Yu Mi Noa?

Weh aal ih mi tek fi chravl bai ship eena di paas?

EENA di apasl Paal taim dehn neva yoostu ga pasinja ship. Peepl weh mi waahn chravl wuda mi haftu aks rong if enibadi mi noa bowt wahn kaargo ship weh wilin fi kehr pasinjaz. (Aks 21:2, 3) Eevn if di ship neva mi-di goh egzakli wehpaat di pasinja mi waahn goh, hihn kuda chaynj ship wen di ship stap da wahn nada poat ahn luk fi wahn neks wan weh wuda kehr ahn kloasa tu weh ih mi waahn goh.—Aks 27:1-6.

Dehn onli kuda chravl sertn taimz a di yaa, ahn dehn neva ga wahn set skejul. Som tingz weh wuda kip di ship fahn chravl wuda bee bad weda an eevn soopastishan. Wan a di soopastishos bileef dehn da-mi if dehn mi si peesiz a wahn ship weh mi wash op pahn di shoar, dehn wudn set sayl. Wahn neks bad sain da-mi if wahn berd pich pahn di roap dehn fi di sayl a di ship ahn kroak, den dehn wuda hoal bak fahn staat dehn jerni. Di kyaptin dehn wuda tek advantij a wen di win di bloa gud fi set sayl. Wen di chravla fain wahn ship weh wuda giv ahn wahn raid, hihn wuda stan op bai di poat wid ih bag dehn ahn wayt fi di anonksment dat di ship wahn soon set sayl.

Lionel Casson, wahn man weh stodi hischri, seh: “Di siti a Roam mi aafa gud servis weh mi mek it eeziya fi di peepl geh wahn raid pahn di ship dehn widowt hasl op dehnself. Di poat da Roam mi deh da di mowt a di Tiber Riva. Kloas bai, da di tong a Ostia, dehn mi ga wahn big maakit skwyaa wid lata aafis. Som a dehnya aafis mi bilangz tu lata di ship oana dehn fahn difrent seepoats: di ship oana dehn fahn Narbonne [weh da France tudeh] mi ga wan, di ship oana dehn fahn Carthage [weh da Tunisia tudeh] mi ga wahn nada wan, . . . ahn soh aan. Enibadi weh mi waahn wahn raid pahn wahn ship mi haftu chek da di aafis dehn soh dat ih ku reech wehpaat ih waahn goh.”

Fi chravl bai ship mi eeziya fi di chravla dehn bot ih mi ga risk tu. Sevral taimz, di apasl Paal mi ekspeeryens shiprek joorin ih mishineri jerni dehn.—2 Kor. 11:25.