Ánhiñuraguei duna Hordán

ARIHABÁ! Hánhiñuraguñein ísüraelina duna Hordán! Ani hagéiti duna? Ladüga lidanñanu lidaani huya, ani fiú minutu lubaragiñe, buin liña duna. Ánheinti guentó nǘdünha sun duna! Hánhiñuraguña ísüraelina luéigiñe sagoun mábeiti kei meha hadüga lidan barana Funati! Haliñoun san lidin sun duna? Ariha waméi.

Dan le lachülürün dan lun hánhiñuraguni ísüraelina duna Hordán, nihán le ladügübei Heowá lun lariñaguni Hosué houn lumutuniña: ‘Mosu hanügünu fádirigu lubagüsina daradu ábame houdin wabá wabá. Danme le hadagaragüdüni hagudi dúnarugu Hordán, ábame lararamun léibaagun duna.’

Aba lubéiti hiñuragunu fádirigu lubagüsina daradu aba hanügünu habá habá gürigia. Dan le hachülürün lubadu duna Hordán aba hebelurun dúnarugun. Hanarimeti léibaagun duna ani huliliti. Ani kei híchuguni fádirigu hagudi dúnarugu, aba lararamun léibaagun duna! Aban milaguru le! Redei laali Heowá léibaagun duna le ñübuinbei íñugiñe. Ítara liña lamabeidun lidunari Hordán.

Fádirigu ha anügübalun lubagüsina daradu sügütiñu lamidanguagiñe duna luéigiñe sagoun mábeiti. Gayarati barihiniñu lidan dibuhu. Lidan añaha lan fádirigu ñein, aba hagumeserun sun ísüraelina ánhiñuragua luéigiñe sagoun mábeiti!

Dan le hiñuguaaña súngubei, aba ladügün Heowá lun lariñagun Hosué houn 12 wügüriña héretiñu: ‘Heiba dúnarugu le ñein habéi fádirigu tau lubagüsina daradu. Budá huma 12 dübü ñéingiñe ábame híchuguni lidan fulasu le ñeinba lubéi hásügürei áriebu. Ítarati, ámuñegü, danme hálügüdünün hisaanigu ka lan mini lan dübü burí le, mosu hariñagun houn luagu aba lan lararamun léibaagun duna dan le tánhiñuragunbalin lubagüsina lidaradun Bungiu Hordán. Laritaguagüdübei dübü burí le milaguru le hun!’ Dagagüdati giñe Hosué 12 dübü lidan fulasu le ñein lubéi hararama fádirigu lidan duna.

Lagumuhóun aba lariñagun Hosué houn fádirigu ha táubaña lubagüsina daradu: ‘Furí huma lídangiñe Hordán.’ Kei háfuridun, ábaya lagumeserun duna éibaagua kéiñaha lubéi.