Áfuriduni Ehiptugiñe darí furumiñeti urúei Ísüraeli

Barǘ lumutiñu Moisesi ísüraelina lídangiñe adaürǘni Ehiptu dagá luagun wübü Sinaí, ñein líchigei Bungiu lilurudun houn. Lárigiñe, aba lóunahan Moisesi 12 wügüriña aríaahei ageiraü Kanán. Gama lumoun giributiñu diisi hádangiñe lau uganu wuribati, ábati habuseerun gürigia hagiribudun Ehiptun. Ladüga lilouguan hafiñen, aba lígiruniñu Bungiu éibugañahadügü luagu 40 irumu lidan fulasu mageirawati.

Lagumuhóun, aba lanuadirún Hosué lun líchuguniñu ísüraelina lidoun ageiraü Kanán. Adügati Heowá milaguru, lun líderaguniñu lun herederun lau ageiraü. Adügati lun méibaagun lan duna Hordán, lun léiguadun lubarieirun Herikó luma lun lararamagun Weyu luagu aban weyu dayarüti. Lidan sisi irumu, gidawati ageiraü hawéi kananna.

Lúmagiñe Hosué, agumadihatiña alidihatiñu Ísüraeli luagu 356 irumu. Furendeitiwa hawagu saragu hádangiñe, kei burí Barakü, Hedeón, Hefüte, Sansón luma Samueli. Aliihatiwa giñe hawagu würiña kei burí Raabü, Débora, Haeli, Rudu, Noemí tuma Dalila. Sun le lídanbei Fánreinti ǗRÜWA susereti lidan 396 irumu.