1-3. Wat da sohn kweschan weh peepl aks bowt det, ahn how sohn rilijan ansa dehndeh kweschan?

DI BAIBL pramis wi dat wan day peepl “noh wahn ded nohmoh.” (Revilayshan 21:4) Eena Chapta 5, wi mi laan dat bikaaz a di ransom wi ku liv fareva. Bot peepl stil di ded. (Ecclesiastes 9:5) Soh wahn impoatant kweschan weh wi aks da, Weh hapm tu wi wen wi ded?

² Ih impoatant fi fain di ansa tu da kweschan, espeshali wen sombadi weh wi lov ded. Wi mait wanda: ‘Weh ih deh? Ih di sofa? Ih ku si wi? Ih ku help wi? Wi wahn eva si ahn agen?ʼ

³ Rilijan ansa dehndeh kweschan eena difrent wayz. Som a dehn teech dat if yoo da wahn gud persn, yu gwehn da hevn an if yoo da wahn bad persn, yu wahn bon op fareva eena hel. Som a dehn seh dat wen yu ded yu chaynj intu wahn spirit persn ahn liv wid yu ada famili dehn weh don ded. An adaz seh dat afta yu ded ahn Gaad don joj yu, yu wahn kohn bak tu laif wid wahn difrent badi, maybi eevn az wahn nada persn.

4. Weh moas rilijan teech bowt det?

⁴ Eevn doa moas rilijan teech sohnting difrent fahn eech ada, dehn teech di saym ting bowt peepl weh ded. Dehn teech dat wen wahn persn ded, wahn paat a da persn stil di liv sohnweh els. Yu tink dat da chroo?

WEH HAPM TU WAHN PERSN WEN IH DED?

5, 6. Weh hapm tu wi wen wi ded?

⁵ Jehoava noa weh hapm tu wi wen wi ded. Ih seh dat wen wahn persn ded, ih laif kohn tu wahn en. Det da di opozit a laif. Soh wen wahn persn ded, ih noh ga wahn spirit weh liv sohnweh els, ih noh chaynj intu wahn spirit, ih kyaahn feel eniting, an ih kyaahn memba notn.a Wen wi ded wi kyaahn si, hyaa, ner tink nohmoh.

⁶ King Salaman mi seh dat “di ded noh noa notn ataal.” Di wan dehn weh ded kyaahn shoa lov er hayt, ahn dehn ‘kyaahn werk ner plan eniting, ner ga nalij er wizdom eena di Grayv.’ (Reed Ecclesiastes 9:5, 6, 10.) Ahn da Psalm 146:4, di Baibl seh dat wen wahn persn ded, “ih stap tink.”

WEH JEEZAS SEH BOWT DET

7. Weh Jeezas mi seh bowt det?

⁷ Wen Jeezas gud fren Lazaros mi ded, Jeezas tel ih disaipl dehn: “Wi fren Lazaros gaahn sleep.” Bot Jeezas neva meen dat Lazaros mi-di res. Soh ih en op di tel dehn: “Lazaros ded.” (Jan 11:11-15) Soh Jeezas mi-di seh dat wen wahn persn ded, da jos laik ih di sleep. Ih neva seh dat Lazaros mi deh da hevn er mi deh wid ih ada famili dehn weh ded aredi. An ih neva seh dat Lazaros mi-di sofa eena hel, er dat ih mi kohn bak az wahn nada persn. No, ih neva seh eniting laik dat, kaaz tu Jeezas, da laik Lazaros mi deh eena wahn deep sleep. Ahn wen Jairos daata mi ded, Jeezas mi seh di saym ting bowt di lee gyal. Bifoa ih mi rezorek ahn, ih seh: ‘Di lee gyal noh ded; ih onli di sleep!ʼ​—Look 8:52.

8. How wee noa dat Gaad neva mek hyoomanz fi ded?

⁸ Gaad neva mek Adam ahn Eev fi ded. Ih mi mek dehn fi liv fareva wid perfek helt. Jehoava mek wi fi waahn liv fareva. (Ecclesiastes 3:11) No payrent waahn si dehn pikni geh sik ahn ded, ahn Jehoava feel di saym way bowt wee. Bot if Gaad mek wi fi liv fareva, den da wai wi ded?

DA WAI WI DED?

9. Wai di koman weh Jehoava mi giv Adam ahn Eev neva haad fi mek dehn obay?

⁹ Eena di gyaadn, Jehoava mi tel Adam: “Fahn evri chree weh deh eena di gyaadn, yu ku eet til yu satisfai. Bot, az tu di chree a di nalij a gud ahn bad, yu noh fi eet di froot, bikaaz di day yu eet it yu wahn ded fi shoar.” (Genesis 2:9, 16, 17) Da koman neva haad fi obay ataal. Jehoava mi mek Adam ahn Eev, ahn hihn mi noa weh bes fi dehn. Ih mi ga di rait fi tel dehn weh gud ahn weh bad. If dehn mi obay Gaad, dehn wuda mi shoa dat dehn rispek fi hihn atariti. Ahn dehn wuda mi shoa hihn dat dehn apreeshiayt evriting weh ih mi gi dehn.

10, 11. (a) Weh Saytan mi du fi geh Adam ahn Eev fi disobay Gaad? (b) Wai Adam ahn Eev neva ga no ekskyoos fi weh dehn mi du?

¹⁰ Adam ahn Eev mi chooz fi disobay Jehoava. Saytan mi aks Eev: “Da chroo Gaad seh yu noh fi eet fahn aala di chree eena di gyaadn?” Eev tel ahn seh: “Wi ku eet di froot dehn fahn di chree dehn eena di gyaadn. Bot Gaad mi seh dis bowt di chree weh deh eena di midl a di gyaadn: ‘Yu noh fi eet di froot, yu noh fi toch it; bikaaz di day yu eet it yu wahn ded.ʼ”​—Genesis 3:1-3.

¹¹ Den Saytan tel ahn: “Ah di tel yu, yu noh wahn ded. Bikaaz Gaad noa dat di day yu eet fan it, yu aiy dehn wahn oapm, yu wahn bee laik Gaad, ahn yu wahn noa weh gud ahn bad.” (Genesis 3:4-6) Saytan mi waahn Eev tink dat shee ku mek ih oan disizhan bowt weh gud ahn weh bad. Bot reeli, ih mi-di lai tu ahn bowt weh mi wahn hapm if shee disobay Gaad. Ih mi tel Eev dat shee noh wahn ded, soh shee eet di froot ahn shayr it wid ih hozban. Adam ahn Eev mi noa dat Jehoava mi tel dehn noh fi eet di froot. Wen dehn mi eet it, dehn chooz fi disobay wahn klayr an eezi koman. Ahn dehn mi shoa dat dehn neva rispek dehn lovin hevnli Faada. Adam ahn Eev neva ga no ekskyoos fi weh dehn mi du!

12. Wai ih soh sad dat Adam ahn Eev mi disobay Jehoava?

¹² Ih onli sad dat wi fos payrent dehn neva ga no rispek fi dehn Kriyayta! How yoo wuda feel if afta yu werk soh haad fi rayz yu son ahn yu daata, dehn ton rong ahn disobay yu ahn du di veri ting weh yu mi tel dehn noh fi du? Ih wuda brok yu haat, noh chroo?

13. Weh Jehoava mi meen wen ih seh ‘yu gwehn bak tu dosʼ?

¹³ Wen Adam ahn Eev mi disobay Gaad, dehn laas di chaans fi liv fareva. Jehoava mi tel Adam: “Fahn dos yu kohn, ahn da dos yu gwehn bak tu.” (Reed Genesis 3:19.) Soh dis meen dat afta Adam mi sin, ih ded; hihn noh egzis nohmoh. Ih neva chaynj intu wahn spirit. Ih jos gaahn bak tu di dos weh ih mi kohn fram.​—Genesis 2:7.

14. Wai wee ded?

¹⁴ If Adam ahn Eev mi obay Gaad, dehn wuda stil deh ya tudeh. Bot wen dehn mi disobay Gaad, dehn sin, ahn dis kaaz dehn fi geh oal ahn ded. Sin da laik wahn terabl siknis weh wi payrents paas aan tu wi. Aala wi baan az sinaz, ahn dat da wai wi ded. (Roamanz 5:12) Bot dat da noh di reezn wai Gaad mek hyoomanz. Hihn neva mek wi fi ded, ahn di Baibl seh dat det da wahn “enimi.”​—1 Korintyanz 15:26.

DI CHROOT BOWT DET SET WI FREE

15. How di chroot bowt det set wi free?

¹⁵ Di chroot bowt det set wi free fahn wahn lata rang teechin. Di Baibl teech wi dat peepl weh ded kyaahn feel payn ner feel sad. Wi kyaahn taak tu dehn, ahn dehn kyaahn taak tu wi. Wi kyaahn help dehn, ahn dehn kyaahn help wi. Dehn kyaahn hert wi, soh wi noh haftu frayd fi dehn. Bot, sohn rilijan teech dat afta wahn persn ded ih soal kip aan di liv, ahn dat wi ku help da persn if wi pay moni tu di prees er di paasta dehn. Bot wen wi noa di chroot bowt det, nobadi wahn ku fool wi.

16. Weh lai wahn lata rilijan teech bowt di wan dehn weh ded?

¹⁶ Saytan yooz rilijan fi lai tu wi ahn fi mek wi tink dat di wan dehn weh ded stil alaiv. Laik weh yu mi reed erliya, dehn teech dat wen wi ded, wahn paat a wi kantinyu fi liv sohnweh els. How bowt fi yoo rilijan? Da dat dehn teech yu er dehn teech yu weh di Baibl seh? Saytan yooz lai fi mek peepl jraa weh fahn Jehoava.

17. Da wahn insolt fi teech dat Jehoava bon op peepl fareva eena hel. Wai?

¹⁷ Weh wahn lata rilijan teech bowt det da wahn insolt tu Jehoava. Fi egzampl, som a dehn teech dat Gaad wahn bon op bad peepl fareva eena hel. Dis da wahn lai, ahn hihn wuda neva alow peepl fi sofa da way! (Reed 1 Jan 4:8.) How yu wuda feel bowt sombadi weh put ih pikni han eena faiya fi ponish ahn? Yu wuda tink dat da persn kruwil, noh chroo? Yu wudn waahn geh fi noa da persn, ner bee ih fren. Ahn dat da egzakli how Saytan waahn wi feel bowt Jehoava! Hihn waahn wi bileev dat Gaad taacha peepl fareva.

18. Wai wi noh fi frayd fi ded peepl?

¹⁸ Sohn rilijan teech dat wen peepl ded, dehn chaynj intu spirit. Dehn teech dat wi fi rispek an eevn frayd fi dehndeh spirit bikaaz dehn ku eeda bee wi fren er wi enimi. Lata peepl bileev da lai. Dehn frayd fi ded peepl, soh dehn wership dehn ahn chrai pleez dehn insteda Jehoava. Memba dat peepl weh ded noh noa notn, ahn dehn kyaahn feel notn. Soh wi noh need fi frayd fi dehn. Jehoava da wi Kriyayta. Hihn da di chroo Gaad, ahn da onli hihn wi fi pleez ahn wership.​—Revilayshan 4:11.

19. How wi benifit wen wi noa di chroot bowt det?

¹⁹ Wen wi noa di chroot bowt det, wi free fahn rilijos lai. Ahn dis chroot help wi fi andastan di wandaful pramis dehn fi di fyoocha, laik di rezorekshan hoap.

20. Weh wi wahn laan eena di neks chapta?

²⁰ Wahn servant a Gaad weh mi naym Joab mi aks: “If wahn man ded, ih ku liv agen?” (Job 14:14) Yu tink ih pasabl fi mek sohnbadi weh ded liv agen? Ih onli eksaitin fi reed Gaad ansa eena di Baibl. Wi wahn laan bowt it eena di neks chapta.

1-3. Da wat ga aala wi az prizna, ahn how Jehoava wahn set wi free?

IMAJIN yu gwehn da prizn fi laif fi wahn kraim weh yu neva komit. Yu noh ga no chaans fi get owt fahn deh. Yu feel laik no hoap deh bikaaz yu kyaahn du notn bowt it. Bot jos wen yu staat tu feel da way, yu fain owt bowt sombadi weh ku set yu free, an ih pramis fi help yu! How yu wuda feel?

² Aala wi da prizna, ahn det da wi maasta. Noh mata weh wi du, wi kyaahn get weh fan it. Bot Jehoava ga di powa fi set wi free fahn det. Ahn di Baibl pramis dat “di laas enimi weh Gaad wahn dischrai wahn bee det.”​—1 Korintyanz 15:26.

³ Imajin di rileef weh yu wahn feel wen det noh deh nohmoh! Jehoava noh wahn onli geh rid a det, bot ih wahn bring bak tu laif di wan dehn weh don ded. Tink bowt how yoo ku benifit fahn dis. Ih pramis dat di ded wahn liv agen. (Isaiah 26:19) Dis da weh di Baibl kaal di rezorekshan.

WEN SOMBADI WEH WI LOV DED

4. (a) Weh ku komfert wi wen wan a wi famili er fren ded? (b) Hoo da-mi som a Jeezas kloas fren dehn?

⁴ Wen wan a wi famili er kloas fren ded, wi feel laik wi kyaahn bayr di payn ahn sadnis. Wi kyaahn du notn fi bring bak da persn tu laif, soh wi feel helples. Bot di Baibl gi wi komfert. (Reed 2 Korintyanz 1:3, 4.) Mek wi luk pahn wahn egzampl weh shoa humoch Jehoava ahn Jeezas waahn rezorek wi famili ahn fren dehn weh ded. Wen Jeezas mi deh pahn di ert, ih yoostu aalwayz goh hayl Lazaros an ih sista dehn weh mi naym Mayri ahn Marta. Di chree a dehn da-mi gud fren wid Jeezas. Di Baibl seh: “Jeezas mi lov Mayri ahn Marta ahn dehn breda Lazaros.”​—Jan 11:3-6.

5, 6. (a) Weh Jeezas mi du wen ih si Lazaros famili ahn fren dehn di krai? (b) Wai ih inkorij wi fi laan how Jeezas feel bowt det?

⁵ Den wan day Lazaros mi ded. Soh Jeezas gaan fi gi Mayri ahn Marta komfert. Wen Marta hyaa dat Jeezas mi-di kohn, shee gaan fi meet ahn. Ih mi soh hapi fi si Jeezas, bot ih tel ahn: ‘Laad, if yu mi onli deh ya, mi breda neva mi wahn ded.ʼ Marta mi tink dat Jeezas mi get deh tu layt. Laytaraan, Jeezas meet op wid Mayri, ahn shee mi-di krai. Wen Jeezas si how evribadi mi-di krai, ih mi hert ahn, ahn hihn staat krai tu. (Jan 11:21, 22, 33, 35) Hihn mi feel di deep payn weh wee feel wen sombadi weh wi lov ded.

⁶ Di way Jeezas mi feel reeli inkorij wi kaaz ih teech wi dat Jeezas an ih Faada, Jehoava, hayt det. (Jan 14:9) Jehoava ga di powa fi geh rid a det fareva, an ih wahn du it soon.

“LAZAROS, KOM OWT!”

7, 8. Wai Marta neva waahn dehn moov di rak fahn fronta di toom, bot weh Jeezas mi tel dehn fi du?

⁷ Wen Jeezas get da di plays weh dehn mi put Lazaros badi, ih fain wahn big rak fronta it. Soh Jeezas seh: “Moov di rak.” Bot Marta neva waahn dehn du it kaaz da mi don foa dayz aredi dat Lazaros mi ded. (Jan 11:39) Shee neva noa weh Jeezas mi wahn du fi help Lazaros.

⁸ Den Jeezas seh: “Lazaros, kom owt!” Wel, Marta ahn Mayri kudn bileev weh dehn mi-di si. ‘Di ded man kom owt. Ih han an ih fut dehn mi rap op rong ahn rong wid sohn lang pees a klaat.ʼ (Jan 11:43, 44) Lazaros mi kohn bak tu laif! Ih mi deh bak wid ih famili ahn fren dehn agen. Dehn kuda mi hoal ahn, toch ahn, ahn taak tu ahn. Dat da-mi wahn mirakl! Jeezas mi rezorek Lazaros.

“LEE GYAL, GET OP!”

9, 10. (a) Da hoo gi Jeezas di powa fi rezorek peepl? (b) How di difrent rezorekshan dehn eena di Baibl ku inkorij wi?

⁹ Jeezas neva rezorek peepl wid ih oan powa. Bifoa ih mi rezorek Lazaros, Jeezas pray tu Jehoava, ahn Jehoava gi ahn di powa fi rezorek Lazaros. (Reed Jan 11:41, 42.) Lazaros da noh di onli persn Jeezas mi rezorek. Di Baibl tel wi bowt wahn lee gyal weh mi 12 yaaz oal weh mi sik bad. Ih pa, weh mi naym Jairos, chroa ihself da Jeezas fut ahn bayg ahn haad fi heel ih daata. Shee da-mi ih onli pikni. Wen ih mi-di taak tu Jeezas, sohn man kohn tel ahn: “Yu daata don ded, soh noh bada di teecha agen.” Bot Jeezas tel Jairos: “Noh wori, jos ga fayt ahn yu daata wahn aarait.” Den ih gaahn lang wid Jairos da ih hows. Az dehn mi-di geh kloasa tu di hows, Jeezas kuda mi si ahn hyaa peepl di moan ahn baal. Soh Jeezas tel dehn: ‘Unu stap unu naiz. Di lee gyal noh ded; ih onli di sleep.ʼ Di lee gyal ma ahn pa mosi mi-di wanda weh Jeezas mi meen. Den Jeezas aks evribadi fi goh owtsaid an ih kehr di ma ahn pa eena di room weh dehn daata mi deh. Jeezas hoal di lee gyal han ahn tel ahn seh: “Lee gyal, get op!” Imajin how di ma ahn pa mi feel wen shee get op ahn staat tu waak rong! Jeezas mi rezorek dehn lee daata. (Maak 5:22-24, 35-42; Look 8:49-56) Afta dat, tu evri taim dehn mi si di lee gyal, dehn wuda mi rimemba weh Jehoava du fi dehn chroo Jeezas.a

¹⁰ Aala di peepl weh Jeezas mi rezorek mi ded agen laytaraan. Yu tink ih neva mek sens fi rezorek dehn? No, kaaz wi ku laan fahn fi dehn stoari eena di Baibl. Dehn gi wi hoap dat Jehoava reeli waahn rezorek peepl, an ih wahn du it.

WEH WI KU LAAN FAHN DI DIFRENT REZOREKSHAN DEHN WEH MI HAPM

11. Weh Ecclesiastes 9:5 teech wi bowt Lazaros?

¹¹ Di Baibl seh playn-wan dat “di ded noh noa notn ataal.” Ahn dat da egzakli weh mi hapm tu Lazaros. (Ecclesiastes 9:5) Jos laik weh Jeezas mi seh, da mi laik Lazaros mi-di sleep. (Jan 11:11) Wen Lazaros mi deh eena di grayv, ih neva “noa notn ataal.”

12. How wi noa dat Jeezas mi rezorek Lazaros fi chroo?

¹² Lata peepl mi si wen Jeezas mi rezorek Lazaros. Eevn Jeezas enimi dehn mi noa dat hihn mi du dis mirakl. Lazaros mi alaiv, ahn dis mi proov dat di rezorekshan mi reeli hapm. (Jan 11:47) Wahn lata peepl mi gaahn vizit Lazaros tu, ahn bikaaz a dis, dehn mi staat tu bileev dat Gaad mi sen Jeezas dong ya pahn di ert. Jeezas enimi dehn neva laik dat ataal, soh dehn mi plan fi kil Jeezas ahn Lazaros.​—Jan 11:53; 12:9-11.

13. Wai wi ku bee shoar dat Jehoava wahn rezorek di ded?

¹³ Jeezas mi seh dat “aala dehn wan weh deh eena dehn grayv” wahn kohn bak tu laif. (Jan 5:28) Dis meen dat aala di wan dehn weh deh eena Jehoava memri wahn liv agen. Bot fi mek Jehoava rezorek sombadi, ih haftu rimemba evriting bowt da persn. Yu tink hihn ku du dat? Wel, bilyanz a staarz deh eena di yoonivers. Ahn di Baibl seh dat Jehoava noa di naym a evri staar. (Reed Isaiah 40:26.) If hihn ku memba di naym a aala di staar dehn, den da noh wahn prablem fi hihn memba evriting bowt aala di wan dehn weh hihn wahn rezorek. Jehoava mi mek evriting, soh wi noa dat hihn ga di powa fi bring peepl bak tu laif.

14, 15. Weh wi ku laan fahn Joab bowt di rezorekshan?

¹⁴ Joab da-mi wahn faytful man, ahn hihn mi bileev eena di rezorekshan. Ih mi aks dis kweschan: “If wahn man ded, ih ku liv agen?” Den ih tel Jehoava: “Yu wahn kaal mi, an Ah wahn ansa yu. Yu wahn lang fi di werk a yu han dehn.” Joab mi noa dat Jehoava di luk faawod tu di taim wen ih wahn rezorek di wan dehn weh ded.​—Job 14:13-15.

¹⁵ How di rezorekshan hoap mek yoo feel? Yu mait di wanda, ‘How bowt mai famili ahn fren dehn weh ded, dehn wahn kohn bak tu laif tu?ʼ Jehoava reeli waahn rezorek di wan dehn weh ded—dis gi wi lata komfert. Mek wi si weh di Baibl seh bowt hoo aal wahn kohn bak tu laif ahn wehpaat dehn wahn liv.

DEHN “WAHN YEHR FI HIHN VAIS AHN KOM OWT”

16. Weh kaina laif di wan dehn weh wahn kohn bak tu laif wahn injai pahn di ert?

¹⁶ Eena di paas, di wan dehn weh mi kohn bak tu laif mi get bak wid dehn famili ahn fren dehn rait ya pahn di ert. Dis wahn soon hapm agen, bot ih wahn bee beta. Wai? Bikaaz evribadi weh kohn bak tu laif fi liv pahn di ert wahn ga di chaans fi liv fareva ahn neva haftu ded agen. Ahn dehn wahn liv eena wahn werl weh difrent fahn weh wi di liv eena tudeh. No waar, no kraim, ahn no siknis wahn deh.

17. Hoo aal wahn kohn bak tu laif?

¹⁷ Hoo aal wahn kohn bak tu laif? Jeezas mi seh dat “aala dehn wan weh deh eena dehn grayv wahn yehr fi hihn vais ahn kom owt.” (Jan 5:28, 29) Ahn Revilayshan 20:13 seh: “Di see giv op di ded peepl weh mi een deh, ahn det ahn di Grayv mi giv op di ded peepl eena dehn.” (NW) Fi shoar, bilyanz a peepl wahn liv agen. Ahn di apasl Paal mi seh dat “wan day Gaad wahn rayz op di raichos ahn di wikid [er, “di wan dehn weh noh raichos,” NW].” (Reed Aks 24:15.) Weh dat meen?

18. Hoo da “di raichos” wan dehn weh wahn kohn bak tu laif?

¹⁸ “Di raichos wan dehn” da faytful servants a Jehoava weh mi liv bifoa Jeezas mi kohn dong pahn di ert. Peepl laik Noawa, Aybraham, Sayra, Moaziz, Root, an Ester wahn kohn bak tu laif fi liv rait ya pahn di ert. Yu ku reed bowt som a dehnya man ahn uman da Heebrooz chapta 11. How bowt faytful servants a Jehoava hoo ded eena fi wee taim? Dehn “raichos” tu, soh dehn wahn kohn bak tu laif.

19. Hoo da “di wan dehn weh noh raichos”? Weh apachooniti Jehoava wahn gi dehn?

¹⁹ “Di wan dehn weh noh raichos” da bilyanz a peepl weh neva geh fi noa Jehoava. Eevn doa dehn ded, Jehoava noh faget dehn. Ih wahn rezorek dehn, ahn dehn wahn ga di apachooniti fi laan bowt hihn ahn serv ahn.

20. Hoo noh wahn kohn bak tu laif?

²⁰ Dis noh meen dat evribadi weh mi ded wahn liv agen. Jeezas mi seh dat sohn peepl noh wahn liv agen. (Look 12:5, NW) Hoo wahn disaid if wahn persn wahn kohn bak tu laif er nat? Jehoava da di fainal Joj, bot ih gi Jeezas di atariti fi ‘joj evribadi, dehn wan weh livin ahn dehn wan weh don ded.ʼ (Aks 10:42) Hihn noh wahn bring bak tu laif enibadi weh hihn joj az wikid ahn weh noh waahn chaynj.​—Pleez goh da Noat 19 da di en a dis buk.

GAAD WAHN REZOREK SOHN PEEPL FI GOH LIV DA HEVN

21, 22. (a) Weh kaina badi di wan dehn weh gwehn da hevn wahn gat? (b) Hoo da-mi di fos persn Gaad mi rezorek fi goh liv da hevn?

²¹ Di Baibl tel wi tu dat sohn peepl gwehn liv da hevn. Di wan dehn weh Gaad rezorek fi goh liv da hevn noh wahn kohn bak az wahn hyooman, bot dehn wahn kohn bak wid wahn spirit badi.

²² Jeezas da-mi di fos persn fi geh dis kaina rezorekshan. (Jan 3:13) Chree dayz afta dehn mi kil Jeezas, Jehoava rezorek ahn. (Psalm 16:10; Aks 13:34, 35) Jeezas neva kohn bak tu laif wid wahn hyooman badi. Di apasl Peeta mi seh dat “dehn put fi hihn [Jeezas] badi tu det, bot ih mi rayz op bak eena di Spirit.” (1 Peeta 3:18) Jeezas mi kohn bak tu laif az wahn powaful spirit persn! (1 Korintyanz 15:3-6) Bot di Baibl seh dat hihn noh wahn bee di onli wan.

23, 24. Hoo da di “lee flak” weh Jeezas mi taak bowt, ahn humoch deh eena da groop?

²³ Jos bifoa Jeezas mi ded, ih mi tel ih faytful disaipl dehn: “Ah gwehn deh [hevn] goh geh wahn plays redi fi unu.” (Jan 14:2) Dis meen dat som a Jeezas falowaz gwehn liv wid hihn da hevn. Humoch a dehn gwehn deh? Jeezas mi seh dat ih wahn bee wahn “lee flak.” (Look 12:32, NW) Di apasl Jan mi menshan di egzak amonk. Ih seh: “Di Lam di stan op pahn tap a wahn mongtin [da hevn] weh dehn kaal Mongt Zaiyan. Wan honjrid ahn faati-foa towzn peepl mi-di stan op deh wid ahn.”​—Revilayshan 14:1.

²⁴ Wen di 144,000 wahn geh dehn rezorekshan? Di Baibl tel wi dat dis mi wahn staat afta Jeezas bigin fi rool da hevn. (1 Korintyanz 15:23) Wee di liv eena da taim rait now, ahn moas a di 144,000 don deh da hevn aredi. Di res a dehn weh stil deh pahn di ert rait now wahn kohn bak tu laif rait away ahn goh schrayt da hevn wen dehn ded. Bot di wan dehn weh noh deh eena da groop wahn kohn bak tu laif eena wahn Paradais rait ya pahn di ert.

25. Weh wi wahn laan bowt eena di neks chapta?

²⁵ Soon, Jehoava wahn free aala wi fahn det. Hihn wahn dischrai det fareva! (Reed Isaiah 25:8.) Bot weh di wan dehn weh gwehn da hevn wahn du deh? Di Baibl tel wi dat dehn wahn rool lang wid Jeezas eena Gaad govament da hevn. Wi wahn laan moa bowt dis govament eena di neks chapta.