Wahn lata peepl stap goh da dehn cherch bikaaz dehn noh fain di spirichwal gaidans ahn komfert weh dehn di luk fa. Soh den, wai yu shuda goh da di Kristyan meetin dehn weh Jehoava Witnisiz ga? Weh yu wahn fain deh?

Yu wahn ekspeeryens lov, kyaa, ahn hapinis. Eena di dayz a di apasl dehn, di Kristyan dehn mi aaganaiz bai kangrigayshan. Dehn yoostu ga meetin fi wership Gaad, fi stodi di Skripcha dehn, ahn fi inkorij wan anada. (Heebrooz 10:24, 25) Bikaaz dehn mi deh rong peepl weh lov wan anada, dehn mi feel laik dehn deh monks chroo frenz—dehn spirichwal bradaz ahn sistaz. (2 Tesaloanyanz 1:3; 3 Jan 14) Wi fala da saym patan tudeh ahn ekspeeryens da saym lov, kyaa, ahn hapinis.

Yu wahn benifit wen yu laan how fi aplai Baibl prinsipl. Di saym way how di Baibl mi seh dat man, uman, ahn pikni yoostu meet tugeda fi wership, tudeh wi du di saym ting. Dehn wan weh kwalifai fi teech help wi laan how fi aplai Baibl prinsipl eena wi evriday laif. (Deuteronomy 31:12; Nehemiah 8:8) Evribadi ku tek paat wen wi ga wahn diskoshan ahn wen wi sing. Dis gi wi wahn apachooniti fi shoa how wi feel bowt wi Kristyan hoap.​—Heebrooz 10:23.

Yu fayt eena Gaad wahn geh schranga, ahn dis da wahn blesin. Di apasl Paal mi tel wan a di kangrigayshan dehn eena fi hihn taim dat ih ‘lang fi si dehn’ soh dat dehn kuda ‘bil op wan anada.’ Dis wuda bee wahn blesin kaa dehn wuda geh schranga wen dehn si wan anada fayt eena Gaad. (Roamanz 1:11, 12, Di Jamiekan Nyuu Testiment) Wen wi aalwayz deh rong wi bradaz ahn sistaz da wi meetin dehn, wi fayt ahn korij fi liv az wahn Kristyan geh schranga.

If yu waahn ekspeeryens dehnya ting fi yuself, pleez kohn lang wid wi da wi neks kangrigayshan meetin. Wi wahn gi yu wahn waam welkom. Wi noh chaaj notn fi kom een, ahn wi noh tek op kalekshan.

• Weh patan wi kangrigayshan meetin dehn bays pan tudeh?

• How wi wahn benifit if wi goh da di meetin dehn?

Eevn if wi haftu waak chroo tik bush, fays bad weda, er chrai kech wahn raid, wi noh mek notn stap wi fahn goh da wi Kristyan meetin dehn. Aala wi ga wi oan prablemz eena laif ahn feel taiyad afta di werk haad aal day, bot wi stil chrai haad fi deh da wi meetin wid wi bradaz ahn sistaz. Wai wi du dis?

Wi wahn feel hapi. Wen di apasl Paal mi seh fi “inkorij wan anada,” ih mi-di taak bowt wi bradaz ahn sistaz eena di kangrigayshan. (Heebrooz 10:24) Dis meen dat wi wahn tink bowt wan anada ahn geh fi noa wi bradaz ahn sistaz beta. Wi wahn spen taim wid dehn ahn shoa dehn dat wi kay bowt dehn. Wen wi du dis, wi wahn fain owt dat som a dehn don gaan chroo di saym prablem dehn weh wee di goh chroo. Soh, dehn wahn ku help wi fi deel wid fi wee prablem dehn tu.

Wi wahn ga wahn kloas rilayshanship wid wi bradaz. Da wi meetin dehn, wi deh rong wi kloas frenz, noh jos peepl weh wi bayli noa. Bisaidz wi meetin dehn, wi spen taim tugeda di ga fon. Wen wi du dis, wi laan fi apreeshiayt wan anada moa, ahn dat mek wi lov geh schranga. Den, wen wi bradaz di fays wahn prablem, wi glad fi help dehn owt kaaz wi da gud frenz. (Jan 15:13) Soh, wen wi spen taim wid evribadi eena di kangrigayshan, wi di shoa dat wi waahn “get lang wid wan anada.”​—1 Korintyanz 12:25, 26.

Wi inkorij yu fi pik dehn wan weh di du di wil a Jehoava az yu fren dehn. Yu wahn fain dehn kaina frenz monks Jehoava Witnisiz. Pleez noh mek notn stap yu fahn spen taim wid wi.

• How wi benifit wen wi spen taim wid wi bradaz da di meetin dehn?

• Wen yoo wuda waahn geh fi noa evribadi eena fi wee kangrigayshan?

Eena di dayz a di apasl dehn, di Kristyan dehn yoostu sing, pray, reed, ahn diskos di Skripchaz da di meetin dehn. Dehn wership neva inklood no kaina richwal. (1 Korintyanz 14:26) Wi du di sayhn ting da wi meetin dehn tudeh. Wen yu kohn yu wahn see’t fi yuself.

Wi hyaa Baibl teechinz weh wi ku yooz eena wi laif. Pahn di weeken, eech kangrigayshan meet tugeda fi hyaa wahn Baibl taak weh da fi 30 minits. Dis taak shoa wi how wi ku yooz di Skripchaz eena wi persnal laif, ahn eena dehnya taimz weh wi di liv. Aala wi fala lang eena wi oan kapi a di Baibl. Afta di taak, wi ga di “Watchtower” Stodi, weh da fi wan owa. An enibadi ku gi wahn koment if dehn waahn. Dis diskoshan da fahn di stodi kapi a The Watchtower, an ih help wi fi si how di Baibl ku gaid wi eena wi laif. Jehoava Witnisiz deh eena moa dan 115,000 kangrigayshan aal oava di werl, ahn stilyet, aala wi stodi di saym infamayshan.

Wi laan how fi teech di Baibl beta. Joorin di week wi ga Wi Kristyan Laif ahn Minischri meetin weh divaid op eena chree paat. Di infamayshan fi dis meetin bays pahn di Laif ahn Minischri Meetin Werkbuk weh wi geh evri mont. Di fos paat a dis meetin, weh naym Chrezhaz Fahn di Werd a Gaad, help wi fi andastan wahn paat a di Baibl weh di kangrigayshan mi don reed heda taim. Di sekant paat, weh naym Werk Haad fi Du Beta Eena Feel Servis, gat een sohn demonschrayshan, er egzampl, a how wi ku diskos di Baibl wid ada peepl. Wahn brada wach ahn lisn gud tu di paat dehn weh eech wan a wi giv. Hihn wahn gi wi sohn kongsl ahn sojeshan pahn how wi ku du beta eena wi reedin ahn eena di way how wi taak tu peepl. (1 Timoti 4:13) Di laas paat, weh naym Liv Yu Laif az Wahn Kristyan, diskos how wi kud yooz Baibl prinsiplz eena wi evriday laif. Dis gat een wahn kweschan-ahn-ansa paat weh help wi fi ga wahn beta andastandin a di Baibl.

Wen yu kohn da wi meetin dehn, yu wahn laik di levl a Baibl ejukayshan weh yu wahn get deh.​—Jan 6:45.

• Weh yu wahn hyaa da wi meetin dehn?

• Wich wan a wi meetin dehn yu wuda waahn kohn tu?

Eena di picha dehn fi dis broashoar, yu wahn noatis dat Jehoava Witnisiz jres op fi goh da dehn kangrigayshan meetin. Wai wee pay soh moch atenshan tu weh wi wayr ahn how wi luk?

Fi shoa rispek fi wi Gaad. Da chroo dat Gaad noh foakos pahn weh wi luk laik pahn di owtsaid. (1 Peeta 3:4) Bot wen wi meet tugeda fi wership Gaad, wi waahn shoa rispek fi hihn ahn fi wi bradaz ahn sistaz. If wee mi hafu goh da koat ahn deh fronta wahn joj, wi wuda jres gud owta rispek fi di joj. Eena di sayhn way, how wi luk da di meetin dehn shoa humoch wi rispek “di chroo chroo Joj,” Jehoava Gaad, ahn di plays weh wi wership ahn. ​—Jaymz 4:12.

Fi shoa di prinsipl dehn weh wi liv bai. Di Baibl inkorij Kristyanz fi jres eena wahn “sensabl ahn deesent” way. (1 Timoti 2:9, 10) Wen wi jres eena wahn “sensabl” way, wi wahn pik kloaz weh luk gud, noh kloaz weh doti ahn weh shoa laik wi noh kay. Fi jres eena wahn “deesent” way meen dat wi noh wahn yooz kloaz weh wahn kaal atenshan tu wiself. Wi kloaz noh fi bee flashi, tait, er mek wi di shoa tu moch skin. Wen wi aplai dehnya prinsipl, evribadi ku stil jres eena wahn way weh dehn laik ahn stil luk gud. Wen wi jres eena wahn neet ahn prizentabl way wi noh eevn hafu seh notn. Wi wahn “jraa peepl” tu Jehoava, ahn ‘gi hihn aana.’ (Taitos 2:10; 1 Peeta 2:12) Soh bai di way how wi jres fi di meetin dehn, wi afek how ada peepl feel bowt di wership a Jehoava.

Noh mek yu kloaz bee di reezn wai yu noh kohn da di Kingdom Haal. Wi kloaz noh hafu bee ekspensiv er fansi. Dehn jos need fi bee kleen ahn prizentabl.

• Wai ih impoatant fi wi jres gud wen wi wership Gaad?

• Wat da sohn Baibl prinsipl weh ku help wi pik wat fi wayr ahn how fi luk?

If yu di stodi di Baibl wid wan a Jehoava Witnisiz, yu mosi chrai goh oava di infamayshan fi eech wan a yu stodi heda taim. Fi geh di moas owta di meetin dehn, yu shuda du di sayhn ting. Wi geh di bes rizolt wen wi ga sohn gud stodi habit.

Disaid wen ahn wehpaat yu waahn stodi. Wen da di bes taim yu ku foakos pahn weh yu di stodi? Erli da maanin, bifoa yu staat werk, er da nait wen di pikni dehn don gaahn sleep? Eevn if yu kyaahn stodi fi lang, mek op yu main humoch taim yu wahn yooz fi stodi ahn noh mek notn get eena yu way. Luk fi wahn plays weh kwaiyet. Ton aaf yu rayjo, TV, ahn sel foan soh dat dehn noh dischrak yu. Wen yu pray bifoa yu stodi, ih wahn help yu fi foakos pahn di Baibl, ahn noh pahn tingz weh yu di wori bowt.​—Filipiyanz 4:6, 7.

Maak di infamayshan, ahn pripyaa fi tek paat eena di meetin. Di fos ting fi du da fi chrai andastan di hoal lesn. Tink bowt di tapik a di lesn er di chapta, ahn kansida weh eech sobhedin ga fi du wid di tapik. Luk pahn di picha dehn gud, ahn goh oava di rivyoo kweschanz weh bring owt di mayn point dehn. Den reed eech paragraaf, ahn chrai fain di ansa tu di kweschan dehn. Luk op di skripchaz, ahn si how dehn help wi fi andastan di infamayshan. (Aks 17:11) Wen yu fain di ansa tu di kweschan dehn, andalain er maak di mayn werdz er frayz dehn eena di paragraaf weh wahn help yu fi rimemba di ansa. Den, wen yu deh da di meetin, yu ku put op yu han if yu waahn, ahn ansa eena yu oan werdz.

Wen yu pripyaa di paat dehn fi di meetin, yu wahn ad tu yu “stoaroom” a Baibl nalij.​—Machyu 13:51, 52.

• Wat da sohn stodi habit weh ku help yu pripyaa fi di meetin dehn?

• How yu ku pripyaa fi gi wahn koment da di meetin?

Fahn way bak, Jehoava mi aalwayz waahn eech famili spen taim tugeda fi schrentn dehn rilayshanship wid hihn, ahn wid wan anada. (Deuteronomy 6:6, 7) Dat da wai Jehoava Witnisiz ga wahn speshal taim weh dehn set wan said evri week fi wership tugeda az wahn famili. Da wahn taim wen evribadi ku rilaks ahn taak bowt spirichwal tingz weh kansaan di hoal famili. Eevn if yu liv bai yuself, yu ku stil spen dis taim fi wership Gaad ahn stodi difrent Baibl tapik.

Da wahn taim fi geh kloasa tu Jehoava. “Kohn kloas  tu Gaad, ahn hihn wahn kohn kloas tu yoo.” (Jaymz 4:8) Wen wi reed di Baibl ahn laan bowt Gaad wayz ahn weh aal ih du, wi geh fi noa hihn beta. Wahn eezi way fi bigin yu famili wership da fi reed di Baibl tugeda. If unu waahn, unu ku reed wahn paat a di Baibl reedin fahn di Laif ahn Minischri meetin skejul. Evribadi eena di famili ku tek tern fi reed, ahn den unu ku taak bowt weh unu mi laan fan it.

Da wahn taim fi geh kloasa tu wan anada. Wen wahn waif ahn hozban er payrents ahn dehn pikni stodi di Baibl tugeda, dehn schrentn dehn rilayshanship wid wan anada. Ih shuda bee wahn peesful ahn hapi taim weh evribadi ku luk faawod tu. Bays pahn di pikni dehn ayj, payrents ku pik wahn tapik fahn The Watchtower an Awake! er fahn wi websait, jw.org. ahn diskos it. Unu ku taak bowt wahn prablem weh unu pikni dehn di fays da skool ahn how dehn ku deel wid it. Er unu ku wach wahn proagram pahn JW Broadcasting (tv.jw.org) ahn taak bowt it aftawodz. Unu ku praktis di sang dehn weh wi wahn sing da di meetin, ahn ga sohn lee snaks wen unu don.

Dis speshal taim weh di famili spen evri week di wership Jehoava tugeda wahn help evribadi fi injai dehn stodi a di Baibl. Gaad wahn bles di haad werk weh yu famili di du.​—Jaymz 1:25.

• Wai wi set wahn taim wan said fi wi famili wership?

• Weh payrents ku du soh dat evribadi injai famili wership?

Wai dehnya peepl luk soh hapi? Dehn deh da wan a wi asembli dehn. Gaad mi tel ih peepl dehn eena di paas fi meet tugeda chree taimz fi di yaa. Jos laik dehn, wi luk faawod tu dehnya asembli. (Deuteronomy 16:16) Evri yaa, wi ga chree asembli: too wan-day serkit asembli ahn wahn chree-day reejinal kanvenshan. Da how wi benifit wen wi meet tugeda da wi asembli dehn?

Dehn schrentn wi Kristyan famili. Jos laik how di Izrelait dehn mi hapi fi prayz Jehoava da “di asembli dehn,” wi feel hapi fi wership hihn pahn dehnya okayzhan. (Psalm 26:12, futnoat; 111:1) Dehnya asembli gi wi wahn apachooniti fi meet ahn spen taim wid wi bradaz ahn sistaz fahn ada kangrigayshan, er fahn ada konchri. Afta di maanin seshan, wi stay rait deh ahn injai di food weh wi bring, ahn den wi stil ga taim fi goh rong ahn mek nyoo frenz. (Aks 2:42) Da wi asembli dehn, wi si fi wiself di lov weh bring wi tugeda az wahn Kristyan famili fahn aal oava di werl.​—1 Peeta 2:17.

Dehn help wi fi groa eena wahn spirichwal way. Wen di prees dehn mi yoostu eksplayn di Skripchaz tu di Izrelait dehn, di peepl mi “andastan di werdz” ahn mi benifit fan it. (Nehemiah 8:8, 12) Jos laik dat, wi apreeshiayt it wen wi geh fi andastan ahn benifit fahn Baibl teechin da wi asembli. Di proagram fi wi asembli dehn bays pahn wahn Skripcha fahn owta di Baibl. Aala di taak ahn demonschrayshan dehn help wi fi laan how fi du di wil a Gaad eena wi laif. Wen wi hyaa difrent ekspeeryens fahn wi bradaz, ahn wi si how dehn deel wid di chalenj fi liv az wahn Kristyan eena dehnya haad taimz, ih inkorij wi. Da wi kanvenshan dehn, di Baibl play weh ak owt pahn stayj reeli mek di Baibl stoari dehn moa reel tu wi, ahn wi laan tingz weh wi ku yooz eena wi evriday laif. Da wi asembli dehn, dehn wan weh don dedikayt dehn laif tu Gaad, ahn weh kwalifai, ku geh baptaiz.

• Wai wi hapi fi deh da wi asembli dehn?

• How yu tink yu wahn benifit if yu goh da wi asembli dehn?

Jos bifoa Jeezas mi ded, ih mi seh: “Di Gud Nyooz bowt di kingdom a hevn wahn geh preech oava di hoal werl soh dat aala di nayshan dehn ku yehr di chroot, ahn den di en wahn kohn.” (Machyu 24:14) Bot how wi wahn du dis preechin werk aal oava di werl? Wi haftu fala di egzampl weh Jeezas mi set fi wi wen ih mi deh pahn di ert.​—Look 8:1.

Wi chrai fain peepl weh dehn liv. Jeezas mi chrayn ih disaipl dehn fi preech di gud nyooz fahn hows tu hows. (Machyu 10:11-13; Aks 5:42; 20:20) Ih mi gi dehn wahn set ayrya fi goh preech eena. (Machyu 10:5, 6; 2 Korintyanz 10:13) Tudeh wi preechin werk aaganaiz di sayhn way; eech kangrigayshan ga dehn oan ayrya fi kova. Wen wi du dis, wi ‘di preech tu di peepl dehn’ jos laik weh Jeezas mi seh fi du.​—Aks 10:42.

Wi chrai fain peepl noh mata weh dehn deh. Jeezas mi preech tu peepl owt eena di poblik, laik lang di seesaid er bai wahn wel. (Maak 4:1; Jan 4:5-15) Wi fala da sayhn egzampl tudeh. Wen wi meet peepl pahn di schreet, da wahn bizniz plays, da di maakit, da wahn paak, er taak tu dehn pahn di foan, wi chrai shayr di gud nyooz fahn di Baibl wid dehn. Ahn wen da wahn gud taim fi wi nayba dehn, peepl weh wi werk wid, wi klaasmayt, er wi faamli dehn, wi preech tu dehn tu. Bikaaz aala wi di werk haad fi shayr “di Gud Nyooz,” milyanz a peepl di hyaa di chroot.​—Ifeezhanz 1:13.

Yu ku tink bowt sohnbadi weh yu wuda waahn shayr di gud nyooz bowt di Kingdom a Gaad wid? Tink bowt weh kaina fyoocha dehn ku ga bikaaz a di gud nyooz. Dis mesij ku gi da persn wahn hoap. Noh kip it tu yuself. Shayr it wid dehn wen yu geh di neks chaans!

• Wat da di “Gud Nyooz” weh Jeezas mi seh fi preech bowt?

• How Jehoava Witnisiz di fala Jeezas egzampl fi preech?

Di werd “painyaa” naamali rifaa tu wahn persn weh saach owt wahn nyoo ayrya ahn mek wahn way soh dat adaz ku fala. Jeezas da-mi wahn painyaa eena da way deh. Ih mi kohn dong pahn di ert ahn preech tu peepl ahn mek di way pasabl soh dat dehn ku geh sayv. (Machyu 20:28) Fi hihn falowaz tudeh di kapi ih egzampl ahn yooz wateva taim dehn ga fi chrayn peepl ‘fi bee fi hihn disaipl dehn.’ (Machyu 28:19, 20) Fi du dis, som a Jehoava Witnisiz staat painyaa.

Wahn painyaa da wahn ful-taim preecha. Aala Jehoava Witnisiz preech di gud nyooz. Bot, som a dehn araynj dehn skejul fi bee wahn regyula painyaa ahn spen 70 owaz di preech evri mont. Fi du dis, lata dehn du paat-taim werk. Wi aaganaizayshan pik adaz fi bee speshal painyaa. Dehnya wan spen 130 owaz er moa di preech evri mont eena wahn ayrya weh need help. Di painyaa dehn satisfai wid di baysik tingz eena laif, kaaz dehn noa Jehoava wahn gi dehn weh dehn need fi liv. (Machyu 6:31-33; 1 Timoti 6:6-8) Di wan dehn weh kyaahn bee wahn ful-taim painyaa ku bee wahn agzilari painyaa wen dehn kud. Dehn spen op tu 30 er 50 owaz di preech fi di mont. Dis gi dehn di apachooniti fi du moa eena di minischri.

Wahn painyaa preech bikaaz ih lov Gaad ahn peepl. Jos laik Jeezas, wi si dat peepl need fi noa bowt Gaad tudeh. (Maak 6:34) Bot weh wi noa fahn di Baibl ku help dehn rait now ahn gi dehn wahn hoap fi di fyoocha. Bikaaz wahn painyaa lov peepl, ih noh wahn tink haad fi yooz ih taim an enerji fi help dehn eena wahn spirichwal way. (Machyu 22:39; 1 Tesaloanyanz 2:8) Bikaaz a dis, wahn painyaa ga moa hapinis, schranga fayt, ahn wahn kloasa rilayshanship wid Gaad.​—Aks 20:35.

• How yu wuda diskraib wahn painyaa?

• Wai som a Jehoava Witnisiz painyaa ful-taim?

Ejukayshan fahn di Baibl da sohnting weh Jehoava Witnisiz di du fahn lang taim. Dehn wan weh di painyaa ful-taim ku goh da sohn speshal skool weh wahn help dehn fi ‘finish di jab weh Gaad gi dehn fi du.’​—2 Timoti 4:5.

Painyaa Servis Skool. Wen wahn regyula painyaa finish ih fos yaa a ful-taim servis, ih ku goh da dis skool. Da fi siks dayz, ahn dehn yoozhwali gat it da wahn Kingdom Haal. Di perpos a dis skool da fi help di painyaa geh kloasa tu Jehoava. Ih wahn help ahn fi du beta eena aal ayrya a di minischri, ahn fi kantinyu painyaa ahn noh giv op.

Skool fi Kingdom Ivanjelaizaz. Dis skool, weh da fi too monts, chrayn painyaaz weh ga ekspeeryens ahn weh wilin fi lef wehpaat dehn liv fi goh serv weh dehn sen dehn. Jeezas da-mi di graytis Ivanjelaiza weh mi eva liv pahn di ert, ahn dehn di fala fi hihn egzampl. Da laik dehn di seh, “Si mi ya! Sen mee!” (Isaiah 6:8; Jan 7:29) Wen wahn painyaa moov faar fahn weh ih mi liv fos, ih mait haftu laan fi liv wid di baysik tingz eena laif. Di kolcha, weda, ahn food mait bee difrent fahn weh ih mi yoostu. Ih mait eevn haftu laan wahn nyoo langwij. Bradaz ahn sistaz weh marid er singl, fahn ayj 23 tu 65 ku goh da dis skool. Dis skool wahn help dehn fi ga di Kristyan kwalitiz weh dehn wahn need eena dehn nyoo asainment. Ih wahn help dehn laan di skilz weh wahn alow Jehoava ahn di aaganaizayshan fi yooz dehn moa.

Wachtowa Baibl Skool a Gilyad. Eena Heebroo, di werd “Gilyad” meen wahn “Pail a Rak Weh Gi Wahn Witnis.” Gilyad mi fos staat eena 1943, ahn sins den moa dan 8,000 styoodents grajuayt fahn dis skool az mishineriz di witnis tu peepl “aal oava di werl”—ahn dehn di ga sohn gud rizolt! (Aks 13:47) Fi egzampl, wen di fos mishineri dehn mi reech da Peru, no kangrigayshan mi dehdeh. Now dehn ga moa dan 1,000 kangrigayshan. Ahn wen dehn mi fos gaahn da Japan, les dan ten Witnis mi dehdeh. Now dehn ga moa dan 200,000 Witnis deh. Wahn Gilyad styoodent goh da di skool fi faiv monts ahn stodi di Baibl chroo ahn chroo. Enibadi weh da wahn speshal painyaa er feel mishineri, er serkit oavaseeya, er weh werk da wahn branch aafis, ku geh wahn invitayshan fi goh da dis skool. Dis chraynin wahn help dehn fi sopoat ahn schrentn di werk weh wi di du aal oava di werl.

• Wat da di perpos a di Painyaa Servis Skool?

• Hoo aal ku goh da di Skool fi Kingdom Ivanjelaizaz?