Uganu buiti le labürüdübei Matéu
23 Ábati lariñagun Hesusu houn saragu gürigia ha ñéinbaña, luma houn lani disipulugu: 2 “Ragǘ hamatia arufudahatiña Lilurudun Moisesi hama fariséugu lubara Moisesi lidan arufudahani. 3 Ligíati, sun le hariñagubei hun, adüga huméi, pero madüga huméi le hadügübei, ladüga ariñagatiña aban katei, hadüga amu. 4 Rútiña anügüni hǘrüti hégewagun gürigia lun hanügüni, ánheinti hagía, maweiyasuntiña ánhingichei nírügü lau lifingan* háhabu. 5 Sun burí katei le hadügübei, adüga hamuti lúnrügü harihiniña gürigia. Wéirigüda hamutu tirahüñü gafu to gaganaboun fánreinti tídangiñeti Lererun Bungiu lun hanügünu kei lúyawa uraü, adügatiña giñe lúntima migife lan taru hadaüragun. 6 Hínsiñeti houn lun hañuurun lidan burí ubaraü le buídutimaabei lidan adineruni luma lun hañuurun igibugiñoun tidan burí luban hadamuridagun huríu, 7 luma lun labusurún houn tidan burí mágidu luma lun lawarún houn ‘máisturu’. 8 Ánheinti huguya, mígira humá lun lariñawagúniwa hun ‘máisturu’, ladüga ábanrügüñein Humaisturun ani íbirigu sun huguya. 9 Ualá ni aban agúaruti lun gürigia ya ubouagu ‘núguchi’ kei ligaburi hagúarun lun Húguchi le siélubei, lugundun ábanrügüñein Húguchi: Bungiu. 10 Mígira humá giñe lun laguarúniwa hun ábuti, ladüga ábanrügüñein Hábuti, au le Kristu. 11 Lubaragiñe lira, le wéirigutimaabei hidan, lunti leseriwidun houn ha híbiri. 12 Le anaaguti lungua, lǘnabudagüdüwaba, ánheinti le ǘnabugubei, íñubei lanügǘniwa.
13 ”Fugiabugu huguya, arufudahatiña Lilurudun Moisesi hama fariséugu! Biangua tigibu huguya le! Ladüga mígiruntün lun hebelurun gürigia lidoun Arúeihani le siélubei. Mebelurun hiña, mígirun huguya lun hebelurun ha álugubaña hebelurun. 14* ——
15 ”Fugiabugu huguya, arufudahatiña Lilurudun Moisesi hama fariséugu! Biangua tigibu huguya le! Ladüga éibuga humuti sun Ubóu, hiñugua huméi burí barana áluaha ábanrügü gürigia lun hadügüni ábanme hádangiñe hánigu, danti le ibiha humaali, aba hadügün lun gadünatima lani lachüürǘn lidoun Heena* bián wéiyaasu sügǘ hau.
16 ”Fugiabugu huguya, adundehatiña marihintiña huguya le! Ladüga ariñagatün: ‘Anhein áfiñura aban gürigia tuagu ténpulu, ni kata lira; ánheinti áfiñura luagu golu le tídanbei ténpulu, anati ñein, mosu lagunfulirun lau le lariñagubei’. 17 Darugu liña hisaminan ani marihintün! Kagia gebegitimaabei? Golu, o ténpulu to adügüboun lun sagüráu lan golu? 18 Ariñagatün giñe: ‘Anhein áfiñura aban gürigia luagu latarü,* ni kata lira; ánheinti áfiñura luagu adagaragüdüni le luágubei latarü, anati ñein, mosu lagunfulirun lau le lariñagubei’. 19 Marihintiña huguya le! Kagia gebegitimaabei? Adagaragüdüni, o latarü le adügübei lun sagüráu lan adagaragüdüni? 20 Ligíati, le áfiñuruti luagu latarü, láfiñuruña giñe luagu sun katei le ligibuagubei; 21 le áfiñuruti tuagu ténpulu, láfiñuruña giñe luagu Bungiu le aganóubei tidan, 22 ani le áfiñuruti luagu sielu, láfiñuruña giñe luagu lálana Larúeihan Bungiu luma luagu le ñunbei luagu.
23 ”Fugiabugu huguya, arufudahatiña Lilurudun Moisesi hama fariséugu! Biangua tigibu huguya le! Ladüga wéiritimaati hetenirun lun lichugún lidiisin fánreinti lánina menta, eneldu luma kominu sügǘ lau hetenirun lun igaburi le lébunabei Lúrudu: irichaü, gudemehabu luma úaraguni. Lau sun mosu lan letenirún lun katei burí le, moun lumuti ligirún le líbiri. 24 Adundehatiña marihintiña huguya le! Lau sun áseiha humani minimini, hulú humuti kameyu!
25 ”Fugiabugu huguya, arufudahatiña Lilurudun Moisesi hama fariséugu! Biangua tigibu huguya le! Ladüga arumadaha humuti weru luma asiedu bóugudigiñe libiti, ánheinti múnadagiñe libiti, buin liña lau íweruni luma márügüdaguni unguaü. 26 Fariséu marihinti buguya le! Furumiñe, arumadahabéi weru luma asiedu múnadagiñe libiti, lun giñe haruma lan bóugudigiñe libiti.
27 ”Fugiabugu huguya, arufudahatiña Lilurudun Moisesi hama fariséugu! Biangua tigibu huguya le! Aban harihín kei umúahaü le sun liña labarihóun, le buiti larihíniwa bóugudigiñe libiti, lau sun lira, múnadagiñe libiti buin liña lau habu hilaaña luma sun luwuyeri ahahürühaü. 28 Ítara hiña: arufudaguatün hungua kei gürigia buítiña hagibugiñe amu, ani múnadagiñe hibiti, buin hiña lau wuribani, biangua ligía higibu.*
29 ”Fugiabugu huguya, arufudahatiña Lilurudun Moisesi hama fariséugu! Biangua tigibu huguya le! Ladüga adügagüdatün hamúaha profetagu, wéndegüda huméi hamúaha hilaaña ha meha úaraguabaña. 30 Ariñagatün: ‘Lun hamuga meha winwan wamá lidan hadaani wagüchagu, maweiyasunbadiwa hamuga meha íderaguaña lidan háfaraguniña profetagu’. 31 Lau hariñaguni lira, harufuduñein hadügawagun humá ha meha áfaragubaliña profetagu hilagubei. 32 Gumú huméi lubeiti le hagumeserubei hagüchagu.
33 ”Harasan hewe huguya le! Mesefubadün luéi haguserawagüdün ni luéi hachüürǘn lidoun Heena.* 34 Nóunahaba lubeiti profetagu, adundehatiña hama máisturugu erereha hun. Ñéinbaña hádangiñe, háfaragubaña hilagubei, dagua humañame luagu wagabu,* ha híbiri, habeichagubaña tidan burí luban hadamuridagun huríu, éibaaha humañame ha híbiri lidan ámuñegueinarügü uburugu. 35 Ítara luba hafayeirawagüdǘn hawagu gürigia buítiña ha áfarawagubaña hilagubei ya ubouagu, lúmagiñe Aweli dagá lumoun Sakaríasi le liráü Barakíasi, le meha háfarubei hilagubei tabadinagua sanduariu luma latarü. 36 Gayaraati nachoururuni hun hafayeiruba lan gürigia ha lánina dan le luagu sun katei burí le.
37 ”Herusalén, Herusalén, uburugu le ñein lubéi háfarawagua profetagu, chamuguawa ligía dübü hawagun ha ounahóubaña ñeinhin..., ma yebe liibe wéiyaasu nálugun lun nóundaraguniña bílana kei tóundaraguniña gayu tirahüñü lábugiñe tarüna! Lau sun lira, máhatün. 38 Lígiraadün Bungiu hungua ani teredera huban málouga. 39 Ladüga ariñagatina hun marihin humaadina lanme lúmagiñe guentó lun lubaruaguóun darime hariñagun ‘Biniwalá le ñǘbuinbei lidan liri Heowá!’”.*