Lanügǘn Hesusu adaürǘwa

Éibugati Hesusu hama apostolugu lubadugiñe duna Sedurón darí hachülürün luagun wübü Oliwu. Lárigiñehali amidi áriebu ani haruniti hati. Dan hachülürünbei lidoun aban fuluri-agei gíriti Hetüsemaní, aba lariñagun Hesusu houn: “Redei humá agagudúañu ya”. Ábati lebelurun Hesusu murusunraü lidoun fuluri-agei, aba láhuduragun. Lau saragu idiheri lafurieida lun Heowá, lariñaga: “Adügüwalá le babusenrubei”. Ábati lóunahan Heowá aban ánheli íchiga erei lun. Dan lagiribudunbei Hesusu le ñeinhin habéi ǘrüwa hádangiñe lani apostolugu, aba ladariruniña arumuga. Lariñaga houn: “Agagudúañu humá! Mama lóurate arumuguni le! Chülühali dan lun nederegerúniwa houn náganiñu”.

Málüti lárigiñe, ligía lachülürün Húdasi hama bandi gürigia tau eféin luma wewe. Subudi lumuti meha halíaba lan ladarirei Hesusu ladüga héchuti meha ñüdün hama lidoun fuluri-agei ligía. Ariñaga laali meha Húdasi houn súdaragu ida luba lan larufuduni Hesusu houn. Aba lidin lumoun Hesusu ariñaga lun: “Buiti binaafin, Máisturu”. Ábati lachuuruni. Lariñaga Hesusu lun: “Húdasi, lau san aban chuuti balugurana?”.

Aba lidin Hesusu hagibugiñoun gürigia hagía, ábati lálügüdüniña: “Ka háluahabei?”. Hariñaga lun: “Hesusu le Nasarétüna”. Dan lariñagunbei houn: “Au háluahabei”. Aba houdin hárigoun, ábati héiguadun. Ábaya lálügüdüniña: “Ka háluahabei?”. Ábayati hariñagun lun: “Hesusu le Nasarétüna”. Lariñaga Hesusu houn: “Ariñagaadina hun au lan. Ánhaña wügüriña ha, ígira humaña lun houdin”.

Dan líchugunbei Féduru fe luagu le asuseredubei, aba lasagarun aban eféin, ábati láchuguni larigei Maluku, le lumusun fádiri le íñutimabei. Aba laguuruni Hesusu larigei musu ligía, ábati lareidagun. Lariñaga lun Féduru: “Ruboun befeinte tárigoun. Ánhabu áfaraha tau eféin, tauba eféin bafarúa”. Aba hárügüdüni súdaragu Hesusu, güragua haméi lúhabu, ánhañati apostolugu, aba hanurun. Barǘ hamuti gürigia Hesusu lun Anasi, le hábuti fádirigu. Lárigiñe lálügüdaguni Anasi Hesusu, aba lóunahani lúbiñoun Gáifasi, Fádiri le íñutimabei. Ka asuseredubei houn apostolugu?