• “Di King a di Naat” Joorin di Taim a di En
    Di Wachtowa (Stodi Kapi)—2020 | May

    • STODI AATIKL 19

      “Di King a di Naat” Joorin di Taim a di En

      “Joorin di taim a di en, di king a di sowt ahn di king a di naat wahn staat tu push gens wan anada.”—DAN. 11:40.

      SANG 150 Luk tu Gaad fi Salvayshan

      WEH WI WAHN DISKOS?a

      1. Weh Baibl prafesi ku help wi fi andastan?

      WEH wahn soon hapm tu Jehoava peepl? Baibl prafesi help wi fi andastan, bikaaz da laik wahn windo weh wi ku luk chroo fi si weh wahn hapm eena di fyoocha. Dehn ga wan prafesi weh help wi fi si weh som a di moas powaful govament dehn pahn di ert wahn du. Da prafesi deh eena Daniel chapta 11, an ih tel wi bowt too king weh wahn fait gens wan anada, di king a di naat ahn di king a di sowt. Wahn lata da prafesi don kohn chroo, soh wi ku bee shoar dat di res a it wahn kohn chroo tu.

      2. Laik weh wi si da Genesis 3:15 ahn Revilayshan 11:7 ahn 12:17, weh impoatant faks wi haftu memba wen wi stodi Danyel prafesi?

      2 Fi andastan di prafesi eena Daniel chapta 11, wi haftu memba sohn impoatant faks. Wi haftu memba dat dis prafesi onli taak bowt di difrent king dehn ahn govament dehn weh mi ga dairek deelinz wid Gaad peepl, eeda fi rool oava dehn er atak dehn. Gaad peepl da onli wahn lee bit wen yu kompyaa dehn tu aala di peepl weh liv pahn di ert. Soh wai wen sohnting impoatant hapm eena di werl dehn aal taim deh rait eena di midl a it? Bikaaz Saytan ahn fi hihn hoal sistem ga wan mayn goal. Hihn waahn dischrai enibadi weh serv Jehoava ahn Jeezas. (Reed Genesis 3:15b ahn Revilayshan 11:7; 12:17.) Pahn tap a dat, di prafesi weh Danyel mi rait haftu gree wid ada prafesi eena Gaad Werd tu. Az a mata a fak, wi onli ku andastan Danyel prafesi karek if wi kompyaa it tu weh di res a di Baibl seh.

      3. Weh wi wahn diskos eena dis aatikl ahn di wan afta?

      3 Soh, eena disya aatikl wi wahn diskos Daniel 11:25-39. Wi wahn si hoo da-mi di king a di naat ahn di king a di sowt fahn 1870 tu 1991. Wi wahn aalso si wai wi ga gud reezn fi chaynj di way wi andastan dis paat a Danyel prafesi. Eena di neks aatikl, wi wahn diskos Daniel 11:40–12:1, ahn wi wahn geh wahn moa karek andastandin a weh da paat a di prafesi tel wi bowt di taim bitween di 1990’s ahn di waar a Armagedon. Wail yu stodi dehnya too aatikl, yu ku yooz di chaat “Too King Weh Fait Gens Eech Ada Joorin di Taim a di En” fi help yu andastan dis prafesi. Bot fers, wi haftu fain owt hoo da di too king dehn weh dis prafesi taak bowt.

      HOW FI AIDENTIFAI DI KING A DI NAAT AHN DI KING A DI SOWT

      4. Weh chree tingz wahn help wi fi aidentifai di king a di naat ahn di king a di sowt?

      4 Fers, di taitl “king a di naat” mi rifaa tu hoo mi-di rool di ayrya tu di naat a di nayshan a Izrel, ahn “king a di sowt” mi rifaa tu hoo mi-di rool tu di sowt a da ayrya. How wi noa dat? Noatis weh di aynjel weh mi diliva di mesij tel Danyel: “Ah kohn fi tel yu mek yu andastan weh wahn hapm tu fi yoo peepl eena di laas dayz.” (Dan. 10:14) Bifoa Pentikaas 33 C.E., di nayshan a Izrel da-mi Gaad peepl. Bot afta dat, Jehoava mi mek it klyaa dat now Krais disaipl dehn da fi Hihn peepl. Ahn soh wahn lata di prafesi eena Daniel chapta 11 da bowt Krais disaipl dehn, noh di nayshan a Izrel. (Aks 2:1-4; Roam. 9:6-8; Gal. 6:15, 16) Ahn di aidentiti a di king a di naat ahn di king a di sowt mi chaynj oava di yaaz. Bot sertn tingz neva chaynj. Fers, aala dehndeh king mi eeda rool oava wahn ayrya weh lata Gaad peepl mi liv er dehn mi atak er persikyoot Gaad peepl. Sekant, di way how dehn mi chreet Gaad peepl shoa dat dehn hayt di chroo Gaad, Jehoava. Ahn terd, di too king dehn mi fait gens eech ada fi powa.

      5. Bitween di yaa 100 C.E. ahn di yaa 1870, eni roola da-mi king a di naat er king a di sowt? Pleez eksplayn yu ansa.

      5 Som taim afta di yaa 100 C.E., wahn lata faals Kristyan mi kom een ahn tek oava di chroo Kristyan kangrigayshan. Dehn mi teech lata lai ahn dehn mi haid di chroot weh deh eena Gaad Werd. Fahn da taim op tu eena di 1800’s, no aaganaiz groop a Gaad peepl mi deh pahn di ert. Di faals Kristyan dehn mi groa laik paiznos plaant eena wahn feel. Sayka dat, ih mi haad fi noa hoo da chroo Kristyanz. (Mach. 13:36-43) Wai ih impoatant fi noa dat? Dat tel wi dat weh wi reed bowt di king a di naat ahn di king a di sowt kudn rifaa tu eni roola er govament weh mi rool bitween di yaa 100 C.E. ahn di yaa 1870 C.E. Gaad peepl neva deh az wahn aaganaiz groop az yet fi mek dehn atak.c Bot, wi ku ekspek dat di king a di naat ahn di king a di sowt wuda shoa op agen som taim soon afta 1870. How wi noa dat?

      6. Da wen Gaad peepl mi staat tu geh aaganaiz az wahn groop agen? Pleez eksplayn yu ansa.

      6 Fahn di yaa 1870, Gaad peepl mi staat tu geh aaganaiz az wahn groop agen. Dat da-mi di yaa wen Charles Taze Russell an adaz mi staat wahn Baibl stodi klaas tugeda. Ahn den Brada Russell an ih kloas fren dehn mi mek di prafesi kohn chroo bikaaz dehndeh da-mi di mesinja weh di Baibl seh mi wahn “klayr op di way” fi mek di Mesaiya staat tu rool eena ih Kingdom. (Mal. 3:1) Wahn aaganaiz groop a peepl mi-di serv Jehoava agen! Joorin da taim, dehn mi ga eni govament weh mi egzis weh mi wahn rool oava er atak Gaad peepl? Mek wi si.

      HOO DA DI KING A DI SOWT?

      7. Hoo da-mi di king a di sowt op tu nayli di en a Werl Waar I?

      7 Bai 1870, Britain da-mi di moas powaful konchri eena di werl, an ih mi ga di schrangis aami. Danyel prafesi taak bowt wahn smaal haan weh kanka chree ada haan. Da smaal haan stan fi Britain, ahn di ada chree haan stan fi France, Spain, ahn di Netherlands. (Dan. 7:7, 8) Ahn Britain da-mi di king a di sowt op tu nayli di en a di fers werl waar. Rong da saym taim, di United States of America mi groa fi bee di richis konchri eena di werl an ih mi staat tu werk tugeda wid Britain.

      8. Hoo da di king a di sowt joorin di laas dayz?

      8 Joorin Werl Waar I, di United States ahn Britain mi jain op ahn dat da how dehn mi staat werk tugeda fi bee di moas powaful nayshan eena di werl. Jos laik weh Danyel mi prafesai, dis king mi gyada wahn ‘big ahn powaful aami.’ (Dan. 11:25) Joorin di laas dayz, Britain ahn di United States tugeda da di king a di sowt.d Bot hoo mi wahn bee di king a di naat?

      HOO DA DI KING A DI NAAT?

      9. Da wen wahn nyoo king a di naat mi apyaa, ahn how Daniel 11:25 mi kohn chroo?

      9 Di yaa afta Brada Russell an adaz mi staat op dehn Baibl stodi groop, 1871, wahn nyoo king a di naat apyaa. Da saym yaa, Otto von Bismarck mi yoonait sevral ayrya da Europe, ahn tugeda dehn mi mek op wahn powaful nayshan naym Germany. King Wilhelm I da-mi di fers roola oava dis nyoo nayshan, ahn hihn mi chooz Bismarck fi bee di leeda a dis govament.e Oava taim, Germany mi tek kanchroal oava sevral konchri da Africa an eena di Pacific Ocean, an ih mi-di chrai fi bee moa powaful dan Britain. (Reed Daniel 11:25.)f Germany mi gyada tugeda wahn big aami, nayli az big az Britain aami. Eena di fers werl waar, Germany mi yooz da aami fi fait gens ih enimi dehn.

      10. How Daniel 11:25b, 26 mi kohn chroo?

      10 Den Danyel prafesai weh mi wahn hapm tu Germany ahn di aami weh ih mi gat. Di prafesi seh dat di king a di naat “wahn faal.” Wai? “Bikaaz dehn wahn plan op aal kaina chriks gens ahn. Ahn dehn wan weh di eet fi hihn bes food wahn mek hihn faal.” (Dan. 11:25b, 26a) Bak eena Danyel dayz, peepl weh mi eet “di king bes food” mi inklood di raiyal ofishal dehn weh mi “serv di king.” (Dan. 1:5) Soh da hoo dis prafesi di taak bowt? Ih di taak bowt di ofishal dehn weh mi ga hai pozishan eena di German govament. Dat wuda inklood di jenaral dehn ahn aala di ada aafisa dehn weh mi werk lang wid di king. Sayka weh dehndeh aami aafisa mi du, di king mi looz powa ahn dehn mi en op di staat wahn difrent kaina govament da Germany.g Dis prafesi neva jos seh weh mi wahn hapm tu di govament, bot ih mi aalso seh wat wuda bee di rizolt a di waar wid di king a di sowt. Dis da weh di prafesi mi seh bowt di king a di naat: “Wahn flod wahn wash weh fi hihn aami, ahn lata peepl wahn ded.” (Dan. 11:26b) Eena di fers werl waar, jos laik weh di prafesi seh, di German aami mi looz ahn lata peepl mi ded. Da waar da-mi di wers waar eva op tu da taim.

      11. Weh di king a di naat ahn di king a di sowt mi du?

      11 Daniel 11:27, 28 taak bowt weh mi wahn hapm joorin di taim bifoa Werl Waar I. Ih seh dat di king a di naat ahn di king a di sowt wuda “sidong tugeda da di saym taybl ahn tel wan anada lai.” An ih seh dat di king a di naat wuda kalek “wahn lata tingz” tu. Dat da egzakli weh mi hapm. Germany ahn Britain mi tel eech ada dat dehn mi waahn pees, bot dat da-mi loan lai kaaz waar mi brok owt eena 1914. Ahn bai 1914 Germany da-mi di sekant richis konchri eena di werl. Soh Daniel 11:29 ahn di fers paat a vers 30 mi kohn chroo wen Germany mi fait gens di king a di sowt ahn looz.

      DI KING DEHN FAIT GENS GAAD PEEPL

      12. Weh di king a di naat ahn di king a di sowt mi du eena di fers werl waar?

      12 Fahn sins 1914, di too king dehn fait gens wan anada ahn gens Gaad peepl moa ahn moa. Fi egzampl, eena di fers werl waar, di German govament ahn di British govament mi persikyoot Gaad peepl, hoo mi rifyooz fi fait eena di waar. Ahn di U.S. govament mi tek di bradaz weh mi-di tek di leed eena di preechin werk ahn chroa dehn eena prizn. Dis persikyooshan mi fulfil di prafesi eena Revilayshan 11:7-10.

      13. Eena di 1930’s ahn joorin di sekant werl waar, weh di king a di naat mi du?

      13 Den, joorin di 1930’s di king a di naat mi atak Gaad peepl widowt mersi ahn dat mi onli geh wers joorin di sekant werl waar. Wen di Nazi paati mi tek kanchroal a Germany, Hitler ahn fi hihn falowaz mi ban di werk weh Gaad peepl mi-di du. Di king a di naat mi kil honjridz a Jehoava peepl ahn dehn mi sen towznz moa da kansenchrayshan kyamp. Danyel mi prafesai bowt dehndeh ivent. Di king a di naat mi aybl fi “mek di hoali plays noh bee hoali nohmoh” ahn “stap di regyula sakrifais” wen ih mi ban di preechin werk. (Dan. 11:30b, 31a) Hitler, hoo da-mi di roola a Germany, mi eevn pramis fi kil aala Gaad peepl weh mi deh da Germany.

      WAHN NYOO KING A DI NAAT RAIZ OP

      14. Hoo da-mi di king a di naat afta di sekant werl waar? Pleez eksplayn yu ansa.

      14 Afta di sekant werl waar, di Soviet Union mi tek kanchroal oava aala di teritori weh dehn mi kyapcha fahn Germany ahn dehn mi tek oava az king a di naat. Di Soviet Union mi rool peepl eena wahn rof way jos laik di Nazi govament. Dehn mi persikyoot enibadi weh mi mek wership a di chroo Gaad tek fers plays eena dehn laif.

      15. Weh di king a di naat mi du afta Werl Waar II mi finish?

      15 Wahn lee wail afta Werl Waar II mi finish, di nyoo king a di naat, di Soviet Union, mi atak Gaad peepl. Jos laik weh di prafesi da Revilayshan 12:15-17 seh, dis king mi ban wi preechin werk ahn foas towznz a Jehoava peepl fi goh liv da Siberia. Az a mata a fak, joorin di laas dayz, di king a di naat poar owt “wahn riva” a persikyooshan fi chrai stap di werk weh Gaad peepl mi-di du, bot dat neva werk.h

      16. How Daniel 11:37-39 mi kohn chroo?

      16 Reed Daniel 11:37-39.i How di king a di naat mi shoa dat ih noh ga “no rispek fi di Gaad a ih ansesta dehn”? Di Soviet Union mi waahn geh rid a aal rilijan, soh ih mi chrai tek weh powa fahn di difrent rilijos aaganaizayshan dehn. Fahn way bak eena 1918 di Soviet govament mi aada aala di skool dehn fi teech dat no Gaad noh deh. How dis king a di naat mi “gi gloari tu di gaad a di schrang plays dehn”? Di Soviet Union mi spen wahn hoal lata moni fi bil op ih aami ahn fi mek towznz a wepan fi bil op ih powa. Di too king dehn, di king a di naat ahn di king a di sowt, mi en op di kalek inof wepan fi kil bilyanz a peepl!

      DI TOO KING DEHN WERK TUGEDA

      17. Wat da “di disgostin ting weh kaaz dischrokshan”?

      17 Di king a di naat mi akchwali werk lang wid di king a di sowt fi du wan impoatant ting. Dehn mi “set op di disgostin ting weh kaaz dischrokshan.” (Dan. 11:31) Da “disgostin ting” da di United Nations.

      18. Wai di prafesi diskraib di United Nations az wahn “disgostin ting”?

      18 Di prafesi diskraib di United Nations aaganaizayshan az wahn “disgostin ting” bikaaz ih klaym dat ih ku bring werl pees ahn onli Gaad Kingdom ku du dat. Ahn di prafesi seh dat di disgostin ting wuda “kaaz dischrokshan” bikaaz di United Nations wahn play wahn impoatant paat eena di dischrokshan a aal faals rilijan.—Si di chaat “Too King Weh Fait Gens Eech Ada Joorin di Taim a di En.”

      WAI WI NEED FI NOA DIS HISCHRI?

      19-20. (a) Wai wi need fi noa dis hischri? (b) Weh kweschan wi wahn ansa eena di neks aatikl?

      19 Wi need fi noa dis hischri bikaaz ih proov dat fahn di 1870’s dong tu di erli 1990’s, Danyel prafesi bowt di king a di naat ahn di king a di sowt mi kohn chroo. Soh wi ku ga fayt dat di res a di prafesi wahn kohn chroo tu.

      20 Eena 1991, di Soviet Union mi brok op. Soh hoo da di king a di naat tudeh day? Wi wahn ansa da kweschan eena di neks aatikl.

      SANG 128 Stay Faytful Dong tu di En

      a Wi si evidens dat Danyel prafesi bowt “di king a di naat” ahn “di king a di sowt” stil di kohn chroo tudeh. How wi ku bee soh shoar? Ahn wai wi need fi andastan di deetaylz a dis prafesi?

      b Genesis 3:15: “Ah wahn mek yoo ahn di uman hayt eech ada, ahn fi yoo pikni dehn ahn fi shee pikni dehn wahn hayt eech ada tu. Hihn wahn krosh yu hed ahn yoo wahn brooz ahn pan ih heel.”

      c Bikaaz no aaganaiz groop a Gaad peepl mi deh rong joorin dehnya taim, ih seemz dat Roaman Emperor Aurelian (270-275 C.E.) kudn bee “king a di naat” er Kween Zenobia (267-272 C.E.) kudn bee “king a di sowt.” Dis da wahn chaynj fahn di andastandin weh mi poblish eena chapta 13 ahn 14 a di buk Pay Attention to Daniel’s Prophecy!

      e Eena 1890, Kaiser Wilhelm II mi tek owt Bismarck fahn di govament.

      f Daniel 11:25: “An ih wahn gyada tugeda wahn big aami, ahn wid aala ih powa an aala ih haat ih gwehn gens di king a di sowt. Ahn di king a di sowt wahn pripyaa ihself fi di waar wid wahn eevn biga ahn moa powaful aami. Bot ih wahn faal, bikaaz dehn wahn plan op aal kaina chriks gens ahn.”

      g Dehn mi du wahn lata tingz weh mi mek di govament looz powa. Fi egzampl, dehn mi stap sopoat di king, dehn mi giv op seekrit infamayshan tu ada peepl bowt how di waar mi-di goh, ahn dehn mi foas di king fi giv op ih chroan.

      h Laik weh Daniel 11:34 shoa wi, di king a di naat mi wahn stap persikyoot Kristyanz fi wahn lee wail. Dat mi hapm, fi egzampl, wen di Soviet Union mi faal apaat eena 1991.

      i Daniel 11:37-39: “Hihn noh wahn shoa no rispek fi di Gaad a ih ansesta dehn. Ih noh wahn kay fi weh di uman dehn waahn er fi eni ada gaad needa, bot ih wahn aana ihself oava evribadi els. Insteda dat, ih wahn gi gloari tu di gaad a di schrang plays dehn. Ih wahn gi goal ahn silva ahn lata preshos tingz fi aana wahn gaad weh ih ansesta dehn neva noa. Hihn wahn goh gens di schrang plays dehn wid di help a wahn farin gaad an ih wahn ga sokses. Hihn wahn aana peepl weh aksep ahn. Ih wahn mek dehn rool oava lata peepl, an ih wahn shayr owt lan fi wahn prais.”

  • Hoo Da “di King a di Naat” Tudeh?
    Di Wachtowa (Stodi Kapi)—2020 | May

    • STODI AATIKL 20

      Hoo Da “di King a di Naat” Tudeh?

      “Ih wahn kohn aal di way tu ih oan en, ahn nobadi noh wahn dehdeh fi help ahn.”—DAN. 11:45.

      SANG 95 Di Lait Geh Braita

      WEH WI WAHN DISKOS?a

      1-2. Weh wi wahn kansida eena dis aatikl?

      MOA dan eva bifoa wi ga proof dat wi di liv da di en a di laas dayz a dis werl. Jehoava ahn Jeezas Krais wahn soon dischrai evri govament weh deh gens di Kingdom. Bifoa dat hapm, di king a di naat ahn di king a di sowt wahn kantinyu fi fait gens eech ada ahn gens Gaad peepl.

      2 Eena dis aatikl, wi wahn kansida di prafesi da Daniel 11:40–12:1. Wi wahn si hoo da di king a di naat rait now, ahn wi wahn diskos wai wi kud kip kaam ahn chros dat Jehoava wahn sayv wi noh mata weh hapm.

      WAHN NYOO KING A DI NAAT

      3-4. Hoo da di king a di naat tudeh? Pleez eksplayn yu ansa.

      3 Afta di Soviet Union mi faal apaat eena 1991, Gaad peepl weh mi-di liv eena da ayrya mi injai “wahn lee help”—dehn mi ga freedom fi wahn lee wail. (Dan. 11:34) Sayka dat, dehn kuda mi preech widowt enibadi di stap dehn. Soon dehn mi ga honjridz a towznz a poblishaz eena di konchri dehn weh yoostu bee paat a di Soviet Union. Bot afta sohn yaaz paas, Russia ahn di ada konchriz weh sopoat dehn mi en op di bee di king a di naat. Laik weh wi mi diskos eena di laas aatikl, wahn govament haftu du chree ting fi mek dehn bee di king a di naat er di king a di sowt. Dehn haftu (1) eeda rool oava er atak Gaad peepl, (2) shoa bai di way dehn chreet Gaad peepl dat dehn da Jehoava enimi, ahn (3) fait gens di ada king fi powa.

      4 Dehnya da di reezn wai wi ku seh dat Russia ahn di ada konchriz weh sopoat dehn da di king a di naat tudeh day. (1) Dehn atak Gaad peepl wen dehn ban di preechin werk ahn persikyoot honjridz a towznz a bradaz ahn sistaz weh liv eena di ayrya weh dehn kanchroal. (2) Dehndeh akshan shoa dat dehn hayt Jehoava ahn fi hihn peepl. (3) Dehn chrai fi geh moa powa dan di king a di sowt, Britain ahn di United States. Mek wi si weh Russia ahn di ada konchriz weh sopoat dehn du fi proov dat dehn da di king a di naat.

      DI KING A DI NAAT AHN DI KING A DI SOWT KANTINYU PUSH GENS WAN ANADA

      5. Weh Daniel 11:40-43 taak bowt?

      5 Reed Daniel 11:40-43.b Dis paat a di prafesi taak bowt weh wahn hapm joorin di taim a di en. Dis pasij tel wi dat di king a di naat ahn di king a di sowt wuda fait gens wan anada. Danyel mi prafesai dat eena di taim a di en, di king a di sowt ahn di king a di naat wuda “push gens wan anada.”—Dan. 11:40.

      6. How di too king dehn push gens wan anada?

      6 Di king a di naat ahn di king a di sowt kantinyu fi fait gens wan anada fi chrai bee di moas powaful govament eena di werl. Fi egzampl, kansida weh mi hapm afta Werl Waar II wen di Soviet Union mi ga kanchroal oava moas a Europe. Sayka dat di king a di sowt mek wahn agreement wid sohn ada konchri fi jain op aala dehn aami az wan aaganaizayshan weh dehn mi kaal di North Atlantic Treaty Organization. Di king a di sowt mi yooz dis aaganaizayshan fi fait gens di king a di naat. Di king a di naat ahn di king a di sowt spen wahn lata moni fi chrai ga di moas powaful aami. Wan a di wayz weh di king a di naat ahn di king a di sowt mi fait wan anada da wen dehn sopoat wan anada enimi dehn eena difrent waar da Africa, Asia, ahn Latin America. Eena moa reesent taimz, Russia ahn di ada konchriz weh sopoat dehn ga lata powa aal oava di werl. Dehn aalso yooz kompyoota fi fait wahn dijital waar gens di king a di sowt. Di king dehn akyooz wan anada dat dehn yooz kompyoota proagram fi kaaz wan anada fi looz moni ahn damij eech ada govament. Pahn tap a dat, jos laik weh Danyel mi prafesai, di king a di naat kantinyu fi atak Gaad peepl.—Dan. 11:41.

      DI KING A DI NAAT GWEHN EENA “DI BYOOTIFUL LAN”

      7. Wat da “di Byootiful Lan”?

      7 Daniel 11:41 seh dat di king a di naat gwehn eena “di Byootiful Lan.” Da wich lan dat? Eena Baibl taimz, peepl mi kansida di lan a Izrel fi bee “di moas byootiful lan eena di hoal werl.” (Ezek. 20:6) Bot di lan a Izrel mi eevn moa preshos bikaaz dat da weh Jehoava peepl mi wership ahn. Sins Pentikaas 33 C.E., da “Byootiful Lan” mi kyaahn bee wahn akchwal pees a lan, bikaaz Jehoava peepl spred owt aal oava di ert. Rada, “di Byootiful Lan” eena fi wee taim da di way Jehoava peepl dehn liv. Dat inklood tingz laik di wership weh dehn gi Jehoava chroo di meetin dehn ahn feel servis.

      8. How di king a di naat gaan eena “di Byootiful Lan”?

      8 Joorin di laas dayz, di king a di naat gaan eena “di Byootiful Lan” lata taim. Fi egzampl, wen Nazi Germany da-mi di king a di naat, espeshali joorin di sekant werl waar, da king mi gaan eena “di Byootiful Lan” wen dehn mi persikyoot ahn kil Gaad peepl. Afta Werl Waar II wen di Soviet Union mi tek oava az king a di naat, da king mi gaan eena “di Byootiful Lan” wen dehn mi persikyoot Gaad peepl ahn foas dehn fi lef dehn hoam ahn liv sohnweh els.

      9. Eena moa reesent taimz, how Russia ahn di ada konchriz weh sopoat dehn gaan eena “di Byootiful Lan”?

      9 Eena moa reesent taimz, Russia ahn di ada konchriz weh sopoat dehn gaan eena “di Byootiful Lan” tu. How? Eena 2017, dis king a di naat mi ban di werk weh Jehoava Witnisiz du ahn dehn mi chroa som a wi bradaz ahn sistaz eena prizn. Ih mi ban wi poblikayshan dehn tu, eevn di New World Translation. Ih mi tek weh wi branch aafis da Russia ahn sohn Kingdom Haal an Asembli Haal tu. Afta dehnya ting mi hapm, eena 2018 di Govanin Badi mi aidentifai Russia ahn di konchriz weh sopoat dehn az di king a di naat. Bot, eevn wen Jehoava peepl fays lata persikyooshan, dehn stilyet rifyooz fi tek paat eena eni kaina akshan fi fait gens di govament er chaynj it. Rada, dehn fala di Baibl kongsl fi pray fi “aal weh ga atariti,” espeshali wen peepl laik dehndeh di mek disizhan weh ku tek weh wi freedom fi wership.—1 Tim. 2:1, 2.

      DI KING A DI NAAT WAHN DISCHRAI DI KING A DI SOWT?

      10. Di king a di naat wahn dischrai di king a di sowt? Pleez eksplayn yu ansa.

      10 Di prafesi da Daniel 11:40-45 foakos moa pahn weh di king a di naat du moa dan eniting els. Dat meenz dat hihn wahn kanka di king a di sowt? No. Di king a di sowt wahn stil “alaiv” wen Jehoava ahn Jeezas dischrai aal hyooman govament joorin di waar a Armagedon. (Rev. 19:20) Wai wi ku bee soh shoar bowt dat? Kansida weh di prafesi dehn eena Daniel ahn Revilayshan meen.

      Wahn stoan di kohn dong fahn wahn mongtin ahn schraik di too fut a wahn jaiyant metal stachu.

      Da Armagedon, Gaad Kingdom wahn geh rid a di hyooman roola dehn, jos laik how di stoan dischrai di stachu eena dis picha (Paragraaf 11)

      11. Weh Daniel 2:43-45 meen? (Koment pahn di picha pahn di kova.)

      11 Reed Daniel 2:43-45.c Di prafit Danyel tel wi bowt wahn jaiyant stachu weh aala di difrent paats a di badi mek owta difrent metal. Eech paat a di stachu stan fi wahn difrent govament weh afek Gaad peepl. Aala dehndeh govament wuda mi rool joorin difrent taimz. Di stachu fut dehn weh mi mek owta aiyan ahn klay stan fi di laas wan, Britain ahn di United States of America tugeda. Di prafesi help wi fi andastan dat da govament wahn stil di rool wen Gaad Kingdom dischrai aal hyooman govament.

      12. Weh di sevent hed a di wail bees stan fa, ahn wai dat impoatant?

      12 Di apasl Jan tel wi bowt sohn govament weh afek Jehoava peepl tu. Eena Jan prafesi, wahn wail bees weh ga sevn hed stan fi dehndeh govament. Di sevent hed a da bees stan fi Britain ahn di United States of America tugeda. Dis impoatant bikaaz di bees noh groa nohmoh hed afta da wan. Di sevent hed a dis bees wahn stil di rool wen Krais an ih aami dischrai it lang wid di res a di bees.d—Rev. 13:1, 2; 17:13, 14.

      WEH DI KING A DI NAAT WAHN SOON DU?

      13-14. Hoo da “Gag a di lan a Maygag,” ahn weh ku bee di reezn wai ih wahn atak Gaad peepl?

      13 Wan a Izeekyel prafesi dehn help wi fi andastan weh mait hapm joorin di taim bifoa di king a di naat ahn di king a di sowt geh dischrai. Ih luk laik di prafesi dehn da Ezekiel 38:10-23; Daniel 2:43-45; 11:44–12:1; ahn Revilayshan 16:13-16, 21 di taak bowt di saym ting. If dat da di kays, den ih luk laik dis da weh wahn hapm.

      14 Afta di grayt chribyulayshan staat, “di king dehn weh di rool oava aal di ert” wahn yoonait tugeda az wan. (Rev. 16:13, 14; 19:19) Di Baibl kaal da groop a nayshanz “Gag a di lan a Maygag.” (Ezek. 38:2) Da groop a nayshanz wahn atak Gaad peepl ahn chrai dischrai aala dehn wans an far aal. Wai dehn wahn atak Gaad peepl? Eena wahn prafesi weh taak bowt weh wahn hapm joorin da taim, di apasl Jan mi si wahn staam weh di jrap sohn big big haylstoan pahn Gaad enimi dehn. Da haylstaam mait stan fi wahn schrang jojment mesij weh Jehoava peepl dehn wahn diliva. Ih ku bee dat dis mesij wahn provoak Gag a Maygag fi atak Gaad peepl ahn chrai waip dehn owt aafa di ert.—Rev. 16:21.

      15-16. (a) Weh Daniel 11:44, 45 mait di taak bowt? (b) Weh wahn hapm tu di king a di naat ahn di res a di govament dehn weh da paat a Gag a Maygag?

      15 Dis schrang mesij ahn di fainal atak weh Gaad enimi dehn mek gens fi hihn peepl mait bee di saym ting weh di prafesi da Daniel 11:44, 45 taak bowt. (Reed.)e Eena da prafesi, Danyel seh dat “sohn ripoat weh kohn fahn di ees ahn fahn di naat” wahn wori di king a di naat, an “ih wahn geh beks ahn goh owt ahn dischrai lata peepl.” Di “lata peepl” weh ih taak bowt ya seemz fi bee Jehoava peepl.f Danyel kuda mi di taak bowt di fainal atak pahn Gaad peepl.

      16 Di king a di naat ahn di res a di govament dehn wahn atak Gaad peepl, ahn dis wahn provoak di Almaiti Gaad ahn den Armagedon wahn staat. (Rev. 16:14, 16) Den, di king a di naat, lang wid aala di ada nayshan dehn weh da paat a Gag a Maygag, wahn geh dischrai, ahn “nobadi noh wahn dehdeh fi help ahn.”—Dan. 11:45.

      Jeezas di raid wahn wait haas an ih redi fi shoot wahn aro. Sohn ada aynjel di raid wait haas tu ahn dehn ga soad eena dehn han.

      Jeezas Krais ahn fi hihn aami wahn dischrai Saytan wikid werl da Armagedon ahn sayv Gaad peepl (Paragraaf 17)

      17. Hoo da Maikl “di grayt prins” weh Daniel 12:1 menshan, ahn weh hihn du?

      17 Di neks vers eena Danyel prafesi gi wi moa deetaylz bowt how di king a di naat an aala di ada govament dehn weh sopoat ahn wahn geh dischrai ahn how wee wahn geh sayv. (Reed Daniel 12:1.)g Weh dis vers meen? Maikl da wahn nada naym fi Krais Jeezas, weh da wi King weh di rool fahn hevn. Hihn di “stan op fi” Gaad peepl fahn sins 1914 wen fi hihn Kingdom staat rool da hevn. Soon, hihn wahn “stan op” ahn dischrai aala ih enimi dehn da Armagedon. Da waar wahn bee di laas ting fi hapm joorin wahn taim weh Danyel seh “lata sofarin wahn deh” laik neva bifoa. Jan prafesi eena Revilayshan kaal di taim weh leed op tu da waar “di grayt chribyulayshan.”—Rev. 6:2; 7:14.

      FI YOO NAYM WAHN GEH “RAIT DONG EENA DI BUK”?

      18. Wai wi ku fays di fyoocha wid kanfidens noh mata weh hapm?

      18 Wi ku fays di fyoocha wid kanfidens bikaaz dehnya too prafit, Danyel ahn Jan, tel wi dat peepl weh serv Jehoava ahn Jeezas wahn servaiv dis grayt chribyulayshan. Danyel seh dat di peepl weh servaiv wahn “ga dehn naym rait dong eena di buk.” (Dan. 12:1) Weh wi haftu du fi geh wi naym rait dong eena da buk? Wi haftu proov dat wi ga fayt eena Jeezas, di Lam a Gaad. (Jan 1:29) Wi haftu dedikayt wi laif tu Gaad ahn geh baptaiz. (1 Peet. 3:21) Ahn wi haftu shoa wi sopoat fi Gaad Kingdom. Wan way wi ku du dat da fi werk haad fi help ada peepl laan bowt Jehoava.

      19. Weh wi shuda du now, ahn wai?

      19 Now da di taim fi bil op wi chros eena Jehoava ahn fi hihn laayal aaganaizayshan. Now da di taim fi sopoat Gaad Kingdom. If wi du dat, wi wahn geh sayv wen Gaad Kingdom dischrai di king a di naat ahn di king a di sowt.

      SANG 149 Wahn Vikchri Sang

      a Hoo da “di king a di naat” tudeh day, ahn how ih wahn geh dischrai? Di ansa tu dehndeh kweschanz ku schrentn wi fayt ahn help wi pripyaa fi di chraiyalz weh wi wahn soon fays.

      b Daniel 11:40-43: “Joorin di taim a di en, di king a di sowt ahn di king a di naat wahn staat tu push gens wan anada. Di king a di naat wahn kohn aata di king a di sowt laik wahn staam wid ih chariyat dehn ahn wid soalja pahn haas ahn wid lata big ship. Ih wahn goh eena difrent konchri ahn sweep chroo dehn laik wahn flod. Hihn wahn goh eena di Byootiful Lan tu, an ih wahn win owt oava wahn lata konchri. Bot dehnya da di konchri dehn weh wahn eskayp fahn owta fi hihn han: Eedom ahn Moawab ahn di moas impoatant paat a di Amonait dehn. Ahn hihn wahn kantinyu fi yooz ih powa gens di ada konchri dehn, an az fi Eejip, dehn noh wahn get weh. Ahn hihn wahn rool oava di goal ahn silva chrezhaz weh Eejip haid an oava aala fi dehn preshos tingz. Ahn di peepl fahn Libiya ahn fahn Eetiyopya wahn fala ahn.”

      c Daniel 2:43-45: “Di sayhn way yu mi si aiyan miks wid saaf klay, dehn wahn miks op wid di peepl. Bot dehn noh wahn stik tugeda, wan tu di neks wan, jos laik how aiyan noh miks wid klay. Eena di dayz a dehndeh king, di Gaad a hevn wahn set op wahn kingdom weh wahn neva geh dischrai. Ahn dis kingdom wahn neva geh paas aan tu eni ada peepl. Ih wahn krosh ahn put wahn en tu aala dehnya kingdom, an ih wahn bee di onli wan weh wahn laas fareva. Ih wahn bee jos laik di stoan weh yu mi si weh geh kot owt fahn di mongtin, weh no han neva kot, ahn di stoan mi krosh di aiyan, di kapa, di klay, di silva, ahn di goal. Di Grayt Gaad mek di king noa weh wahn hapm eena di fyoocha. Di jreem chroo, ahn yu ku chros di eksplanayshan.”

      e Daniel 11:44, 45: “Bot sohn ripoat weh kohn fahn di ees ahn fahn di naat wahn wori ahn. Ih wahn geh beks ahn goh owt ahn dischrai lata peepl. An ih wahn set op ih raiyal tent bitween di grayt see ahn di hoali mongtin a Byooti. An ih wahn kohn aal di way tu ih oan en, ahn nobadi noh wahn dehdeh fi help ahn.”

      g Daniel 12:1: “Joorin da taim Maikl wahn stan op. Hihn da di grayt prins weh di stan op fi yu peepl. Ahn fi wahn wail lata sofarin wahn deh, laik notn weh eva hapm fahn bifoa eni peepl kohn tugeda az wahn nayshan. Ahn joorin da taim fi yoo peepl wahn eskayp, evribadi weh ga dehn naym rait dong eena di buk.”

  • Too King Weh Fait Gens Eech Ada Joorin di Taim a di En
    Di Wachtowa (Stodi Kapi)—2020 | May

    • Too King Weh Fait Gens Eech Ada Joorin di Taim a di En

      Som a di prafesi dehn pahn dis chaat taak bowt difrent tingz weh hapm saym taim. Aala dehn proov dat wi di liv eena “di taim a di en.”—Dan. 12:4.

      Wahn chaat weh shoa di prafesi dehn ahn di aidentiti a di king a di naat ahn di king a di sowt fahn 1870 tu fi wee taim.
      • Chaat 1 owta 4 shoa sohn prafesi a weh hapm joorin di taim a di en ahn weh kova di taim fahn di yaa 1870 tu di yaa 1918. Di taim a di en staat eena 1914. Prafesi 1: Wahn wail bees wid sebm hed apyaa bifoa di erliyes dayt pahn di chaat. Joorin Werl Waar I, di bees sevent hed nayli ded. Fahn 1917, di sevent hed geh heel ahn di wail bees get bak ih schrent. Prafesi 2: Wi ku aidentifai hoo da di king a di naat sins 1871, ahn di king a di sowt sins 1870. Germany da-mi di king a di naat fahn 1871. Great Britain da-mi di king a di sowt, bot America ahn Great Britain jain op tugeda ahn kohn fi bee di king a di sowt eena 1917. Prafesi 3: Eena di 1870’s, Charles Russell an ih kloas fren dehn mi geh aidentifai az di ‘mesinja.’ Erli eena di 1880’s, ‘Zion’s Watch Tower’ inkorij evribadi weh mi reed di Wachtowa fi preech di gud nyooz. Prafesi 4: Fahn 1914, da haavis taim. Di paiznos plaants geh separaytid fahn di weet. Prafesi 5: Fahn 1917, di too fut weh mek owta klay ahn aiyan apyaa. Dis chaat aalso shoa: Sohn ivent weh hapm eena di werl fahn 1914 tu 1918, Werl Waar I. Sohn ivent weh afek Jehoava peepl: Fahn 1914 tu 1918, Baibl Styoodents weh deh da Britain ahn Germany geh chroa eena jayl. Eena 1918, sohn bradaz fahn hedkwaataz eena di United States geh lak op da jayl.
        Prafesi 1.

        Skripcha(z) Rev. 11:7; 12:13, 17; 13:1-8, 12

        Prafesi “Di wail bees” di rool oava di ert fi towznz a yaaz now. Joorin di taim a di en, di sevent hed nayli ded. Laytaraan, da hed heel an “aal di peepl pahn di ert” fala di bees. Saytan yooz da bees fi “fait di uman ada pikni dehn.”

        How ih kohn chroo Afta di Flod, hyooman govament weh da enimi tu Jehoava staat rool oava peepl. Honjridz a yaaz layta, joorin Werl Waar I, Britain laas wahn lata ih powa. Dehn mi get bak dehn powa wen di United States mi jain op wid dehn. Joorin di taim a di en, Saytan yooz aala di govament dehn pahn di ert fi persikyoot Gaad peepl.

      • Prafesi 2.

        Skripcha(z) Dan. 11:25-45

        Prafesi Di king a di naat ahn di king a di sowt fait wan anada fi powa joorin di taim a di en.

        How ih kohn chroo Germany fait gens Britain ahn di United States. Fahn 1945, di Soviet Union ahn di ada konchriz weh sopoat dehn da-mi di king a di naat. Eena 1991, di Soviet Union mi faal apaat, an afta sohn taim paas, Russia an di konchriz weh sopoat dehn tek oava di roal az di king a di naat.

      • Prafesi 3.

        Skripcha(z) Isa. 61:1; Mal. 3:1; Look 4:18

        Prafesi Jehoava sen ih “mesinja” fi “klayr op di way” bifoa di Kingdom staat rool. Dis mesinja mi staat tu “preech di Gud Nyooz tu di poa peepl dehn.”

        How ih kohn chroo Fahn sins di 1870’s, Charles Taze Russell an adaz lang wid ahn mi werk haad fi stodi di Baibl fi si weh ih reeli teech. Joorin di 1880’s, dehn mi riyalaiz dat Gaad servant dehn need fi preech. Dehn mi poblish sohn aatikl laik “Wanted 1,000 Preachers” an “Anointed to Preach.”

      • Prafesi 4.

        Skripcha(z) Mach. 13:24-30, 36-43

        Prafesi Wahn enimi plaant paiznos plaants eena wahn weet feel. Dehndeh paiznos plaant groa ahn haid di weet til wen di haavis taim kohn. Den dehn separayt di paiznos plaant fahn di weet.

        How ih kohn chroo Fahn di 1800’s, ih mi geh eeziya an eeziya fi si di difrens bitween di chroo Kristyan dehn ahn di faals Kristyan dehn. Joorin di taim a di en, di chroo Kristyan dehn separayt dehnself fahn di faals Kristyan dehn.

      • Prafesi 5.

        Skripcha(z) Dan. 2:31-33, 41-43

        Prafesi Di too fut weh mek owta aiyan ahn klay bilangz tu wahn stachu weh mek owta difrent kaina metal.

        How ih kohn chroo Klay stan fi di peepl weh di govament dehn a Britain ahn di United States rool oava ahn weh ribel gens dehndeh govament. Sayka dehn peepl deh, dehndeh govament kyaahn yooz dehn ful powa.

      • Chaat 2 owta 4 di shoa sohn prafesi weh hapm eena di taim a di en fahn rong 1919 tu 1945. Germany geh aidentifai az di king a di naat til 1945. Britain ahn di United States of America geh aidentifai az di king a di sowt. Prafesi 6: Eena 1919, anointid Kristyanz geh gyada op eena di kleen kangrigayshan. Fahn 1919, di preechin werk kantinyu. Prafesi 7: Eena 1920, di League of Nations geh set op ahn kantinyu fi ga powa til lee bit afta Werl Waar II staat. Dis chaat aalso shoa: Prafesi 1, di wail bees weh ga sebm hed, stil deh rong. Prafesi 5, di too fut dehn weh mek owta klay ahn aiyan, stil deh rong. Sohn ivent weh hapm eena di werl fahn 1939 tu 1945, Werl Waar II. Sohn ivent weh afek Jehoava peepl: Da Germany fahn 1933 tu 1945, oava 11,000 Witnisiz geh lak op da jayl. Da Britain fahn 1939 tu 1945, nayli 1,600 Witnisiz geh lak op da jayl. Da di United States fahn 1940 tu 1944, Witnisiz geh atak oava 2,500 taimz bai wahn krowd a peepl.
        Prafesi 6.

        Skripcha(z) Mach. 13:30; 24:14, 45; 28:19, 20

        Prafesi “Di weet” geh put op eena di “stoaroom” ahn “di faytful ahn waiz slayv” geh put in chaaj a “aala di servant dehn.” Di preechin a di “gud nyooz bowt di Kingdom” staat tu spred “oava di hoal werl.”

        How ih kohn chroo Eena 1919 di faytful slayv geh put in chaaj a Gaad peepl. Fahn da taim di Baibl Styoodent dehn mi-di preech moa ahn moa. Tudeh, Jehoava Witnisiz preech eena oava 200 konchriz ahn teritori, ahn dehn poblish Baibl lichricha eena oava 1,000 langwij.

      • Prafesi 7.

        Skripcha(z) Dan. 12:11; Rev. 13:11, 14, 15

        Prafesi Wahn wail bees weh ga too haan pahn ih hed tel peepl pahn di ert fi mek “wahn stachu fi shoa aana tu di fos bees,” ahn den ih “bloa laif eena di stachu.”

        How ih kohn chroo Britain ahn di United States mi werk tugeda fi staat op di League of Nations. Dis aaganaizayshan mi geh sopoat fahn ada nayshanz tu. Eevn di king a di naat mi jain di League, bot onli fahn 1926 tu 1933. Laik di United Nations (UN) weh mi kohn afta, di League mi geh prayz weh onli bilangz tu Gaad Kingdom.

      • Chaat 3 owta 4 shoa sohn prafesi weh kohn chroo joorin di taim a di en fahn 1945 tu 1991. Di Soviet Union ahn di ada konchriz weh sopoat dehn geh aidentifai az di king a di naat til 1991 ahn den afta dat Russia ahn di ada konchriz weh sopoat dehn geh aidentifai az di king a di naat. Britain ahn di United States of America geh aidentifai az di king a di sowt. Prafesi 8: Wahn atomik bom lef wahn klowd weh luk laik wahn moshroom, weh stan fi di lata dischrokshan weh Britain ahn di United States of America kaaz. Prafesi 9: Di United Nations geh faam eena 1945 ahn tek di plays a di League of Nations. Dis chaat aalso shoa: Prafesi 1, di wail bees weh ga sebm hed, stil deh rong. Prafesi 5, di too fut weh mek owta aiyan ahn klay, stil deh rong. Prafesi 6, eena 1945 oava 156,000 poblishaz mi deh. Eena 1991, oava 4,278,000 poblishaz mi deh. Sohn ivent weh di afek Jehoava peepl: Da di Soviet Union fahn 1945 ahn op tu eena di 1950’s, towznz a Jehoava Witnisiz mi geh foas fi goh liv da Siberia.
        Prafesi 8.

        Skripcha(z) Dan. 8:23, 24

        Prafesi Wahn meen-lukin king bring “lata dischrokshan.”

        How ih kohn chroo Britain ahn di United States kil lata peepl ahn kaaz lata dischrokshan. Fi egzampl, joorin Werl Waar II, di United States mi jrap too atomik bom pahn wahn nayshan weh da-mi enimi gens Britain ahn di United States. Dehndeh too bom mi kaaz moa dischrokshan dan eni wepan weh enibadi eva yooz bifoa.

      • Prafesi 9.

        Skripcha(z) Dan. 11:31; Rev. 17:3, 7-11

        Prafesi Di “brait red” bees weh ga ten haan kom op fahn owta di deep deep hoal. Dis bees da di ayt king. Di buk a Daniel diskraib dis king az “di disgostin ting weh kaaz dischrokshan.”

        How ih kohn chroo Di League of Nations mi stap fongshan joorin Werl Waar II. Afta di waar, di UN mi geh “put in plays.” Di UN, jos laik di League weh mi kohn bifoa, geh gloari weh bilangz tu Gaad Kingdom. Di UN wahn atak rilijan.

      • Chaat 4 owta 4 shoa sohn prafesi weh hapm eena di taim a di en fahn tudeh day aal di way tu Armagedon. Russia ahn di ada konchriz weh sopoat dehn geh aidentifai az di king a di naat. Britain ahn di United States of America geh aidentifai az di king a di sowt. Prafesi 10: Werl leedaz anonks dat ‘evriting fain ahn peesful.’ Afta dat, di grayt chribyulayshan bigin. Prafesi 11: Di nayshan dehn atak faals rilijan. Prafesi 12: Aala di govament dehn atak Gaad peepl. Di res a di anointid Kristyanz dehn geh gyada op fi goh da hevn. Prafesi 13: Armagedon. Di wan weh di sidong pahn wahn wait haas finish ih fait. Di wail bees wgh ga sebm hed geh dischrai; di big stachu geh nak da ih too fut weh mek owta aiyan ahn klay. Dis chaat aalso shoa: Prafesi 1, di wail bees weh ga sebm hed, stil deh rong til Armagedon. Prafesi 5, di too fut weh mek owta aiyan ahn klay, stil deh rong til Armagedon. Prafesi 6, tudeh oava 8,580,000 poblishaz deh. Sohn ivent weh di afek Jehoava peepl: eena 2017, di Russian govament chroa Jehoava Witnisiz eena jayl ahn dehn tek weh dehn branch aafis.
        Prafesi 10 an 11.

        Skripcha(z) 1 Tes. 5:3; Rev. 17:16

        Prafesi Di nayshan dehn wahn klaym dat evriting “fain ahn peesful,” ahn “di ten haan dehn” ahn “di bees” wahn atak “di prastichoot” ahn dischrai ahn. Afta dat, di nayshan dehn wahn geh dischrai.

        How ih kohn chroo Di nayshan dehn mait klaym dat dehn mek evriting fain ahn peesful fi di hoal werl. Den, di nayshan dehn weh di sopoat di UN wahn dischrai di aaganaizayshan dehn weh da paat a faals rilijan. Dis wahn bee di staat a di grayt chribyulayshan. Da chribyulayshan wahn en wen Jeezas dischrai di hoal a Saytan werl da Armagedon.

      • Prafesi 12.

        Skripcha(z) Ezek. 38:11, 14-17; Mach. 24:31

        Prafesi Gag invayd di plays dehn weh Gaad peepl deh. Den, di aynjel dehn gyada “aala fi hihn speshal peepl dehn weh hihn pik.”

        How ih kohn chroo Di king a di naat ahn di res a govament dehn pahn di ert wahn atak Gaad peepl. Afta dis atak staat, di res a di anointid wahn goh da hevn.

      • Prafesi 13.

        Skripcha(z) Ezek. 38:18-23; Dan. 2:34, 35, 44, 45; Rev. 6:2; 16:14, 16; 17:14; 19:20

        Prafesi “Di wan weh di raid” pahn wahn “wait haas” finish “win owt oava” ih enimi dehn wen ih dischrai Gag an ih aami. “Di bees” wahn geh “pich eena wahn layk a faiya,” ahn di jaiyant stachu wahn geh dischrai.

        How ih kohn chroo Jeezas, di King a Gaad Kingdom, wahn sayv Gaad peepl. Jeezas, di 144,000 weh wahn rool lang wid ahn, ahn di aynjel dehn wahn dischrai aala di nayshan dehn weh atak Gaad peepl. Dat wahn bee di en a Saytan hoal werl