydi laan how fi reed ahn rait. Bot ih impoatant fi mek aal Kristyanz laan fi reed ahn rait gud.d (1 Tim. 4:13) Soh eevn if yu fain it haad fi reed ahn rait, noh mek notn stap yu. Wen yu laan how fi du dehnya tingz gud, ih ku help yu fain wahn jab ahn kip it. Ih wahn mek it eeziya fi yu stodi di Baibl ahn teech adaz. Bot di bes ting weh dehnya skilz wahn help yu fi du da fi jraa kloasa tu Jehoava wen yu reed ahn tink gud bowt weh yu laan fahn di Baibl.—Jash. 1:8; 1 Tim. 4:15.

12. Weh yu laan fahn Proverbs 31:26?

¹² Laan fi lisn ahn taak eena wahn way weh peepl ku andastan yu. Dis da sohnting impoatant fi mek Kristyanz du. Jaymz mi gi wi dis gud advais wen ih seh: “Wahn persn shuda aalwayz bee redi fi lisn, bot ih fi tek ih taim bifoa ih taak.” (Jay. 1:19) Wen yu tek yu taim fi lisn wen adaz di taak, yu shoa dat yu “lov wan anada.” (1 Peet. 3:8) If yu feel laik yu noh di andastan weh wahn persn di seh er how ih di feel, aks dehn kweschanz weh dehn wuda bee komfatabl fi ansa. Bifoa yu seh eniting, tink bowt weh yu wahn seh. (Prov. 15:​28, ftn.) Aks yuself: ‘Weh Ah wahn seh da chroo an ih wahn inkorij di persn? Ih wahn bee rispekful ahn kain?ʼ Laan fahn machoar sistaz hoo taak eena wahn kain way ahn lisn gud wen ada peepl taak. (Reed Proverbs 31:26.) Chrai noatis weh dehn seh ahn how dehn seh it. Di moa yu laan how fi lisn ahn taak tu peepl, yu frenship wid dehn wahn bee beta.

13. How yu ku laan fi tek kayr a tingz eena wahn hows? (Koment pahn di picha.)

¹³ Laan skilz weh wahn help yu tek kayr a yu hows. Eena lata difrent plays, wahn laydi du moas a di howswerk. Yu ma er wahn oalda sista ku teech yu how fi du dat. Wahn sista weh naym Cindy seh: “Wan a di moas impoatant ting weh Ah laan fahn mi ma da dat wen yu werk haad, yu ku bee hapi. Bikaaz shee teech mi how fi kuk, kleen, soa, ahn spen mi moni eena wahn waiz way, dehnya tingz mi help mi fi tek kayr a miself ahn du moa fi Jehoava. Mi ma mi aalso teech mi how fi shoa haspitaliti, ahn dat help mi fi meet bradaz ahn sistaz weh ga gud kwalitiz Ai ku kapi.” (Prov. 31:​15, 21, 22) Wahn haspitabl ahn haad werkin wuman weh laan fi tek kayr a tingz eena wahn hows da wahn blesin fi evribadi eena ih famili an eena di kangrigayshan.—Prov. 31:​13, 17, 27; Aks 16:15.

14. Weh yu laan fahn Crystal egzampl, ahn weh yu shuda foakos pan?

¹⁴ Laan fi mek inof moni fi tek kayr a yuself. Ih impoatant fi mek aal machoar Kristyanz laan fi mek moni fi tek kayr a dehnself ahn fi bee satisfai wid wat dehn gat. (Fil. 4:11) Wahn sista weh naym Crystal seh: “Mi payrents mi help mi chooz wich sobjeks fi tek eena hai skool soh dat Ah ku laan gud skilz weh wuda help mi laytaraan eena mi laif. Mai pa mi inkorij mi fi tek sohn klaas weh teech mi how fi manij moni fi wahn bizniz. Dis da-mi di bes disizhan kaaz ih help mi wahn lat.” Pahn tap a di skilz weh yu laan fi tek kayr a yuself, ih aalso impoatant fi laan how fi yooz yu moni soh dat yu noh spen moa moni dan weh yu mek. (Prov. 31:​16, 18) An if yu laan fi bee hapi wid weh yu gat ahn noh bai tingz weh yu kyaahn afoad, yu wahn ku du moa fi Jehoava.—1 Tim. 6:8.

PRIPYAA FI YU FYOOCHA

15-16. Wai singl sistaz soh preshos tu di kangrigayshan? (Maak 10:​29, 30)

¹⁵ Wen yu werk haad fi ga kwalitiz weh pleez Jehoava ahn laan gud skilz, dat wahn help yu fi bee redi fi ada tingz eena di fyoocha. Mek wi luk pahn som a di tingz yu ku du.

¹⁶ Yu ku chooz fi stay singl fi wahn wail. Laik weh Jeezas seh, sohn peepl chooz fi noh geh marid eevn doa eena fi dehn kolcha peepl wuda luk dong pahn da disizhan. (Mach. 19:​10-12) Adaz mait chooz fi stay singl fi difrent reezn. Yu ku bee shoar dat Jehoava ahn Jeezas noh wahn luk dong pahn yu jos bikaaz yu noh marid. Rong di werl, dehn ga wahn lata singl sistaz weh du wahn lat fi sopoat di kangrigayshan. Bikaaz dehn shoa lov ahn dehn tek kayr a adaz, dehn da laik wahn ma ahn sista tu wahn lata peepl eena di kangrigayshan.—Reed Maak 10:​29, 30; 1 Tim. 5:2.

17. How yong sistaz ku pripyaa dehnself fi ful-taim servis?

¹⁷ Yu ku serv Jehoava ful-taim. Aal rong di werl, di sistaz eena di kangrigayshan du moas a di preechin werk. (Ps. 68:11) Yu tink yu ku plan fahn now fi serv ful-taim? Maybi yu ku bee wahn painyaa, valantyaa fi werk pahn kanschrokshan proajeks, er werk da Betel. Wen yu di set yu goal, pray bowt it ahn taak tu adaz weh don reech da goal soh yu noa weh yoo need fi du fi reech it. Den, mek wahn plan weh wahn werk fi yu. Wen yu reech da goal, yu wahn ga wahn lat moa eksaitin tingz weh yu ku du fi Jehoava.

18. Wai wahn sista need fi tek ih taim fi chooz hoo fi marid tu? (Koment pahn di picha.)

¹⁸ Yu mait disaid fi geh marid. Di kwalitiz ahn skilz weh wi taak bowt aredi wahn help yu fi bee wahn gud waif. If yu doo disaid fi geh marid, yu need fi tek yu taim fi chooz hoo yu wahn marid tu. Dat da wan a di moas impoatant disizhan yu wahn eva mek eena yu laif. Noh ferget dat yu hozban wahn bee di wan weh wahn tek di leed eena yu famili. (Roam. 7:2; Ifee. 5:​23, 33) Soh aks yuself: ‘Hihn da wahn machoar Kristyan? Hihn di put Jehoava fers eena ih laif? Wen hihn mek disizhanz, hihn mek dehn bays pahn Baibl prinsipl? Hihn oan op tu di mistayk dehn weh ih mek? Ih shoa dat ih ga rispek fi wahn wuman? Ih shoa dat ih da wahn persn weh ku provaid fi mi, help kip mi rilayshanship wid Jehoava schrang, ahn bee mi gud fren? Wen dehn giv ahn werk fi du, ih du it gud? Fi egzampl, weh asainment ih ga eena di kangrigayshan ahn how ih handl dehn?ʼ (Look 16:10; 1 Tim. 5:8) Bot memba, if yu waahn fain wahn gud hozban, yoo need fi bee redi fi bee wahn gud waif tu.

19. Wai wahn waif ku bee hapi dat di Baibl seh dat fi shee roal da fi “help” ih hozban?

¹⁹ Di Baibl seh dat wahn gud waif “help” ih hozban ahn shee da “wahn paadna” far ahn. (Jen. 2:18) Yu tink dat meenz shee noh az impoatant az ih hozban? No! Dis da wahn aana fi shee ahn da sohnting veri speshal weh shee geh fi du. Rimemba, di Baibl eevn seh di saym ting bowt Jehoava, dat hihn da di wan weh “help” wi. (Ps. 54:4; Heeb. 13:6) Wahn waif da wahn big help fi ih hozban wen shee sopoat hihn. Fi egzampl, wen hihn mek wahn disizhan fi di famili, shee werk lang wid hihn fi mek di plan werk owt. Ahn bikaaz shee lov Jehoava, shee du weh ih kud soh dat adaz ku si ih hozban gud kwalitiz. (Prov. 31:​11, 12; 1 Tim. 3:11) Yoo ku staat tu pripyaa fahn now fi bee wahn gud waif wen yu schrentn yu lov fi Jehoava ahn help owt adaz eena yu famili ahn di kangrigayshan.

20. How wahn gud ma ku help ih famili?

²⁰ Yu mait disaid fi bee wahn ma. Afta yu geh marid, yoo ahn yu hozban mait disaid fi ga chiljren. (Ps. 127:3) Soh ih gud fi tink bowt weh yu need fi du fi bee wahn gud ma. Di kwalitiz ahn skilz weh wi mi taak bowt eena dis aatikl wahn help yu fi bee wahn gud waif ahn wahn gud ma. Wen yu shoa lov, kainis, ahn payshens, yu wahn help yu famili fi bee hapi ahn yu pikni dehn wahn feel sayf ahn dehn wahn noa dat yu lov dehn.—Prov. 24:3.

21. How wi feel bowt wi yong sistaz, ahn wai? (Koment pahn di picha pahn di kova.)

²¹ Wi lov aala unu yong sistaz fi aal weh unu du fi Jehoava an ih peepl. (Heeb. 6:10) Unu werk haad fi ga kwalitiz weh pleez Jehoava, laan skilz weh mek yu laif ahn di laif a adaz rong yu hapiya, ahn fi pripyaa beta fi yu fyoocha. Unu reeli preshos tu Jehoava aaganaizayshan!