Uganu buiti le labürüdübei Matéu
17 Sisi weyu lárigiñe, aba lamudeirun Hesusu luagun aban wübü íñuti úara luma Féduru, Santiagu luma Huan le lamulen Santiagu, lun hábuguarügü hamá ñein. 2 Aba lámuñedagun larihín Hesusu ñein hagibugiñe: aba ladurangun ligibu kamá hamuga Weyu, ámiriha tuguya ladaüragun kamá hamuga leiti. 3 Arihúati giñe Moisesi luma Elíasi ayanuha luma. 4 Ábati lariñagun Féduru lun Hesusu: “Ma lubuidun awanhán lan ya, Nabureme! Anhein busén bubéi, gayaraati nácharaguagüdün ǘrüwa kianpu: aban bun, aban lun Moisesi tuma aban lun Elíasi”. 5 Sun anihagua lan Féduru ayanuha ligía ladouragun aban dúeri hau. Sódini, aba laganbún aban umalali lídangiñe dúeri ligía, ariñageina: “Anihán Niráü le hínsiñebei nun; le aubei weiri lan nugundan. Aganba huméi”. 6 Ábati hanufudedagun disipulugu dan le haganbunbalin umalali ligía ani aba habuluchagun darí ladagarun herebe múarugu. 7 Ábati layarafadun Hesusu houn, aba laguurun hawagu, ariñageina: “Sará humá. Manufudeda humá”. 8 Dan le hiñuragunbalin harihin, Hesusurügüñein hariha. 9 Lidan ararireina hamá luéigiñe wübü, aba líchuguni Hesusu gumadi le houn: “Mabahüdaha humeitia ni ka un ariha humani arufudúni le, darime lárigiñe saragüdawáadina, au le Liráü Wügüri,* lídangiñe óunweni”.
10 Ábati hálügüdüni lani disipulugu: “Ka san uagu hariñaga arufudahatiña Lilurudun Moisesi lunti lan liabin Elíasi furumiñe?”. 11 Aba lariñagun houn: “Inarüni lunti lan liabin Elíasi lunya líchuguni sun katei lidoun lilugaarun. 12 Ánheinti au, ariñagatina hun ñǘbuinhali lan Elíasi, keiti míchugun habéi fe ligía lan, aba hásurun adüga lau. Ítara luba giñe hasufuriragüdünina, au le Liráü Wügüri”. 13 Ñein híchiga disipulugu fe layanuhaña lan buga luagu Huan le Abadiseihabei.
14 Dan le hachülürünbei lidoun fulasu le ñein habéi saragu gürigia, aba liabin aban wügüri áhuduragua ligibugiñe Hesusu, ariñageina ligía lun: 15 “Nabureme, gudemehabubá lun niráü, wuribati le gádanbalin, góunwehaditi. Anihein dan léiguadun wáturugun ani anihein dan léiguadun dúnarugun. 16 Aba yebe nanügüni houn bani disipulugu, siñá hamuti areidaguagüda”. 17 Ábati lariñagun Hesusu: “Gürigiañoun ha mau! Wuriba haña, mafiñen. Halíaba san lébeda ya nan huma awandei higaburi? Barǘ huméi irahü le nun ñahoun”. 18 Ábati lébechuni Hesusu sífiri wuribati le árügüdübalin irahü ligía ani ouraméme ligía, aba láfuridun luéi, ábati lareidagun irahü. 19 Aba hayabin disipulugu álügüdei Hesusu dan le hábuguarügüñanu lubéi: “Ka san uagu siñá wabalin sífiri wuribati ligía asagara?”. 20 Ábati lóunabuniña: “Ladüga lilouguan hafiñen. Gayaraati nachoururuni hun íbini lan ñüraü lan hafiñen kei aban tila mostasa, gayaraabei lan hariñagun lun wübü le ‘Diñuba yáagiñe lun yágütoun’ ani ábame ladiñurun; úabei ni kata hásiñarun adüga”. 21* ——
22 Dan le óundaraguñu haña lubéi Galiléa, aba lariñagun Hesusu houn lani disipulugu: “Nederegerúba,* au le Liráü Wügüri, háhaburugun wügüriña 23 ani nafarúba hilagubei, lau sun lira, náguyuguagüdüwaba* lídanme lǘrüwan weyu”. Adügati lira lun habuinchun lani disipulugu lau íruni.
24 Lárigiñebei hachülürün Kapernaúmu, aba hayabin wügüriña ha aguburahabalin tiseinsuna ténpulu álügüdei Féduru: “Afayeiha lumuti san humaisturun tiseinsuna* ténpulu?”. 25 Aba lóunabun Féduru: “Anha, afayeihati” ani aba lebelurun múnadoun. Lubaragiñeti lariñagun Féduru somu katei, aba lálügüdüni Hesusu: “Kaba bóunabagüle lun álügüdahani le, Simón? Ka úmagiñe haguburahei gumadimatiña liseinsuna gumadi? Hámagiñe hasaanigu o hámagiñe terencha?”. 26 Aba lóunabun Féduru: “Hámagiñe terencha”. Ábati lariñagun Hesusu lun: “Mini lan lira, mafayeihan hamá isaanigu liseinsuna gumadi. 27 Lau sun lira, luéi wadügün lun hachugeragun wügüriña ha, beiba baranaha, ábame bachüürüni bigünwüri. Lémeti furumiñeti úduraü badigin, ábame badaaruni liyuma, badariruba aban seinsu lauti pülata* liyumulugu. Ábame banügüni lun bafayeihan dandu nuagu kei buougua”.