Wahn Disizhan Weh Evribadi Haftu Mek
Jehoava Gaad noa dat di moaral standadz weh wi chooz fi fala wahn eeda afek wi er help wi. Dat da wai hihn waahn mek wi chooz fi hihn standadz.
Jehoava waahn mek wi ga pees ahn hapinis.
“Ai, Jehoava, da yu Gaad, di Wan weh di teech yu fi yu oan gud, di Wan weh di gaid yu eena di way how yu shuda waak. If yu wuda onli pay atenshan tu mi komanment dehn! Den yu pees wuda bee laik wahn riva ahn yu raichosnis wuda bee laik di wayv dehn eena di see.”—Isaiah 48:17, 18.
Sins Gaad kriyayt wi, hihn noa wat da di bes way wi shuda liv wi laif. Hihn waahn mek wi fala fi hihn advais bikaaz da fi wi oan gud. Wi noh wahn haftu wanda bowt di chois dehn weh wi mek, bikaaz wi wahn aalwayz mek di rait disizhan. Wen wi fala Gaad komanment dehn, wi wahn ga pees ahn hapinis.
Jehoava noh aks wi fi du notn weh wi kyaahn du.
“Dis koman weh Ah di gi yu tudeh noh haad fi mek yu andastan, da noh notn weh yu kyaahn du.”—Deuteronomy 30:11.
If wi obay Gaad moaral standadz, wi mait haftu chaynj di way wi tink an ak. Bot Jehoava noh di aks wi fi du sohnting weh wi kyaahn du, bikaaz hihn noa weh wi ku du ahn kyaahn du. Az wi geh fi noa bowt Jehoava, wi wahn fain owt dat “fi hihn komanment dehn noh haad fi obay.”—1 Jan 5:3.
Jehoava pramis fi help dehn wan weh chooz fi fala ih standadz.
“Ai, Jehoava yu Gaad, di hoal aan tait tu yu rait han. Ai da di Wan weh tel yu, ‘Noh bee frayd. Ai wahn help yu.ʼ”—Isaiah 41:13.
Wi ku liv di way Gaad waahn wi liv bikaaz hihn dehdeh fi help wi. Hihn help wi chroo ih Werd, di Baibl. Ahn di Baibl da weh inkorij wi ahn gi wi hoap.
Milyanz a peepl rong di werl ga wahn hapiya laif bikaaz dehn liv akaadn tu weh di Baibl seh. Wi waahn inkorij yu fi laan moa bowt di gud advais eena di Baibl. Yu ku staat wid wahn free broashoar weh naym Injai Laif Fareva! pahn jw.org. Een deh yu wahn fain dehnya lesn:
How di Baibl Ku Mek Yu Laif Beta?
Di Baibl Gi Wi Hoap
Yoo Tink Yu Ku Chros di Baibl?
Az yu laan moa bowt Gaad Werd, yu wahn fain owt dat ih ku stil help wee tudeh; wi ku “aalwayz rilai pahn fi hihn koman dehn, now ahn fareva.” (Saam 111:8) Aala wi ga wahn chois weh wi need fi mek, an if wi fala di moaral standadz weh deh eena di Baibl, wi wahn ga di bes laif eva. Bot Gaad noh foas wi, hihn lef da disizhan op tu wee.—Deuteronomy 30:19, 20; Jashwa 24:15.