Wi fi Aksep ahn Rispek Peepl Weh Difrent Fahn Wee?—How di Baibl Ku Help Wi?
“Wi ku oanli ga pees if peepl wilin fi aksep ahn rispek adaz eevn if dehn difrent.”—UNESCO Declaration of Principles on Tolerance, 1995.
Pahn di ada han, if peepl noh wilin fi aksep dat ada peepl ku bee difrent fahn dehn, dehn mait hayt dehn ahn noh ga no rispek fi dehn. Peepl weh goh aan laik dat mait en op di seh hertful tingz, bee prejudis, an ak eena wahn vailent way.
Peepl ga difrent opinyan pahn weh ih meen fi aksep ahn rispek dat ada peepl ga di rait fi bee difrent fahn dehn. Som peepl tink dat ih meenz wi haftu agree wid evriting er laik evriting weh adaz du. Adaz agree wid weh di Baibl seh, dat wi fi aksep ahn rispek ada peepl rait fi chooz weh dehn wahn bileev eena an di kaina standadz dehn wahn liv bai, eevn if wi noh agree wid dehn chois.
Yu tink di Baibl ku reeli help peepl tudeh fi aksep ahn rispek peepl weh difrent fahn dehn?
Weh di Baibl seh bowt how wi fi chreet peepl weh difrent fahn wee
Di Baibl inkorij wi fi bee wilin fi aksep ahn rispek ada peepl eevn if dehn difrent fahn wee. Ih seh: “Evribadi fi si dat unu noh aalwayz waahn unu oan way.” (Filipiyanz 4:5) Di Baibl inkorij wi fi bee kain ahn kansidarayt ahn fi chreet adaz eena wahn fyaa way. If wi fala dis advais, wi wahn rispek ada peepl disizhanz eevn if wi noh agree wid di way dehn di liv dehn laif.
Bot di Baibl doo tel wi dat Gaad set standadz fi hyoomanz. Ih seh: “Jehoava don tel yu bowt weh gud.” (Micah 6:8) Gaad giv ih advais eena di Baibl soh dat ih ku help peepl injai di bes laif pasabl.—Isaiah 48:17, 18.
Gaad noh gi non a wi di atariti fi joj adaz. Di Baibl seh, “Onli wan persn deh weh mek laa ahn weh da Joj . . . Da hoo unu soh fi di joj unu nayba?” (Jaymz 4:12) Gaad giv eech wan a wi di freedom fi mek wi oan disizhan, an eech wan a wi rispansabl fi di disizhan dehn weh wi mek.—Deuteronomy 30:19.
Weh di Baibl seh bowt rispek
Di Baibl seh wi mos “shoa rispek fi aal kaina peepl.” (1 Peeta 2:17) Soh wahn persn weh chooz fi liv bai Baibl standadz wahn chreet evribadi wid rispek, noh mata weh di ada persn bileev eena er weh kaina laif dehn liv. (Look 6:31) Bot dis noh meen dat sohnbadi weh fala di Baibl haftu agree wid evriting weh peepl bileev er seh, er ih haftu sopoat aala di disizhanz weh peepl mek. Insteda chreet peepl bad er ak eena wahn way weh noh shoa rispek fi adaz, dehn chrai dehn bes fi kapi Jeezas egzampl.
Fi egzampl, Jeezas mi meet wahn laydi weh da-mi fahn wahn difrent rilijan weh hihn neva agree wid. Pahn tap a dat, shee mi-di liv wid wahn man weh da neva ih hozban. Jeezas neva agree wid da laifstail needa. Bot stilyet, hihn mi chreet di laydi wid rispek wen ih mi taak tu ahn.—Jan 4:9, 17-24.
Jos laik Jeezas, Kristyanz redi fi eksplayn weh dehn bileev tu enibadi weh wilin fi lisn, bot dehn du it eena wahn way weh “shoa deep rispek.” (1 Peeta 3:15) Di Baibl teech Kristyanz noh fi foas dehn bileef pahn peepl. Ih seh “wahn slayv a di Laad noh haftu kwaaril, bot ih fi bee jentl tuwaadz evribadi,” ahn dis inklood peepl weh ga difrent bileef.—2 Timoti 2:24.
Weh di baibl seh bowt haychrid
Di Baibl tel wi fi “werk haad fi liv eena pees wid evribadi.” (Heebrooz 12:14) Sohnbadi weh chrai haad fi liv eena pees noh wahn hayt enibadi. Eevn doa ih werk haad fi liv eena pees wid adaz, saym taim ih noh du notn weh goh gens fi hihn oan standadz. (Machyu 5:9) Noh onli dat, bot di Baibl inkorij Kristyanz fi lov dehn enimi, ahn dehn du dis wen dehn chreet peepl weh ak bad wid dehn eena wahn kain way.—Machyu 5:44.
Di Baibl seh dat Gaad “hayt,” er ih “kyaahn stan,” wen peepl du tingz weh mek adaz feel shaym er weh hert adaz. (Proverbs 6:16-19) Rait ya eena dis vers di werd “hayt” rifa tu wahn schrang feelin weh shoa dat Gaad noh laik wen sohnbadi du sohnting weh bad. Di Baibl tel wi dat Gaad wilin fi fergiv ahn help enibadi weh waahn chaynj dehn wayz ahn liv bai fi hihn standadz.—Isaiah 55:7.
Sohn Baibl vers weh taak bowt how wi fi bee wilin fi aksep ahn rispek peepl weh difrent fahn wee
Taitos 3:2: ‘Noh bee stobant, bot aalwayz bee jentl tuwaadz evribadi.’
Wahn reeznabl persn noh wahn geh beks wen adaz ga wahn difrent opinyan dan hihn, bot ih wahn chreet dehn eena wahn jentl way ahn chrai promoat rispek monks wan anada.
Machyu 7:12: “Soh den, eena evriting, unu fi chreet adaz di saym way unu waahn dehn chreet unu.”
Aala wi laik it wen adaz chreet wi wid rispek, ahn wi aalso laik it wen dehn tek weh wi seh er how wi feel seeryos. Fi laan moa bowt weh wi need fi du fi fala dis faymos rool weh Jeezas mi yooz fi teech wi how fi bihayv, si di aatikl weh naym “What Is the Golden Rule?”
Jashwa 24:15: “Chooz fi unuself tudeh hoo unu wahn serv.”
Wen wi rispek dat adaz ga di rait fi mek dehn oan chois, wi wahn ga pees.
Aks 10:34: “Gaad chreet evribadi di saym way.”
Gaad chreet evribadi di saym way, noh mata if da mayl er feemayl er weh konchri, rays, kolcha, er bakgrong dehn kohn fram. Enibadi weh waahn kapi Gaad egzampl wahn shoa rispek fi evribadi.
Habakkuk 1:12, 13: “[Gaad] kyaahn talarayt wikidnis.”
Gaad noh aksep aal kaina bihayvya. Hihn noh wahn talarayt wikidnis fareva. Fi laan moa, wach di veedyo weh naym Wai Gaad Talarayt Sofarin?
Roamanz 12:19: “Lef it tu Gaad ahn hihn wahn shoa ih anga gens di bad tingz weh dehn du. Kaaz da jos laik weh rait dong eena di Skripchaz: ‘Jehoava seh, “Venjans bilangz tu mee. Ai wahn pay dehn bak fi di bad tingz weh dehn du.”’”a
Jehoava Gaad noh gi nobadi di atariti fi tek rivenj. Hihn wahn mek shoar dat evribadi geh jostis da wahn taim weh hihn set. Fi laan moa, reed di aatikl weh naym “Will the Cry for Justice Be Heard?”
a Jehoava da Gaad persnal naym. (Psalm 83:18) Si di aatikl weh naym “Hoo Da Jehoava?”