Katei ñǘbüriti le asagarúbei lídangiñe hitaü luma agaranihani

Katei ñǘbüriti le asagarúbei lídangiñe hitaü. Sagawati katei ñǘbüriti le, lídangiñe gádürü katei méiniti le lídanbei hitaü: glóbulos rojos, glóbulos blancos, plaquetas luma plasma. Lidan katei ñǘbüriti le asagarúbei lídangiñe glóbulos rojos anihein aban proteína gíriti hemoglobina.a Lídangiñe hemoglobina, dandu hani gürigia kei hani animaalugu, sagawati arani le burí ayusurúbei lun lagaranihoun lun mataü luma dan le weiri lan heferidirun gürigia hitaü.

Anihein giñe amu katei ñǘbüriti le asagarúbei lídangiñe plasma, aban lídangiñe lagana hitaü le wéinamutimabei ani kéiburi 90% lídangiñe plasma duna luma bandi hormonas, sales inorgánicas, enzimas luma nutrientes, kéiburi minerales luma azúcares. Anihein giñe aban lídangiñe lagana plasma adügüti lun ladurudun hitaü, gaganati giñe albúmina luma katei le ageindagubei luma sandi lidan wágubu. Ítarati, dan le haganagua wamá gürigia sanditiña, aba hariñagun surusiagu mosu lan wimirún lau gammaglobulina, aban arani gaganati katei le ageindagubei luma sandi ani sagawati lídangiñe plasma hani gürigia ha madagaradihali sandi ligía hawagu. Lídangiñe glóbulos blancos sagawati giñe amu burí katei kéiburi interferones luma interleuquinas, le burí aubei lagaranihoua lun sandi le galugurahati luma kánserü.b

Gayarati san hánharun kristiánugu lun agaranihani le ñein lumuti layusurúa katei ñǘbüriti le asagarúbei lídangiñe hitaü? Mayanuhantu Bíbülia luagu katei le, ligía mosu lubéi desidírü lan kada gürigia según lisaminan, gama lumoun lunti gabaroun wamani wóunabuba lan lun Bungiu. Añahein gürigia máhatiña lun ni aban lídangiñe katei ñǘbüriti le, lugundun saminatiña dan le lan líchugunbalin Bungiu Lúrudu houn ísüraelina, ariñaga lan houn le lan hata animaalugu ha háfarun mosu lan “háwiyuruni múarugun” (2 Lúrudu 12:22-24). Gama lumoun, añahein amu, ánhatiña lun somu lídangiñe katei ñǘbüriti ligía íbini maha hamá lun hitaü ni lun gádürü katei méiniti le asagarúbei lídangiñe, lugundun saminatiña chülǘ lan aban oura lun mama lan aban sínbolu lani libagari gürigia katei ñǘbüriti le asagarúbei lídangiñe lita.

Lubaragiñe desidírü humá, álügüdagua humá hungua: “Gunfuranda numuti san ánhana lan amahada lun sun katei ñǘbüriti le asagarúbei lídangiñe hitaü, namahaduña lan giñe lun sun arani le gaganabalin, kéiburi le ayusurúbei lun lagaranihoun lun somu sandi o lerederún aseñeihani le héreti? Gayarabei san nafuranguagüdüni lun surusia ka lan uagu nánhara o namahada lun aban o fiú lídangiñe katei ñǘbüriti le asagarúbei lídangiñe hitaü?”.

Agaranihani. Hemodilución luma labudún hitáü, ligía biama katei le wéiritimabei hayusuruni surusiagu dan le operarü hamá. Ka hemodiluciónbei? Lasagarún lídangiñe lita gürigia dan le operarua lan ani aba lamigisirún lau sueru lubá hagiribudagüdüni lidoun lúgubu. Anheinti lidan labudún hitaü yusuwati aban máhina lun labudún hitaü le awiyurubei lidan operarua lan gürigia lun larumadahoun lubá lagiribudun lidoun úgubu. Kei ámuñegueinarügü lubéi ligaburi ladügüni kada surusia katei le, mosu lálügüdüni kristiánu surusia ida lubá lan ladügüni danme le operarü lani.

Dan le lachülürün oura lun desidírü wamá luagu bián luwuyeri agaranihani le, mosu wálügüdagun woungua: “Anhein asagarúa nita lídangiñe núgubu lun lidin lidoun somu máhina o hadüraaguni léibaagun nita luagu murusun dan, lígirubadina san nisaminan le aranse naalibei según inarüni le tídanbei Bíbülia lun nasigirun arihei hitaü ligía kei nibagari ani mama lan mosu ‘lawiyurún múarugun’?” (2 Lúrudu 12:23, 24). “Darangilu luba san nisaminan anhein asagarúa lídangiñe nita mígisiwa ligíame, lárigiñe ábanya hagiribudagüdüni lidoun núgubu?” “Gunfuranda numuti san ánhana lan amahada lun agaranihani le ídanbei layusurúa nita, namahaduña lan giñe lun ladügǘn egüsámini lau nita, hemodiálisis luma layusurún aban máhina le adügüti tuadigimari anigi lidan operarua lan gürigia?”

Kada kristiánu lunti desidírü lan ida luba lan lahandilihoun lita dan le operarua lan. Ligíameme giñe asuseredubei dan le hadügün egüsámini lánina hitaü luma agaranihani le ídanbei lasagarúa lídangiñe lita gürigia lárigiñe ábaya hagiribudagüdüni lidoun lúgubu lárigiñe lamigisirún o larumadahoun.