KWESCHANZ WEH YONG PEEPL AKS
Weh Ku Moov Mi fi Waahn Eksasaiz?
Wai Ah shuda eksasaiz?
Eena sohn konchri, yong peepl di spen les ahn les taim di bee fizikali aktiv, ahn bikaaz a dis dehn di put dehn oan helt eena daynja. Soh ih playn fi si wai di Baibl seh “if sohnbadi di chrayn ih badi, dat help.” (1 Timoti 4:8) Mek wi luk pahn sohn sojeshanz:
Eksasaiz ku mek yu feel beta. Wen yu eksasaiz, yu rilees endorphins weh da wahn kemikal eena yu brayn weh mek yu feel hapi ahn rilaks. Ahn dat da wai sohn peepl seh dat eksasaiz da weh yu kud du wen yu feel dong.
“If Ah goh ron fos ting da maanin, den Ai injai di res a mi day ahn Ah feel laik Ah ga moa enerji fi du moa tingz. Wen Ai goh ron, ih mek Ah feel beta.”—Regina .
Wen yu eksasaiz, dis kud mek yu luk gud. If yu du di rait kaina eksasaiz, den dis kud mek yu geh schranga, get eena shayp ahn boos op yu kanfidens.
“Ai feel gud dat Ai ku du ten chin-ops—wahn yaa agoa Ai kudn eevn du wan! Oavaraal, di bes ting da dat Ah di tek kayr a mi badi.”—Olivia.
Eksasaiz ku mek yu liv langa. Dehn ga lata benifits wen yu werkowt. Wen yu werkowt yu improov how yu haat ahn yu longz fongshan. Eksasaiz ku help yu fi noh divelop haat dizeez weh da wan a di nomba wan kaaz a det eena man ahn uman.
“Wen wi ga wahn regyula eksasaiz skejul, wi noh onli wahn bee helti bot wi wahn di shoa dat wi graytful fi di badi weh Jehoava gi wi.”—Jessica.
Di lesn da dis: Eksasaiz noh onli benifit yu rait now, bot dong di road tu. Wahn yong laydi weh naym Tonya mi seh “Yu wahn neva seh, ‘Ai sari Ah gaahn ron er gaahn haik. Ahn wen Ai stap mek ekskyooz an Ah goh goh eksasaiz, Ai noh feel sari ataal.’”
Wen yu stap tek kyaa a wahn kaar, afta wahn wail ih wahn stap werk; di sayhn ting hapm wid yu badi if yu noh eksasaiz.
Da weh di kip mi bak fahn eksasaiz?
Dehn ga lata ting weh mait di hoal yu bak:
No rezn deh fi Eksasaiz. “Ah tink yong peepl feel laik notn kyaahn hapm tu dehn. Ahn ih haad fi dehn imajin dehnself di ga helt prablemz. Yu tink dat da onli oal peepl geh sik er ga helt prablemz.”—Sophia.
No taim noh deh. “Bikaaz Ah don ga wahn bizi skejul aredi, an Ah haftu mek taim fi eet gud ahn geh nof res, Ah fain it haad fi mek taim fi eksasaiz.”—Clarissa.
Noh ga wahn jim membaship. “Ih kaas moni fi stay eena shayp if yu waahn goh da di jim!”—Gina.
Tink bowt dis:
Wat da fi yoo bigis chalenj weh di kip yu bak fahn di eksasaiz? In aada fi get oava dis chalenj, ih wahn tek werk, bot di rizolts wert it.
Weh kaina eksasaiz Ai need fi du fi bee helti?
Dehnya da sohn sojeshanz:
Tek kanchroal a yu oan helt.—Galayshanz 6:5.
Noh mek ekskyooz. (Ecclesiastes 11:4) Fi egzampl, yu no haftu sain op da wahn jim fi mek yu kud eksasaiz. Jos fain wahn aktiviti weh yu laik du ahn mek dat bee paat a yu skejul.
Aks adaz weh kaina eksasaiz dehn du.—Proverbs 20:18.
Kip wahn skejul. Set gud goalz ahn rait dong di kaina proagres yu di mek. Dis wahn help yu fi ga di dizaiya fi kantinyu eksasaiz.—Proverbs 21:5.
Fain wahn eksasaiz paadna. Wahn “werkowt paadna” wahn inkorij ahn help yu fi stik tu yu eksasaiz skejul.—Ecclesiastes 4:9, 10.
Noa dat sohntaim ih wahn bee haad, bot noh giv op.—Proverbs 24:10.
Bee balans
Di Baibl tel man an uman dat dehn need fi bee aybl fi “kanchroal dehnself” eena eniting weh dehn du. (1 Timoti 3:2, 11) Soh yu need fi bee balans wen ih kohn tu eksasaiz. Sohn peepl seh dat peepl weh spen tu moch taim di werk owt, geh swel hedid ahn tink tu moch a dehnself. Julia mi seh “If wahn man mosl biga dahn ih braynz, den dat noh inchres mee”.
Bee kyaaful wen ih kohn tu dehn ‘werk-owt advais’ weh sel yu loan jreem laik “Wen yu feel laik yu kyaahn du nohmoh, du 10 moa.” Dehndeh advais ku bee daynjaros fi yu badi ahn kaaz yu fi looz foakos pahn “weh da di bes ting fi du” eena fi yoo laif.—Filipiyanz 1:10.
Pahn tap a dat, dehndeh fitnis advais ku ton owt fi bee bad fi yu. Wahn yong laydi weh naym Vera seh: “Wahn lata yong gyal sayv picha a peepl weh dehn wuda wahn luk laik, ahn dehn stayr pahn dehndeh picha wen dehn need inkorijment fi eksasaiz. Bot dehn onli en op di kompyaa dehnself wid dehndeh peepl ahn geh diskorij. Ih beta fi jos mek wahn goal fi improov yu helt, noh onli fi luk gud.”