Humoch Jehoava Witnisiz yoo noa? Som a wi mait bee yu nayba, peepl weh yu werk wid, er yu klaasmayt. Er maybi wi mi taak tu yu bowt di Baibl aredi. Bot da hoo wee, ahn wai wi shayr wat wi bileev wid evribadi?

Wi da jos aadineri peepl. Wi kohn fahn aal difrent rays ahn kolcha, ahn fahn difrent bakgrong. Som a wi mi bilangz tu wahn nada rilijan, ahn som a wi neva eevn bileev eena Gaad. Bot bifoa wi mi baptaiz az wahn Witnis, aala wi mi hafu stodi di Baibl gud fi andastan weh ih reeli teech. (Aks 17:11) Wi mi aksep evriting weh wi mi laan, den wi mi disaid pahn wi oan fi wership Jehoava Gaad.

Wi benifit wen wi stodi di Baibl. Wi ga wi prablemz ahn weeknis dehn fi deel wid jos laik evribadi els. Bot wen wi chrai praktis Baibl prinsiplz eena wi evriday laif, wi si dat di kwaliti a wi laif geh beta. (Jaymz 1:25) Dis da wan reezn wai wi tel adaz bowt di gud tingz weh wi di laan fahn di Baibl.

Wi liv bai Baibl standadz. Dehnya Baibl standadz teech wi how fi bee hapi, fi ga rispek fi ada peepl, fi bee aanis, ahn fi bee kain tu adaz. Dehnya standadz help wi fi bee moa helti ahn mek wi bee beta peepl eena di kamyooniti. Dehn inkorij wi famili fi stay tugeda ahn fi liv di rait kaina laif. Bikaaz wi noa fi shoar dat “Gaad chreet evribadi di sayhn way,” wi da paat a wahn spirichwal famili weh deh aal oava di werl. Wi noh mek rays ner palitiks divaid wi. Eevn doa wi da aadineri peepl, wi da wahn speshal groop a peepl.​—Aks 4:13; 10:34, 35.

• How Jehoava Witnisiz da jos laik evribadi els?

• How Baibl standadz gaid wi eena wi laif?

Lata peepl tink dat Jehoava Witnisiz da wahn nyoo rilijan. Bot, Jehoava di kaal fi hihn chroo servant dehn fi hihn “witnisiz” fi oava 2,700 yaaz now. (Isaiah 43:10-12) Op til 1931, peepl mi noa wi az Baibl Styoodents. Wai wi mi staat yooz di naym Jehoava Witnisiz?

Ih shoa evribadi hoo da fi wee Gaad. Akaadn tu sohn oal skroal, Gaad naym, Jehoava, deh eena di Baibl towznz a taim. Bot, dehn tek owt Gaad naym fahn wahn lata chranslayshan ahn put een sohn taitl, laik Gaad er Laad. Gaad mi tel Moaziz dat fi hihn persnal naym da Jehoava. Ih mi seh: “Dis da mai naym fareva.”(Exodus 3:15) Eena dis way, hihn mi separayt ihself fahn di faals gaad dehn. Wi prowd fi yooz Gaad hoali naym.

Ih diskraib weh wi du. Di Baibl ga wahn lang lis a raichos peepl weh mi gi wahn witnis bowt dehn fayt eena Jehoava. Aybl da-mi di fos wan, den az di yaaz gaan bai, peepl laik Noawa, Aybraham, Sayra, Moaziz, Dayvid, an adaz mi jain dis ‘big krowd a witnis.’ (Heebrooz 11:4–12:1) Jos laik wen sohnbadi stan op da koat az wahn witnis fi wahn inosent persn, sayhn way, wi don mek op wi main fi tek wi stan fi tel ada peepl di chroot bowt fi wee Gaad.

Wi di kapi Jeezas egzampl. Di Baibl seh dat hihn da “di Wan wi ku chros fi chroo ahn weh di taak di chroot aal di taim bowt Gaad [“faytful ahn chroo witnis,” NW].” (Revilayshan 3:14) Jeezas ihself mi seh dat hihn teech adaz ‘bowt Gaad wandaful naym,’ ahn dat ih kip aan di ‘taak di chroot’ bowt Gaad. (Heebrooz 2:12; Jan 18:37) Soh Jeezas chroo falowaz need fi yooz Jehoava naym ahn tel adaz bowt it tu. Dis da wat wee az Jehoava Witnisiz di chrai wi bes fi du.

• Wai di Baibl Styoodents mi staat yooz di naym Jehoava Witnisiz?

• How lang now sins Jehoava ga witnisiz pahn di ert?

• Hoo da di graytis Witnis fi Jehoava?

Di Baibl mi prafesai dat afta Jeezas ded, sohn faals teecha mi wahn kohn rait fahn monks di erli Kristyan dehn ahn korop di teechin dehn fahn di Baibl. (Aks 20:29, 30) Afta sohn taim, dat da egzakli weh mi hapm. Dehn tek Jeezas teechin dehn ahn miks dehn op wid faals rilijos teechinz. Ahn dat da weh faals Kristyanz kohn fram. (2 Timoti 4:3, 4) How wi ku noa fi shoar dat tudeh wi ga di karek andastandin a weh di Baibl reeli teech?

Di taim mi kohn fi Jehoava bring owt di chroot. Ih mi prafesai dat eena ‘di taim a di en, wi wahn ga lata chroo nalij.’ (Daniel 12:4) Eena 1870 wahn smaal groop a peepl weh mi-di saach fi di chroot mi riyalaiz dat weh di cherch dehn mi-di teech neva kohn fahn di Baibl. Soh, dehn staat fi du risaach fi chrai andastan di orijinal teechin dehn fahn di Baibl, ahn Jehoava bles dehn wid spirichwal andastandin.

Sohn sinsyaa man mi tek taim fi stodi di Baibl. Fi wee bradaz bak den da-mi sohn seeryos styoodents a di Baibl. Di way dehn mi stodi di Baibl da di sayhn way wi stil du it tudeh. Dehn mi diskos di Baibl tapik bai tapik. Wen dehn mi kohn kraas wahn Baibl vers weh haad fi andastan, dehn luk op sohn ada vers fi eksplayn it. Wen dehn don du dehn risaach, if ih mach op wid di res a di Skripchaz, dehn rait dong di rizolt. Bikaaz dehn mi mek di Baibl eksplayn ihself, dehn get bak di chroot bowt Gaad naym ahn fi hihn Kingdom, an ih perpos fi hyoomanz ahn di ert. Dehn mi get bak di chroot bowt di kandishan a di ded, ahn di rezorekshan hoap. Di risaach weh dehn mi du set dehn free fahn wahn lata teechin ahn praktis weh rang.​—Jan 8:31, 32.

Bai 1879 di Baibl Styoodents mi riyalaiz dat da-mi taim fi mek evribadi noa di chroot. Soh eena da sayhn yaa, dehn bring owt The Watchtower Announcing Jehovah’s Kingdom; di sayhn magazeen weh wi stil di poblish tudeh. Now wi di shayr Baibl chroot wid peepl eena 240 difrent lan ahn eena moa dan 750 difrent langwij. Lata chroo nalij fahn di Baibl deh nowadayz fi chroo, laik neva bifoa eena hischri!

• Weh mi hapm tu di chroot fahn di Baibl afta Jeezas mi ded?

• Weh mi help wi fi get bak di chroot weh deh eena di Baibl?

Fi yaaz, Jehoava Witnisiz mi-di yooz, print, ahn giv owt difrent verzhanz a di Baibl. Bot wi mi riyalaiz dat wi need wahn nyoo chranslayshan weh ku help peepl andastan “di chroot,” bikaaz dis da di wil a Gaad fi evribadi. (1 Timoti 2:3, 4) Soh, eena 1950 wi mi poblish di fos sekshan a fi wee Baibl, di New World Translation. Di chranslayshan a dis Baibl faytful ahn chroo tu di orijinal manyuskrip. Wi chranslayt it how peepl taak nowadayz, eena moa dan 130 difrent langwij.

Wi mi need wahn Baibl weh eezi fi andastan. Bikaaz langwij chaynj oava taim, lata chranslayshan gat een werdz weh haad fi andastan er weh wi noh yooz nohmoh. Fi ad tu dat, peepl mi fain oalda manyuskrip a di Baibl weh moa karek ahn stik kloasa tu di orijinal kapiz. Dis mi help dehn fi ga wahn beta andastandin a di Heebroo, Aramayik, ahn Greek langwij weh di Baibl mi fos rait eena.

Wi mi need wahn chranslayshan weh faytful tu di werd a Gaad. Peepl hoo chranslayt di Baibl need fi bee faytful tu di orijinal raitin dehn insteda du dehn oan ting. Bot eena moas verzhanz a di Baibl, dehn tek owt di divain naym, Jehoava.

Wi mi need wahn Baibl weh aana Jehoava naym. (2 Timoti 3:16) Di naym Jehoava deh eena di oaldis Baibl manyuskrip bowt 7,000 taim, soh di New World Translation put bak fi hihn naym weh ih mi sopoas tu deh. Yu ku si wahn egzampl a dis da di batam a dis payj. (Psalm 83:18) Afta yaaz a haad werk ahn risaach, wi ku si di rizolt eena dis Baibl; ih reeli bring owt weh Gaad tink. Yu wahn laik reed dis Baibl. Weda yu ga di New World Translation eena yu langwij er nat, wi inkorij yu fi mek it wahn habit fi reed di Baibl evriday.​—Joshua 1:8; Psalm 1:2, 3.

• Wai wi mi disaid dat wi mi need wahn nyoo chranslayshan a di Baibl?

• Weh gud habit wi shuda ga evriday if wi waahn laan wat da di wil a Gaad?