Ganigiti meha Hoyadá

Atalía meha tíribei aban tisaani Hesawéli ani wéiriti meha turiban kei túguchu. Maríeitu luma lurúeite Hudá. Dan le lóunwenbei tani weiriei, aba larúeihan tisaani. Lárigiñebei lounwen tisaani, adügaguatu Atalía tungua urúeime Hudá. Hóuchatu táfaraguniña sun ha gayaraabei harúeihan teweñegua. Íbini tibañan! Hanufudetiña meha sun gürigia tuéi.

Dandu Hoyadá, fádiri le íñutimabei, kei Hosewa to lani weiriou, subudi hamuti meha sun wuribani le tadaagubei Atalía. Ru hamuti habagari lidoun denchaü lun haramudun aban hádangiñe tibañan Atalía, aban irahü figigili gíriti Hoasi. Ténpulurugu laweirida.

Dan le sédühali irumu lau Hoasi, óundaraguagüda lumutiña Hoyadá hábutigu óunigihatiña hama lewitagu, lariñaga houn: “Góunigi huméi tubenari ténpulu, mígira humá lun lebelurun ni aban ñeinhin”. Aba líchuguni Hoyadá ridi lábulugu Hoasi lun ligía lan urúei Hudá. Ábati hagúarahan lílana Hudá: “Gabagarilá urúei!”.

Dan taganbunbalin urúei Atalía hareinchun gürigia, aba téibaagun ténpulurugun. Dan tarihinbalin iseri urúei, aba tagúaragun: “Garabaguaadün nuagun! Garabaguaadün nuagun!”. Aba hárügüdünu hábutigu óunigihatiña urúei wuribatu to, aba hasagarunu bóugudin, ábati háfarunu hilagubei. Kei meha furendeihaña lan ísüraelina bandi katei wuribati túmagiñe Atalía, kaba méhati adügǘwa?

Íderagua lumutiña Hoyadá ísüraelina adüga aban daradu luma Heowá. Lidan daradu ligía, füramasetiña lun Bungiu lúnrügüba lan háhuduragua. Adügati Hoyadá lun tagünrinchawagun litenpulun Baali hama sun guáriua. Anúadirati fádirigu hama lewitagu lun hawadigimaridun tidan ténpulu lunya háhuduragun gürigia ñein. Ruti hóuniri tubenari ténpulu lun mebelurun hamá gürigia ha marumantiña ñeinhin. Ábati lanügüni Hoyadá hama hábutigu óunigihatiña Hoasi añuura luagu lálana arúeihani tidan luban urúei. Ma meha lueirin hagundan lílana Hudá! Gayaraahali meha heseriwidun lun Heowá, séfuñu luéi turiban Atalía luma áhuduraguni lun Baali. Ganigiti meha Hoyadá, adián? Ariha bumuti san gibe hamá gürigia líderagun?