Sefu tumutiña Esütérü huríu tíledigu

Aban meha nibureintu huríu Esütérü to awinwanduboun lidan uburugu pérüsiana le gíribei Susa. Lasagarun meha Nabukodonosoru tiduheñu Herusaléngiñe bandi irumu lubaragiñe. Marüdokéu agüriahabarun, tipürimun le eseriwidubei lun Asueru, le lurúeite Pérüsia.

Busenti meha urúei Asueru aban würi lun tuguya lan iseri urúei. Barǘ hamutiña lubúeingu Asueru würiña hátima magadiñebaña lidan sun ageiraü lun, Esütérü haganagua. Hádangiñe sun würiña hagía, anúadira lumutu urúei Asueru Esütérü lun tuguya lan urúei. Ariñagati Marüdokéu tun lun mariñagun tani ni ka un huríu lan tuguya.

Aban meha wügüri barügua tungua gíriti Amán ábutibei houn sun gumadimatiña. Busenti meha lun habuluchagun sun gürigia ligibugiñe. Kei meha maha lubéi Marüdokéu ladügüni lira, aba lagañidun Amán darí lun busén lan láfaruni Marüdokéu hilagubei. Dan lasubudirunbalin Amán huríu lan Marüdokéu, aba laransehan lun háfarawagun sun huríu ha lídanbaña ageiraü. Ariñagati lun urúei: “Mabuiduntiña huríu; mosu lagumuchúniwa hau”. Lariñagati Asueru lun: “Adügabéi le basaminarubei mégeiwa lan”. Aba líchugun ubafu lun lun ladügün aban lúrudu. Lidan lúrudu ligía, ariñawagúati houn lílana fulasu lun háfaraguniña sun huríu weyu 13 lidan hati le gíribei Adarü. Aríagu liña meha Heowá lun sun le asuseredubei.

Ibidiñeti meha luáguti lúrudu ligía tun Esütérü. Ligía lóunahanbei Marüdokéu aban kopia tun, ariñageina: “Beiba ayanuha luma urúei”. Tariñaga Esütérü lun: “Sun le ñǘdünti arihei urúei, afarúati hilagubei anhein mama lubéi urúei amisurahabalin. Darandi weyu guenlé lúmagiñe mamisurahan lánina urúei! Íbini ítara, nídiba. Anhein liñura badun lánina agumadihani nuagun, nasigiruba abagarida. Anhein madügün lan, nóunweba”.

Ñǘdüntu Esütérü lidoun tibürürün luban urúei. Dan larihinbarun urúei, aba liñuruni badun lánina agumadihani tuagun. Ábati tidin lun, aba lálügüdünu: “Ka babusenrubei nadügün buagu, Esütérü?”. Tariñaga lun: “Busentina namisurahanün lau sun Amán lidoun adineruni le lunbei nadügüni”. Lidan adineruni, amisurahaya tumutiña Esütérü lidoun aban libiaman adineruni. Lidan libiaman adineruni ligía, ábaya lálügüdünu urúei: “Ka babusenrubei nadügün buagu?”. Tariñaga lun: “Busenti aban gürigia láfarunina hilagubei hau sun nirasan. Adügabá fulesei woun, sefubáwa luéi”. Ábati lálügüdahan urúei: “Ka busenbei láfarunibu hilagubei?”. Tariñaga lun: “Amán, eyeri wuribati le!”. Wéiriti ligañi Asueru darí lun ladügün lun lafarún Amán ouraméme ligía.

Úati meha ni aban gürigia gayaraati ladügün lun magunfulirúniwa lan lúrudu le ladügübei Amán, ni íbini urúei. Ligía líchugunbalin urúei Asueru Marüdokéu hábutime gumadimatiña, ábati líchugun ubafu lun lun ladügün aban iseri lúrudu. Adügati Marüdokéu amu lúrudu le ígirubei lun hageindagun huríu haweigiñegua danme labürühóun hawagun. Lidan weyu 13 lidan hati Adarü, ageindaguatiña huríu hama háganiñu ani gañei hamutiña. Lúmagiñe meha dan ligía, efeduha hamuti huríu agañeiruni ligía sagü irumu.