Di elda dehn eena wi aaganaizayshan noh geh pay. Jos laik wen di Kristyan kangrigayshan mi fos staat op, wahn oavaseeya hafu kwalifai bifoa ih kud “shepad oava di kangrigayshan a Gaad.” (Aks 20:28, NW) Dehnya elda ga lata ekspeeryens ahn wahn schrang rilayshanship wid Gaad. Dis help dehn fi shepad ‘di sheep wilin-wan laik weh Gaad waahn dehn du, ahn noh bikaaz dehn haftu. Dehn du di werk bikaaz dehn reeli waahn serv, noh fi moni.’ (1 Peeta 5:1-3) Weh werk dehn du fi wi eena di kangrigayshan?

Dehn tek kayr a wi ahn protek wi. Di elda dehn gaid ahn protek di kangrigayshan eena wahn spirichwal way. Dehn noa dat Gaad gi dehn dis impoatant werk fi du, soh dehn noh baas op fi hihn peepl, insteda dat, di elda dehn werk tugeda wid wi fi mek aala wi feel hapi. (2 Korintyanz 1:24) Jos laik how wahn shepad werk haad fi tek kayr a eech wan a ih sheep dehn, di elda dehn chrai geh fi noa eech memba a di kangrigayshan.​—Proverbs 27:23.

Dehn teech wi how fi du di wil a Gaad. Evri week, di elda dehn tek di leed eena di kangrigayshan meetin dehn fi schrentn wi fayt. (Aks 15:32) Dehnya bradaz werk haad ahn tek di leed eena di preechin werk. Dehn werk lang wid wi ahn chrayn wi fi preech eena difrent wayz.

Dehn inkorij eech wahn a wi. Fi help schrentn wi rilayshanship wid Gaad, di elda dehn vizit wi da wi hows er dehn meet wid wi da di Kingdom Haal. Di perpos a dis vizit da fi help wi ahn gi wi komfert fahn di Skripchaz.​—Jaymz 5:14, 15.

Apaat fahn aal weh dehn ga fi du eena di kangrigayshan, wahn lata di elda dehn hafu werk ahn tek kayr a dehn famili. Wi shuda gi dehnya bradaz wahn lata rispek.​—1 Tesaloanyanz 5:12, 13.

• Weh di elda dehn du eena di kangrigayshan?

• How di elda dehn shoa dat dehn kay bowt wi?

Di Baibl taak bowt too groop a man weh tek kayr a di kangrigayshan. Jehoava Witnisiz kaal dehn ‘oavaseeya ahn ministeeryal servant.’ (Filipiyanz 1:1, NW) Yoozhwali, yu wahn fain dehnya bradaz eena evri kangrigayshan. Wat aal di ministeeryal servant dehn du fi help owt?

Dehn help di elda dehn. Di ministeeryal servant dehn ga wahn gud rilayshanship wid Jehoava. Dehn rispansabl ahn di elda dehn kud pen pahn dehn. Som a dehn yong, ahn som a dehn oalda. Dehn du werk fi kip di kangrigayshan aaganaiz. Dis gi di elda dehn moa taim fi foakos pahn di teechin ahn shepadin a di kangrigayshan.

Dehn help di kangrigayshan. Di elda dehn yooz som a dehn fi welkom evribadi weh kohn da di meetin dehn. Adaz tek kayr a di song sistem, giv owt lichricha, er tek kayr a di akonks. Ahn wen wi need wahn ayrya fi goh preech, dehn shoa wi wehpaat fi goh. Dehn help tek kayr a di Kingdom Haal tu. Sohntaim di elda dehn aks dehn fi help owt di oalda wanz eena di kangrigayshan. Noh mata weh di elda dehn gi di ministeeryal servant dehn fi du eena di kangrigayshan, dehn aalwayz wilin fi du it. Dis mek wi ga lata rispek fi dehn.​—1 Timoti 3:13.

Dehn set wahn gud egzampl. Da bikaaz a dehn Kristyan kwalitiz, dehn ku serv az wahn ministeeryal servant. Wen dehn gi wahn paat pahn di meetin, dehn bil op wi fayt. Dehn set wahn gud egzampl di preech ahn dehn inkorij wi fi du moa. Bikaaz dehn werk lang wid di elda dehn, dehn inkorij wi fi bee hapi ahn fi werk lang wid wan anada tu. (Ifeezhanz 4:16) Ahn wen dehn kwalifai, dehn ku serv az wahn elda.

• How yu wuda diskraib wahn ministeeryal servant?

• How di ministeeryal servant dehn help owt eena di kangrigayshan?

Di Baibl taak bowt Paal ahn Baanabas wahn lat. Dehn da-mi sohn oavaseeya weh yoostu goh rong di vizit di difrent kangrigayshan. Da wai dehn mi du dis? Dehn mi reeli kansaan bowt how dehn spirichwal bradaz mi-di du. Paal mi seh dat ih waahn ‘goh bak ahn si di bileeva dehn’ fi si how dehn mi-di du. Ih mi wilin fi chravl honjridz a mailz soh dat ih ku schrentn dehn. (Aks 15:36) Dat da egzakli weh wi serkit oavaseeya dehn waahn du tudeh.

Dehn kohn fi inkorij wi. Eech serkit oavaseeya vizit bowt 20 kangrigayshan too taimz fi di yaa. Dehn spen wan week wid eech kangrigayshan. Wi ku benifit wahn lat fahn dehnya bradaz. An if dehn marid, wi ku benifit fahn di ekspeeryens weh dehn waif gat tu. Dehn chrai geh fi noa evribadi eena di kangrigayshan. Dehn waahn goh wid wi pahn feel servis ahn pahn wi Baibl stodi dehn. Di serkit oavaseeya goh du shepadin vizit lang wid di elda dehn. Di taak dehn weh di serkit oavaseeya gi da di meetin an asembli dehn reeli inkorij ahn schrentn wi.​—Aks 15:35.

Dehn shoa dat dehn kay bowt aala wi. Di serkit oavaseeya dehn reeli kansaan bowt di spirichwal kandishan a di kangrigayshan dehn. Dehn meet lang wid di elda ahn ministeeryal servant dehn fi goh oava how di kangrigayshan di du, ahn den gi dehn advais pahn how fi tek kayr a dehn rispansabiliti beta. Dehn help di painyaa dehn fi du beta eena di minischri. Ahn dehn waahn geh fi noa nyoo membaz a di kangrigayshan ahn hyaa how dehn di du. Eech wan a dehnya bradaz ‘werk haad’ fi help wi. (2 Korintyanz 8:23) Wi shuda fala fi dehn egzampl a fayt ahn lov fi Gaad.​—Heebrooz 13:7.

• Wai di serkit oavaseeya dehn vizit di kangrigayshan dehn?

• How yu wahn benifit fahn fi dehn vizit?

Wen wahn dizaasta hapm, Jehoava Witnisiz noh ways no taim fi staat aaganaiz help fi dehn bradaz. Wen wi du dis, wi di shoa dat wi reeli lov wan anada. (Jan 13:34, 35; 1 Jan 3:17, 18) How wee help owt?

Wi sen moni. Wen wahn big staavayshan mi hapm da Judeeya, di Kristyanz bak den da Antiyak mi sen moni fi help owt dehn spirichwal bradaz. (Aks 11:27-30) Sayhn way, wen wi hyaa dat wi bradaz di fays haad taimz tudeh, wi sen doanayshan fi dehn chroo di kangrigayshan soh dat dehn ku bai weh dehn reeli need.​—2 Korintyanz 8:13-15.

Wi goh help da di dizaasta ayrya. Di eldaz weh deh wehpaat di dizaasta hapm chrai fain eech memba a di kangrigayshan fi mek shoar dehn sayf. Wahn rileef komiti aaganaiz food, kleen waata fi jrink, ahn medisn. Dehn mek shoar dat di bradaz ga kloaz fi wayr ahn wahn plays fi stay. Lata Witnisiz weh ga di skilz dehn need, pay dehn oan way fi goh help owt. Dehn bil op er fiks op bak wi bradaz hows, ahn eni Kingdom Haal weh di dizaasta mi damij. Bikaaz wi ga wahn lata ekspeeryens di werk wid wan anada, ahn bikaaz a di yooniti weh wi ga az wahn aaganaizayshan, wi moov kwik-wan fi help owt wi bradaz. Eevn doa wi help owt “wi oan bradaz ahn sistaz” fos, wi help peepl fahn ada rilijan tu wen wi kud.​—Galayshanz 6:10.

Wi aafa komfert fahn di Baibl ahn dehdeh fi sopoat dehn. Peepl weh jos fays wahn dizaasta reeli need komfert. Da eena taimz laik dehnya wi geh schrent fahn Jehoava, “di Gaad weh gi wi aal di komfert weh wi need.”(2 Korintyanz 1:3, 4) Wi hapi fi shayr weh di Baibl pramis wid dehn wan weh feel laik no hoap deh. Wi shoa dehn di pramis fahn di Baibl dat soon di Kingdom a Gaad wahn en aala di prablem dehn weh di kaaz payn ahn sofarin.​—Revilayshan 21:4.

• Wai Jehoava Witnisiz ku moov kwik-wan wen wahn dizaasta hapm?

• Weh kaina spirichwal komfert wi ku shayr wid peepl weh jos servaiv wahn dizaasta?

Jos bifoa Jeezas mi ded, ih mi ga wahn praivit kanvasayshan wid foa a ih disaipl dehn, Peeta, Jaymz, Jan ahn Anjru. Wen ih mi-di taak bowt di sain a fi hihn prezens eena dehnya laas dayz, ih mi aks dehn wahn kweschan tu. Ih aks dehn seh, ‘Soh da hoo da di servant weh waiz, weh ih baas ku pen pan [“faytful ahn diskreet slayv,” NW]?’ Di ansa tu dis kweschan impoatant kaa Jeezas seh dat da dis servant ih “wahn put in chaaj a aala di servant dehn eena ih hows” mek dehn geh dehn “food tu taim.” (Machyu 24:3, 45; Maak 13:3, 4) Soh den, Jeezas, az dehn “maasta,” mi wahn apoint wahn groop a man weh wahn aalwayz gi fi hihn falowaz dehn spirichwal food eena di taim a di en. Hoo da dis servant, er slayv?

Dehn da wahn smaal groop a Jeezas anointid falowaz. Di “slayv” da wahn smaal groop a anointid bradaz weh mek op di Govanin Badi a Jehoava Witnisiz. Dehn di gi spirichwal food da di karek taim tu evribadi weh wership Jehoava lang wid dehn. Wi pen pahn di faytful slayv fi aalwayz gi wi wi “food tu taim.”​—Look 12:42.

Dehn tek kayr a di famili a Gaad. (1 Timoti 3:15) Jeezas mi gi di slayv di impoatant rispansabiliti fi tek kayr a di paat a Jehoava aaganaizayshan weh deh pahn di ert. Dis meen dehn fi luk afta aala ih mateeryal bilanginz, dairek di preechin werk, ahn teech wi chroo di kangrigayshan. Soh fi mek wi ga weh wi need tu taim, “di faytful ahn diskreet slayv” di gi wi spirichwal food chroo di poblikayshan dehn weh wi yooz eena di minischri, ahn chroo di meetin an asembli dehn.

Di slayv faytful tu di chroot dehn weh deh eena di Baibl ahn di koman fi goh preech di gud nyooz. Dehn diskreet, er waiz wid how dehn tek kayr a evriting weh da fi Krais pahn di ert. (Aks 10:42) Jehoava di jraa moa ahn moa peepl fi bee fi hihn Witnisiz an ih di help di faytful slayv fi gi wi lata spirichwal food.​—Isaiah 60:22; 65:13.

• Da hoo Jeezas mi apoint fi gi ih disaipl dehn spirichwal food tu taim?

• How di slayv faytful ahn diskreet?

Afta Jeezas mi ded, “di apasl dehn ahn di elda dehn” da Jeroosalem mi serv az di govanin badi. Dehn mi rispansabl fi mek impoatant disizhan fi di Kristyan kangrigayshan. (Aks 15:2) Bifoa dehn mek wahn disizhan weh aala dehn ku gree pan, dehn si weh di Skripchaz di seh, ahn mek Gaad spirit gaid dehn. (Aks 15:25) Di Govanin Badi di du di sayhn ting tudeh.

Gaad yooz di Govanin Badi fi du fi hihn wil. Di anointid bradaz weh da paat a di Govanin Badi reeli lov di Werd a Gaad, ahn ga lata ekspeeryens di mek disizhanz bowt di preechin werk ahn ada spirichwal tingz. Dehn meet eech week fi si weh di aaganaizayshan need. Jos laik eena di dayz a di apasl dehn, wi geh inschrokshanz chroo leta er wen di oavaseeya ahn adaz goh rong ahn vizit di kangrigayshan dehn. Dis help Gaad peepl fi tink an ak di saym way. (Aks 16:4, 5) Di Govanin Badi soopavaiz aala di spirichwal food weh wi geh ahn di apointment a difrent bradaz weh ga rispansabiliti eena di aaganaizayshan. Ahn dehn inkorij aala wi fi put di preechin werk fos eena wi laif.

Di Govanin Badi pen pahn Gaad spirit fi gaidans. Jehoava da di Sovrin a di Yoonivers, ahn Jeezas da di Hed a di kangrigayshan. Di Govanin Badi luk tu dehn fi gaidans. (1 Korintyanz 11:3; Ifeezhanz 5:23) Dehn noh tink dat dehn da fi wee leedaz. Dehn, ahn di res a anointid Kristyanz, “fala di Lam [Jeezas] eniway weh ih goh.” (Revilayshan 14:4) Di Govanin Badi reeli apreeshiayt it wen wi pray fi dehn ahn fi aal weh dehn di du.

• Hoo mi mek op di govanin badi eena di dayz a di apasl dehn?

• How di Govanin Badi tudeh luk tu Gaad fi gaidans?

Betel da wahn Heebroo naym weh meen “Hows a Gaad.” (Genesis 28:17, 19, futnoat) Dis da di bes naym fi aala di bildin dehn weh Jehoava Witnisiz ga rong di werl. Fahn Betel dehn dairek ahn sopoat di preechin werk. Di Govanin Badi serv da di werl hedkwaataz da New York, U.S.A., ahn fahn deh dehn soopavaiz aala di werk weh di ada branch aafis dehn di du eena ada konchri. Dehn kaal di groop a bradaz weh serv deh di Betel famili. Jos laik wahn famili, dehn liv, werk, eet, ahn stodi di Baibl tugeda.​—1 Peeta 3:8.

Da wahn speshal plays weh evribadi gi dehn bes. Da di Betel dehn, bradaz ahn sistaz di yooz aala dehn taim fi du di wil a Gaad ahn fi put di Kingdom fos eena dehn laif. (Machyu 6:33) Non a dehn geh pay, bot evribadi geh wahn plays fi stay, food fi eet, ahn wahn lee chaynj fi bai persnal tingz. Evribadi da Betel geh wahn asainment; ih mait bee eena wahn aafis, wahn kichin, er wahn dainin room. Som werk weh dehn print di lichricha er weh dehn bain di buk dehn. Adaz du kleenin, laanjri, mantayn di prapati, er ada tingz.

Da wahn bizi plays weh sopoat di preechin werk bowt di Kingdom. Di mayn goal da eech Betel da fi mek spirichwal food deh fi evribadi. Dis broashoar da wahn egzampl a dat, ahn di Govanin Badi mek shoar dat weh deh een ya karek. Dehn yooz kompyoota fi sen di infamayshan tu honjridz a chranslayshan teem weh deh rong di werl. Den da di Betel dehn weh ga wahn printin fakchri, dehn yooz sohn printin masheen weh onli faas fi print dis broashoar, ahn dehn ship dehn tu moa dan 115,000 kangrigayshan. Evri step lang di way, di Betel famili sopoat di moas impoatant werk, weh da di preechin a di gud nyooz.​—Maak 13:10.

• Hoo serv da Betel, ahn weh di aaganaizayshan provaid fi dehn?

• Weh impoatant werk eech memba a di Betel famili sopoat?

Bradaz ahn sistaz weh werk da Betel serv eena lata dipaatment. Di werk weh dehn du da fi sopoat di preechin werk da di konchri dehn weh deh anda da branch aafis. Dehn mait serv pahn wahn chranslayshan teem, print magazeen, bain buk, er werk eena wahn plays weh dehn stak op lichricha. Som a dehn werk eena di aadyo ahn veedyo dipaatment, er tek kayr a ada tingz weh kansaan di konchri dehn weh deh anda da branch aafis.

Wahn Branch Komiti soopavaiz di werk. Di Govanin Badi chooz wahn Branch Komiti fi soopavaiz di werk da di branch aafis dehn. Da yoozhwali chree er moa bradaz deh pahn dis komiti, ahn dehnya elda ga lata ekspeeryens. Dehn kip di Govanin Badi op-tu-dayt wid weh di goh aan eena di konchri dehn weh dehn di luk afta, ahn mek dehn noa if dehn ga eni prablem weh dehn need help wid. Dehnya ripoat help di Govanin Badi fi disaid weh kaina tapik fi rait bowt eena wi poblikayshan dehn, er weh wahn bee di tapik a di meetin an asembli dehn. Di Govanin Badi sen wahn brada fahn di hedkwaataz fi vizit eech branch aafis. Dis brada gi di Branch Komiti gaidans weh wahn help dehn fi handl dehn asainment beta. (Proverbs 11:14) Di komiti araynj wahn speshal proagram weh inklood wahn taak fahn di brada weh di vizit. Aala di Witnisiz fahn di konchri dehn weh deh anda da branch aafis ku hyaa ih taak ahn benifit fan it.

Dehn sopoat di kangrigayshan dehn. Sohn rispansabl bradaz da di branch aafis aproov eni nyoo kangrigayshan. Ada bradaz dairek di werk weh aala di painyaa, mishineri, ahn serkit oavaseeya dehn du eena di difrent konchri weh deh anda fi dehn branch aafis. Dehn aaganaiz di asembli ahn kanvenshan dehn. Dehn mek araynjment fi bil nyoo Kingdom Haal, ahn mek shoar dat lichricha ship owt tu aala di kangrigayshan soh dat di bradaz ku ga weh dehn need. Evriting weh wahn branch aafis du da soh dat di preechin werk hapm eena wahn aadali way.​—1 Korintyanz 14:33, 40.

• How di Branch Komiti dehn help di Govanin Badi?

• Weh kaina werk dehn du da wahn branch aafis?

Fi help wi du wi bes fi shayr di “Gud Nyooz tu di peepl a aal di difrent nayshan dehn, aal di chraib dehn, ahn tu aal di peepl weh taak di difrent langwij dehn,” wi chranslayt wi lichricha eena moa dan 750 difrent langwij. (Revilayshan 14:6) How wi du dis? Wi du dis werk wid di help a wi bradaz ahn sistaz fahn aal oava di werl.

Dehn pripyaa di infamayshan eena Inglish fos. Di Govanin Badi soopavaiz weh di Raitin Dipaatment du da di werl hedkwaataz. Dis dipaatment aaganaiz di werk fi di bradaz weh rait di infamayshan da di hedkwaataz ahn da sohn ada branch aafis. Bikaaz di bradaz weh rait da fahn difrent konchri ahn bakgrong, dehn ku rait bowt difrent tapik, ahn peepl fahn aal oava di werl ku injai di reed it.

Dehn sen di infamayshan tu di chranslayta dehn. Afta dehn rivyoo an aproov di infamayshan, dehn yooz kompyoota fi sen it tu di difrent chranslayshan teem rong di werl. Wen dehn get it, dehn chranslayt it ahn mek shoar evriting karek. Dehn chrai pik di “karek werdz a chroot” weh wahn help dehn fi put it eena di way peepl fahn fi dehn langwij ku andastan.​—Ecclesiastes 12:10.

Dehn yooz kompyoota fi speed op di werk. Wahn kompyoota kyaahn rait ahn chranslayt laik wahn hyooman. Bot, wahn chranslayta werk kwika wid wahn kompyoota weh gat aan dikshineri, langwij toolz, ahn ada risaach mateeryal. Jehoava Witnisiz dizain wahn proagram weh naym MEPS (Multilanguage Electronic Publishing System). Wid dis proagram wi ku print poblikayshanz eena honjridz a langwij. Dis proagram ad een di chranslayshan dakyument lang wid di picha dehn an araynj it, ahn den ih get it redi fi print da di fakchri.

Wai wi goh chroo aala dis werk fi chranslayt wi poblikayshan dehn eena soh moch langwij? Bikaaz da di wil a Jehoava fi ‘sayv aal peepl ahn ih waahn dehn fi noa di chroot.’​—1 Timoti 2:3, 4.

• Weh aal wi du fi chranslayt wi poblikayshan dehn?

• Wai wi chranslayt wi lichricha dehn eena soh moch langwij?

Wi aaganaizayshan poblish ahn giv owt milyanz a Baibl ahn ada poblikayshan evri yaa ahn noh chaaj fi it. Wi bil ahn mantayn wi Kingdom Haal ahn branch aafis dehn rong di werl. Wi sopoat towznz a Betelait ahn mishineri, ahn help owt wen wahn dizaasta hapm. Weh aala di moni kohn fram fi du dis?

Wi noh chaaj fi notn ahn noh tek op kalekshan. Eevn doa ih kaas wahn lat fi du wi preechin werk, wi noh bayg fi moni. Di Watchtower fahn Aagas 1879 seh dat da Jehoava di sopoat wi, ahn dat wi “wahn neva bayg man fi moni er fi dehn sopoat.” Ahn dat da chroo—wi neva yet bayg enibadi!​—Machyu 10:8.

Wi sopoat wi werk wid valanteri doanayshan. Lata peepl apreeshiayt di Baibl werk weh wi du ahn dehn doanayt tuwaadz it. Wi hapi fi gi wi taim, enerji, moni, ahn ada tingz fi du di wil a Gaad aal oava di werl. (1 Chronicles 29:9) Wi ga sohn kanchribyooshan baks da aala wi Kingdom Haal, asembli ahn kanvenshan fi enibadi weh waahn gi wahn lee doanayshan, er dehn ku mek wahn doanayshan pahn wi websait, jw.org. Moas a di moni weh wi geh da fahn peepl weh noh rich. Dehn da jos laik di wido weh Jeezas mi taak bowt. Eevn doa shee mi poa, ih mi giv ih lee moni fahn wahn wilin haat. (Look 21:1-4) Soh, enibadi ku “put sohn moni wan said” ahn “mek op dehn oan main az tu humoch dehn wahn giv.”​—1 Korintyanz 16:2; 2 Korintyanz 9:7.

Wi noa fi shoar dat Jehoava wahn kantinyu fi toch di haat a dehn wan weh waahn ‘aana hihn wid dehn tingz weh ga valyu.’ Da way deh, dehn ku sopoat di werk a di Kingdom ahn du di wil a Gaad.​—Proverbs 3: 9.

• Weh mek wi aaganaizayshan soh difrent fahn ada rilijan?

• How wi yooz di doanayshan dehn weh wi get?

Wi kaal di plays weh wi wership Jehoava Kingdom Haal. Dis da bikaaz wen Jeezas mi deh pahn di ert, ih mayn teechin da-mi bowt di Kingdom a Gaad. Soh, jos laik hihn, di mayn ting weh wi taak bowt da wi Kingdom Haal da di Kingdom a Gaad.​—Look 8:1.

Dehn da plays fi chroo wership eena wi kamyooniti. Fahn  dehsoh, wi aaganaiz di preechin werk. (Machyu 24:14) Aala wi Kingdom Haal noh luk di saym, bot aala dehn da sohn deesent bildin. Sohntaim, moa dan wan kangrigayshan yooz wahn Kingdom Haal. Oava di paas kopl a yaaz wi bil towznz a nyoo Kingdom Haal, bowt faiv fi di day, soh dat wi ku kip op wid how di kangrigayshan dehn di groa. How wi du dis?​—Machyu 19:26.

Wi bil dehn wid doanayshan weh wi get. Wi sen doanayshan da di branch aafis soh dat wen dehn need fi bil er fiks op wahn Kingdom Haal, dehn ku yooz da moni fi dat.

Bradaz valantyaa dehn taim fi bil Kingdom Haal. Eena wahn lata konchri, dehn aaganaiz sohn Kingdom Haal Kanschrokshan Groop. Dehnya groop moov fahn kangrigayshan tu kangrigayshan fi help owt. Dehn wilin fi goh eniway eena di konchri weh dehn need wahn Kingdom Haal. Eena ada konchri, di branch aafis asain difrent bradaz wid lata ekspeeryens fi soopavaiz di bildin ahn mantaynans a di Kingdom Haal dehn eena wahn sertn ayrya. Eevn doa wahn lata bradaz wid skilz valantyaa dehn taim, da di Witnisiz weh liv eena da ayrya du moas a di werk. Aala dis pasabl bikaaz a Jehoava spirit ahn bikaaz di bradaz chrai dehn bes fi du dis werk.​—Psalm 127:1; Koloashanz 3:23.

• Wai wi kaal di plays weh wi wership Jehoava Kingdom Haal?

• How ih pasabl fi wi bil Kingdom Haal aal oava di werl?

Wi wership Jehoava da di Kingdom Haal dehn. Soh wi feel dat da wahn privilij ahn wahn impoatant paat a wi wership fi kip di bildin kleen, prizentabl, an eena gud shayp. Evribadi ku tek paat eena di kleenin if dehn waahn.

Wi ku help owt wid di kleenin afta di meetin. Afta eech meetin, wi tek wahn lee taim fi kleen wi Kingdom Haal, ahn wans a week wi du wahn moa jenaral kleen op. Wahn elda er ministeeryal servant araynj di werk, ahn dehn yoozhwali ga wahn lis a tingz fi du. Som a wi sweep er map di floa, dos dong, er schraytn di chyaa dehn. Adaz ku kleen di baachroom dehn, er kleen di windo ahn miro dehn, er chroh-weh di gyaabij, er kleen di owtsaid a di bildin ahn di yaad. Wans a yaa wi ga wahn big werk day. Wi kehr wi pikni dehn wid wi fi kleen di Kingdom Haal soh dat dehn ku laan fi rispek Jehoava hows.​—Ecclesiastes 5:1.

Wi ku help owt wen eniting need fi fiks. Evri yaa, sohn bradaz inspek di eensaid ahn owtsaid a di Kingdom Haal gud. Bays pahn weh dehn fain, dehn set op wahn skejul fi mantayn di bildin, ahn dis help wi fi sayv moni eena di langa ron. (2 Chronicles 24:13; 34:10) Wahn Kingdom Haal weh kleen ahn eena gud shayp da wahn rispektabl plays fi wership Gaad. Wen eech wan a wi du wi paat, wi di shoa how wi reeli feel bowt Jehoava ahn di plays wehpaa wi wership. (Psalm 122:1) Da wahn gud witnis tu di peepl dehn weh liv eena di ayrya tu.​—2 Korintyanz 6:3.

• Wai wi noh waahn niglek di kleenin a wi Kingdom Haal?

• Weh aal di bradaz du fi kip di Kingdom Haal kleen?

Yu wuda waahn du sohn risaach fi mek yu ga moa nalij a di Baibl? Yu eva wanda bowt wahn skripcha, persn, plays, er ting weh di Baibl taak bowt? Er yu wuda waahn noa if di Baibl ku help yu wid wahn prablem? Den di laibri da di Kingdom Haal ku help yu.

Ih ga buk ahn ada tingz fi help yu du risaach. Af koars, yu noh mait ga aala di poblikayshan dehn fahn Jehoava Witnisiz eena yu langwij. Bot di laibri weh deh da di Kingdom Haal ga moas a di laytes poblikayshan dehn. Ih mait ga sohn ada Baibl chranslayshan, wahn gud dikshineri, ahn sohn ada buk fi help yu du risaach. Yu ku yooz di laibri eeda bifoa di meetin er afta di meetin. If wahn kompyoota dehdeh, ih mait gat aan Watchtower Library pan it. Dis da wahn proagram weh gat een moas a wi poblikayshan dehn. Ih eezi fi yooz. Yu ku saach bai tapik, bai werd, er bai skripcha.

Ih ku help di styoodent dehn pahn di Laif ahn Minischri Meetin. Wen yu di pripyaa yu asainment fi di meetin, yu mait fain dat di laibri da di Kingdom Haal ga infamayshan weh yu ku yooz. Di Laif ahn Minischri Meetin oavaseeya tek kayr a di laibri. Ih mek shoar dat di laytes poblikayshan dehn dehdeh ahn dat di laibri luk neet. Hihn er di persn weh stodi di Baibl wid yu ku shoa yu how fi fain di infamayshan weh yu wahn need. Pleez noh kehr dehnya buk owta di Kingdom Haal. Sins evribadi yooz dehn, wi wuda waahn yu tek kayr a dehn ahn noh rait eena dehn.

Di Baibl tel wi dat fi “fain di nalij a Gaad,” wi haftu wilin fi saach fi it “laik fi sohn chrezha weh dehn haid weh.” (Proverbs 2:1-5) Wel, yu ku bigin yu saach da di Kingdom Haal laibri.

• Weh aal deh da di Kingdom Haal laibri fi help yu du risaach?

• Hoo ku help yu yooz di laibri?

Jeezas Krais mi tel ih falowaz: “Shain yu lait fronta evribadi, soh dehn ku si di gud ting dehn weh yu du, ahn prayz yu Faada eena hevn.” (Machyu 5:16) Di laytes teknalaji ahn di Intanet di help wi fi du dis. Wi websait, jw.org, da di ofishal sait onlain fi geh infamayshan bowt weh wi bileev ahn weh wi du. Weh aal deh pan it?

Di ansa fahn di Baibl tu sohn impoatant kweschan weh peepl aks. Fi egzampl, yu ku fain dehnya chrak eena moa dan 600 difrent langwij onlain: Yu Tink Sofarin Wahn Eva En? ahn Di Ded—Yu Tink Dehn Kud Liv Agen? Di New World Translation deh pahn di websait eena moa dan 130 difrent langwij. Apaat fahn dat yu wahn fain sohn ada buk fi stodi di Baibl, laik What Does the Bible Really Teach? ahn di laytes kapi a The Watchtower an Awake! magazeen tu. Yu ku reed lata wi poblikayshan dehn onlain, er lisn tu di aadyo rikaadn, er dongload di MP3, PDF, er EPUB faamat. Er yu ku eevn print aaf sohnting fi shayr wid sombadi eena ih oan langwij! Yu wahn fain veedyo poblikayshanz eena lata sain langwij. Er yu ku dongload sohn jramatik Baibl reedin, Baibl jrama, ahn sohn byootiful myoozik fi lisn tu.

Di chroot bowt Jehoava Witnisiz. Yu ku fain di laytes nyooz ahn veedyo bowt di werk weh wi du aal oava di werl ahn ada tingz weh di afek Jehoava Witnisiz. Yu ku reed bowt how wi help owt wan anada wen wahn dizaasta hapm. Yu ku fain infamayshan bowt wi kanvenshan dehn evri yaa ahn di ajres a di branch aafis dehn weh deh aal oava di werl.

Dehnya tingz help wi fi shain di lait a chroot eevn eena sohn plays weh ih haad fi get tu. Peepl aal oava di werl di benifit fahn di gud nyooz, eevn eena sohn plays weh faar faar ahn koal, laik Antarctica. Wi pray dat “di Laad mesij wahn spred aal oava faas-wan,” soh dat wi ku gi Gaad gloari.​—2 Tesaloanyanz 3:1.

• How wi ofishal websait, jw.org, di help moa peepl laan di chroot fahn di Baibl?

• Weh yu wuda waahn luk fa pahn wi websait?