Det Da Sohnting Weh Nobadi Ku Ron Weh Fram

IMAJIN yu di wach wahn moovi bowt wahn faymos singa weh yu admaiya wahn lat. Di moovi staat wid wen shee da-mi wahn lee gyal. Ih shoa how shee mi laan fi play wahn inschrument, an aala di praktis weh ih mi du. Den ih shoa ahn di sing eena kanserts, di chravl fahn konchri tu konchri, ahn di geh faymos aal oava di werl. Noh tu lang afta, doh, dehn shoa ahn eena ih oal ayj, an afta dat az di moovi di en ih ded.

Dis moovi da wahn reel-laif stoari. Noh mata if di persn da-mi wahn myoozishan, wahn saiyentis, sombadi weh intu spoats, er sombadi els weh faymos, di stoari wuda stil bee di saym. Maybi di persn mi du wahn lat, bot tink bowt humoch moa ih kuda mi du if ih neva geh oal ahn ded.

Wi mait feel sad wen wi tink bowt dis, bot dis da weh wahn hapm tu aala wi. (Ecclesiastes 9:5) Noh mata how haad wi chrai, wi wahn stil geh oal ahn ded. Noh onli dat, bot wi ku ded sodn-wan if wi geh sik er get eena wahn aksident. Laik weh di Baibl seh, wee da laik wahn ‘lee bit a steem weh yu si fi wahn lee wail, ahn den wi disapyaa.ʼ—Jaymz 4:14.

Bikaaz wi ku ded eni taim, som peepl tink, “mek wi jos eet, ahn jrink, kaa tumaaro wi wahn ded eniway”; dat da di way dehn liv dehn laif. (1 Korintyanz 15:32) Peepl liv dis way kaaz dehn noh ga no hoap fi di fyoocha. If wahn persn di fays haad taimz eena laif, ih mait staat tu wanda, ‘Wai wi deh ya?ʼ Wehpaat yu ku fain di ansa?

Wahn lata peepl ton tu saiyens fi fain di ansa. Saiyentis ahn daktaz fain tingz weh mek it pasabl fi peepl tudeh liv langa dan eena di paas. Ahn som saiyentis stil di chrai fain owt how fi mek peepl liv eevn langa dan dat. Weda dehnya saiyentis gat sokses er nat, wi stil aks wiself dehnya kweschanz: Wai wi geh oal ahn ded? Wi ga eni hoap dat det wahn geh dischrai? Eena di neks aatikl dehn, wi wahn diskos dehnya tapik an ansa dis kweschan, Wai wi deh ya?